នមោ តស្ស ភគវតោ អរហតោ សម្មាសម្ពុទ្ធស្ស

សុត្តន្តបិដកេ

ទីឃនិកាយេ

សីលក្ខន្ធវគ្គសុត្ត

សំគាយនស្ស បុច្ឆា វិស្សជ្ជនា

បុច្ឆា – បឋមមហាធម្មសំគីតិកាលេ អាវុសោ ធម្មសំគាហកា មហាកស្សបាទយោ មហាថេរវរា បឋមំ វិនយំ សំគាយិត្វា តទនន្តរំ កំ នាម បាវចនំ សំគាយិំសុ.

វិស្សជ្ជនា – បឋមមហាធម្មសំគីតិយំ ភន្តេ ធម្មសំគាហកា មហាកស្សបាទយោ មហាថេរវរា បឋមំ វិនយំ សំគាយិត្វា តទនន្តរំ ធម្មំ សំគាយិំសុ.

បុច្ឆា – ធម្មោ នាម អាវុសោ សុត្តន្តាភិធម្មវសេន ទុវិធោ, តត្ថ កតរំ ធម្មំ បឋមំ សំគាយិំសុ.

វិស្សជ្ជនា – ទ្វីសុ ភន្តេ ធម្មេសុ សុត្តន្តាភិធម្មបិដកេសុ បឋមំ សុត្តន្តំ បិដកំ ធម្មំ សំគាយិំសុ.

បុច្ឆា – សុត្តន្តបិដកេ បិ អាវុសោ ទីឃមជ្ឈិមសំយុត្តអង្គុត្តរខុទ្ទកនិកាយវសេន បញ្ច និកាយា, តេសុ បឋមំ កតរំ និកាយំ សំគាយិំសុ.

វិស្សជ្ជនា – បញ្ចសុ ភន្តេ និកាយេសុ បឋមំ ទីឃនិកាយំ សំគាយិំសុ.

បុច្ឆា – ទីឃនិកាយេបិ អាវុសោ តយោ វគ្គា ចតុត្តិំសា ច សុត្តានិ, តេសុ កតរំ វគ្គំ កតរញ្ច សុត្តំ បឋមំ សំគាយិំសុ.

វិស្សជ្ជនា – ទីឃនិកាយេបិ ភន្តេ តីសុ វគ្គេសុ បឋមំ សីលក្ខន្ធវគ្គំ, ចតុត្តិំសតិយា ច សុត្តេសុ បឋមំ ព្រហ្មជាលសុត្តំ សំគាយិំសុ.

ព្រហ្មជាលសុត្ត

បុច្ឆា – សាធុ សាធុ អាវុសោ មយម្បិ ទានិ តតោយេវ បដ្ឋាយ សំគាយិតុំ បុព្ពកិច្ចានិ សមារភាម…, តេនាវុសោ ភគវតា ជានតា បស្សតា អរហតា សម្មាសម្ពុទ្ធេន ព្រហ្មជាលសុត្តំ កត្ថ ភាសិតំ.

វិស្សជ្ជនា – អន្តរា ច ភន្តេ រាជគហំ អន្តរា ច នាឡន្ទំ អម្ពលដ្ឋិកាយំ រាជាគារកេ ភាសិតំ.

បុច្ឆា – កំ អាវុសោ អារព្ភ ភាសិតំ.

វិស្សជ្ជនា – សុប្បិយញ្ច ភន្តេ បរិព្ពាជកំ ព្រហ្មទត្តញ្ច មាណវំ អារព្ភ ភាសិតំ.

បុច្ឆា – កិស្មិំ អាវុសោ វត្ថុស្មិំ ភាសិតំ.

វិស្សជ្ជនា – វណ្ណាវណ្ណេ ភន្តេ, សុប្បិយោ ហិ ភន្តេ អនេកបរិយាយេន ពុទ្ធស្ស អវណ្ណំ ភាសតិ ធម្មស្ស អវណ្ណំ ភាសតិ សង្ឃស្ស អវណ្ណំ ភាសតិ, សុប្បិយស្ស បន បរិព្ពាជកស្ស អន្តេវាសី ព្រហ្មទត្តោ មាណវោ អនេកបរិយាយេន ពុទ្ធស្ស វណ្ណំ ភាសតិ ធម្មស្ស វណ្ណំ ភាសតិ សង្ឃស្ស វណ្ណំ ភាសតិ, តស្មិំ ភន្តេ វត្ថុស្មិំ ភាសិតំ.

អនុសន្ធេ

បុច្ឆា – កតិ អាវុសោ តត្ថ អនុសន្ធយោ.

វិស្សជ្ជនា – តយោ ភន្តេ តត្ថ អនុសន្ធយោ, ឯកោ អវណ្ណានុសន្ធិ, ទ្វេ វណ្ណានុសន្ធិយោ.

បឋម អនុសន្ធេ

បុច្ឆា – តត្ថាវុសោ បឋមេ អនុសន្ធិម្ហិ កថំ ភគវតា ភាសិតំ, តំ សំខេបតោ កថេហិ.

វិស្សជ្ជនា – បឋមេ ភន្តេ អនុសន្ធិម្ហិ អវណ្ណេ មនោបទោសំ និវារេត្វា, តត្ថ ច អាទីនវំ ទស្សេត្វា, តត្ថ បដិបជ្ជិតព្ពាការោ ភគវតា ភាសិតោ.

មមំ វា ភិក្ខវេ បរេ អវណ្ណំ ភាសេយ្យុំ, ធម្មស្ស វា អវណ្ណំ ភាសេយ្យុំ សង្ឃស្ស វា អវណ្ណំ ភាសេយ្យុំ, តត្រ តុម្ហេហិ ន អាឃាតោ អប្បច្ចយោ ន ចេតសោ អនភិរទ្ធិ ករណីយា…

ទុតិយ អនុសន្ធេ

បុច្ឆា – សាធុ សាធុ អាវុសោ, សាធុ ខោ ភគវា អត្តនា បរមុក្កំ សាគតខន្តីគុណសមន្នាគតោ អត្តនោ សាវកភូតេ អម្ហេបិ តត្ថ សមាទាបេសិ, អត្តនា ច លោកធម្មេសុ អនិញ្ជនសភាវោ អម្ហាកម្បិ តថត្តាយ ឱវាទមទាសិ, ទុតិយេបនាវុសោ អនុសន្ធិម្ហិ កថំ ភគវតា ភាសិតំ, តម្បិ សំខេបតោ បកាសេហិ.

វិស្សជ្ជនា – ទុតិយេ បន ភន្តេ អនុសន្ធិម្ហិ វណ្ណេ ចេតសោ ឧប្បិលាវិតត្តំ និសេធេត្វា, តត្ថ ច អាទីនវំ ទស្សេត្វា, តត្ថ ច បដិបជ្ជនាការំ ទស្សេត្វា, បុថុជ្ជនស្ស វណ្ណភូមិភូតានិ តីណិ សីលានិ វិត្ថារតោ ភគវតា ភាសិតានិ.

