បញ្ចបញ្ញាសតិម បរិច្ឆេទ

រោហណារាតិ វិជយោនាម

១. លោកនាមោ ចមូនាថោ, មក្ខកុទ្រូសវាសិកោ;

សច្ចបដិញ្ញោ ធីតិមា, ចោឡទប្បវិឃាតនោ.

២. អភិភូយ ជនេ បត្វា, រជ្ជំ រោហណមណ្ឌលេ;

វសី កាជរគាមម្ហិ, ចារិត្តវិធិកោវិទោ.

៣. អហុ តទា កិត្តិនាមោ, រាជបុត្តោ មហព្ពលោ;

តស្ស វំសាទិសម្បត្តី, នុបុព្ពេន បវុច្ចតេ.

៤. សុតោ កស្សបភូបស្ស, មាណនាមេន វិស្សុតោ;

អាទិបាទោ អហុ ធីរោ, សទាចារវិភូសិតោ.

៥. តស្សា’ថ ជេដ្ឋកោ ភាតា, មាណវម្មោ មហាមតិ;

គោកណ្ណកសមីបដ្ឋ-នទីតីរេ និសីទិយ.

៦. កតមន្តុបចារោ សោ, យថាវិធិមសេសតោ;

អក្ខមាលំ គហេត្វាន, មន្តំ ជប្បិតុមារភិ.

៧. កុមារោ កិរ ភត្តគ្គេ, បាតុរាសិ សវាហនោ;

សិខណ្ឌិ មុខតុណ្ឌេន, ពលិបដ្ដំ វិខណ្ឌិយ.

៨. សច្ឆិទ្ទកេ នាឡិកេរ-កបាលេ វិច្ចុនោទកេ;

លូខេ ជលមបស្សន្តោ, ជបន្តស្ស មុខំគតោ.

៩. តតោ ភាវិនិំ សិទ្ធិ, មបេក្ខំ នយនំ សកំ;

តស្សោបនេសិ, និព្ភិជ្ជ, សោបិ តំ សហសាបិចិ.

១០. កុមារោ តស្ស សន្តុដ្ឋោ, កុមារស្សាភិបត្ថិតំ;

វរំ បទាយ នភសា, រាជមានោ គតោ តតោ.

១១. ភិន្នេកនយនំ ទិស្វា, សចិវាតំ បរោ ទិសុំ;

វរលាភំ បកាសេត្វា, សមស្សាសេសិ សោ ជនេ.

១២. តតោ សោ សចិវាតស្ស, សន្តុដ្ឋារាធយិំសុ តំ;

អនុរាធបុរំ បត្វា, ភិសេកោ ការិយោ ឥតិ.

១៣. អត្ថោ កោ មមរជ្ជេន, វិកលង្គស្ស សម្បតិ;

តបោកម្មំ ករិស្សាមិ, បព្ពជ្ជមុបគម្មហំ.

១៤. កណិដ្ឋោ មាណនាមោ ច, លង្ការជ្ជំ កមាគតំ;

បាលេតុ ឥតិ សោ រជ្ជំ, សម្បត្តំ សម្បដិក្ខិបិ.

១៥. វិញ្ញាតចិត្តសញ្ចារា, សចិវា តស្ស សព្ពថា;

វត្តុមេតំ កណិដ្ឋស្ស, បេសេសុំ បុរិសេ តទា.

១៦. សុត្វា តំ សីឃមាគម្ម, បស្សិត្វា សកភាតរំ;

បតិត្វា បាទមូលម្ហិ, ពហុំ កន្ទិយ រោទិយ.

១៧. ជេដ្ឋេន ភាតរា សទ្ធិ-មនុរាធបុរំ គតោ;

មកុដំ តត្ថ ធារេសិ, ជេដ្ឋចិត្តានុវត្តកោ.

១៨. តតោ’ភយគិរិំ គន្ត្វា, បព្ពជ្ជំ សកភាតុនោ;

យត យោ តត្ថ យាចិត្ថ, ពហុមានបុរស្សរំ.

១៩. តតោ តេ យតយោ តស្ស, បព្ពជ្ជមុបសម្បទំ;

អកំសុ វិកលង្គស្ស, សិក្ខាបទនិរាទរា.

២០. បរិវេណមុត្តរោឡ-មុឡារំ តស្ស ការិយ;

កត្វា តំ បរិវេណស្ស, សាមិកំ ធរណី បតិ.

