៣. បត្តវគ្គ, ៧. មហាបេសការ សិក្ខាបុច្ឆា

បុច្ឆា – បុព្ពេ អប្បវារិតស្ស អាវុសោ អញ្ញាតកស្ស គហបតិកស្ស តន្តវាយេ ឧបសង្កមិត្វា ចីវរេ វិកប្បំ អាបជ្ជន្តស្ស និស្សគ្គិយំ បាចិត្តិយំ កត្ថ បញ្ញត្តំ.

វិស្សជ្ជនា – សាវត្ថិ យំ ភន្តេ បញ្ញត្តំ.

បុច្ឆា – កំ អាវុសោ អារព្ភ កិស្មិំ វត្ថុស្មិំ បញ្ញត្តំ.

វិស្សជ្ជនា – អាយស្មន្តំ ភន្តេ ឧបនន្ទំ សក្យបុត្តំ អារព្ភ បញ្ញត្តំ, អាយស្មា ភន្តេ ឧបនន្ទោ សក្យបុត្តោ បុព្ពេ អប្បវារិតោ អញ្ញាតកស្ស គហបតិកស្ស តន្តវាយេ ឧបសង្កមិត្វា ចីវរេ វិកប្បំ អាបជ្ជិ, តស្មិំ ភន្តេ វត្ថុស្មិំ បញ្ញត្តំ.