មមំ វា ភិក្ខវេ បរេ វណ្ណំ ភាសេយ្យុំ, ធម្មស្ស វា វណ្ណំ ភាសេយ្យុំ, សង្ឃស្ស វា វណ្ណំ ភាសេយ្យុំ, តត្រ តុម្ហេហិ ន អានន្ទោ ន សោមនស្សំ ន ចេតសោ អភិរទ្ធិ ករណីយា –

តតិយ អនុសន្ធេ

បុច្ឆា – សាធុ សាធុ អាវុសោ, សាធុ ខោ ភគវា អត្តនា បរមុក្កំសគតសុបរិសុទ្ធសីលសមន្នាគតោ, តំ អត្តនោ សុបរិសុទ្ធសីលំ ទស្សេត្វា បរេបិ តត្ថ និយោជេសិ, តតិយេ បនាវុសោ អនុសន្ធិម្ហិ កថំ ភគវតា ភាសិតំ, តំ សំខេបតោ បកាសេហិ.

វិស្សជ្ជនា – តតិយេ បន ភន្តេ អនុសន្ធិម្ហិ ទ្វាសដ្ឋិ ទិដ្ឋិយោ សព្ពញ្ញុត ញាណេន វិត្ថារតោ វិភជិត្វា, តាសញ្ច ឆ ផស្សាយតនបទដ្ឋានភាវំ វិភាវេត្វា, មិច្ឆាទិដ្ឋិគតិកាធិដ្ឋា នញ្ច វដ្ដំ កថេត្វា, យុត្តយោគភិក្ខុអធិដ្ឋានញ្ច វិវដ្ដំ កថេត្វា, មិច្ឆាទិដ្ឋិគតិកស្ស ទេសនាជាលតោ អវិមុត្តភាវំ ទេសនាជាលតោ វិមុត្តស្ស នត្ថិកភាវញ្ច វិភាវេត្វា, អត្តនោ ច កត្ថចិ អបរិយាបន្នភាវំ ទស្សេត្វា, ឧបាទិសេសនិព្ពានធាតុំ បាបេត្វា ទេសនា ភគវតា និដ្ឋាបិតា.

ឧច្ឆិន្នភាវនេត្តិកោ ភិក្ខវេ តថាគតស្ស កាយោ តិដ្ឋតិ, យាវស្ស កាយោ ឋស្សតិ តាវ នំ ទក្ខន្តិ ទេវមនុស្សា, កាយស្ស ភេទា ឧទ្ធំ ជីវិតបរិយាទានា ន នំ ទក្ខន្តិ ទេវមនុស្សា.

សុត្តនិទេសនា

បុច្ឆា – សាធុ សាធុ អាវុសោ, សាធុ ខោ ភគវា អត្តនា ទ្វាសដ្ឋិ ទិដ្ឋិយោ ច ឆ ផស្សាយតនានិ ច ទ្វាទស បដិច្ចសមុប្បាទង្គានិ ច សព្ពសោ បរិជានិត្វា តេសំ បរិជាននត្ថាយ បរេសម្បិ តថត្តាយ ធម្មំ បកាសេតិ, សុត្តញ្ច នាម អាវុសោ ចតុន្នំ សុត្តនិក្ខេបានំ អញ្ញតរវសេនេវ និក្ខិត្តំ, តស្មា តេសុ ឥទំ សុត្តំ កតរេន សុត្តនិក្ខេបេន ភគវតា និក្ខិត្តំ.

វិស្សជ្ជនា – ចតូសុ ភន្តេ សុត្តនិក្ខេបេសុ អដ្ឋុប្បត្តិនិក្ខេបន ឥទំ សុត្តំ និក្ខិត្តំ.

បុច្ឆា – កស្ស អាវុសោ វចនំ.

វិស្សជ្ជនា – ភគវតោ ភន្តេ វចនំ អរហតោ សម្មាសម្ពុទ្ធស្ស.

បុច្ឆា – កេនាវុសោ អាភតំ.

វិស្សជ្ជនា – បរម្បរាយ ភន្តេ អាភតំ.

បុច្ឆា – អត្ថិ នុ ខោ អាវុសោ ឯត្ថ កោចិ វិរទ្ធទោសា, យេន បច្ឆិមា ជនា មិច្ឆាអត្ថំ គណ្ហេយ្យុំ.

វិស្សជ្ជនា – នត្ថិ ភន្តេ.

សាមញ្ញផលសុត្ត

បុច្ឆា – តេនាវុសោ ភគវតា…បេ… សម្មាសម្ពុទ្ធេន សាមញ្ញផលសុត្តំ កត្ថ ភាសិតំ.

វិស្សជ្ជនា – រាជគហេ ភន្តេ ជីវកស្ស កោមារភច្ចស្ស អម្ពវនេ ភាសិតំ.

បុច្ឆា – កេនាវុសោ សទ្ធិំ ភគវតា ភាសិតំ.

វិស្សជ្ជនា – រញ្ញា ភន្តេ មាគធេន អជាតសត្តុនា វេទេហិបុត្តេន សទ្ធិំ ភាសិតំ.

បុច្ឆា – តំ បនាវុសោ សុត្តំ ចតុន្នំ សុត្តនិក្ខេបានំ កតរេន សុត្តនិក្ខេបេន ភគវតា និក្ខិត្តំ.

វិស្សជ្ជនា – ចតុន្នំ ភន្តេ សុត្តនិក្ខេបានំ បុច្ឆាវសិកេន សុត្តនិក្ខេបេន និក្ខិតំ ភគវតា.

អជាតសត្តុ

បុច្ឆា – សា បនាវុសោ បុច្ឆា កេនាការេន សមុប្បន្នា.

វិស្សជ្ជនា – រាជា ភន្តេ មាគធោ អជាសត្តុ វេទេហិបុត្តោ តទហុបោសថេ បន្នរសេ កោមុទិយា ចាតុមាសិនិយា បុណ្ណាយ បុណ្ណមាយ រត្តិយា យេន ភគវា តេនុបសំកមិ, ឧបសំកមិត្វា ភគវន្តំ ទិដ្ឋេវ ធម្មេ សំទិដ្ឋិកំ សាមញ្ញផលំ បុច្ឆិ, ឯវំ ខោ សា ភន្តេ បុច្ឆា ឧប្បន្នា.

រម្មណីយា វត ភោ ទោសិនា រត្តិ, អភិរូបា វត ភោ ទោសិនា រត្តិ, ទស្សនីយា វត ភោ ទោសិនា រត្តិ, បាសាទិកា វត ភោ ទោសិនា រត្តិ, លក្ខញ្ញា វត ភោ ទោសិនា រត្តិ….

កំ នុខ្វជ្ជ សមណំ វា ព្រាហ្មណំ វា បយិរុបាសេយ្យាម….

យំ នោ បយិរុបសតោ ចិត្តំ បសីទេយ្យ….

