១. មុសាវាទវគ្គោ ៥. សហសេយ្យ សិក្ខាបុច្ឆា

បុច្ឆា – អនុបសម្បន្នេន អាវុសោ ឧត្តរិទិរត្តតិរត្តំ សហសេយ្យំ កប្បេន្តស្ស បាចិត្តិយំ កត្ថ បញ្ញត្តំ, កំអារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – អាឡវិយំ ភន្តេ បញ្ញត្តំ, សម្ពហុលេ ភិក្ខូ អារព្ភ បញ្ញត្តំ, សម្ពហុលា ភន្តេ ភិក្ខូ អនុបសម្បន្នេន សហសេយ្យំ កប្បេសុំ, តស្មិំ ភន្តេ វត្ថុស្មិំ បញ្ញត្តំ.

បុច្ឆា – កេសំ អាវុសោ ឯត្ថ អនុបសម្បន្នេន សហសេយ្យំ កប្បេន្តានម្បិ អនាបត្តិ ហោតិ.

វិស្សជ្ជនា – ឯកាទសន្នំ ភន្តេ បុគ្គលានំ អនុបសម្បន្នេន សហសេយ្យំ កប្បេន្តានំ អនាបត្តិ, ទ្វេតិស្សោ រត្តិយោ វសតី, ឩនកទ្វេ តិស្សោ រត្តិយោ វសតិ, ទ្វេរត្តិយោ វសិត្វា តតិយាយរត្តិយា បុរារុណា និក្ខមិត្វា បុន វសតិ, សព្ពច្ឆន្នេ សព្ពអបរិច្ឆន្នេ, សព្ពបរិច្ឆន្នេ សព្ពអច្ឆន្នេ, យេភុយ្យេន អច្ឆន្នេ យេភុយ្យេន អបរិច្ឆន្នេ, អនុបសម្បន្នេ និបន្នេ ភិក្ខុ និសីទតិ, ភិក្ខុនិបន្នេ អនុបសម្បន្នោ និសីទតិ, ឧភោវា និសីទន្តិ, ឧម្មត្តកស្ស, អាទិកម្មិកស្ស, ឥមេសំខោ ភន្តេ ឯកាទសន្នំ បុគ្គលានំ អនុបសម្បន្នេន សហសេយ្យំ កប្បេន្តានំ អនាបត្តិ.