សីលក្ខន្ធវគ្គសុត្ត

សំគាយនស្ស បុច្ឆា វិស្សជ្ជនា

បុច្ឆា – បឋមមហាធម្មសំគីតិកាលេ អាវុសោ ធម្មសំគាហកា មហាកស្សបាទយោ មហាថេរវរា បឋមំ វិនយំ សំគាយិត្វា តទនន្តរំ កំ នាម បាវចនំ សំគាយិំសុ.

វិស្សជ្ជនា – បឋមមហាធម្មសំគីតិយំ ភន្តេ ធម្មសំគាហកា មហាកស្សបាទយោ មហាថេរវរា បឋមំ វិនយំ សំគាយិត្វា តទនន្តរំ ធម្មំ សំគាយិំសុ.

បុច្ឆា – ធម្មោ នាម អាវុសោ សុត្តន្តាភិធម្មវសេន ទុវិធោ, តត្ថ កតរំ ធម្មំ បឋមំ សំគាយិំសុ.

វិស្សជ្ជនា – ទ្វីសុ ភន្តេ ធម្មេសុ សុត្តន្តាភិធម្មបិដកេសុ បឋមំ សុត្តន្តំ បិដកំ ធម្មំ សំគាយិំសុ.

បុច្ឆា – សុត្តន្តបិដកេ បិ អាវុសោ ទីឃមជ្ឈិមសំយុត្តអង្គុត្តរខុទ្ទកនិកាយវសេន បញ្ច និកាយា, តេសុ បឋមំ កតរំ និកាយំ សំគាយិំសុ.

វិស្សជ្ជនា – បញ្ចសុ ភន្តេ និកាយេសុ បឋមំ ទីឃនិកាយំ សំគាយិំសុ.

បុច្ឆា – ទីឃនិកាយេបិ អាវុសោ តយោ វគ្គា ចតុត្តិំសា ច សុត្តានិ, តេសុ កតរំ វគ្គំ កតរញ្ច សុត្តំ បឋមំ សំគាយិំសុ.

វិស្សជ្ជនា – ទីឃនិកាយេបិ ភន្តេ តីសុ វគ្គេសុ បឋមំ សីលក្ខន្ធវគ្គំ, ចតុត្តិំសតិយា ច សុត្តេសុ បឋមំ ព្រហ្មជាលសុត្តំ សំគាយិំសុ.