ភិក្ខុនីសំយុត្ត

អាឡវិកាសុត្ត

បុច្ឆា – ឥទានិ អាវុសោ ភិក្ខុនី សំយុត្តំ បុច្ឆាមិ, យំ តស្ស ភគវតោ អរហតោ សម្មាសម្ពុទ្ធស្ស សាវិកាហិ ថេរីហិ អត្តនោ

ច ពុទ្ធសាសនស្ស ច យថាភូតំ គុណំ បកាសេត្វា ភាសិតំ. តត្ថាវុសោ បឋមំ បោរាណកេហិ មហាកស្សបាទីហិ ធម្មសំគាហកេហិ ថេរវរេហិ សំគីតំ អាឡវិកាសុត្តំ កត្ថ កំ អារព្ភ កិស្មិំ វត្ថុស្មិំ កេន កថញ្ច ភាសិតំ.

វិស្សជ្ជនា – សាវត្ថិយំ ភន្តេ មារំ បាបិមន្តំ អារព្ភ អាឡវិកាយ ភិក្ខុនិយា ភាសិតំ. មារោ ភន្តេ បាបិមា អាឡវិកាយ ភិក្ខុនិយា ភយំ ឆម្ភិតត្តំ លោមហំសំ ឧប្បាទេតុកាមោ វិវេកម្ហា ចាវេតុកាមោ អាឡវិកំ ភិក្ខុនិំ គាថាយ អជ្ឈភាសិ–

‘‘នត្ថិ និស្សរណំ លោកេ, កិំ វិវេកេន កាហសិ;

ភុញ្ជស្ស កាមរតិយោ, មាហុ បច្ឆានុតាបិនី’’តិ.

តស្មិំ ភន្តេ វត្ថុស្មិំ–

‘‘អត្ថិ និស្សរណំ លោកេ, បញ្ញាយ មេ សុផុស្សិតំ;

បមត្តពន្ធុ បាបិម, ន ត្វំ ជានាសិ តំ បទំ;

សត្តិសូលូបមា កាមា, ខន្ធាសំ អធិកុដ្ដនា;

យំ ត្វំ កាមរតិំ ព្រូសិ, អរហិ មយ្ហ សា អហូ’’តិ.

ឯវំ ខោ ភន្តេ អាឡវិកាយ ភិក្ខុនិយា ភាសិតំ.

នត្ថិ និស្សរណំ លោកេ, កិំ វិវេកេន កាហសិ;

ភុញ្ជស្សុ កាមរតិយោ, មាហុ បច្ឆានុតាបិនី-ហុ–

អត្ថិ និស្សរណំ លោកេ, បញ្ញាយ មេ សុផុស្សិតំ;

បមត្តពន្ធុ បាបិម, ន ត្វំ ជានាសិ តំ បទំ.

សត្តិសូលូបមា កាមា, ខន្ធាសំ អធិកុដ្ដនា;

យំ ត្វំ កាមរតិំ ព្រូសិ, អរតិ មយ្ហ សា អហុ–

សោមាសុត្ត

បុច្ឆា – សោមាសុត្តំ បនាវុសោ កត្ថ កំ អារព្ភ កិស្មិំ វត្ថុស្មិំ កេន កថញ្ច ភាសិតំ.

វិស្សជ្ជនា – សាវត្ថិយំយេវ ភន្តេ អន្ធវនេ មារំ បាបិមន្តំ អារព្ភ សោមាយ ភិក្ខុនិយា ភាសិតំ. មារោ ភន្តេ បាបិមា សោមាយ ភិក្ខុនិយា ភយំ ឆម្ភិតត្តំ លោមហំសំ ឧប្បាទេតុកាមោ សមាធិម្ហា ចាវេតុកាមោ សោមំ ភិក្ខុនិំ គាថាយ អជ្ឈភាសិ.

‘‘យំ តំ ឥសីហិ បត្តព្ពំ, ឋានំ ទុរភិសម្ភវំ;

ន តំ ទ្វង្គុលបញ្ញាយ, សក្កា បប្បោតុមិត្ថិយា’’តិ.

