២០០. កិ+មំសិសុ សហ នបុំសកេ

អំសិសុ សហ តេហិ កិំ សទ្ទស្ស កិំហោតិ នបុំសកេ. កាទេសស្ស សាមញ្ញត្តា ‘‘វិសេសវិហិតា វិធយោ សាមញ្ញវិធយោ និសេធេន្តី’’តិ ញាយា កិំអាទេសេន កាទេសនិវុត្តិ. កិំ, កានិ. កិំ, កេ កានិ. កេនេ+ច្ចាទិ បុព្ពេវ.

ឯកសទ្ទោ សំខ្យា+តុល្យ+ញ្ញ+សហាយវចនោ. យទា សំខ្យាវចនោ, តទា ឯកវចនន្តោ, អត្រ ឯកសទ្ទោ សំខ្យេយ្យវាបី. អញ្ញត្រ តុល្យាទីសុ ពហុវចនន្តោបិ. ឯកោ, ឯកេ. ឯកា, ឯកា ឯកាយោ. ឯកំ, ឯកានិ+ច្ចាទិ សព្ពសមំ តិលិង្គេ.

តុល្យេ ឯកោ វិលាសោ ទ្វិន្នំ កុមារានំ, ឯកេ វណ្ណសទ្ទា ទ្វិន្នំ កុមារានំ. អញ្ញត្ថេ ឯកោ អាចរិយោ ឯវ+មាហ, ឯកេ អាចរិយា ឯវ+មាហំសុ. អសហាយតេ ឯកោវ អរញ្ញំ បវិសិត្វា.

ឯកោ, ឯកេ. ឯកា, ឯកា ឯកាយោ. ឯកំ ឯកានិ+ច្ចាទិ សព្ពសមំ តិលិង្គេ. ស្សា+ស្សំសុ បន ‘‘ស្ស’’មាទិនា ឥ, ឯកិស្សា ឯកាយ, ឯកិស្សំ ឯកាយំ ឯកាយ.

ឥធ អត្តបរគារវវសេន ឯកស្សាបិ ‘‘អម្ហាកំ រញ្ញោ’’តិបិ ‘‘ឯកេ អាចរិយា’’តិបិ ពហុវចនស្ស លោកេន ឥច្ឆិតត្តា ពហុលវិធានា ពហុវចនេនេវ សិជ្ឈតិ.

តុម្ហ+អម្ហសទ្ទា អលិង្គា, តថា ឧភ+កតិ+ទ្វិសទ្ទា, បញ្ចាទយោ អដ្ឋារសន្តា ច. តុម្ហ សិ, អម្ហ សិ.