ទ្វិសដ្ឋិមបរិច្ឆេទ

បរមណ្ឌលាភិគមនោ

១. អត្តនាភិមតស្សា’សុ, ជាតទេសស្ស បត្តិយា;

សម្បុណ្ណមនសង្កប្បោ, ទុស្សង្កបវិវជ្ជិតោ.

២. វជិរូបមោរុបញ្ញា, ពលេន គុរុសន្តិកេ;

លហុំ ពហុញ្ច គណ្ហន្តោ, សិប្បជាតមនេក កំ.

៣. ជិនាគមេសុ នេកេសុ, កោដិល្លា ទីសុ នីតិសុ;

សទ្ទសត្ថេ ច កាវេយ្យេ, សនិឃណ្ឌុក កេដុភេ.

៤. នច្ចគីតេសុ សត្ថេសុ, ហត្ថិសិប្បាទិកេសុ ច;

ធនុ ខគ្គាទិនេកេសុ, សត្ថេសុ ច វិសេសតោ.

៥. បារប្បត្តោ វិនីតត្តោ, បិតុ រញ្ញោ សមាចរិ;

អធិប្បាយានុកុលំ’វ, សទា ភត្តិបុរស្សរោ.

៦. តទា សទា ទរាចារ-គុណារាធិតមានសោ;

បិយេន វិយ មិត្តេន, តេន សទ្ធិំ មហីបតិ.

៧. ឧយ្យានជលកីឡាទិ-សុខំ នានប្បការកំ;

អនុភោត្វា សទេសស្មិំ, សញ្ចរន្តោ តហិំ តហិំ.

៨. ឯកទាសង្ខសេនាធិ-បតិនា ទឡ្ហភត្តិនា;

សរដ្ឋសីមា រក្ខាយ, យោ ជិតេន ពលីយសា.

៩. អជ្ឈាវុត្ថស្ស ច ពលត្ថ-លិនមស្ស ច សន្តិកំ;

គាមសា’គញ្ឆិ សុត្វាន, តមត្ថំ ធជិនីបតិ.

១០. គាមំ តំ សាធុកំ សជ្ជុ, សជ្ជាបេត្វា សបុត្តកំ;

បច្ចុគ្គន្ត្វា មហីបាលំ, បណមិត្វា ឋិតោ តទា.

១១. បិតា បុត្តោ ឧភោ តស្ស, សម្ភាសិយ បិយំ វចោ;

នេកធា’រាធិតា តេន, តំ គាមំ សមុបាគគុំ.

១២. តហិំ កតិចិ ភូបាលោ, វាសរេ វីតិនាមិយ;

សេនាបតិំ សមាហូយ, ឥទំ វចនំ មព្រវិ.

១៣. បុត្តោ មេ ទានិវយសិ, ឋិតោ’ បនយនារហេ;

តស្សោបនយនំ កាតុំ, មហោបករណំ លហុំ.

១៤. សជ្ជេតព្ពន្តិ តំ សុត្វា, សោបិ សេនាធិនាយកោ;

សព្ពុបករណំ ខិប្បំ, មង្គលត្ថំ សុសជ្ជយិ.

១៥. សុគន្ធ ទីបបុប្ផាទិ-វត្ថូហិ ទិវសត្តយំ;

បុព្ពការំ ករិត្វាន, មហន្តំ រតនត្តយេ.

១៦. វេទិកាចារទក្ខេហិ, ទ្វិជេហិ បុថុវីបតិ;

សម្បភាវានុ រូបំវ, មង្គលំ តំ សមាបិយ.

១៧. បរក្កមកុមារេន, តេន សទ្ធិំ សមារភិ;

វសន្តកីឡំ មហតិំ, សាមច្ចោ កីឡិតុំ តទា.

១៨. រាជា កិត្តិ សិរីមេឃោ-រោហណេ វសតោ តទា;

សិរីវល្លភនាមស្ស, សភាតុ មរណម្បិ ច.

១៩. មាណភរណនាមស្ស, រជ្ជលាភញ្ច ទេវិយា;

មិត្តាយ បដិលាភញ្ច, សិរីវល្លភសូនុ នោ.

២០. រោហណាគតទូតេហិ, សុណិត្វា សកភាតុនោ;

កាលក្រិយាយ សញ្ជាត-សោកវេគំ សុទុស្សហំ.

២១. មិត្តាយតនយុប្បត្តិ បវត្តិំ សវណេន តំ;

វិនេយ្យ វិរតោ តម្ហា, វសន្តសមយុស្សវា.

២២. និវត្តេត្វាន តត្ថេវ, សេនានិំ សង្ខនាមកំ;

បុត្តេន សហ សោ សង្ខ-ត្ថលិ នាមំ បុរំ គមិ.

