៣. ឱវាទវគ្គ, ៣-៤. ភិក្ខុនុបស្សយ, អាមិស សិក្ខាបុច្ឆា

បុច្ឆា – ភិក្ខុនុបស្សយំ អាវុសោ ឧបសង្កមិត្វា ភិក្ខុនិយោ ឱវទន្តស្សច អាមិសហេតុ ថេរា ភិក្ខូ ភិក្ខុនិយោ ឱវទន្តីតិ ភណន្តស្សច បាចិត្តិយំ ភគវតា កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – ភិក្ខុនុបស្សយំ ឧបសង្កមិត្វា ភិក្ខុនិយោ ឱវទន្តស្ស បាចិត្តិយំ ភន្តេ សក្កេសុ ឆព្ពគ្គិយេ ភិក្ខូ អារព្ភ បញ្ញត្តំ, ឆព្ពគ្គិយា ភន្តេ ភិក្ខូ ភិក្ខុនុបស្សយំ ឧបសង្កមិត្វា ភិក្ខុនិយោ ឱវទិំសុ, អាមិសហេតុ ថេរា ភិក្ខូ ភិក្ខុនិយោ ឱវទន្តីតិ ភណន្តស្ស បាចិត្តិយំ សាវត្ថិយំ ឆព្ពគ្គិយេ ភិក្ខូ អារព្ភ បញ្ញត្តំ, ឆព្ពគ្គិយា ភន្តេ ភិក្ខូ អាមិសហេតុ ថេរា ភិក្ខូ ភិក្ខុនិយោ ឱវទន្តីតិ ភណិំសុ, តស្មិំ ភន្តេ វត្ថុស្មិំ បញ្ញត្តំ.