៦៣. បុព្ពេ+កកត្តុកានំ

ឯកោ កត្តា យេសំ ព្យាបារានំ, តេសុ យោ បុព្ពោ, តទត្ថតោ ក្រិយត្ថា តុនាទយោ ហោន្តិ ភាវេ. ‘‘តុំតុនា’’ ទិនា ករស្ស អា, សោ កាតុន កម្មំ គច្ឆតិ, អកាតុន បុញ្ញំ កិលិស្សន្តិ. រលោបេ កម្មំ កត្វាន ភទ្រកំ, បុញ្ញានិ កត្វា សគ្គំ គច្ឆតិ. អភិសង្ខរណំ កត្វា អភិសង្ខរិត្វា ករិត្វា វា. តថា សិព្ពិត្វា ឆាទយិត្វា ជានិត្វា ធម្មំ សុត្វា សុត្វាន ធម្មំ មោទតិ, សុណិត្វា, បត្វា បាបុណិត្វា, កិនិត្វា, ជេត្វា ជិនិត្វា ជិត្វា, ចោរេត្វា ចោរយិត្វា, បូជេត្វា បូជយិត្វា, តថា មេត្តំ ភាវេត្វា ភាវយិត្វា, វិហារំ ការេត្វា ការយិត្វា ការាបេត្វា ការាបយិត្វា សគ្គំ គមិស្សន្តិ+ច្ចាទិ. បុព្ពេតិ កិំ, ភុញ្ជតិ ច បចតិ ច. ‘‘អបត្វា នទិំ បព្ពតោ, អតិក្កម្ម បព្ពតំ នទី’’តិអាទីសុ ភូធាតុស្ស សម្ភវា ឯកកត្តុកតា បុព្ពកាលតា ច គម្យតេ. ‘‘ភុត្វា ភុត្វា គច្ឆតី’’តិ ឥមិនាវ សិទ្ធំ, អាភិក្ខញ្ញន្តុ ទ្វិព្ពចនាវ គម្យតេ. កថំ ‘‘ជីវគ្គាហំ អគាហយិ, កាយប្បចាលកំ គច្ឆតី’’តិ, ឃណន្តេន ក្រិយាវិសេសនេន សិទ្ធំ, យថា ឱទនបាកំ សយតីតិ.