ព្រាហ្មណសំយុត្ត

ធនញ្ជានីសុត្ត

បុច្ឆា – ព្រាហ្មណសំយុត្តេ អាវុសោ បឋមំ សំគីតំ ធនញ្ជានីសុត្តំ ភគវតា កត្ថ កំ អារព្ភ កិស្មិំ វត្ថុស្មិំ កថញ្ច ភាសិតំ.

វិស្សជ្ជនា – រាជគហេ ភន្តេ ភារទ្វាជគោត្តំ ព្រាហ្មណំ អារព្ភ ភាសិតំ. ភារទ្វាជគោត្តោ ភន្តេ ព្រាហ្មណោ ភគវន្តំ ឧបសង្កមិត្វា គាថាយ អជ្ឈភាសិ.

‘‘កិំ សុ ឆេត្វា សុខំ សេតិ,

កិំ សុ ឆេត្វា ន សោចតិ;

កិស្សស្សុ ឯកធម្មស្ស,

វធំ រោចេសិ គោតមា’’តិ–

តស្មិំ ភន្តេ វត្ថុស្មិំ–

‘‘កោធំ ឆេត្វា សុខំ សេតិ;

កោធំ ឆេត្វា ន សោចតិ;

កោធស្ស វិសមូលស្ស,

មធុរគ្គស្ស ព្រាហ្មណ;

វធំ អរិយា បសំសន្តិ,

តញ្ហិ ឆេត្វា ន សោចតី’’តិ;

ឯវំ ខោ ភន្តេ ភគវតា ភាសិតំ.

កិំ សុ ឆេត្វា សុខំសេតិ, កិំ សុ ឆេត្វា ន សោចតិ;

កិស្សស្សុ ឯកធម្មស្ស, វធំ រោចេសិ គោតម–

បុច្ឆា – ឥមញ្ច បនាវុសោ ធម្មទេសនំ សុត្វា ភារទ្វាជគោត្តោ ព្រាហ្មណោ ឥមស្មិំ ធម្មវិនយេ បសន្នោ កីទិសំ បសន្នាការមកាសិ, កីវត្តកញ្ច អត្ថំ សម្បាទេសិ.

វិស្សជ្ជនា – ឥមញ្ច បន ភន្តេ ធម្មទេសនំ សុត្វា ភារទ្វាជគោត្តោ ព្រាហ្មណោ ‘‘អភិក្កន្តំ ភោ គោតម, អភិក្កន្តំ ភោ គោតម, សេយ្យថាបិ ភោ គោតម និក្កុជ្ជិតំ វា ឧក្កុជ្ជេយ្យ, បដិច្ឆន្នំ វា វិវរេយ្យ, មូឡ្ហស្ស វា មគ្គំ អាចិក្ខេយ្យ, អន្ធការេ វា តេលបជ្ជោតំ ធារេយ្យ ចក្ខុមន្តោ រូបានិ ទក្ខន្តី’’តិ ឯវមាទិនា ភន្តេ ឥមស្មិំ ធម្មវិនយេ បសន្នោ បសន្នាការមកាសិ. ឥមញ្ច បន ភន្តេ ធម្មទេសនំ សុត្វា ភារទ្វាជគោត្តោ ព្រាហ្មណោ ភគវតោ សន្តិកេ បព្ពជ្ជំ ឧបសម្បទំ យាចិត្វា អចិរូបសម្បន្នោ យាវ អរហត្តំ សម្បាទេសិ.

អក្កោសសុត្ត

បុច្ឆា – អក្កោសកភារទ្វាជសុត្តំ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ កថញ្ច ភាសិតំ.

វិស្សជ្ជនា – រាជគហេ ភន្តេ អក្កោសកភារទ្វាជំ ព្រាហ្មណំ អារព្ភ ភាសិតំ. អក្កោសកភារទ្វាជោ ភន្តេ ព្រាហ្មណោ ភគវន្តំ ឧបសង្កមិត្វា អសព្ភាហិ ផរុសាហិ វាចាហិ ភគវន្តំ អក្កោសតិ បរិភាសតិ. តស្មិំ ភន្តេ វត្ថុស្មិំ ‘‘តំ កិំ មញ្ញសិ ព្រាហ្មណ, អបិ នុខោ តេ អាគច្ឆន្តិ មិត្តាមច្ចា ញាតិសាលោហិតា អតិតិយោ’’តិ ឯវមាទិនា ភន្តេ ភគវតា ភាសិតំ.

