៥,១១៣. យជស្ស យស្ស ដិ+យីតិ

យជស្ស យស្ស ដិ+យី ហោន្តិ កានុពន្ធេតិ ពហុលាធិការា ត្យាទិវិសយេបិ ក្យេ បុព្ពរូបេ ច ឥជ្ជតិ យិជ្ជតិ មយា ពុទ្ធោ. សោ យជិស្សតិ, តេន ឥជ្ជិស្សតេ យិជ្ជិស្សតេ. សោ យជី, តេន ឥជ្ជិ យិជ្ជិ. សោ យជិស្សា, តេន ឥជ្ជិស្សា យិជ្ជិស្សា. សោ យជេយ្យ, តេន ឥជ្ជេយ្យ យិជ្ជេយ្យ. សោ យជតុ, តេន ឥជ្ជតុ យិជ្ជតុ ឥច្ចាទិ.

វទ=វចនេ, ‘‘គមវទា’’ ទិនា វទស្ស វជ្ជាទេសោ វា, លស្ស ‘‘ឩលស្សេ’’តិ ក្វចិ ឯ ច, វជ្ជតិ វទេតិ វទតិ, វជ្ជេន្តិ វទេន្តិ ឥច្ចាទិ. កម្មេ – ‘‘ក្យស្សា’’តិ ឦញ, វជ្ជីយតិ វជ្ជតិ វទីយតិ, វជ្ជីយន្តិ វជ្ជន្តិ វទីយន្តិ. វទិស្សតិ, វទិស្សន្តិ. អវទី វទី, អវទិំសុ វទិំសុ. អវទិស្ស វទិស្ស. វជ្ជេ វជ្ជេយ្យ វទេ វទេយ្យ, វជ្ជេយ្យុំ វទេយ្យុំ. វជ្ជេតុ វទេតុ វទតុ ឥច្ចាទិ យថាគមំ ញេយ្យំ.

កមុ=បទវិក្ខេបេ, ‘‘បរោក្ខាយញ្ចា’’តិ ចគ្គហណេន កម កម ឥតិ ទ្វិត្តេ អនាទិព្យញ្ជនលោបេ លវិករណេ ‘‘កវគ្គហា’’ ទិនា កស្ស ចេ និគ្គហីតាគមេ ច កតេ ចំកមតិ កមតិ ឥច្ចាទិ. ចល=កម្បនេ, ចំចលតិ. ជល+ទល=ទិត្តិយំ, ទ្វិត្តេ ទទ្ទល្លតិ ឥច្ចាទិ. (សវុទ្ធិកភូវាទិនយោ).

ហូ+ភូ=សត្តាយំ, ត្យាទីសុ ‘‘កត្តរិ លោ’’តិ លោ, តស្ស លោបេ ‘‘យុវណ្ណាន+មេឱ បច្ចយេ’’តិ ឱការោ. សោ ហោតិ, តេ ហោន្តិ. ហោសិ, ហោថ. ហោមិ, ហោម ឥច្ចាទិ. ភាវេ-តេន ហូយតិ ហូយតេ.