៥,២១. ទិវាទីហិ យក

ទិវាទីហិ កត្តរិ លវិសយេ យក ហោតិ. កការោ កានុពន្ធការិយត្ថោ, ឯវ+មុបរិ ច. វស្ស ពការេ បុព្ពរូបំ, សោ ជុតំ ទិព្ពតិ, ទិព្ពន្តិ ឥច្ចាទិ. កម្មេ-ក្យេ តេន ទិព្ពតិ, ទិព្ពន្តិ ឥច្ចាទិ. ទិព្ពិស្សតិ, តេន ទិព្ពិស្សតិ. អទិព្ពិ ទិព្ពិ. តេន អទិព្ពិ ទិព្ពិ. អទិព្ពិស្ស. តេន អទិព្ពិស្ស. ទិព្ពេ ទិព្ពេយ្យ. តេន ទិព្ពេ ទិព្ពេយ្យ. ទិព្ពតុ. តេន ទិព្ពតុ ឥច្ចាទិ.

សិវ=តន្តុសន្តានេ, សិព្ពតិ, សិព្ពន្តិ ឥច្ចាទិ. បទ=គមនេ, ឧបុព្ពោ, ចវគ្គបុព្ពរូបានិ, ឧប្បជ្ជតិ, ឧប្បជ្ជរេ ឧប្បជ្ជន្តិ ឥច្ចាទិ. កម្មេក្យេ តេន បដិបជ្ជតេ ឥច្ចាទិ. ភាវេ-ឧប្បជ្ជតេ តយា. ពុធ=អវគមនេ, ឈការបុព្ពរូបានិ យក្ខរេសុ. ធម្មំ ពុជ្ឈតិ, ពុជ្ឈរេ ពុជ្ឈន្តិ ឥច្ចាទិ. កម្មេ-មយា ធម្មោ ពុជ្ឈតេ ឥច្ចាទិ. យុធ=សម្បហារេ, យុជ្ឈតិ+ច្ចាទិ. នហ=ពន្ធនេ, ‘‘ហស្ស វិបល្លាសោ’’តិ យេ វិបល្លាសោ, សន្នយ្ហតិ+ច្ចាទិ. មន=ញាណេ, ញ្ញការ+បុព្ពរូបានិ, មញ្ញតិ+ច្ចាទិ. តុស=តុដ្ឋិម្ហិ, បុព្ពរូបេ តុស្សតិ+ច្ចាទិ. សម=ឧបសមេ, សម្មតិ+ច្ចាទិ.

ជន=ជននេ, ‘‘ជនិស្សា’’តិ អា ហោតិ កានុពន្ធេ ពហុលាធិការា, សោ ជាយតិ, ជាយន្តិ+ច្ចាទិ. កម្មេ-ជនិតុំ បយោជេតីតិ ‘‘បយោជកព្យាបារេ ណាបិ ចេ’’តិ ណិម្ហិ ‘‘អញ្ញត្រាបី’’តិ វុទ្ធិបដិសេធេ ក្យម្ហិ ‘‘ទីឃោ សរស្សា’’តិ ទីឃេ ច កតេ តេន ជនីយតិ, ជនីយន្តិ ឥច្ចាទិ. សោ ជាយិស្សតិ. តេន ជនិស្សតិ. សោ អជាយិ, តេន អជនីយិ. សោ អជាយិស្ស, តេន អជនីយិស្ស. សោ ជាយេ ជាយេយ្យ, តេន ជនីយេយ្យ. សោ ជាយតុ, តេន ជនីយតុ ឥច្ចាទិ. (ទិវាទិនយោ).

តុទ=ព្យថនេ,