១៦៧. នជ្ជា ធយាស្វាម

យោសុ នទីសទ្ទស្ស អាម វា ហោតិ. សុញ+នក+អាម ឥត្យាទិ ញ្ញការ+កការ+មការា អាគមលិង្គា. ស ច ‘‘មានុពន្ធោ សរាន+មន្តា បរោ’’តិ មានុពន្ធត្តា សរាន+មន្តា បរោ ហោតីតិ ឦការា បរោ. ‘‘យវា សរេ’’តិ យេ ទស្ស ជោ, យស្ស ច បុព្ពរូបំ, នជ្ជាយោ. វា ប-លោប+យោលោបេសុ នជ្ជោ នទី នទិយោ ឥច្ចាទិ.

ឦការន្តំ.

យាគុ, យាគូ យាគុយោ. ភោ យាគុ, យាគូ យាគុយោ. យាគុំ, យាគូ យាគុយោ. យាគុយា, យាគូហិ យាគូភិ. យាគុយា, យាគូនំ. យាគុយំ យាគុយា, យាគូសុ. ឯវំ ធាតុ+ធេនុ+កាសុ+ទទ្ទុ+កណ្ឌុ+កច្ឆុ+រជ្ជុ+ករេណុ+សស្សុ+បិយង្គុ អាទយោ.

ឯត្ថ ធាតុសទ្ទោ ‘‘មនោធាតុនា’’តិ អភិធម្មាវតារេ វុត្តត្តា បុល្លិង្គេបិ ទិស្សតិ, តំ សក្កដមតេន វុត្តន្តិ កេចិ.

មាតា, មាតរោ. ភោ មាត មាតា, មាតរោ. មាតរំ, មាតរេ មាតរោ. មាតរា, នាស្ស យាទេសេ ‘‘យេ បស្សា’’តិ យោគវិភាគា បលោបោ, អនុញ្ញាតោ អហំ មត្យា, អញ្ញត្រ មាតុយា, មាតរេហិ មាតរេភិ មាតូហិ មាតូភិ. សលោបេ មាតុ, បសញ្ញត្តា ‘នោ’ ន ហោតិ, មត្យា មាតុយា, មាតរានំ មាតានំ មាតូនំ. ឆដ្ឋិវិសយេ ‘‘មាតុស្ស សរតី’’តិបិ ទិស្សតិ. មាតរិ, មាតរេសុ មាតូសុ. វិសេសា+ញ្ញត្រ បិតុសមំ. ឯវំ ធីតុ+ទុហិតុសទ្ទា.

ឧការន្តំ.

រស្សនិសេធេ សិលោបេ ច កតេ ជម្ពូ. ‘‘ជន្ត្វា’’ទិនា យោលោបេ, ជម្ពូ ជម្ពុយោ. ‘‘គេ វា’’តិ រស្សេ ភោ ជម្ពុ, ជម្ពូ ជម្ពុយោ. ជម្ពុំ, ជម្ពូ ជម្ពុយោ. ជម្ពុយា, ជម្ពូហិ ជម្ពូភិ. ជម្ពុយា, ជម្ពូនំ. ជម្ពុយំ ជម្ពុយា, ជម្ពូសុ.

ឯវំ វធូ ច សរភូ, សរពូ សុតនូ ចមូ;

វាមូរូ នាគនាសុរូ, សមានា ខលុ ជម្ពុយា.

ឩការន្តំ.

គោ, គាវោ គវោ ឥច្ចាទិ បុល្លិង្គសមំ.

ឥត្ថិលិង្គំ.

នបុំសក, សិ –