តស្មិំ ភន្តេ វត្ថុស្មិំ–

‘‘ឥត្ថិភាវោ កិំ កយិរា, ចិត្តម្ហិ សុសមាហិតេ;

ញាណម្ហិ វត្តមានម្ហិ, សម្មា ធម្មំ វិបស្សតោ;

យស្ស នូន សិយា ឯវំ, ឥត្ថាហំ បុរិសោតិ វា;

កិញ្ចិ វា បន អញ្ញស្មិ, តំ មារោ វត្តុមរហតី’’តិ.

ឯវំ ខោ ភន្តេ សោមាយ ភិក្ខុនិយា អរិយសាវិកាយ ភាសិតំ.

យំ តំ ឥសីហិ បត្តព្ពំ, ឋានំ ទុរភិសម្ភវំ;

ន តំ ទ្វង្គុលបញ្ញាយ, សក្កា បប្បោតុមិត្ថិយា–

ឥត្ថិ ភាវោ កិំ កយិរា, ចិត្តម្ហិ សុសមាហិតេ;

ញាណម្ហិ វត្ត មានម្ហិ, សម្មា ធម្មំ វិបស្សតោ.

យស្ស នូន សិយា ឯវំ, ឥត្ថាហំ បុរិសោតិ វា;

កិញ្ចិ វា បន អញ្ញស្មិ, តំ មារោ វត្តុមរហតិ.

កិសាគោតមីសុត្ត

បុច្ឆា – តត្ថាវុសោ កិសាគោតមីសុត្តំ កត្ថ កំ អារព្ភ កិស្មិំ វត្ថុស្មិំ កេន កថញ្ច ភាសិតំ.

វិស្សជ្ជនា – សាវត្ថិយំយេវ ភន្តេ អន្ធវនេ មារំ បាបិមន្តំ អារព្ភ កិសាគោតមិយា ភិក្ខុនិយា ថេរិយា ភាសិតំ. មារោ ភន្តេ បាបិមា កិសាគោតមិយា ភិក្ខុនិយា ភយំ ឆម្ភិតត្តំ លោមហំសំ ឧប្បាទេតុកាមោ សមាធិម្ហា ចាវេតុកាមោ កិសាគោតមិំ ភិក្ខុនិំ គាថាយ អជ្ឈភាសិ–

‘‘កិំ នុ ត្វំ មតបុត្តាវ, ឯកមាសិ រុទម្មុខី;

វនមជ្ឈគតា ឯកា, បុរិសំ នុ គវេសសី’’តិ.

តស្មិំ ភន្តេ វត្ថុស្មិំ–

អច្ចន្តំ មតបុត្តាម្ហិ, បុរិសា ឯកទន្តិកា;

ន សោចាមិ ន រោទាមិ, ន តំ ភាយាមិ អាវុសោ.

សព្ពត្ថ វិហតា នន្ទី, តមោក្ខន្ធោ បទាលិតោ;

ជេត្វាន មច្ចុនោ សេនំ, វិហរាមិ អនាសវា’’តិ.

ឯវំ ខោ ភន្តេ កិសាគោតមិយា ភិក្ខុនិយា ភាសិតំ.

កិំ នុ ត្វំ មតបុត្តាវ, ឯកមាសិ រុទម្មុខី;

វនមជ្ឈគតា ឯកា, បុរិសំ នុ គសេសសិ-ហុ–

អច្ចន្តំ មតបុត្តាម្ហិ, បុរិសា ឯតទន្តិកា;

ន សោចាមិ ន រោទាមិ, ន តំ ភាយាមិ អាវុសោ.

សព្ពត្ថ វិហតា នន្ទី, តមោក្ខន្ធោ បទាលិតោ;

ជេត្វាន មច្ចុនោ សេនំ, វិហរាមិ អនាសវា.

ឧប្បលវណ្ណាសុត្ត

បុច្ឆា – តត្ថាវុសោ បោរាណេហិ សំគីតិការមហាថេរវរេហិ សំគីតំ ឧប្បលវណ្ណសុត្តំ កត្ថ កំ អារព្ភ កិស្មិំ វត្ថុស្មិំ កេន កថញ្ច ភាសិតំ.