២១. ភិក្ខូនំ ឆសតំ តត្ថ, វិធាយ តទធីនកំ;

បរិហារេ អទា តស្ស, បេស្សវគ្គេ ច បញ្ច សោ.

២២. សមប្បេសិ ច សោ នានា-សិប្បកម្មវិចក្ខណេ;

ជនេ ចាកា តទាយត្តេ, សោ ទាឋាធាតុរក្ខិយេ.

២៣. តស្សេវាទករា’ហេសុំ, ភិក្ខូ’ភយគិរិម្ហិ តេ;

រាជា ច លោកំ បាលេសិ, សម្មា តស្សានុសិដ្ឋិយា.

២៤. ជនា តព្ពំសជា កេចិ, តំ រជ្ជនិរបេក្ខកា;

និវសិំសុ យថាកាមំ, មហាសាមិ បទំសិតា.

២៥. ឯតស្ស មាណវម្មស្ស, រញ្ញោ ធម្មនយញ្ញុនោ;

អគ្គពោធិកុមារាទិ-បុត្តនត្តុក្កមាគតេ.

២៦. វំសេ វិសុទ្ធេ ជាតស្ស, ភូបាលន្វយមុទ្ធនិ;

សមាសោឡសកង្កាយំ, សម្មា រជ្ជានុសាសិនោ.

២៧. មហីបស្ស មហិន្ទស្ស, ទុវេ មាកុលធីតរោ;

ទេវលា លោកិកា ចាតិ, នាមតោ វិស្សុតា សុភា.

២៨. ឯតាសុ ទ្វីសុ ធីតាសុ, លោកិកា មាតុលត្តជំ;

បដិច្ច រាជតនយំ, សុភំ កស្សបនាមកំ.

២៩. សា មោគ្គល្លាន លោកវ្ហេ, បុត្តេ ទ្វេ លភិ សោភនេ;

តេសុ ជេដ្ឋសុតោ លោក-សាសនាធារកោវិទោ.

៣០. មហាសាមីតិ បញ្ញាតោ, សង្ឃុបាសនបាលយោ;

នេកសារគុណាវាសោ, វាសំ កប្បេសិ រោហណេ.

៣១. ទាឋោបតិស្ស រាជស្ស, នត្តា សុគតសាសនេ;

បព្ពជ្ជូបគតោ សទ្ធោ, ធុតវា សីលសំវុតោ.

៣២. បហិតត្តោ វិចិត្តោសោ, បន្តសេនាសនេ វសី;

គុណំ សព្ពត្ថ វណ្ណេសុំ, តស្មិំ ទេវា បសីទិយ.

៣៣. គុណំ សុណិត្វា លំកិន្ទោ, តទា សព្ពត្ថ បត្ថដំ;

ឧបសង្កម្ម តំ នត្វា, កាតុមត្តានុសាសនំ.

៣៤. អារាធយមនិច្ឆន្តំ, យាចិត្វាន បុនប្បុនំ;

អានីយ វាសយិត្វា តំ, បាសាទេ សាធុការិតេ.

៣៥. យតិស្សរស្ស វសតោ, កត្ថ រាជាគុណប្បិយោ;

តស្សានុសិដ្ឋិមគ្គដ្ឋោ, លោកំ ធម្មេន បាលយិ.

៣៦. ឧទ្ទិស្សារាធនំ សម្មា, លំកិន្ទេន កតំ តទា;

សេលន្តរាភិនិក្ខម្ម, យតិន្ទោ សោ ទយានុគោ.

៣៧. យតោ ភិក្ខូ សមូហេត្វា, វាសំ កប្បេសិ យត្ថ សោ;

សេលន្តរសមូហោ’តិ, វិក្ខ្យាតិំ សោ តតោ គតោ.

៣៨. តតោ បដ្ឋាយ វាសេត្វា, រត្តិយំ ទេវបល្លិយំ;

ទេវតានុមតំ ភិក្ខុំ, មូលឋានេ ឋបេន្តិ ហិ.

៣៩. មូលត្តមាវសន្តានំ, យតីនមនុសាសនា;

លំកិស្សរា បវត្តន្តិ, បាលេន្តា លោកសាសនំ.

