ចតុបញ្ញាសតិម បរិច្ឆេទ

ឆ រាជកោនាម

១. កត្វា វិក្កម្ម ពាហូ’តិ, នាម ភូបាលសូនុតោ;

តស្សាណាយ បវត្តិំសុ, សាទរំ សីហឡា ខិលា.

២. សោ រាជា ទមិឡេ ហន្តុំ, ធនំ សញ្ចិយ’នេកាធា;

សង្គហំ សេវកានញ្ច, កុរុមានោ យថោចិតំ.

៣. អលង្ការកិរីដានិ, ឆត្តសីហាសនានិ ច;

ការយិត្វា’ភិសេកត្ថំ, សចិវេហា’ភិយាចិតោ.

៤. ន យាវ រាជរដ្ឋស្ស, គហណំ ហោតិ តាវ មេ;

ឆត្តុស្សាបនកម្មេន, កិំ តេនា’តិ វិវារិយ.

៥. សតំ នរសហស្សានំ, សង្កលេត្វា មហព្ពលោ;

សង្គាមារព្ភ កាលម្ហិ, វាតរោគាភិបីឡិតោ.

៦. យុជ្ឈិតុំ សមយោ នេតិ, ទ្វាទសេ វច្ឆរេ លហុំ;

ឧបេច្ច ទេវនគរំ, គញ្ឆិទេវសហព្យតំ.

៧. កិត្តិនាមោ ច សចិវោ, សេនាបច្ចមធិដ្ឋិតោ;

រជ្ជត្ថិកោ ទិនានដ្ឋ, និជាណំ សម្បវត្តយិ.

៨. ឃាតេត្វា តំ មហាលាន-កិត្តិនាមោ មហព្ពលោ;

បត្វា’ភិសេកំ ភុញ្ជន្តោ, ទេសំ តំ រោហណវ្ហយំ.

៩. សំវច្ឆរម្ហិ តតិយេ, ចោឡយុទ្ធេ បរាជិតោ;

សហត្ថេន សកំ សីសំ, ឆិន្ទិត្វា សហសា មរិ.

១០. តទាបិតេ កិរីដាទិ-ធនសារំ សមាទិយ;

បេសេសុំ ទមិឡា ចោឡ-មហីបាលស្ស សន្តិកំ.

១១. ភយា សរដ្ឋំ ហិត្វា’ថ, ទុដ្ឋទេសេ វសំ តទា;

ឯកោ វិក្កមបណ្ឌូតិ, វិស្សុតោ បត្ថិវត្តជោ.

១២. វិញ្ញាតលង្កាវុត្តន្តោ, ទេសមាគម្ម រោហណំ;

កាឡតិត្ថេ វសំ វស្ស-មេកំ រជ្ជមការយិ.

១៣. រាមន្វយសមុព្ភូតោ, តទាយុជ្ឈ បុរាគតោ;

ជគតី បាលនាមេន, វិស្សុតោ ភូភុជត្តជោ.

១៤. រណេ វិក្កមបណ្ឌុតំ, ឃាតាបេត្វា មហព្ពលោ;

តតោ ចត្តារិ វស្សានិ, រជ្ជំ ការេសិ រោហណេ.

១៥. តម្បិ ចោឡារណេ ហន្ត្វា, មហេសិំ ធីតរា សហ;

វិត្តសារញ្ច សាកលំ, ចោឡរដ្ឋមបេសយុំ.

១៦. រាជា បរក្កមោ នាម, បណ្ឌុរាជសុតោ តតោ;

អកា វស្សទ្វយំ ចោឡា, ឃាតេសុំ តម្បិ យុជ្ឈិយ.

១៧. ឥមេ ភុសំ លោភពលាភិភូតា,

គតា អសេសា វិវសា វិនាសំ;

ឥច្ចេវមញ្ញាយ សទា សបញ្ញោ,

តណ្ហក្ខយេយេវ រតិំ ករេយ្យ.

សុជនប្បសាទសំវេគត្ថាយ កតេ មហាវំសេ

ឆ រាជកោ នាម

ចតុបញ្ញាសតិមោ បរិច្ឆេទោ.