ឆរាជីវក

ត្វំ បន សម្ម ជីវក កិំ តុណ្ហីសិ –

អយំ ទេវ អម្ហាកំ ភគវា អរហំ សម្មាសម្ពុទ្ធោ អម្ហាកំ អម្ពវនេ វិហរតិ.

តំ ខោ បន ភគវន្តំ ឯវំ កល្យាណោ កិត្តិសទ្ទោ អព្ភុគ្គតោ ‘‘ឥតិបិ សោ ភគវា អរហំ សម្មាសម្ពុទ្ធោ វិជ្ជាចរណសម្បន្នោ សុគតោ លោកវិទូ អនុត្តរោបុរិសទម្មសារថិ សត្ថាទេវមនុស្សានំ ពុទ្ធោ ភគវា’’តិ.

តំ ទេវោ ភគវន្តំ បយិរុបាសតុ, អប្បេវនាម ទេវស្ស ភគវន្តំ បយិរុបាសតោ ចិត្តំ បសីទេយ្យ.

តេន ហិ សម្ម ជីវក ហត្ថិយានានិ កប្បាបេហិ.

កប្បិតានិ ខោ តេ ទេវ ហត្ថិយានានិ, យស្ស ទានិ កាលំ មញ្ញសិ.

អជាតសត្តុ

កិច្ចិ មំ សម្ម ជីវក ន វញ្ចេសិ, កច្ចិ មំ សម្ម ជីវក ន បលម្ភេសិ….

មា ភាយិ មហារាជ, មា ភាយិ មហារាជ….

ន តំ ទេវ វញ្ចេមិ, ន តំ ទេវ បលម្ភាមិ….

អជាតសត្ត

ឯសោ មហារាជ ភគវា, ឯសោ មហារាជ ភគវា មជ្ឈិមំ ថម្ភំ និស្សាយ បុរត្ថាភិមុខោ និសិន្នោ បុរក្ខតោ ភិក្ខុសង្ឃស្ស….

ឥមិនា មេ ឧបសមេន ឧទយភទ្ទោ កុមារោ សមន្នាគតោ ហោតុ…

អគមា ខោ ត្វំ មហារាជ យថា បេមំ.

បុច្ឆេយ្យាមហំ ភន្តេ ភគវន្តំ កិញ្ចិទេវ ទេសំ សចេ មេ ភគវា ឱកាសំ ករោតិ បញ្ហស្ស វេយ្យាករណាយ.

បុច្ឆ មហារាជ យទាកង្ខសិ.

យថា នុ ខោ ឥមានិ ភន្តេ បុថុសិប្បាយតនានិ, សេយ្យថិទំ, ហត្ថារោហា អស្សារោហា រថិកា ធនុគ្គហា ចេលកា ចលកា បិណ្ឌទាយកា (បេយ្យាល) គណកា មុទ្ទិកា, អញ្ញានិបិ ឯវំ គតិកានិ បុថុសិប្បាយតនានិ, តេ តេន សិប្បេន សន្ទិដ្ឋិកំ សិប្បផលំ ជីវន្តិ, តេ តេន អត្តានំ សុខេន្តិ បីណេន្តិ, មាតាបិតរោ សុខេន្តិ, បីណេន្តិ, បុត្តទារំ សុខេន្តិ បីណេន្តិ, មិត្តាមច្ចេ សុខេន្តិ បីណេន្តិ សមណព្រាហ្មណេសុ ឧទ្ធគ្គិកំ ទក្ខិណំ បតិដ្ឋបេន្តិ សោវគ្គិកំ សុខវិបាកំ សគ្គសំវត្តនិកំ, សក្កា នុ ខោ ភន្តេ ឯវមេវ ទិដ្ឋេវ ធម្មេ សន្ទិដ្ឋិកំ សាមញ្ញផលំ បញ្ញបេតុំ.

បុច្ឆា – តទា អាវុសោ កថំ ភគវតា រាជា អជាតសត្តុ វេទេហិ បុត្តោ បដិបុច្ឆិតោ កថញ្ច តេន ភគវតោ អារោចិតំ.

វិស្សជ្ជនា – ‘‘អភិជានាសិ នោ ត្វំ មហារាជ ឥមំ បញ្ហំ អញ្ញេ សមណព្រាហ្មណេ បុច្ឆិតាតិ, អភិជានាមហំ ភន្តេ អញ្ញេ សមណព្រាហ្មណេ បុច្ឆិតាតិ, យថាកថំ បន តេ មហារាជ ព្យាករិំសុ, សចេ តេ អគរុ, ភាសស្សូតិ ន ខោ មេ ភន្តេ គរុ, យត្ថស្ស ភគវា និសិន្នោ ភវន្តរូបោ វាតិ, តេនេហិ មហារាជ ភាសស្សូ’’តិ, ឯវំ ខោ ភន្តេ តទា ភគវតា រាជា មាគធោ អជាតសត្តុ វេទេហិ បុត្តោ បដិបុច្ឆិតោ, ឯវំ ខោ ភន្តេ តេន តទា ភគវតោ អារោចិតំ.

បូរណកស្សប អយូវាទ

បុច្ឆា – កថញ្ចាវុសោ បូរណកស្សបស្ស សន្តិកេ បុច្ឆាវិស្សជ្ជនា អហោសិ.

វិស្សជ្ជនា – ឯកមិទំ ភន្តេ សមយំ រាជា មាគធោ អជាតសត្តុ វេទេហិបុត្តោ យេន បូរណោ កស្សបោ តេនុបសង្កមិ, ឧបសង្កមិត្វា បូរណំ កស្សបំ សន្ទិដ្ឋិកំ សាមញ្ញផលំ បុច្ឆិ, អថ ខោ ភន្តេ បូរណោ កស្សបោ ករោតោ ខោ មហារាជ ការយតោ, ឆិន្ទតោ ឆេទាបយតោ, បចតោ បាចាបយតោ, សោចយតោ សោចាបយតោ (បេយ្យាល) ករោតោ ន ករីយតិ បាបំ ត្យាទិនា រញ្ញោ មាគធស្ស អជាតសត្តុស្ស វេទេហិបុត្តស្ស សំទិដ្ឋិ កំ សាមញ្ញផលំ បុដ្ឋោ សមានោ អកិរិយំ ព្យាកាសិ, ឯវំ ខោ ភន្តេ បូរណស្ស កស្សបស្ស សន្តិកេ បុច្ឆាវិស្សជ្ជនា អហោសិ.

បូរណកស្សបវាទ

និស្សិរិកោ វត អាវុសោ បូរណស្ស កស្សបស្ស វាទោ អនត្ថសំហិតោ ជិគុច្ឆនីយោ អតិវិយ ភយានកោ, យេ តស្ស វចនំ សោតព្ពំ សទ្ធាតព្ពំ មញ្ញេយ្យុំ, តេសំ តំ អស្ស ទីឃរត្តំ អហិតាយ ទុក្ខាយ, ឯត្តកេនេវ អជ្ជ មយំ បុច្ឆាវិស្សជ្ជនំ ថបេស្សាម.