អក្កោធស្ស កុតោ កោធោ,

ទន្តស្ស សមជីវិនោ;

សម្មទញ្ញា វិមុត្តស្ស,

ឧបសន្តស្ស តាទិនោ.

តស្សេវ តេន បាបិយោ,

យោ កុទ្ធំ បដិកុជ្ឈតិ;

កុទ្ធំ អប្បដិកុជ្ឈន្តោ,

សង្គាមំ ជេតិ ទុជ្ជយំ.

ឧភិន្នមត្ថំ ចរតិ,

អត្តនោ ច បរស្ស ច;

បរំ សង្កុបិតំ ញត្វា,

យោ សតោ ឧបសម្មតិ.

ឧភិន្នំ តិកិច្ឆន្តានំ,

អត្តនោ ច បរស្ស ច;

ជនា មញ្ញន្តិ ពាលោតិ,

យេ ធម្មស្ស អកោវិទា.

បុច្ឆា – ឥមញ្ច បនាវុសោ ធម្មទេសនំ សុត្វា អក្កោសកភារទ្វាជោ ព្រាហ្មណោ ឥមស្មិំ ធម្មវិនយេ បសន្នោ កីទិសំ បសន្នាការមកាសិ. កីវត្តកញ្ច អត្ថំ សម្បាទេសិ.

វិស្សជ្ជនា – ឥមញ្ច បន ភន្តេ ធម្មទេសនំ សុត្វា អក្កោសកភារទ្វាជោ ព្រាហ្មណោ ‘‘អភិក្កន្តំ ភោ គោតម, អភិក្កន្តំ ភោ គោតមា’’តិ ឯវមាទិនា ឥមស្មិំ ធម្មវិនយេ បសន្នោ បសន្នាការមកាសិ. យាវ អរហត្តា ច បន មហន្តំ អត្ថំ សម្បាទេសិ.

ពហុធីតរសុត្ត

បុច្ឆា – តេនាវុសោ ភគវតា ជានតា…បេ… សម្មាសម្ពុទ្ធេន ព្រាហ្មណសំយុត្តេ ពហុធីតរសុត្តំ កត្ថ កំ អារព្ភ កិស្មិំ វត្ថុស្មិំ កថញ្ច ភាសិតំ.

វិស្សជ្ជនា – កោសលេសុ ភន្តេ អញ្ញតរស្មិំ វនសណ្ឌេ អញ្ញតរំ ភារទ្វាជគោត្តំ ព្រាហ្មណំ អារព្ភ ភាសិតំ. អញ្ញតរោ ភន្តេ ភារទ្វាជគោត្តោ ព្រាហ្មណោ គោណេ នដ្ឋេ បរិយេសន្តោ ភគវតោ សន្តិកេ ឥមា គាថាយោ អភាសិ.

‘‘ន ហិ នូនិមស្ស សមណស្ស, ពលីពទ្ទា ចតុទ្ទស;

អជ្ជសដ្ឋិំ ន ទិស្សន្តិ, តេនាយំ សមណោ សុខី;

ន ហិ នូនិមស្ស សមណស្ស, តិលាខេត្តស្មិ បាបកា;

ឯកបណ្ណា ទុបណ្ណា ច, តេនាយំ សមណោ សុខី.

(បេយ្យាល)

ន ហិ នូនិមស្ស សមណស្ស, បច្ចូសម្ហិ ឥណាយិកា;

ទេថ ទេថាតិ ចោទេន្តិ, តេនាយំ សមណោ សុខី’’តិ.

តស្មិំ ភន្តេ វត្ថុស្មិំ–

ន ហិ មយ្ហំ ព្រាហ្មណ, ពលីពទ្ទា ចតុទ្ទស;

អជ្ជសដ្ឋិំ ន ទិស្សន្តិ, តេនាហំ ព្រាហ្មណា សុខី;

ន ហិ មយ្ហំ ព្រាហ្មណ, តិលាខេត្តស្មិ បាបកា;

ឯកបណ្ណា ទុបណ្ណា ច, តេនាហំ ព្រាហ្មណា សុខី.

(បេយ្យាល)

ន ហិ មយ្ហំ ព្រាហ្មណ, បច្ចូសម្ហិ ឥណាយិកា;

ទេថ ទេថាតិ ចោទេន្តិ, តេនាហំ ព្រាហ្មណា សុខីតិ.

ឯវំ ខោ ភន្តេ ភគវតា ភាសិតំ.

(១)

ន ហិ នូនិមស្ស សមណស្ស, ពលីពទ្ទា ចតុទ្ទស;

អជ្ជសដ្ឋិំ ន ទិស្សន្តិ, តេនាហំ សមណោ សុខី.

