៣. យថា ន តុល្យេ

យថាសទ្ទោ តុល្យត្ថេ វត្តមានោ ស្យាទ្យន្តេន សហេ+កត្ថោ ន ភវតិ. យថា ទេវទត្តោ, តថា យញ្ញទត្តោ. ឯត្ថ ឧបមានភូតោ យថាសទ្ទោ ‘តថា យញ្ញទត្តោ’តិ ឧបមេយ្យ+មបេក្ខតិ, តស្មា ‘‘សាបេក្ខ+មសមត្ថំ ភវតី’’តិ ញាយា អសមាសេ ‘‘ន តុល្យេ’’តិ បដិសេធោ កិមត្ថ+មិតិ ចេ. យស្មា ‘‘យថា ទេវទត្តោ’’តិ សមុទាយមេវ ឧបមានំ ភវតិ, ន វិសុំ យថាសទ្ទោ, តស្មា សមុទាយស្សេវ ឧបមេយ្យសាបេក្ខត្តេ ន អសាមត្ថិយតា ន វិសុំ យថាសទ្ទស្ស, តស្មា សាទិស្សេ បត្តសមាសស្ស បដិសេធត្ថ+មិទំ. តុល្យត្ថេតិ វត្តព្ពេ តុល្យំ វិនា តុល្យតា នត្ថីតិ តុល្យត្ថេតិ អវត្វា តុល្យេតិ វុត្តំ.

យថាកថញ្ចិ សាទិស្សំ, ញាយតេ យត្ថ សម្ភវំ;

ឧបមា នាម សា តស្សា, បបញ្ចោ ពហុធា ភវេ.