មក្ខលិគោសាល អយូវាទ

បុច្ឆា – បុរិមទិវសេ អាវុសោ មយា សាមញ្ញផលសុត្តស្ស និទានបរិយាបន្នានិ បុច្ឆិតព្ពដ្ឋានានិ កានិចិ កានិចិ បុច្ឆិតានិ, តយា ច សុដ្ឋុ វិស្សជ្ជិតានិ, អជ្ជ បន យថានុប្បត្តមក្ខលិគោសាយ វាទតោ បដ្ឋាយ បុច្ឆិស្សាមិ, មក្ខលិ បន អាវុសោ

គោសាលោ រញ្ញា មាគធេន អជាតសត្តុនា វេទេហិបុត្តេន សន្ទិដ្ឋិកំ សាមញ្ញផលំ បុដ្ឋោ កថំ ព្យាកាសិ.

វិស្សជ្ជនា – ឯកមិទំ ភន្តេ សមយំ រាជា មាគធោ អជាតសត្តុ វេទេហិបុត្តោ យេន មក្ខលិគោសាលោ តេនុបសំកមិ, ឧបសំកមិត្វា មក្ខលិំ គោសាលំ សន្ទិដ្ឋិកំ សាមញ្ញផលំ បុច្ឆិ, អថ ខោ ភន្តេ មក្ខលិគោសាលោ រាជានំ មាគធំ អជាតសត្តុំ វេទេហិបុត្តំ ឯតទវោច ‘‘នត្ថិ មហារាជ ហេតុ នត្ថិ បច្ចយោ សត្តានំ សំកិលេសាយ, អហេតូ អបច្ចយា សត្តា សំកិលិស្សន្តិ. នត្ថិ មហារាជ ហេតុ នត្ថិ បច្ចយោ សត្តានំ វិសុទ្ធិយា, អហេតូ អបច្ចយា សត្តា វិសុជ្ឈន្តិ, (បេយ្យាល) ចុល្លាសីតិ មហាកប្បិនោ សតសហស្សានិ, យានិ ពាលេ ច បណ្ឌិតេ ច សន្ធាវិត្វា សំសរិត្វា ទុក្ខស្សន្តំ ករិស្សន្តិ, តត្ថ នត្ថិ ‘ឥមិនាហំ សីលេន វា វតេន វា តបេន វា ព្រហ្មចរិយេន វា អបរិបក្កំ វា កម្មំ បរិបាចេស្សាមិ, បរិបក្កំ វា កម្មំ ផុស្ស ផុស្ស ព្យន្តិំ ករិស្សាមី’តិ ហេវំ នត្ថិ. ទោណមិតេ សុខទុក្ខេ, បរិយន្តកតេ សំសារេ នត្ថិ ហាយនវឌ្ឍនេ, នត្ថិ ឧក្កំសាវកំសេ. សេយ្យថាបិ នាម សុត្តបុដ្ឋេ ខិត្តេ និព្ពេឋិយមានមេវ បលេតិ, ឯវមេវ ពាលេ ច បណ្ឌិតេ ច សន្ធាវិត្វា សំសរិត្វា ទុក្ខស្សន្តំ ករិស្សន្តី’’តិ, ឥត្ថំ ខោ ភន្តេ រញ្ញោ មាគធស្ស អជាតសត្តុស្ស វេទេហិបុត្តស្ស មក្ខលិគោសាលោ សន្ទិដ្ឋិកំ សាមញ្ញផលំ បុដ្ឋោ សមានោ សំសារសុទ្ធិំ ព្យាកាសិ.

មក្ខលិគោសាលវាទ

អយម្បិ អាវុសោ វាទោ និស្សិរិកោយេវ អនត្ថសំហិតោ ជិគុច្ឆនីយោ អតិ វិយ ភយានកោ, យេ តស្ស វចនំ សោតព្ពំ សទ្ធាតព្ពំ មញ្ញេយ្យុំ, តេសំ តំ អស្ស ទីឃរត្តំ អហិតាយ ទុក្ខាយ.

អជិតកេសកម្ពលវាទ

បុច្ឆា – អថាបរម្បិ បុច្ឆាមិ, អជិតោ បន អាវុសោ កេសកម្ពលោ រញ្ញា មាគធេន អជាតសត្តុនា វេទេហិបុត្តេន សន្ទិដ្ឋិកំ សាមញ្ញផលំ បុដ្ឋោ កថំ ព្យាកាសិ.

វិស្សជ្ជនា – ឯកមិទំ ភន្តេ សមយំ រាជា មាគធោ អជាតសត្តុ វេទេហិបុត្តោ យេន អជិតោ កេសកម្ពលោ តេនុបសង្កមិ, ឧបសង្កមិត្វា អជិតំ កេសកម្ពលំ សន្ទិដ្ឋិកំ សាមញ្ញផលំ បុច្ឆិ, អថ ខោ ភន្តេ អជិតោ កេសកម្ពលោ រាជានំ មាគធំ អជាតសត្តុំ វេទេហិបុត្តំ ឯតទវោច ‘‘នត្ថិ មហារាជ ទិន្នំ, នត្ថិ យិដ្ឋំ, នត្ថិ ហុតំ, នត្ថិ សុកតទុក្កដានំ កម្មានំ ផលំ វិបាកោ, នត្ថិ អយំ លោកោ, នត្ថិ បរោ លោកោ, នត្ថិ មាតា, នត្ថិ បិតា, នត្ថិ សត្តា ឱបបាតិកា, នត្ថិ លោកេ សមណព្រាហ្មណា សម្មគ្គតា សម្មាបដិបន្នា, យេ ឥមញ្ច លោកំ បរញ្ច លោកំ សយំ អភិញ្ញា សច្ឆិកត្វា បវេទេន្តិ. (បេយ្យាល) ពាលេ ច បណ្ឌិតេ ច កាយស្ស ភេទា ឧច្ឆិជ្ជន្តិ វិនស្សន្តី’’តិ. ឥត្ថំ ខោ ភន្តេ រញ្ញោ មាគធស្ស អជាតសត្តុស្ស វេទេហិបុត្តស្ស អជិតោ កេសកម្ពលោ សន្ទិដ្ឋិកំ សាមញ្ញផលំ បុដ្ឋោ សមានោ ឧច្ឆេទំ ព្យាកាសិ.

អជិតកេសកម្ពល

អយម្បិ ខោ អាវុសោ និស្សិរិកោយេវ, អនត្ថសំហិតោ ជិគុច្ឆនីយោ អតិ វិយ ភយានកោ, យេ តស្ស វចនំ សោតព្ពំ សទ្ធាតព្ពំ មញ្ញេយ្យុំ, តេសំ តំ អស្ស ទីឃរត្តំ អហិតាយ ទុក្ខាយ.