(២)

ន ហិ នូនិមស្ស សមណស្ស, តិលាខេត្តស្មិ បាបកា;

ឯកបណ្ណា ទុបណ្ណា ច, តេនាយំ សមណោ សុខី.

(៣)

ន ហិ នូនិមស្ស សមណស្ស, តុច្ឆកោដ្ឋស្មិ មូសិកា;

ឧស្សោឡ្ហិកាយ នច្ចន្តិ, តេនាយំ សមណោ សុខី.

(៤)

ន ហិ នូនិមស្ស សមណស្ស, សន្ថារោ សត្តមាសិកោ;

ឧប្បាដកេហិ សញ្ឆន្នោ, តេនាយំ សមណោ សុខី.

(៥)

ន ហិ នូនិមស្ស សមណស្ស, វិធវា សត្ត ធីតរោ;

ឯកបុត្តា ទុបុត្តា ច, តេនាយំ សមណោ សុខី.

(៦)

ន ហិ នូនិមស្ស សមណស្ស, បិង្គលា តិលកាហតា;

សោត្តំ បាទេន ពោធេតិ, តេនាយំ សមណោ សុខី.

(៧)

ន ហិ នូនិមស្ស សមណស្ស, បច្ចូសមិ ឥណាយិកា;

ទេថ ទេថាតិ ចោទេន្តិ, តេនាយំ សមណោ សុខី.

(១)

ន ហិ មយ្ហំ ព្រាហ្មណ, ពលីពទ្ទា ចតុទ្ទស;

អជ្ជសដ្ឋិំ ន ទិស្សន្តិ, តេនាហំ ព្រាហ្មណា សុខី.

(២)

ន ហិ មយ្ហំ ព្រាហ្មណ, តិលាខេត្តស្មិ បាបកា;

ឯកបណ្ណា ទុបណ្ណា ច, តេនាហំ ព្រាហ្មណា សុខី.

(៣)

ន ហិ មយ្ហំ ព្រាហ្មណ, តុច្ឆកោដ្ឋស្មិ មូសិកា;

ឧស្សោឡ្ហីកាយ នច្ចន្តិ, តេនាហំ ព្រាហ្មណា សុខី.

(៤)

ន ហិ មយ្ហំ ព្រាហ្មណ, សន្ថារោ សត្តមាសិកោ;

ឧប្បាដកេហិ សញ្ឆន្នោ, តេនាហំ ព្រាហ្មណា សុខី.

(៥)

ន ហិ មយ្ហំ ព្រាហ្មណ, វិធវា សត្ត ធីតរោ;

ឯកបុត្តា ទុបុត្តា ច, តេនាហំ ព្រាហ្មណា សុខី.

(៦)

ន ហិ មយ្ហំ ព្រាហ្មណ, បិង្គលា តិលកាហតា;

សោត្តំ បាទេន ពោធេតិ, តេនាហំ ព្រាហ្មណា សុខី.

(៧)

ន ហិ មយ្ហំ ព្រាហ្មណ, បច្ចូសម្ហិ ឥណាយិកា;

ទេថ ទេថាតិ ចោទេន្តិ, តេនាហំ ព្រាហ្មណា សុខី.

បុច្ឆា – ឥមញ្ច បនាវុសោ ធម្មទេសនំ សុត្វា សោ ភារទ្វាជគោត្តោ ព្រាហ្មណោ ឥមស្មិំ ធម្មវិនយេ បសន្នោ កីទិសំ បសន្នាការមកាសិ. កីវ មហន្តញ្ច ឥមស្មិំ ធម្មវិនយេ អត្ថំ សម្បាទេសិ.

វិស្សជ្ជនា – ឥមញ្ច បន ភន្តេ ធម្មទេសនំ សុត្វា សោ ភារទ្វាជគោត្តោ ព្រាហ្មណោ ‘‘អភិក្កន្តំ ភោ គោតម អភិក្កន្តំ ភោ គោតម, សេយ្យថាបិ ភោគោតម, និក្កុជ្ជិតំ វា ឧក្កុជ្ជេយ្យ, បដិច្ឆន្នំ វា វិវរេយ្យ, មូឡ្ហស្ស វា មគ្គំ អាចិក្ខេយ្យ, អន្ធការេ វា តេលបជ្ជោតំ ធារេយ្យ, ចក្ខុមន្តោ រូបានិ ទុក្ខន្តី’’តិ ឯវមាទិនា ឥមស្មិ ធម្មវិនយេ បសន្នោ បសន្នាការមកាសិ. ភគវតោ ច សន្តិកេ ‘‘លភេយ្យាហំ ភោតោ គោតមស្ស សន្តិកេ បព្ពជំ, លភេយ្យំ ឧបសម្បទ’’ន្តិ ឯវមាទិនា បព្ពជ្ជំ ឧបសម្បទំ យាចិត្វា អចិរូបសម្បន្នោ យាវ អរហត្តា មហន្តំ វិសេសំ សម្បាទេសិ.

