ឱបម្មសំយុត្ត

នខសិខសុត្ត

បុច្ឆា – ឱបម្មសំយុត្តេ អាវុសោ បោរាណកេហិ ធម្មសំគាហកមហាថេរេហិ សំគីតំ នខសិខសុត្តំ ភគវតា កត្ថ កំ អារព្ភ កថញ្ច ភាសិតំ.

វិស្សជ្ជនា – សាវត្ថិយំ ភន្តេ សម្ពហុលេ ភិក្ខូ អារព្ភ ‘‘តំ កិំ មញ្ញថ ភិក្ខវេ, កតមំ នុ ខោ ពហុតរំ, យោ ចាយំ មយា បរិត្តោ នខសិខាយំ បំសុ អារោបិតោ, យា ចាយំ មហាបថវី’’តិ ឯវមាទិនា ភគវតា ភាសិតំ.

តំ កិំ មញ្ញថ ភិក្ខវេ, កតមំ នុ ខោ ពហុតរំ.

តស្មាតិហ ភិក្ខវេ ឯវំ សិក្ខិតព្ពំ.

អាណិសុត្ត

បុច្ឆា – តត្ថេវ អាវុសោ បោរាណកេហិ ធម្មសំគាហកមហាថេរេហិ សំគីតំ អាណិសុត្តំ ភគវតា កត្ថ កំ អារព្ភ កថញ្ច ភាសិតំ.

វិស្សជ្ជនា – សាវត្ថិយំយេវ ភន្តេ សម្ពហុលេ ភិក្ខូ អារព្ភ ‘‘ភូតបុព្ពំ ភិក្ខវេ ទសារហានំ អានកោ នាម មុទិង្គោ អហោសិ, តស្ស ទសារហា អានកេ ឃដិតេ អញ្ញំ អាណិំ ឱទហិំសុ, អហុ ខោ សោ ភិក្ខវេ សមយោ យំ អានកស្ស មុទិង្គស្ស បោរាណំ បោក្ខរផលកំ អន្តរធាយិ, អាណិសង្ឃាដោវ អវសិស្សី’’តិ ឯវមាទិនា ភគវតា ភាសិតំ.