បកុធកច្ចាយនវាទ

បុច្ឆា – អថាបរម្បិ បុច្ឆាមិ, បកុធោ បន អាវុសោ កច្ចាយនោ រញ្ញា មាគធេន អជាតសត្តុនា វេទេហិបុត្តេន សន្ទិដ្ឋិកំ សាមញ្ញផលំ បុដ្ឋោ កថំ ព្យាកាសិ.

វិស្សជ្ជនា – ឯកមិទំ ភន្តេ សមយំ រាជា មាគធោ អជាតសត្តុ វេទេហិបុត្តោ យេន បកុធោ កច្ចាយនោ តេនុបសង្កមិ, ឧបសង្កមិត្វា បកុធំ កច្ចាយនំ សន្ទិដ្ឋិកំ សាមញ្ញផលំ បុច្ឆិ, អថ ខោ ភន្តេ បកុធោ កច្ចាយនោ រាជានំ មាគធំ អជាសត្តុំ វេទេហិបុត្តំ ឯតទវោច ‘‘សត្តិមេ មហារាជ កាយា អកដា អកដវិធា អនិម្មិតា អនិម្មាតា វញ្ចា កូដដ្ឋា ឯសិកដ្ឋាយិតា, តេ ន ឥញ្ជន្តិ, ន វិបរិណាមេន្តិ, ន អញ្ញមញ្ញំ ព្យាពាធេន្តិ, នាលំ អញ្ញមញ្ញស្ស សុខាយ វា ទុក្ខាយ វា សុខទុក្ខាយ វា. កតមេ សត្ត, បថវីកាយោ, អាបោកាយោ, តេជោកាយោ វាយោកាយោ, សុខេ, ទុក្ខេ, ជីវេ សត្តមេ. ឥមេ សត្តកាយា អកដា អកដវិធា អនិម្មិតា អនិម្មាតា វញ្ច្យា កូដដ្ឋា ឯសិកដ្ឋាយិតា, តេ ន ឥញ្ជន្តិ, ន វិបរិណាមេន្តិ, ន អញ្ញមញ្ញំ ព្យាពាធេន្តិ, នាលំ អញ្ញមញ្ញស្ស សុខាយ វា ទុក្ខាយ វា សុខទុក្ខាយ វា. តត្ថ នត្ថិ ហន្តា វា ឃាតេតា វា, សោតា វា សាវេតា វា, វិញ្ញាតា វា វិញ្ញាបេតា វា, យោបិ តិណ្ហេន សត្ថេន សីសំ ឆិន្ទតិ, ន កោចិ កិញ្ចិ ជិវិតា វោរោបេតិ, សត្តន្នំត្វេវ កាយានមន្តរេន សត្ថំ វិវរមនុបតតី’’តិ. ឥត្ថំ ខោ ភន្តេ រញ្ញោ មាគធស្ស អជាតសត្តុស្ស វេទេហិបុត្តស្ស បកុធោ កច្ចាយនោ សាមញ្ញផលំ បុដ្ឋោ សមានោ អញ្ញេន អញ្ញំ ព្យាកាសិ.

បកុធកច្ចាយនវាទ

អយម្បិ ខោ អាវុសោ វាទោ បុរិមវាទោវិយ និស្សិរិកោយេវ អនត្ថសំហិតោ ជិគុច្ឆនីយោ អតិវិយ ភយានកោ.

និគណ្ឋនាដបុត្តវាទ

បុច្ឆា – អថាបរម្បិ បុច្ឆាមិ, និគណ្ឋោ បនាវុសោ នាដបុត្តោ រញ្ញា មាគធេន អជាតសត្តុនា វេទេហិបុត្តេន សន្ទិដ្ឋិកំ សាមញ្ញផលំ បុដ្ឋោ កថំ ព្យាកាសិ.

វិស្សជ្ជនា – ឯកមិទំ ភន្តេ សមយំ រាជា មាគធោ អជាតសត្តុ វេទេហិបុត្តោ យេន និគណ្ឋោ នាដបុត្តោ តេនុបសំកមិ, ឧបសំកមិត្វា និគណ្ឋំ នាដបុត្តំ សន្ទិដ្ឋិកំ សាមញ្ញផលំ បុច្ឆិ, អថ ខោ និគណ្ឋោ នាដបុត្តោ រាជានំ មាគធំ អជាតសត្តុំ វេទេហិបុត្តំ ឯតទវោច, ‘‘ឥធ មហារាជ និគណ្ឋោ ចាតុយាមសំវរសំវុតោ ហោតិ, កថញ្ច មហារាជ

និគណ្ឋោ ចាតុយាមសំវរសំវុតោ ហោតិ, ឥធ មហារាជ និគណ្ឋោ សព្ពវារិវារិតោ ច ហោតិ, សព្ពវារិយុត្តោ ច, សព្ពវារិធុតោ ច, សព្ពវារិផុដោ ច. ឯវំ ខោ មហារាជ និគណ្ឋោ ចាតុយាមសំវរសំវុតោ ហោតិ, យតោ ខោ មហារាជ និគណ្ឋោ ឯវំ ចាតុយាមសំវរសំវុតោ ហោតិ. អយំ វុច្ចតិ មហារាជ និគណ្ឋោ គតត្តោ ច យតត្តោ ច ឋិតត្តោ ចា’’តិ. ឥត្ថំ ខោ ភន្តេ រញ្ញោ មាគធស្ស អជាតសត្តុស្ស វេទេហិបុត្តស្ស និគណ្ឋោ នាដបុត្តោ សន្ទិដ្ឋិកំ សាមញ្ញផលំ បុដ្ឋោ សមានោ ចាតុយាមសំវរំ ព្យាកាសិ.

និគណ្ឋវាទ

ឯតស្ស បនាវុសោ វាទេ កោចិ សាសនានុលោមវាទោ អត្ថិ, អសុទ្ធលទ្ធិតាយ បន ឯសោបិ វាទោ ជិគុច្ឆនីយោយេវ, សេយ្យថាបិ ភោជនំ គូថមិស្សំ គារយ្ហោយេវ អារកា បរិវជ្ជិតព្ពោយេវ, សេយ្យថាបិ វិសសំសដ្ឋោ អាបានីយកំសោ.

សិញ្ចញ្ញវាទ

បុច្ឆា – អថាបរម្បិ បុច្ឆាមិ, សញ្ចយោ បនាវុសោ ពេលដ្ឋបុត្តោ សន្ទិដ្ឋិកំ សាមញ្ញផលំ បុដ្ឋោ កថំ ព្យាកាសិ.