កសិភារទ្វាជសុត្ត

បុច្ឆា – តត្ថាវុសោ ឯកាទសមំ មហាកស្សបាទីហិ បោរាណធម្មសំគាហកថេរេហិ សំគីតំ កសិភារទ្វាជសុត្តំ ភគវតា កត្ថ កំ អារព្ភ កិស្មិំ វត្ថុស្មិំ កថញ្ច ភាសិតំ.

វិស្សជ្ជនា – មគធេសុ ភន្តេ ទក្ខិណាគិរិស្មិំ ឯកនាឡាយំ ព្រាហ្មណគាមេ កសិភារទ្វាជំ ព្រាហ្មណំ អារព្ភ ភាសិតំ. កសិភារទ្វាជោ ភន្តេ ព្រាហ្មណោ ភគវន្តំ គាថាយ អជ្ឈភាសិ.

‘‘កស្សកោ បដិជានាសិ, ន ច បស្សាមិ តេ កសិំ. កស្សកោ បុច្ឆិតោ ព្រូហិ, កថំ ជានេមុ តំ កសិ’’ន្តិ. តស្មិំ ភន្តេ វត្ថុស្មិំ–

‘‘សទ្ធា ពីជំ តបោ វុដ្ឋិ, បញ្ញា មេ យុគនង្គលំ;

ហិរី ឦសា មនោ យោត្តំ, សតិ មេ ផាលបាចនំ.

កាយគុត្តោ វចីគុត្តោ, អាហារេ ឧទរេ យតោ;

សច្ចំ ករោមិ និទ្ទានំ, សោរច្ចំ មេ បមោចនំ.

វីរិយំ មេ ធុរធោរយ្ហំ, យោគក្ខេមាធិវាហនំ;

គច្ឆតិ អនិវត្តន្តំ, យត្ថ គន្ត្វា ន សោចតិ.

ឯវមេសា កសី កដ្ឋា, សា ហោតិ អមតប្ផលា;

ឯតំ កសិំ កសិត្វាន, សព្ពទុក្ខា បមុច្ចតី’’តិ.

ឯវំ ខោ ភន្តេ ភគវតា ភាសិតំ.

កស្សកោ បដិជានាសិ, ន ច បស្សាមិ តេ កសិំ;

កស្សកោ បុច្ឆិតោ ព្រូហិ, កថំ ជានេមុ តំ កសិំ.

សទ្ធា ពីជំ តបោ វុដ្ឋិ, បញ្ញា មេ យុគនង្គលំ;

ហិរី ឦសា មនោ យោត្តំ, សតិ មេ ផាលបាចនំ.

បុច្ឆា – ឥមញ្ច បនាវុសោ ធម្មទេសនំ សុត្វា សោ កសិភារទ្វាជោ ព្រាហ្មណោ ឥមស្មិំ ធម្មវិនយេ បសន្នោ កីទិសំ បសន្នាការមកាសិ.

វិស្សជ្ជនា – ឥមញ្ច បន ភន្តេ ធម្មទេសនំ សុត្វា កសិភារទ្វាជោ ព្រាហ្មណោ ‘‘អភិក្កន្តំ ភោ គោតម, អភិក្កន្តំ ភោ គោតមា’’តិឯវមាទិនា ឥមស្មិំ ធម្មវិនយេ បសន្នោ បសន្នាការមកាសិ.

សេយ្យថាបិ ភោ គោតម ឧក្កុជ្ជិតំ វា និក្កុជ្ជេយ្យ.

ឧទយសុត្ត

បុច្ឆា – ឧទយសុត្តំ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ កថញ្ច ភាសិតំ.

