៦១. តុំ តាយេ តវេ ភាវេ ភវិស្សតិ ក្រិយាយំ តទត្ថាយំ

ភវិស្សតិអត្ថេ វត្តមានតោ ក្រិយត្ថា ភាវេ តុមាទយោ ហោន្តិ ក្រិយាយំ តទត្ថាយំ បតីយមានាយំ. ករណាយ គច្ឆតិ កាតុំ គច្ឆតិ. ‘‘តុំតុនតព្ពេសុ វា’’តិ ករស្ស វា អា ហោតិ, បុព្ពរូបេ កត្តាយេ. ‘‘ករស្សា តវេ’’តិ និច្ចំ អា, កាតវេ. និបាតត្តា ‘‘អសង្ខ្យេហិ សព្ពាសំ’’តិ ចតុត្ថីសស្ស លោបោ. ឯវ+មុបរិ តុនាទីសុ. កត្តុំ កាមេតីតិ កត្តុកាមោ, អភិសង្ខរិតុ+មាកង្ខតិ. សទ្ធម្មំ សុណិតុំ, ញិម្ហិ នាគមេ តស្ស ណោ, នាគមត្តា ន វុទ្ធិ. សោតវេ សោតុំ សុណិតុំ វា បត្ថេហិ. ឯវំ អនុភវិតុំ, បចិតុំ. គន្តុំ, ‘‘មនានំ និគ្គហីតំ’’តិ និគ្គហីតំ. គមិតុំ, ខន្តុំ, ខនិតុំ, ហន្តុំ, ហនិតុំ, មន្តុំ, មនិតុំ, ហរិតុំ, អនុស្សរិតុំ ឥច្ឆតិ. តថា តុទិតុំ, បវិសិតុំ, ឧទ្ទិសិតុំ, ភោត្តុំ, សយិតុំ, នេតុំ, ជុហោតុំ, បជហិតុំ, បហាតុំ, ទាតុំ, រោទ្ធុំ, រុន្ធិតុំ, ភោត្តុំ, ភុញ្ជីតុំ, ឆេត្តុំ, ឆិន្ទិតុំ, សិព្ពិតុំ, ឩម្ហិ វស្ស ពោ, ទ្វិត្តំ, ពុទ្ធុំ, តស្ស ធោ. ពុជ្ឈិតុំ, យុក. ជានិតុំ ញា=អវពោធនេ. ជនិតុំ. ជេតុំ ជិនិតុំ. បត្តុំ បាបុណិតុំ. កេតុំ កិណិតុំ. វិនិច្ឆេតុំ, ឥស្ស ឯ, វិនិច្ឆិនិតុំ. គហេតុំ គណ្ហិតុំ. ចោរិតុំ ចោរេតុំ ចោរយិតុំ, បាលេតុំ បាលយិតុំ. បយោជកេ-ភាវេតុំ ភាវយិតុំ, ការេតុំ ការយិតុំ ការាបេតុំ ការាបយិតុំ ឥច្ឆតិ+ច្ចាទិ.

ឯវំ ក្រិយត្ថក្រិយាយំ គម្យមានាយំ, យថា សុពោទ្ធុំ វក្ខាមិ, ឯវំ ទដ្ឋុំ គច្ឆតិ, គន្តុ+មារភតិ, គន្តុំ បយោជេតិ, ទស្សេតុ+មាហ ឥច្ចាទិ.

អរហសក្កាទីសុបិ សិទ្ធំ, តថា កាល សមយវេលាសុ. កោ តំ និន្ទិតុ+មរហតិ, រាជា ភវិតុ+មរហតិ, អរហោ ភវំ វត្តុំ, សក្កា ជេតុំ ធនេន វា, សក្កា លទ្ធុំ, ភស្ស ធោ. កត្តុំ សក្ខិស្សតិ. ភព្ពោ និយាមំ ឱក្កមិតុំ, អភព្ពោ កាតុំ. អនុច្ឆវិកោ ភវំ ទានំ បដិគ្គហេតុំ, ឥទំ កាតុំ អនុរូបំ, ទានំ ទាតុំ យុត្តំ, ទាតុំ វត្តុញ្ច លភតិ. ឯវំ វដ្ដតិ ភាសិតុំ, ឆិន្ទិតុំ ន ច កប្បតិ ឥច្ចាទិ. តថាកាលោ ភុញ្ជិតុំ, សមយោ ភុញ្ជិតុំ, វេលា ភុញ្ជិតុំ.

អលមត្ថេបិ សិទ្ធំ, អលមេវ ទានានិ ទាតុំ, អលមេវ បុញ្ញានិ កាតុំ.