វិស្សជ្ជនា – ឯកមិទំ ភន្តេ សមយំ រាជា មាគធោ អជាតសត្តុ វេទេហិបុត្តោ យេន សញ្ចយោ ពេលដ្ឋបុត្តោ តេនុបសង្កមិ, ឧបសង្កមិត្វា សញ្ចយំ ពេលដ្ឋបុត្តំ ឯតទវោច, ‘‘យថា នុ ខោ ឥមានិ ភោ សញ្ចយ បុថុសិប្បាយតនានិ, សេយ្យថិទំ, ហត្ថារោហា អស្សរោហា…បេ… សក្កា នុ ខោ ភោ សញ្ចយ ឯវមេវ ទិដ្ឋេវ ធម្មេ សន្ទិដ្ឋិកំ សាមញ្ញផលំ បញ្ញបេតុ’’ន្តិ, ឯវំ វុត្តេ ភន្តេ សញ្ចយោ ពេលដ្ឋបុត្តោ រាជានំ មាគធំ អជាតសត្តុំ វេទេហិបុត្តំ ឯតទវោច.

‘‘អត្ថិ បរោលោកោតិ ឥតិ ចេ មំ បុច្ឆសិ, អត្ថិ បរោ លោកោតិ ឥតិ ចេ មេ អស្ស, អត្ថិ បរោ

លោកោតិ ឥតិ តេ នំ ព្យាករេយ្យំ, ឯវន្តិបិ មេ នោ, តថាតិបិ មេ នោ, អញ្ញថាតិបិ មេ នោ, នោតិបិ មេ នោ, នោ នោតិបិ មេ នោ…បេ… នេវ ហោតិ ន ន ហោតិ តថាគតោ បរំ មរណាតិ ឥតិ ចេ មំ បុច្ឆសិ, នេវ ហោតិ ន ន ហោតិ តថាគតោ បរំ មរណាតិ ឥតិ ចេ មេ អស្ស, នេវ ហោតិ ន ន ហោតិ តថាគតោ បរំ មរណាតិ ឥតិ តេ នំ ព្យាករេយ្យំ, ឯវន្តិបិ មេ នោ, តថាតិបិ មេ នោ, អញ្ញថាតិបិ មេ នោ, នោតិបិ មេ នោ, នោ នោតិបិ មេ នោ’’តិ. ឥត្ថំ ខោ ភន្តេ រញ្ញោ មាគធស្ស អជាតសត្តុស្ស វេទេហិបុត្តស្ស សញ្ចយោ ពេលដ្ឋបុត្តោ សន្ទិដ្ឋិកំ សាមញ្ញផលំ បុដ្ឋោ សមានោ វិក្ខេបំ ព្យាកាសិ.

តិត្ថិអយូវាទ

សព្ពេបិ អាវុសោ ឯតេ ឆន្នំ សត្ថារានំ វាទា និស្សិរិកាយេវ ជិគុច្ឆនីយាយេវ អនត្ថសំហិតាយេវ, ពាលានំ ភិយ្យោសោ មត្តាយ សម្មោហាយ សំវត្តន្តិ អនត្ថាយ.

អជ្ជ បន អាវុសោ កាលោ អតិក្កន្តោ, ស្វេយេវ ភគវតា វុត្តំ បណីតំ បសដ្ឋំ សន្ទិដ្ឋិកផលំ បុច្ឆាម.

បុច្ឆា – បុរិមទិវសេសុ អាវុសោ សាមញ្ញផលសុត្តស្ស បុព្ពភាគេ យាវ ឆសត្ថារមិច្ឆាវាទបរិយោសានំ បុច្ឆនវិស្សជ្ជនំ អម្ហេហិ កតំ, អជ្ជ បន យថានុប្បត្តំ ភគវតា ទេសិតសាមញ្ញផលសុត្តាធិការេ បុច្ឆាវិស្សជ្ជនំ ករិស្សាម. ភគវា បន អាវុសោ រញ្ញា មាគធេន អជាតសត្តុនា វេទេហិបុត្តេន សន្ទិដ្ឋិកំ សាមញ្ញផលំ បុដ្ឋោ កថំ ព្យាកាសិ.

វិស្សជ្ជនា – ភគវា ភន្តេ តិធា វិភជិត្វា រញ្ញោ មាគធស្ស អជាតសត្តុស្ស វេទេហិបុត្តស្ស សន្ទិដ្ឋិកំ សាមញ្ញផលំ បុដ្ឋោ ព្យាកាសិ.

បុច្ឆា – កថញ្ចាវុសោ ភគវា រញ្ញោ មាគធស្ស អជាតសត្តុនោ វេទេហិបុត្តស្ស បឋមំ សន្ទិដ្ឋិកំ សាមញ្ញផលំ ទេសេសិ.

វិស្សជ្ជនា – ទាសំ ភន្តេ បព្ពជិតំ ឧបមាភាវេន និទ្ទិសិត្វា រញ្ញោ មាគធស្ស អជាតសត្តុស្ស វេទេហិបុត្តស្ស ភគវា បឋមំ សន្ទិដ្ឋិកំ សាមញ្ញផលំ ទេសេសិ.

សោហំ ភន្តេ ភគវន្តម្បិ បុច្ឆាមិ, យថា នុ ខោ ឥមានិ ភន្តេ បុថុសិប្បាយតនានិ សេយ្យថិទំ…បេ… សក្កា នុ ខោ ភន្តេ ឯវ មេវ ទិដ្ឋេវ ធម្មេ សន្ទិដ្ឋិកំ សាមញ្ញផលំ បញ្ញបេតុំ –

អច្ឆរិយំ អាវុសោ អព្ភុតំ អាវុសោ, យាវ ស្វាខាតស្ស ពុទ្ធសាសនស្ស មហិទ្ធិកតា មហានុភាវតា, យត្រហិ នាម ទាសោបិ និហីនជច្ចោ ឯវំ ស្វាខាតេ ពុទ្ធសាសនេ បព្ពជិត្វា អត្តនោ ឥស្សរភូតេន រញ្ញាបិ វន្ទនីយត្តំ គរុករណីយត្តំ បាបុណិស្សតិ, សុបញ្ញត្តមេតំ ភគវតា បឋមំ សន្ទិដ្ឋិកផលំ.

បុច្ឆា – កថំ បនាវុសោ ភគវា រញ្ញោ មាគធស្ស អជាតសត្តុនោ វេទេហិបុត្តស្ស ទុតិយំ សន្ទិដ្ឋិកំ សាមញ្ញផលំ ទេសេសិ.

វិស្សជ្ជនា – កស្សកំ ភន្តេ បព្ពជិតំ ឧបមាភាវេន ទស្សេត្វា ភគវា រញ្ញោ មាគធស្ស អជាតសត្តុស្ស វេទេហិបុត្តស្ស សន្ទិដ្ឋិកំ សាមញ្ញផលំ ទេសេសិ.

អច្ឆរិយំ អាវុសោ អព្ភុតំ អាវុសោ, យាវ ពុទ្ធសាសនស្ស ស្វាខាតតា មហិទ្ធិកតា មហានុភាវតា, យត្រហិ នាម កស្ស កោបិ គុណរហិតោ ឯវំ ស្វាខាតេ ពុទ្ធសាសនេ បព្ពជិត្វា រដ្ឋធិបតិនា មនុស្សលោកេ ទេវភូតេន រញ្ញាបិ គរុករណីយតំ វន្ទនីយតំ បាបុណិស្សតិ, សុបញ្ញត្តមេតំ អាវុសោ ភគវតា ទុតិយំ សន្ទិដ្ឋិកផលំ.