វិស្សជ្ជនា – សាវត្ថិយំ ភន្តេ ឧទយំ ព្រាហ្មណំ អារព្ភ ភាសិតំ. ឧទយោ ភន្តេ ព្រាហ្មណោ ភគវន្តំ ឯតទវោច ‘‘បកដ្ឋកោយំ សមណោ គោតមោ បុនប្បុនំ អាគច្ឆតី’’តិ. តស្មិំ ភន្តេ វត្ថុស្មិំ–

បុនប្បុនញ្ចេវ វបន្តិ ពីជំ, បុនប្បុនំ វស្សតិ ទេវរាជា;

បុនប្បុនំ ខេត្តំ កសន្តិ កស្សកា, បុនប្បុនំ ធញ្ញមុបេតិ រដ្ឋំ.

ឯវមាទិនា ភន្តេ ភគវតា ភាសិតំ.

បុនប្បុនំ ចេវ វបន្តិ ពីជំ, បុនប្បុនំ វស្សតិ ទេវ រាជា;

បុនប្បុនំ ខេត្តំ កសន្តិ កស្សកា, បុនប្បុនំ ធញ្ញមុបេតិ រដ្ឋំ.

បុនប្បុនំ យាចកា យាចយន្តិ, បុនប្បុនំ ទានបតី ទទន្តិ;

បុនប្បុនំ ទានបតី ទទិត្វា, បុនប្បុនំ សគ្គមុបេតិ ឋានំ.

បុនប្បុនំ ខីរនិកា ទុហន្តិ, បុនប្បុនំ វច្ឆោ ឧបេតិ មាតរំ;

បុនប្បុនំ កិលមតិ ផន្ទតិ ច, បុនប្បុនំ គព្ភមុបេតិ មន្ទោ.

បុនប្បុនំ ជាយតិ មីយតិ ច, បុនប្បុនំ សិវថិកំ ហរន្តិ;

មគ្គញ្ច លទ្ធា អបុនព្ភវាយ, ន បុនប្បុនំ ជាយតិ ភូរិបញ្ញោ-ហុ–

មាតុបោសកសុត្ត

បុច្ឆា – មាតុបោសកសុត្តំ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ កថញ្ច ភាសិតំ.

វិស្សជ្ជនា – សាវត្ថិយំ ភន្តេ មាតុបោសកំ ព្រាហ្មណំ អារព្ភ ភាសិតំ. មាតុបោសកោ ភន្តេ ព្រាហ្មណោ ភគវន្តំ ឯតទវោច ‘‘អហញ្ហិ ភោ គោតម ធម្មេន ភិក្ខំ បរិយេសាមិ, ធម្មេន ភិក្ខំ បរិយេសិត្វា មាតាបិតរោ បោសេមិ, កច្ចាហំ ភោ គោតម ឯវំការី កិច្ចការី ហោមី’’តិ, តស្មិំ ភន្តេ វត្ថុស្មិំ ‘‘តគ្ឃ ត្វំ ព្រាហ្មណ ឯវំការី កិច្ចការី ហោសិ, យោ ខោ ព្រាហ្មណ ធម្មេន ភិក្ខំ បរិយេសតិ, ធម្មេន ភិក្ខំ បរិយេសិត្វា មាតាបិតរោ បោសេតិ, ពហុំ សោ បុញ្ញំ បសវតី’’តិ ឯវមាទិនា ភន្តេ ភគវតា ភាសិតា.

យោ មាតរំ វា បិតរំ វា, មច្ចោ ធម្មេន បោសតិ;

តាយ នំ បារិចរិយាយ, មាតាបិតូសុ បណ្ឌិតា;

ឥធេវ នំ បសំសន្តិ, បេច្ច សគ្គេ បមោទតិ–

ខោមទុស្សសុត្ត

បុច្ឆា – តេនាវុសោ ភគវតា…បេ… សម្មាសម្ពុទ្ធេន ព្រាហ្មណសំយុត្តេ ខោមទុស្សសុត្តំ កត្ថ កំ អារព្ភ កិស្មិំ វត្ថុស្មិំ កថញ្ច ភាសិតំ.

វិស្សជ្ជនា – សក្កេសុ ភន្តេ ខោមទុស្សេ នាម សក្យានំ និគមេ ខោមទុស្សកេ ព្រាហ្មណគហបតិកេ អារព្ភ ភាសិត, ខោមទុស្សកា ភន្តេ ព្រាហ្មណគហបតិកា ភគវន្តំ ឯតទវោចុំ ‘‘កេ ច មុណ្ឌកា សមណកា, កេ ច សភាធម្មំ ជានិស្សន្តី’’តិ.

តស្មិំ ភន្តេ វត្ថុស្មិំ–

‘‘នេសា សភា យត្ថ ន សន្តិ សន្តោ,

សន្តោ ន តេ យេ ន វទន្តិ ធម្មំ;