២៣. បរក្កមកុមារេន, តេន សទ្ធិំ តហិំ សុខំ;

វសតោ តស្ស ភូបស្ស, វស្សមេកមតិក្កមិ.

២៤. មាណាភរណភូបស្ស, ទេវី ចាបិ បភាវតី;

លភិត្ថ ទុតិយា កិត្តិ-សិរី មេឃវ្ហយំ សុតំ.

២៥. សុណិត្វា តញ្ច សោ អម្ហំ, វំសោ ជាតោ មហា’’ឥតិ;

អហុ កិត្តិសិរីមេឃោ, តទា អត្តមនោ ភុសំ.

២៦. លំកាទីបោបភោគេក-ហេតុនា មហតា សតា;

អសាធារណភូភេន, ចោទិតោ បុញ្ញកម្មុនា.

២៧. កុមារោ សោ’ថ បិតរា, បិយមិត្តេ វិយត្តនិ;

ករិយមានំ សស្នេហំ, មហន្តំ ចោ’បលាលនំ.

២៨. សចិវានមនេកេសំ, ភយភត្តី បុរស្សរំ;

ក្រិយមានមុបដ្ឋានំ, ន មញ្ញន្តោ តិណាយបិ.

២៩. លំកាទីបមិមំ សព្ព មេកច្ឆត្តោ បសោភិតំ;

ខិប្បំ ការេតុកាមោ សោ, សយំ ឥតិ វិចិន្តយិ.

៣០. កេស អក្ខក គីវដ្ឋិ-ទាឋា បត្តាន មេវ ច;

បទចេត្យ មហាពោធិ-សាខានញ្ចាបិ សត្ថុនោ.

៣១. ចតុរាសីតិសហស្សានំ, ធម្មក្ខន្ធាន មេវ ច;

សម្មាសម្ពុទ្ធកប្បានំ, អាធារត្តា ច និច្ចសោ.

៣២. អាករត្តា ច នេកេសំ, មណិមុត្តាទិវត្ថូនំ;

សម្មតោបិ វិសិដ្ឋោតិ, ទីបោនាតិ មហា អយំ.

៣៣. តយោ មេ បិតរោ ភូបា, មាតុលោបិ ច សព្ពថា;

ឯកច្ឆត្តេន វត្តេតុ, មសមត្ថា វិភជ្ជិ’មំ.

៣៤. ភុញ្ជន្តា ឯត្តកេនេវ, កតកិច្ចា មយំ ឥតិ;

មញ្ញន្តា វិគតច្ឆន្ទា’ភិសេកម្ហិ កុលោចិតេ.

៣៥. រដ្ឋេសកេ សកេយេវ, ឥស្សេរំ សម្បវត្តយុំ;

កសិកម្មាទិកំ គាម-ភោជកា វិយ និស្សិតា.

៣៦. តេសុ កិត្តិសិរិ មេឃំ, បេត្តេយ្យំ មេ ឋបេត្វ តេ;

អគមំសុ យថាកម្មំ, សេសា ភូបតយោ តយោ.

៣៧. មច្ចានំ បរមំ អាយុ, វតេ’ទានិ បរិត្តកំ;

ពាលាយុវានោ វុទ្ធា ច, ឥមេ សត្តា’នុបុព្ពសោ.

៣៨. បាបុណិស្សន្តិ មរណ-មីតិ’យំ និយមោបិ ច;

ន ហេវ អស្មិំ លោកស្មិំ, សំវិជ្ជតិ កទាចិបិ.

៣៩. តស្មា សរីរកេ អស្មិំ, ភង្គុរេ សារវជ្ជិតេ;

ហីឡិតេ សារទស្សីហិ, អបេក្ខំ ហិត្វា សព្ពថា.

៤០. បិហនិយេ យសោទេហេ, ចិរដ្ឋាយិម្ហិ សព្ពទា;

អម្ហាទិសេហិ កត្តព្ពោ, រាជបុត្តេហិ អាទរោ.

៤១. ឧម្មគ្គជាតកាទីសុ, ចារិត្តញ្ចាបិ ភូមិសុ;

វិហិតំ ពោធិសត្តេន, វីរភាវាទិនិស្សិតំ.

៤២. រាមាយណភារតាទិ-លោកិយាសុ កថាសុបិ;

រាមស្ស វិក្កមញ្ចេវ, តស្ស រាវណឃាតិនោ.

៤៣. ទុយោធនាទិរាជានោ, ហន្ត្វាយុទ្ធេ បវត្តិតំ;

វិក្កមាតិ សយញ្ចេវ, បញ្ចន្នំ បណ្ឌុសូនូនំ.

៤៤. ឥតិហាសកថាយញ្ច, ទេវាសុររណេ បុរា;

ទុស្សន្តាទិមហីបេហិ, កតញ្ច ចរិតព្ភូតំ.

