១០. បុរេជាតបច្ចយោ

តិវិធោ បុរេជាតបច្ចយោ. វត្ថុបុរេជាតបច្ចយោ ច អារម្មណបុរេជាតបច្ចយោ ច វត្ថារម្មណបុរេជាតបច្ចយោ ច.

តត្ថ វត្ថុបុរេជាតោ ច វត្ថារម្មណបុរេជាតោ ច បុព្ពេ និស្សយបច្ចយេ និស្សយនាមេន វុត្តា ឯវ.

អារម្មណបុរេជាតោ នាម បច្ចុប្បន្នានិ អដ្ឋារសនិប្ផន្នរូបានិ ឯវ. តេសុបិ បច្ចុប្បន្នានិ រូបសទ្ទាទីនិ បញ្ចារម្មណានិ បញ្ចន្នំ បញ្ចវិញ្ញាណ វីថិចិត្តានំ និយមតោ អារម្មណបុរេជាតបច្ចយា ហោន្តិ. យថា ហិ វីណាសទ្ទា នាម វីណាតន្តីសុ វីណាទណ្ឌកេន បហរណ បច្ចយា ឯវ ឧប្បជ្ជន្តិ. ឯវញ្ច សតិ តេ សទ្ទា បុរេជាតាហិ វីណាតន្តិ វីណាទណ្ឌកេហិ វិនា ឧប្បជ្ជិតុំ ន សក្កោន្តិ. ឯវមេវំ បញ្ច វិញ្ញាណ វីថិចិត្តានិបិ បញ្ចសុ វត្ថុទ្វារេសុ បញ្ចន្នំ អារម្មណានំ អាបាតាគមន បច្ចយា ឯវ ឧប្បជ្ជន្តិ. អាបាតាគមនញ្ច តេសំ ទ្វិន្នំ ឋិតិបត្តកាលេ ឯវ ហោតិ. ន កេវលញ្ច តស្មិំ កាលេ តានិ បញ្ចារម្មណានិ តេសុ បញ្ចវត្ថូសុ ឯវ អាបាតមាគច្ឆន្តិ. អថ ខោ ភវង្គមនោទ្វារេបិ អាបាតំ អាគច្ឆន្តិយេវ. តស្មិំ អាបាតគមនត្តា ឯវ តំ ភវង្គម្បិ ទ្វិក្ខត្តុំ ចលិត្វា ឧបច្ឆិជ្ជតិ, ភវង្គុបច្ឆេទេ ឯវ តានិ វីថិចិត្តានិ ឧប្បជ្ជន្តិ. ឯវញ្ច សតិ តានិ វីថិចិត្តានិ បុរេជាតេហិ វត្ថុ ទ្វារារម្មណេហិ វិនា ឧប្បជ្ជិតុំ ន សក្កោន្តីតិ. តានិ បន សព្ពានិបិ អដ្ឋារសនិប្ផន្នរូបានិ និរុទ្ធានិ ហុត្វា អតីតានិបិ ហោន្តិ, អនុប្បន្នានិ ហុត្វា អនាគតានិបិ ហោន្តិ. ឧប្បន្នានិ ហុត្វា បច្ចុប្បន្នានិបិ ហោន្តិ. សព្ពានិបិ មនោវិញ្ញាណវីថិចិត្តានំ អារម្មណានិ ហោន្តិ. តេសុ បច្ចុប្បន្នានិ ឯវ តេសំ អារម្មណបុរេជាតបច្ចយា ហោន្តិ. យទា ទូរេ វា បដិច្ឆន្នេ វា ឋិតំ តំ តំ អារម្មណវត្ថុំ មនសា ឯវ អារម្មណំ ករោតិ, តទា តំ តំ វត្ថុ សចេ តត្ថ តត្ថ វិជ្ជមានំ ហោតិ, បច្ចុប្បន្នំ នាម ហោតិ. បុរេជាតបច្ចយទីបនា និដ្ឋិតា.