បុច្ឆា – កថញ្ចា បនាវុសោ ភគវា បុរិមេហិ សន្ទិដ្ឋិកសាមញ្ញផលេហិ អភិក្កន្តតរញ្ច បណីតតរញ្ច សន្ទិដ្ឋិកំ សាមញ្ញផលំ រញ្ញោ ទេសេសិ.

វិស្សជ្ជនា – ភគវា ភន្តេ ពុទ្ធុប្បាទតោ បដ្ឋាយ កុលបុត្តស្ស បព្ពជិត ភាវំ, តស្ស ច សីលសម្បទំ, តស្ស ច ឥន្ទ្រិយេសុ គុត្តទ្វារតំ, អរិយញ្ចសតិសម្បជញ្ញំ, អរិយញ្ច សន្តុដ្ឋិំ, បញ្ចន្នញ្ច នីវរណានំ បហានំ, ចត្តារិ ច ឈានានិ, អដ្ឋ ច វិជ្ជាយោ, តាហិ តាហិ ឧបមាហិ វិត្ថារតោ វិភជិត្វា រញ្ញោ មាគធស្ស អជាតសត្តុស្ស វេទេហិបុត្តស្ស សន្ទិដ្ឋិកំ សាមញ្ញផលំ បុរិមេហិ សន្ទិដ្ឋិកេហិ សាមញ្ញផលេហិ អភិក្កន្តតរញ្ច បណីតតរញ្ច ទេសេសិ.

សក្កា បន ភន្តេ ទិដ្ឋេវ ធម្មេ សន្ទិដ្ឋិកំ សាមញ្ញផលំ, បុរិមេហិ សន្ទិដ្ឋិកេហិ សាមញ្ញផលេហិ អភិក្កន្តតរញ្ច បណីតតរញ្ច បញ្ញបេតុំ.

សក្កា មហារាជា, តេន ហិ មហារាជ សុណោហិ សាធុកំ មនសិករោហិ ភាសិស្សាមិ.

បុច្ឆា – កថញ្ច បនាវុសោ ភិក្ខុ សីលសម្បន្នោ ហោតិ, កថញ្ច ភគវា រញ្ញោ មាគធស្ស អជាតសត្តុនោ វេទេហិបុត្តស្ស ចូឡសីលំ វិភជិត្វា ទេសេសិ.

វិស្សជ្ជនា – ‘‘កថញ្ច មហារាជ ភិក្ខុ សីលសម្បន្នោ ហោតិ. ឥធ មហារាជ ភិក្ខុ បាណាតិបាតំ បហាយ បាណាតិបាតា បដិវិរតោ ហោតិ និហិតទណ្ឌោ និហិតសត្ថោ លជ្ជី ទយាបន្នោ, សព្ពបាណភូតហិតានុកម្បី វិហរតិ. ឥទម្បិស្ស ហោតិ សីលស្មិំ’’ ឯវមាទិនា ភន្តេ ភគវា រញ្ញោ មាគធស្ស អជាតសត្តុស្ស វេទេហិបុត្តស្ស ឆព្ពីសតិយា អាការេហិ ចូឡសីលំ វិភជិត្វា ទេសេសិ.

សាធុ សាធុ អាវុសោ, សាធុ សាធុ អាវុសោ យំ ភិក្ខុ ឯវំ ស្វាខាតេ ពុទ្ធសាសនេ សទ្ធាបព្ពាជិតោ ឥមិនា ច ចូឡសីលេន សមន្នាគតោ វិហរេយ្យ.

ឥទានិ បន កាលោ អតិក្កន្តោ.

សុវេ យថានុប្បត្តដ្ឋានតោ បដ្ឋាយ បុច្ឆាវិស្សជ្ជនំ ករិស្សាម.

បុច្ឆា – កថំ បនាវុសោ រញ្ញោ មាគធស្ស អជាតសត្តុនោ វេទេហិបុត្តស្ស មជ្ឈិមសីលញ្ច មហាសីលញ្ច វិភជិត្វា ទេសេសិ.

វិស្សជ្ជនា – ‘‘យថា វា បនេកេ ភោន្តោ សមណព្រាហ្មណា សទ្ធាទេយ្យានិ ភោជនានិ ភុញ្ជិត្វា តេ ឯវរូបំ ពីជគាមភូតគាមសមារម្ភំ អនុយុត្តា វិហរន្តិ. សេយ្យថិទំ. មូលពីជំ ខន្ធពីជំ ផឡុពីជំ អគ្គពីជំ ពីជពីជមេវ បញ្ចមំ, ឥតិ ឯវរូបា ពីជគាមភូតគាមសមារម្ភា បដិវិរតោ ហោតិ. ឥទម្បិស្ស ហោតិ សីលស្មិំ’’ ឯវមាទិនា ភន្តេ ភគវា រញ្ញោ មាគធស្ស អជាតសត្តុស្ស វេទេហិបុត្តស្ស មជ្ឈិមសីលញ្ច មហាសីលញ្ច វិត្ថារតោ វិភជិត្វា ទេសេសិ.

សាធុ សាធុ អាវុសោ, សាធុ ខោ អាវុសោ យំ ភិក្ខុ ឯវំ ស្វាខាតេ ពុទ្ធសាសនេ សទ្ធាបព្ពជិតោ ឯវំ អរិយេន សីលេន សមន្នាគតោ វិហរេយ្យ.

បុច្ឆា – កថំ បនាវុសោ អរិយំ ឥន្ទ្រិយសំវរញ្ច អរិយំ សតិសម្បជញ្ញញ្ច អរិយំ សន្តោសញ្ច ភគវា រញ្ញោ មាគធស្ស អជាតសត្តុស្ស វិភជិត្វា ទេសេសិ.

វិស្សជ្ជនា – ឥធ មហារាជ ភិក្ខុ ចក្ខុនា រូបំ ទិស្វា ន និមិត្តគ្គាហី ហោតិ ននុព្យញ្ជនគ្គាហី, យត្វាធិករណមេនំ ចក្ខុន្ទ្រិយំ អសំវុតំ វិហរន្តំ អភិជ្ឈាទោមនស្សា បាបកា អកុសលា ធម្មា អន្វាស្សវេយ្យុំ, តស្ស សំវរាយ បដិបជ្ជតិ, រក្ខតិ ចក្ខុន្ទ្រិយំ, ចក្ខុន្ទ្រិយេ សំវរំ អាបជ្ជតិ, ឯវមាទិនា ច.