វិស្សជ្ជនា – សាវត្ថិយំយេវ ភន្តេ អន្ធវនេ មារំ បាបិមន្តំ អារព្ភ ឧប្បលវណ្ណាយ ភិក្ខុនិយា ភាសិតំ. មារោ ភន្តេ បាបិមា ឧប្បលវណ្ណាយ ភិក្ខុនិយា ភយំ ឆម្ភិតត្តំ លោមហំសំ ឧប្បាទេតុកាមោ សមាធិម្ហា ចាវេតុកាមោ ឧប្បលវណ្ណំ ភិក្ខុនិំ គាថាយ អជ្ឈភាសិ–

‘‘សុបុប្ផិតគ្គំ ឧបគម្ម ភិក្ខុនិ, ឯកា តុវំ តិដ្ឋសិ សាលមូលេ. ន ចត្ថិ តេ ទុតិយា វណ្ណធាតុ, ពាលេ ន ត្វំ ភាយសិ ធុត្តកាន’’ន្តិ.

តស្មិំ ភន្តេ វត្ថុស្មិំ–

‘‘សតំ សហស្សានិបិ ធុត្តកានំ,

ឥធាគតា តាទិសកា ភវេយ្យុំ;

លោមំ ន ឥញ្ជាមិ ន សន្តសាមិ,

ន មារ ភាយាមិ តមេកិកាបិ.

ឯសា អន្តរធាយាមិ, កុច្ឆិំ វា បវិសាមិ តេ;

បខុមន្តរិកាយម្បិ, តិដ្ឋន្តិំ មំ ន ទក្ខសិ.

ចិត្តស្មិំ វសីភូតាម្ហិ, ឥទ្ធិបាទា សុភាវិតា;

សព្ពពន្ធនមុត្តាម្ហិ, ន តំ ភាយាមិ អាវុសោ’’តិ.

ឯវំ ខោ ភន្តេ ឧប្បលវណ្ណាយ ភិក្ខុនិយា ភាសិតំ.

ចាលាសុត្ត

បុច្ឆា – តត្ថាវុសោ ចាលាសុត្តំ កត្ថ កំ អារព្ភ កិស្មិំ វត្ថុស្មិំ កេន កថញ្ច ភាសិតំ.

វិស្សជ្ជនា – សាវត្ថិយំ ភន្តេ អន្ធវនេ មារំយេវ បាបិមន្តំ អារព្ភ ចាលាយ ភិក្ខុនិយា អរិយសាវិកាយ ភាសិតំ. មារោ ភន្តេ បាបិមា ចាលំ ភិក្ខុនិំ ឧបសង្កមិត្វា ឯតទវោច ‘‘កិំ នុ ត្វំ ភិក្ខុនិ ន រោចេសី’’តិ. ជាតិំ ខ្វាហំ អាវុសោ ន រោចេមី’’តិ.

កិំ នុ ជាតិំ ន រោចេសិ, ជាតោ កាមានិ ភុញ្ជតិ;

កោ នុ តំ ឥទមាទបយិ, ជាតិំ មា រោច ភិក្ខុនីតិ.

តស្មិំ ភន្តេ វត្ថុស្មិំ–

ជាតស្ស មរណំ ហោតិ, ជាតោ ទុក្ខានិ ផុស្សតិ;

ពន្ធំ វធំ បរិក្លេសំ, តស្មា ជាតិំ ន រោចយេ.

ពុទ្ធោ ធម្មមទេសេសិ, ជាតិយា សមតិក្កមំ;

សព្ពទុក្ខប្បហានាយ, សោ មំ សច្ចេ និវេសយិ.

យេ ច រូបូបគា សត្តា, យេ ច អរូបដ្ឋាយិនោ;

និរោធំ អប្បជានន្តា, អាគន្តារោ បុនព្ភវន្តិ.

ឯវំ ខោ ភន្តេ ចាលាយ ភិក្ខុនិយា ភាសិតំ.

កិំ នុ ជាតិំ ន រោចេសិ, ជាតោ កាមានិ ភុញ្ជតិ;

កោ នុ តំ ឥទមាទបយិ, ជាតិំ មា រោច ភិក្ខុនី.

ជាតស្ស មរណំ ហោតិ, ជាតោ ទុក្ខានិ ផុស្សតិ;

ពន្ធំ វធំ បរិក្លេសំ, តស្មា ជាតិំ ន រោចយេ.

ពុទ្ធោ ធម្មមទេសេសិ, ជាតិយា សមតិក្កមំ,

សព្ពទុក្ខប្បហានាយ, សោ មំ សច្ចេ និវេសយិ.