៤៥. ឧម្មូលិតវតោ តស្ស, នន្ទវំសនរិស្សរេ;

ចារក្កទ្វិជសេដ្ឋស្ស, សុត្វា ពុទ្ធិពលម្បិ ច.

៤៦. សព្ពា នេតានិ លោកម្ហិ, យាវជ្ជទិវសា ភុវិ;

តេសំ អសន្និធានេបិ, សុប្បសិទ្ធិំ គតានិ ហិ.

៤៧. សុលទ្ធំ ជីវិតំ តេសំ, អសាធារណមីទិសំ;

ចរិតាតិសយំ កត្តុំ, សមត្ថា ហោន្តិ យេ ភុវិ.

៤៨. ជាយិត្វា ខត្តវំសម្ហិ, ខត្តវីរវរោធិតំ;

យទិហំ ន ករិស្សាមិ, មោឃា មេ ជាតិ ហេស្សតិ.

៤៩. តេសមព្ភធិកា កាល-សម្បទាយេវ កេវលំ;

មយា តេ អធិកា កិន្តុ, បញ្ញាទីហីតិ ចិន្តិយ.

៥០. បិតុរាជា ច មេ’ទានិ, បច្ឆិមេ វយសិដ្ឋិតោ;

យទិទំ បេត្តិកំ រជ្ជំ, មម ហត្ថគតព្ភវេ.

៥១. រាជលក្ខិវ សោ បេត-ចេតសោ មេ បមាទតោ;

យថិច្ឆិតញ្ចេ ន ភវេ, មហតី ជានិ មេ ភុសំ.

៥២. ឯត្ថេវ និវសន្តោ’ហំ, ចរាបិយ សកេ វរេ;

បរមណ្ឌលវុត្តន្តំ, ជានេយ្យំ យទិ តត្តនោ.

៥៣. រន្ធំ បច្ចត្ថិកានន្តុ, បកាសេតុំ រថាតថំ;

អធិប្បាយានុរូបំ មេ, សមត្ថា វា ន វាចរា.

៥៤. យេ កេចិ’ធ ជនា សន្តិ, សព្ពេ តេ មម សម្មុខា;

ពលីយត្តំ’វ សត្តូនំ, កថយន្តិ អនេកសោ.

៥៥. បច្ចេករដ្ឋសាមីហិ, បិតុភូបេហិ តិហិបិ;

ឯកីភូយ ករិត្វាន, សត្តក្ខត្តុំ មហាហវំ.

៥៦. សាធេតុំ ទុក្ករំ រដ្ឋំ, ភវតេ កាកិនា កថំ;

សិសុនា គណ្ហិតុំ សក្កា, ខុទ្ទរជ្ជោ បភោគិនា.

៥៧. សុករំ មូលភូតស្ស, តស្ស រជ្ជស្ស សាធនំ;

ឥតិ ទុច្ចិន្តំតំ តុយ្ហំ, ទូរេ តព្ពមិទំ’’ឥតិ.

៥៨. កណ្ណេ តត្ថសលាកាយោ, បវេសេន្តា’វ នេកសោ;

មហន្តត្តំ កថេន្តេ’វំ, ពហុធា បរមណ្ឌលេ.

៥៩. អជាននំ យថាភូតំ, វទន្តានំ កុពុទ្ធិនំ;

សព្ពមេតំ វចោ ជាតុ, សទ្ធាតព្ពំ សិយា ន ហិ.

៦០. លេសេនេកេន គន្ត្វាន, ខិប្បំ’វ បរមណ្ឌលំ;

សរូបំ តត្ថ ឧស្សាមិ, អហមេវេតិ ចិន្តយិ.

៦១. យទិ មេ បីតុភូបាលោ, វិញ្ញាយេតំ វិតក្កិតំ;

អភិជាតស្ស បុត្តស្ស, វំសជោតិករស្ស មេ.

៦២. គតស្ស សត្ថុ វិសយ-មនត្ថោបិ សិយា ឥតិ;

អនុកម្បាធិយា មយ្ហំ, គមនំ វារយិស្សតិ.

៦៣. មនោរថស្ស សំសិទ្ធិ, សព្ពថា មេន ហេស្សតិ;

តស្មា និគុឡរូបេន, គមនំ ភទ្ទកំ ឥតិ.

៦៤. លទ្ធាន រត្តិយម ថេកទិនំ ខណញ្ញូ,

សោ តាទិសំ ខណមខីណតរោរូបាយោ;

ជានាតិ នោ សកបិតាគមនំ តថាតំ,

គេហា’ភិនិក្ខមិតថា ចតុរោ កុមារោ.

សុជនប្បសាទសំវេគត្ថាយ កតេ មហាវំសេ

បរមណ្ឌលាភិគមនោ នាម

ទ្វិសដ្ឋិមោ បរិច្ឆេទោ.