៥,១. តិជ+មានេហិ ខ+សា ខមា+វីមំសាសុ

ខន្តិយំ តិជា, វីមំសាយំ មានា ច ខ+សបច្ចយា ហោន្តិ យថាក្កមំ. តិជ=និសានេ, អការស្សា+បយោគោ. ខេ ‘‘លហុស្សុបន្តស្សា’’តិ បត្តេ+ការស្ស ‘‘អញ្ញត្រាបី’’តិ បដិសេធោ. យការវជ្ជិតព្យញ្ជនស្ស ‘‘បររូប+មយការេ ព្យញ្ជនេ’’តិ បររូបញ្ច. ‘‘ចតុត្ថទុតិយា’’ ទិនា បឋមក្ខរកការេ ច ‘‘ខឆសាន+មេកស្សរោ+ទិ ទ្វេ’’តិ តិក្ខ តិក្ខ ឥតិ ទ្វិភាវេ ‘‘លោបោ+នាទិព្យញ្ជនស្សា’’តិអាទិតោ+ញ្ញស្ស ព្យញ្ជនស្ស លោបេ ច កតេ តិតិក្ខាធាតុតោ ត្យាទិបច្ចយ+លវិករណានិ. តិតិក្ខតិ ឥច្ចាទិ បុរិមសមំ. កម្មេ-តិតិក្ខីយតិ ឥច្ចាទិ. ឥតោ បរំ កម្មោទាហរណំ ន ករិស្សាម.

មាន=បូជាយំ+តិមស្មា សបច្ចយ, ទ្វិត្តាទិម្ហិ កតេ ‘‘មានស្ស វី បរស្ស ច មំ’’តិ បុព្ពមានស្ស វី ច បរមានស្ស មញ្ច ហោតិ. វីមំសធាតុតោ តិបច្ចយាទិម្ហិ កតេ វីមំសតិ ឥច្ចាទិ. តិតិក្ខិស្សតិ, វីមំសិស្សតិ ឥច្ចាទិ. ឯវ+មុបរិបិ អជ្ជតនាទីសុបិ យោជេតព្ពំ. បយោជកត្តា ណិ, ‘‘ណិណាប្យាបីហិ វា’’តិ លវិករណំ, តេជយតិ តេជេតិ. តថា ចុរាទិត្តា ន លវិករណំ, មានយតិ មានេតិ.