សេលាសុត្ត

បុច្ឆា – តត្ថាវុសោ សេលាសុត្តំ កត្ថ កំ អារព្ភ កិស្មិំ វត្ថុស្មិំ កេន កថញ្ច ភាសិតំ.

វិស្សជ្ជនា – សាវត្ថិយំ ភន្តេ មារំយេវ បាបិមន្តំ អារព្ព្ភ សេលាយ ភិក្ខុនិយា អរិយសាវិកាយ ភាសិតំ. មារោ ភន្តេ បាបិមា សេលាយ ភិក្ខុនិយា ភយំ ឆម្ភិតត្តំ លោមហំសំ ឧប្បាទេតុកាមោ សមាធិម្ហា ចាវេតុកាមោ សេលំ ភិក្ខុនិំ គាថាយ អជ្ឈភាសិ–

កេនិទំ បកតំ ពិម្ពំ, ក្វនុ ពិម្ពស្ស ការកោ;

ក្វនុ ពិម្ពំ សមុប្បន្នំ, ក្វនុ ពិម្ពំ និរុជ្ឈតីតិ.

តស្មិំ ភន្តេ វត្ថុស្មិំ–

នយិទំ អត្តកតំ ពិម្ពំ, នយិទំ បរកតំ អឃំ;

ហេតុំ បដិច្ច សម្ភូតំ, ហេតុភង្គា និរុជ្ឈតីតិ.

ឯវមាទិនា ភន្តេ សេលាយ ភិក្ខុនិយា ភាសិតំ.

កេនិទំ បកតំ ពិម្ពំ, ក្វនុ ពិម្ពស្ស ការកោ;

ក្វនុ ពិម្ពំ សមុប្បន្នំ, ក្វនុ ពិម្ពំ និរុជ្ឈតិ-ហុ–

នយិទំ អត្តកតំ ពិម្ពំ, នយិទំ បរកតំ អឃំ;

ហេតុំ បដិច្ច សម្ភូតំ, ហេតុភង្គា និរុជ្ឈតិ.

វជិរាសុត្ត

បុច្ឆា – តត្ថាវុសោ បោរាណកេហិ មហាកស្សបាទីហិ ធម្មសំគាហកថេរវរេហិ សំគីតំ វជិរាសុត្តំ កត្ថ កំ អារព្ភ កេន កថញ្ច ភាសិតំ.

វិស្សជ្ជនា – សាវត្ថិយំ ភន្តេ មារំ បាបិមន្តំ អារព្ភ វជិរាយ ថេរិយា ភិក្ខុនិយា ភាសិតំ. មារោ ភន្តេ បាបិមា បុរិមនយេនេវ វជិរំ ភិក្ខុនិំ គាថាយ អជ្ឈភាសិ–

កេនាយំ បកតោ សត្តោ, កុវំ សត្តស្ស ការកោ,

កុវំ សត្តោ សមុប្បន្នោ, កុវំ សត្តោ និរុជ្ឈតីតិ.

តស្មិំ ភន្តេ វត្ថុស្មិំ–

កិំ នុ សត្តោតិ បច្ចេសិ, មារទិដ្ឋិគតំ នុ តេ;

សុទ្ធសង្ខារបុញ្ជោយំ, នយិធ សត្តុបលព្ភតិ.

យថា ហិ អង្គសម្ភារា, ហោតិ សទ្ទោ រថោ ឥតិ;

ឯវំ ខន្ធេសុ សន្តេសុ, ហោតិ សត្តោតិ សម្មុតិ.

ទុក្ខមេវ ហិ សម្ភោតិ, ទុក្ខំ តិដ្ឋតិ វេតិ ច,

នាញ្ញត្រ ទុក្ខា សម្ភោតិ, នាញ្ញំ ទុក្ខា និរុជ្ឈតីតិ.

ឯវំ ខោ ភន្តេ វជិរាយ ភិក្ខុនិយា ភាសិតំ.

កេនាយំ បកតោ សត្តោ, កុវំ សត្តស្សការកោ;

កុវំ សត្តោ សមុប្បន្នោ, កុវំ សត្តោ និរុជ្ឈតិ-ហុ–

កិំ នុ សត្តោតិ បច្ចេសិ, មារ ទិដ្ឋិគតំ នុ តេ;

សុទ្ធសង្ខារបុញ្ជោយំ, នយិធ សត្តុបលព្ភតិ.