តិសដ្ឋិម បរិច្ឆេទ

សេនាបតិវធោ

១. និជាយុធទុតិយស្ស, និក្ខមន្តស្ស តស្ស ហិ;

តំ ខណំ បុរតោ កោ’បិ, សង្ខសទ្ទោ សមុគ្គតោ.

២. តតោ នេកនិមិត្តញ្ញូ, កុមារោ តំ សុណិ ត្វ សោ;

និប្ផជ្ជិស្សតិ សង្កប្បោ, ខិប្បំ យេវេតិ មោទវា.

៣. តត្ថ តត្ថ និយុត្តានំ, រក្ខកានមជានតំ;

និក្ខមិត្វា បុរាវីត-ភយោ សីហបរក្កមោ.

៤. វេគេន មគ្គំ គន្ត្វាន, បញ្ចគាវុតមត្តកំ;

ពទលត្ថលគាមស្ស, បទេសេនាតិ ទូរកេ.

៥. គាម មេកមុបាគញ្ចិ, បិលិំ វត្ថូតិ សញ្ញិតំ;

ជនានំ សន្និបាតាយ, និជានំ សោ កតាវធិ.

៦. និជាគមនតោ បុព្ពំ, បដិមគ្គេ និសីទិតុំ;

បដិលទ្ធនិយោគានំ, យេចិ ទេវាគតេ តទា.

៧. តហិំ ឋិតេ សោ បស្សិត្វា, ឯត្តកា កិន្នុ អាគតា;

ឥតិ បុច្ឆិ កុមារោថ, តេបិ តំ ឥទ មព្រវុំ.

៨. លោកប្បវត្តិំ សកលំ, ជានន្តេនាបិ សាមិនា;

កិមេវ មុច្ចតេ មច្ចុ-ភយំ កេសំ ន វិជ្ជតិ.

៩. ពាលាតានុគតោ សាមិ, ឋិតោ វយសិ ឦទិសេ;

អជ្ជាបិ ហិ មុខេ តុយ្ហំ, ខីរគន្ធោ បវាយតិ.

១០. ន ហេវត្ថិ វិសុំ វិត្ត-ជាតំ សង្គហិតំ តវ;

តទញ្ញា ចោបករណ-សាមគ្គី នេវ វិជ្ជតេ.

១១. ចិរម្បរិចិតត្តេហិ, ទឡ្ហំ សារុឡភត្តិហិ;

វិនា’ម្ហេហិ វិសុំ កេវា’នុគន្តារោ ជនាតុវំ.

១២. កិញ្ចាគតានមម្ហាកំ, បិតា តុយ្ហំ នរិស្សរោ;

ការេស្សតិ ឥទំ នាម, សព្ពថា នេវ ញាយតេ.

១៣. អម្ហាកមន្តរាមគ្គេ, សង្ខោ នាម ចមូបតិ;

មហព្ពលោ មហាវីរោ, រជ្ជសីមំ តមាវសំ.

១៤. បច្ចត្ថិតេ ឋបេត្វញ្ញេ, ឯតេ កតិបយា មយំ;

អញ្ញមញ្ញម្ហិ និយត-មាសង្កី ហទយា ភុសំ.

១៥. អរុណុគ្គមវេលា ច, សមាសន្នតរាធុនា;

ឥតិ ភីតិំ បកាសេសុំ, បច្ចេកំ ហទយស្សិតំ.

១៦. និសម្ម តេសំ វចនំ, វិធាយ មធុរំ សិតំ;

វីតសង្កោ កុមារោ សោ, មុខានេ’សំ វិលោកិយ.

១៧. ចរិត្វាបិ មយា សទ្ធិ-មេតេ’ហោ កាលមេត្តកំ;

ន ជានិំសុ មមំ សព្ពេ, យេសញ្ហិ ភយមិទិសំ.

១៨. ឥតិ វត្វា ភយំ តេសំ, វិនោទេតុ មុបដ្ឋិតំ;

សីហនាទំ តទា’កាសិ, មហន្តំ សីហវិក្កមោ.

១៩. តិដ្ឋន្តុ មានុសា សព្ពេ, មយិ ហត្ថគតាយុធេ;

សក្កោ ទេវានមិន្ទោបិ, កុបិតោ កិំ ករិស្សតិ.

២០. ពាលោតិ មំ ចិន្តយ តំ, ជាតា វោ កុមតីទិសី;

បរិក្ខីយតិ តេ ជាណា, នវយោ’តិ ន កិំ សុតំ.

២១. អជ្ជេវ កាតុមេកេន, កម្មុនា ចិន្តិតេន មេ;

សទេសបរ ទេសដ្ឋា, ភយភត្តី យថាមយិ.

២២. ករិស្សន្តិ យថា វេទំ, ភយំ តុម្ហេ ជហិស្សថ;

តថា រត្តិយមេតាយ, វិភាតាមយ ខណេន មេ.

