៩៦. មនានំ និគ្គហីតំ

មការ+នការន្តានំ ក្រិយត្ថានំ និគ្គហីតំ ហោត្យ+យការេ ព្យញ្ជនេ. វគ្គន្តំ, គមិយតីតិ គន្តព្ពោ. គមិតព្ពំ គមនីយំ. ខន=ខណ=អវទារណេ, និគ្គហីតំ វគ្គន្តត្តញ្ច, ខញ្ញតេតិ ខន្តព្ពំ អាវាដំ ខនិតព្ពំ ខននីយំ. ហន=ហិំសាយំ, ហញ្ញតេតិ ហន្តព្ពំ ហនិតព្ពំ ហននីយំ. មន=ញាណេ, មញ្ញតេតិ មន្តព្ពោ មនិតព្ពោ. ‘‘បទាទីនំ ក្វចី’’តិ យុក, ចវគ្គាទិម្ហិ កតេ មញ្ញិតព្ពំ មញ្ញនីយំ.

បូជ=បូជាយំ, ‘‘ចុរាទិតោ ណី’’តិ ណិម្ហិ ញុការស្ស គុរុត្តា ឱការាវុត្តិ ‘‘យុវណ្ណាន+មេឱ បច្ចយេ’’តិ ឯការេ បូជេតព្ពោ ឩម្ហិ អយាទេសេ បូជយិតព្ពោ បូជនីយោ ភគវា.

កត្តរិ-យា=បាបុណនេ, នីយតីតិ និយ្យានិយោ មគ្គោ, គច្ឆន្តីតិ គមនីយា ភោគា. ករណេ-នហ=សោចេយ្យេ, នហាយន្ត្យ+នេនាតិ នហានីយំ ចុណ្ណំ. សម្បទានេ-ទា=ទានេ, សំ+បបុព្ពោ, សម្មា បទីយតេ អស្សាតិ សម្បទានិយោ ព្រាហ្មណោ.