៤៨. ហិស្ស+តោ លោបោ

អតោ បរស្ស ហិស្ស វា លោបោ ហោតិ. ត្វំ សុខី ភវ ភវាហិ, ហិម្ហិ ទីឃោ. ‘‘ឯយ្យាថា’’ទិនា វ្ហោក, តុម្ហេ សុខិតា ភវថវ្ហោ ភវថ. អហំ សុខី ភវាមិ, មយំ សុខិនោ ភវាម. បរច្ឆក្កេ-តថា ភវតំ, ភវន្តំ. ភវស្សុ, ភវវ្ហោ. ភវេ ភវាមសេ. កម្មេ-តយា អនុភូយតុ, អនុភូយន្តុ ឥច្ចាទិ. ភាវេ-ភូយតុ, ភូយតំ.

អាណត្តិយំ-ទេវទត្តោ ទានិ ឱទនំ បចតុ, បចន្តុ ឥច្ចាទិ. កម្មេ-តេន ឱទនោ បច្ចតុ ឥច្ចាទិ. តថា សោ គាមំ គច្ឆតុ ឥច្ចាទិ. ‘‘ឩ លស្សេ’’តិ លស្សេ+ការេ គមេតុ, គមេន្តុ ឥច្ចាទិ. ឃម្មាទេសេ ឃម្មតុ, ឃម្មន្តុ ឥច្ចាទិ. កម្មេ-គច្ឆីយតុ ឥច្ចាទិ. តថា គមីយតុ ឥច្ចាទិ.

វិធិម្ហិ-លស្ស លោបេ លុត្តេ វុទ្ធិ, ឥធ បព្ពតោ ហោតុ.

និមន្តនេ-អធិវាសេថ តុម្ហេ ភន្តេ ភគវា ភោជនំ, វសតិស្ស ‘‘ចុរាទិតោ ណី’’តិ ណិម្ហិ ‘‘អស្សា ណានុពន្ធេ’’តិ អា, ‘‘យុវណ្ណាន+មេឱ បច្ចយេ’’តិ ឯ ច ហោតិ. ឥធ និស្សីទតុ ភវំ, សទស្ស ‘‘ជរ+សទាន+មីម វា’’តិ ឦម, មនុពន្ធត្តា អន្តសរតោ ឦម.

អជ្ឈេសនេ-ទេសេតុ ភន្តេ ភគវា ធម្មំ, ឯត្ថ ចុរាទិត្តា បុរិមសមំ.

អនុមតិយំ-បុច្ឆ វាសវ មំ បញ្ហំ, បវិសតុ ភវំ. ឯត្ថ បុច្ឆតោ ហិស្ស លោបោ. ឯវំ និសីទ.

បត្ថនា=យាចនា, តត្រ-ទទ=ទានេ, ទទាហិ មេ គាមវរានិ បញ្ច, ទាតោ លស្ស ឯការេ ច ឯកំ មេ នយនំ ទេហិ.

បត្តកាលេ-សម្បត្តោ តេ កាលោ កដករណេ, កដំ ករោតុ ភវំ. ឯត្ថ ‘‘តនាទិត្វោ’’តិ ឱ.

ត្វាទី ឯយ្យាទយោ វត្ត-មានា សម្បតិ,+នាគតេ;

ភវិស្សតិ, បរោក្ខាទិ-ចត្តារោ+តីតកាលិកា.