២៣. ឧន្នតេ ទស្សយិស្សាមិ, ពុទ្ធិ សាហសវិក្កមេ;

អនុធាវតិ មំ តាត, សេតេហិ យទិ វោ ភយំ.

២៤. បុរតោ ហោថ តុម្ហេហិ, វត្វា តេ គហិតាយុធោ;

សាហសេករសោ វីរោ, តម្ហា និក្ខម្ម គាមតោ.

២៥. ឧទយា’ចលសីសដ្ឋំ, ជេតុមាទិច្ចមណ្ឌលំ;

អបរំ រវិ ពិម្ពំវ, បច្ឆិមា សា មុខោទិតំ.

២៦. តេជសា បសរន្តេន, ជនានំ បវិកាសយំ;

នេតម្ពុជវនំ បាតោ, ពទលត្ថលិមាគមិ.

២៧. ជឃសង្ខស្សរេនា’ថ, សេនា នាថោ បពុជ្ឈិយ;

សញ្ជាតសម្ភមោ ញត្វា, រាជបុត្តមុបាគតំ.

២៨. សទ្ធិំ ពលេន មហតា, បធុគ្គម្មកតាទរោ;

បណាមមុចិតំ កត្តុ-មានតោ វសុធាតលេ.

២៩. អម្ហាកមេសជីវន្តោ, កិំ នាមត្ថំ ករិស្សតិ;

មារេតព្ពោ’ធុនេវេតិ, បស្សន្តេ សមុខំ ភដេ.

៣០. នេវា’ទិដ្ឋាបរាធស្ស, មរណំ បុរិសោ ចិតំ;

វធោ វិរោធេ សក្កា’តិ, ឥង្គិតេន និវារិយ.

៣១. សេនាបតិស្ស សោ ហត្ថំ, គហេត្វា សីហសន្និភោ;

ភាសន្តោ មធុរំ វាចំ, តស្សេវា’គញ្ឆិ មន្ទិរំ.

៣២. អថស្ស គមនំ រញ្ញោ, ភវិតព្ពមជានតា;

សរូបំ យាវ ជានាមិ, តាវស្សេតេ សហាគតា.

៣៣. យថា ន សហិតា ហោន្តិ, ឋបេតព្ពា វិសុំ វិសុំ;

កុមារោ’វ មមាគារេ, វសតូ’តិ វិចិន្តិយ.

៣៤. តថា សេនាបតិ កត្វា, វញ្ចេតុំ តំ មហាមតិំ;

ទស្សេត្វា’តិ ថីសក្ការំ, រញ្ញោ ទូតេ ស បេសយិ.

៣៥. កុមារោ’ថ វិទិត្វាន, តេន តំ វញ្ចនំ កតំ;

កត្តព្ពមេត្ថា’កត្វាហ, មុទាសីនោ ភវេ យទិ.

៣៦. ឥច្ឆិតត្ថស្ស និប្ផត្តិ, ន មេ ជាតុ ភវិស្សតិ;

អយំ តាវា’ធុនាវស្សំ, មារេតព្ពោតិ ចិន្តិយ.

៣៧. សហាគតំ បយោជេត្វា, ឃាតាបយិ ចមូបតិំ;

ហតោ សេនាធិនាថោ’តិ, មហន្តំ ខុភិតំ អហុ.

៣៨. សេនានាថភដោ ឯកោ, សុត្វា សេនាបតិំ ហតំ;

មារណំ សាមិនោ មយ្ហំ, កិំ និមិត្តមីតិ ព្រវិ.

៣៩. នេត្តិំ សបាណី សហសា, កុមារំ ឋិតមេកកំ;

អភិទាវិ សសាមិស្ស, បរិចត្តត្តជីវិនោ.

៤០. កុមារស្ស មុខំ ទិស្វា, វេធមានោ ភយេន សោ;

បុរេ ឋាតុមសក្កោន្តោ, បាទមូលេ តតោ សយិ.

៤១. គណ្ហថេ’តន្តិវចនា-កុមារស្ស បុរេតរំ;

តស្សេវេកោ សហចរោ, ភដមេតំ វិឃាតយិ.

៤២. និយោគំ មេ វិនា តេន, កតំ កម្មំ ន យុជ្ជតិ;

ឥតិ ទណ្ឌនមេតស្ស, ការាបេសិយថោចិតំ.

៤៣. អថ តំ កាលយម្ភូត-សង្ខោភមតិភិំសនំ;

ភមុក្ខិបនមត្តេន, រាជបុត្តោ សមំ នយិ.

៤៤. វីរោ យសោធរធនោ ធិតិមា កុមារោ;

វីរោបការចតុរោ វរកិត្តិសារោ;

សេនិន្ទសញ្ចិតមនប្បធនំ ភដានំ;

សព្ពំ វិសជ្ជយិ យថារុចិយា គហេតុំ.

សុជនប្បសាទសំវេគត្ថាយ កតេ មហាវំសេ

សេនាបតិវធោ នាម

តិសដ្ឋិមោ បរិច្ឆេទោ.