១២៧. កោសជ្ជា+ជ្ជវ+បារិសជ្ជ+សោហជ្ជ+មទ្ទវា+រិស្សា+សភា+ជញ្ញ+ថេយ្យ+ ពាហុសច្ចា

ឯតេ សទ្ទា និបច្ចន្តេ ណានុពន្ធេ. កុសីតស្ស ភាវោតិ ភាវេ ណ្យោ ហោតិ, ឥមិនា ឦស្ស អការេ ច តស្ស ជេ ច កតេ យស្ស បុព្ពរូបំ, កោសជ្ជំ. ឧជុនោ ភាវេ អជ្ជវំតិ ណោ, ឥមិនា ឧស្ស អត្តំ, ‘‘ឧវណ្ណស្សា+វង សរេ’’តិ អវងអាទេសេ ជស្ស ទ្វិត្តំ. បរិសាសុ សាធូតិ វាក្យេ ‘‘ណ្យោ តត្ថ សាធូ’’តិ ណ្យោ, ឥមិនា ជាគមោ ច, ‘‘ព្យញ្ជនេ ទីឃរស្សា’’តិ អាស្ស រស្សេ ច កតេ ជស្ស បុព្ពរូបំ, បារិសជ្ជោ. ឥមិនា កមេន វាក្យេនេវ សទ្ទសិទ្ធិ វេទិតព្ពា. សុហទយោវ សុហជ្ជោ, តស្ស ភាវោ សោហជ្ជំ, ឥមិនា អយលោបោ. មុទុនោ ភាវោ មទ្ទវំ, ឥមិនា ឧស្ស អត្តំ. ឥសិនោ ឥទំ ភាវោ វា អារិស្សំ, ណ្យបច្ចយេ ឥមិនា អារញាគមេ ‘‘លោបោ+វណ្ណិ+វណ្ណានំ’’តិ អន្តឥការលោបោ ច. ឧសភស្ស ឥទំ ភាវោ វា អាសភំ, ឥមិនា ឧស្ស អា. អាជានីយស្ស ភាវោ អាជញ្ញំ, ឥមិនា យលោបេ ‘‘លោបោ+វណ្ណិ+វណ្ណានំ’’តិ ឦការលោបោ. ថេនស្ស ភាវោ ថេយ្យំ, ឥមិនា នស្ស យការោ. ពហុស្សុតស្ស ភាវោ ពាហុសច្ចំ, ឥមិនា ឧស្ស អការោ សំយោគាទិលោបោ. (ភាវតទ្ធិតំ).