ឥធ មហារាជ ភិក្ខុ សតិសម្បជញ្ញេន សមន្នាគតោ ហោតិ, អភិក្កន្តេ បដិក្កន្តេ សម្បជនការី ហោតិ,

អាលោកិតេ វិលោកិតេ សម្បជានការី ហោតិ, សមិញ្ជិតេ បសារិតេ សម្បជានការី ហោតិ, សង្ឃាដិបត្តចីវរធារណេ សម្បជានការី ហោតិ, អសិតេ បីតេ ខាយិតេ សាយិតេ សម្បជានការី ហោតិ, ឧច្ចារបស្សាវកម្មេ សម្បជានការី ហោតិ, គតេ ឋិតេ និសិន្នេ សុត្តេ ជាគរិតេ ភាសិតេ តុណ្ហីភាវេ សម្បជានការី ហោតិ, ឯវំ ខោ មហារាជ ភិក្ខុ សតិសម្បជញ្ញេន សមន្នាគតោ ហោតិ.

កថញ្ច មហារាជ ភិក្ខុ សន្តុដ្ឋោ ហោតិ, ឥធ មហារាជ ភិក្ខុ សន្តុដ្ឋោ ហោតិ កាយបរិហារិកេន ចីវរេន កុច្ឆិបរិហារិកេន បិណ្ឌបាតេន.

ឯវមាទិនា ភន្តេ ភគវា រញ្ញោ មាគធស្ស អជាតសត្តុស្ស វេទេហិបុត្តស្ស អរិយញ្ច ឥន្ទ្រិយេសុគុត្តទ្វារតំ អរិយញ្ច សតិសម្បជញ្ញំ អរិយញ្ច សន្តោសំ វិភជិត្វា ទេសេសិ.

សាធុ សាធុ អាវុសោ, សាធុ ខោ អាវុសោ យំ ភិក្ខុ ឯវំ ស្វាខាតេ ពុទ្ធសាសនេ សទ្ធាបព្ពជិតោ ឥមិនា ច អរិយេន ឥន្ទ្រិយសំវរេន សមន្នាគតោ, ឥមិនា ច អរិយេន សតិសម្បជញ្ញេន

សមន្នាគតោ, ឥមាយ ច អរិយាយ សន្តុដ្ឋិយា សមន្នាគតោ វិហរេយ្យ.

បុច្ឆា – កថំ បនាវុសោ ភគវា រញ្ញោ មាគធស្ស អជាតសត្តុស្ស វេទេហិបុត្តស្ស នីវរណបហានំ វិភជិត្វា ទេសេសិ.

វិស្សជ្ជនា – សោ ឯវំ អរិយេន សីលក្ខន្ធេន សមន្នាគតោ, អរិយេន ឥន្ទ្រិយសំវរេន សមន្នាគតោ, អរិយេន សតិសម្បជញ្ញេន សមន្នាគតោ, អរិយាយ សន្តុដ្ឋិយា សមន្នាគតោ, វិវិត្តំ សេនាសនំ ភជតិ អរញ្ញំ រុក្ខមូលំ បព្ពតំ កន្ទរំ គិរិគុហំ សុសានំ វនបត្តំ អព្ភោកាសំ បលាលបុញ្ជំ. សោ បច្ឆាភត្តំ បិណ្ឌបាតបដិក្កន្តោ និសីទតិ បល្លង្កំ អាភុញ្ជិត្វា ឧជុំ កាយំ បណិធាយ បរិមុខំ សតិំ ឧបដ្ឋបេត្វា. សោ អភិជ្ឈំ លោកេ បហាយ វិគតាភិជ្ឈេន ចេតសា វិហរតិ…បេ… តស្សិមេ បញ្ច នីវរណេ បហីនេ អត្តនិ សមនុបស្សតោ បាមោជ្ជំ ជាយតិ, បមុទិតស្ស បីតិ ជាយតិ, បីតិមនស្ស កាយោ បស្សម្ភតិ, បស្សទ្ធកាយោ សុខំ វេទេហិ, សុខិនោ ចិត្តំ សមាធិយតិ. ឯវំ ខោ ភន្តេ ភគវា រញ្ញោ មាគធស្ស អជាតសត្តុស្ស វេទេហិបុត្តស្ស នីវរណប្បហានំ វិភជិត្វា វិត្ថារតោ ទេសេសិ.

សាធុ សាធុ អាវុសោ, សាធុ ខោ អាវុសោ យំ ភិក្ខុ ឯវំ ស្វាខាតេ ពុទ្ធសាសនេ សទ្ធាបព្ពជិតោ ឯវំ បញ្ចនីវរណេ បជហិត្វា តេហិ ចិត្តំ វិសោធេត្វា វិហរេយ្យ.

បុច្ឆា – កថញ្ចាវុសោ ភគវា រញ្ញោ មាគធស្ស អជាតសត្តុស្ស វេទេហិបុត្តស្ស បឋមំ សន្ទិដ្ឋិកំ សាមញ្ញផលំ ទេសេសិ, បុរិមេហិ សន្ទិដ្ឋិកេហិ សាមញ្ញផលេហិ អភិក្កន្តតរញ្ច បណីតតរញ្ច.

វិស្សជ្ជនា – សោ វិវិច្ចេវ កាមេហិ វិវិច្ច អកុសលេហិ ធម្មេហិ សវិតក្កំ សវិចារំ វិវេកជំ បីតិសុខំ បឋមំ ឈានំ ឧបសម្បជ្ជ វិហរតិ…បេ… ឥទម្បិ ខោ មហារាជ សន្ទិដ្ឋិកំ សាមញ្ញផលំ បុរិមេហិ សន្ទិដ្ឋិកេហិ សាមញ្ញផលេហិ អភិក្កន្តតរញ្ច

បណីតតរញ្ច. ឯវំ ខោ ភន្តេ ភគវា រញ្ញោ មាគធស្ស អជាតសត្តុស្ស វេទេហិបុត្តស្ស បឋមំ សន្ទិដ្ឋិកំ សាមញ្ញផលំ បុរិមេហិ សន្ទិដ្ឋិកេហិ សាមញ្ញផលេហិ អភិក្កន្តតរញ្ច បណីតតរញ្ច ទេសេសិ.

សាធុ សាធុ អាវុសោ, សាធុ ខោ អាវុសោ យំ ភិក្ខុ ឯវំ ស្វាខាតេ ពុទ្ធសាសនសង្ខាតេ ធម្មវិនយេ បព្ពជិត្វា ឯវំ បឋមំ ឈានំ

ឧបសម្បជ្ជ វិវេកជេន បីតិសុខេន អត្តនោ កាយំ អភិសន្ទេយ្យ បរិសន្ទេយ្យ បរិបូរេយ្យ.

បុច្ឆា – កថញ្ចាវុសោ ភគវា ទុតិយញ្ច តតិយញ្ច ចតុត្ថញ្ច សន្ទិដ្ឋិកំ សាមញ្ញផលំ ទេសេសិ, បុរិមេហិ សន្ទិដ្ឋិកេហិ សាមញ្ញផលេហិ អភិក្កន្តតរញ្ច បណីតតរញ្ច.