២៣២. អបាទាទោ បទតេ+កវាក្យេតិ

អធិការោ. ឯត្ថ បាទោ នាម គាថាយ ចតុត្ថំសោ, តស្មា ‘‘តុម្ហេហិ បុញ្ញំ បសុតំ អនប្បកំ’’តិ ឯត្ថ វោ ន ហោតិ. ឯត្ថ បទន្តិ វុត្ត សទ្ទោ សភាវតោ –

អាកាសវាយុប្បភវោ សរីរា,

សមុច្ចរំ វត្ត+មុបេតិ នាទោ;

ឋានន្តរេ សុប្បដិហញ្ញមានោ,

វណ្ណត្ត+មាគច្ឆតិ សោ តុ សទ្ទោតិ –

វុត្តត្តា ឯកេកោ វណ្ណោ សទ្ទោ នាម, តព្ពណ្ណសមូហោ បទំ, តប្បទសមូហោ វាក្យញ្ច. តថា ហិ –

វិតត្យន្តំ បទំ តស្ស, ច យោ វាក្យន្តិ មន្វយំ;

ឧបចារា វណ្ណសទ្ទ-វាច្ចំ តំ ន បរិច្ចជេ.

តំ បទញ្ច –

បទំ ចតុព្ពិធំ វុត្តំ, នាមា+ខ្យាតោ+បសគ្គជំ;

និបាតជញ្ច តញ្ញូ ហិ, អស្សោ ខល្វា+ភិធាវតីតិ.

តំ វាក្យញ្ច –

ឯកាខ្យាតោ បទច្ចយោ, សិយា វាក្យំ សការកោតិ –

វុត្តំ. តស្មា ‘‘វិភត្យន្តំ បទំ, បទសមូហោ វាក្យ’’ន្តិ ច វុច្ចតិ.