២. ភូតគាមវគ្គ, ៥. ទុតិយ សេនាសន សិក្ខាបុច្ឆា

បុច្ឆា – សង្ឃិកេ អាវុសោ វិហារេ សេយ្យំ សន្ថរិត្វា អនុទ្ធរិត្វា អនាបុច្ឆា បក្កមន្តស្ស បាចិត្តិយំ កត្ថ បញ្ញត្តំ, កំ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – សាវត្ថិយំ ភន្តេ សត្តរសវគ្គិយេ ភិក្ខូ អារព្ភ បញ្ញត្តំ, សត្តរសវគ្គិយា ភន្តេ ភិក្ខូ សង្ឃិកេ វិហារេ សេយ្យំ សន្ថរិត្វា អនុទ្ធរិត្វា អនាបុច្ឆា បក្កមិំសុ, តស្មិំ ភន្តេ វត្ថុស្មិំ បញ្ញត្តំ.

បុច្ឆា – កស្ស អាវុសោ វចនំ.

វិស្សជ្ជនា – ភគវតា ភន្តេ វចនំ អរហតោ សម្មាសម្ពុទ្ធស្ស.

បុច្ឆា – កេនាវុសោ អាភតំ.

វិស្សជ្ជនា – បរម្បរាយ ភន្តេ អាភតំ.

បុច្ឆា – អត្ថិ នុខោ អាវុសោ ឯត្ថ កោចិបិ វិរទ្ធទោសោ.

វិស្សជ្ជនា – នត្ថិ ភន្តេ.

សង្ឃស្ស ញាបនំ

សុណាតុ មេ ភន្តេ សង្ឃោ, អហំ ភន្តេ អាយស្មន្តំ វិចិត្តសារាភិវំសំ ឥមេសំ បន្នរសន្នំ សិក្ខាបទានំ និទានាទីនិ បុច្ឆិតព្ពានិ អនេកានិ ឋានានិ បុច្ឆិំ, សោ ច បុដ្ឋោ បុដ្ឋោ វិស្សជ្ជេតិ, ឥតិ ហិទំ ភន្តេ និម្មលំ សុបរិសុទ្ធំ តស្សេវ ភគវតោ វចនំ អរហតោ សម្មាសម្ពុទ្ធស្ស, តស្មា យថាបុរេ មហាកស្សបាទយោ មហាថេរវរា បោរាណសំគីតិការា ព្រហ្មចរិយស្ស ចិរដ្ឋិតិយា ពហុជនហិតាយ ពហុជនសុខាយ លោនុកម្បាយ អត្ថាយ ហិតាយ សុខាយ ទេវមនុស្សានំ ធម្មវិនយំ សំគាយិំសុចេវ អនុសំគាយិំសុច, ឯវមេវ មយម្បិ ទានិ ឆដ្ឋសំគីតិមហាធម្មសភា បរិយាបន្នា យថានុប្បដ្ឋានតោ បដ្ឋាយ ឥមានិ សិក្ខាបទានិ ឯកតោ គណសជ្ឈាយំ កត្វា សំគាយេយ្យាម.