៤០. តស្ស ទាឋោបតិស្សស្ស, វំសជំ រាជបុត្តកំ;

ពោធិំ បដិច្ច តព្ពំសា, ពុទ្ធនាមា កុមារិកា.

៤១. អលត្ថ លោកិតំ នាម, ធីតរំ វរលក្ខណំ;

កាលេន សា បទិន្នា’សិ, មោគ្គល្លានស្ស ធីមតោ.

៤២. សា តំ បដិច្ច កិត្តិញ្ច, មិត្តំ នាម កុមារិកំ;

មហិន្ទំ រក្ខិតំ ចាបិ, លតិត្ថ ចតុរោ បជា.

៤៣. អហុ ជេដ្ឋសុតោ ធីរោ, វីរោ តេរសវស្សិកោ;

កតហត្ថោ វិសេសេន, ធនុសិប្បម្ហិ សោ តតោ.

៤៤. កថំ លង្កំ គហេស្សាមិ, ទូរេត្វា’រាតិ កណ្ដកំ;

ឥតិ ចិន្តាបរោគាមេ, មូលសាលវ្ហយេ វសី.

៤៥. ឯកោ មហាពលោ វីរោ, ពុទ្ធរាជោតិ វិស្សុតោ;

វិលោមវត្តី ហុត្វាន, លោកសេនានិនោ តទា.

៤៦. បលាតោ ចុណ្ណសាលវ្ហំ, ខិប្បំ ជនបទំ តហិំ;

កិត្តាទិកេ ជនេ នេកេ, វសេ វត្តិយ សព្ពថា.

៤៧. សទ្ធិំ ពន្ធូហិ សង្គាម-សូរេហិ ពហុកេហិ សោ;

មលយាចលបាទេសុ, វសី ទុប្បសហោ តទា.

៤៨. តស្ស’ន្តិកមុបាគម្ម, សំវច្ឆរិកនាយកោ;

សង្ឃោ នាម កុមារស្ស, សរូបំ សាធុវំ ព្រវិ.

៤៩. មហាសាមិស្ស តនយោ, ជេដ្ឋោ កិត្តិ សនាមកោ;

ធញ្ញលក្ខណសម្បន្នោ, សម្បន្នមតិវិក្កមោ.

៥០. ជម្ពុទីបេបិ តំ រជ្ជំ, កត្តុមេកាតបត្តកំ;

សមត្ថោតិ វិចិន្តេបិ, លង្កាទីបម្ហិ កា កថា.

៥១. តស្ស សោ វចនំ សុត្វា, សេវិតព្ពោ កុមារកោ;

ឥតិ និច្ឆិយ បេសេសិ, កុមារស្ស’ន្តិកំ ជនេ.

៥២. សុណិត្វា សោ វចោ តេសំ, និវត្តនភយា វិភូ;

អជានហំ បិតុន្នំ សោ, វីរោ ធនុសហាយកោ.

៥៣. គេហា និក្ខម្ម បស្សន្តោ, សុនិមិត្តានិនេកធា;

អគាលហុំ សរីវគ្គ-បិដ្ឋិគាមំ មហាមតិ.

៥៤. តហិំ សោ និវសំ វីរោ, បេសយិត្វា សសេវកេ;

វិបក្ខាធិដ្ឋិតំ ជេសិ, ពោធិវាលវ្ហគាមកំ.

៥៥. តតោ’ភិមានី សេនានី, សេនំ សោ តត្ថ បេសយិ;

សា បរិក្ខិបតំ គាមំ, សង្គាមាយ សមារភី.

៥៦. កុមារោ តេហិ យុជ្ឈន្តោ, សុភដោ បដុវិក្កមោ;

ទិសាសុ វិកិរីសព្ពេ, តុលំ ចណ្ឌោវ មាឡុតោ.

៥៧. ចុណ្ណសាលំ ជនបទំ, គន្ត្វា ឋានវិទូ តទា;

តហិំ វសំ វសេកាសិ, សព្ពំ មលយមណ្ឌលំ.

៥៨. តទាបិ សេនំ សេនិន្ទោ, បេសេត្វា អសកិំ សកំ;

អភិភូតិមសក្កោន្តោ, កាតុំ ទុម្មនតំ គតោ.

៥៩. មក្ខកុទ្រុសវាសិស្ស, សចិបស្សាថ កិត្តិនោ;

សុតោ មហព្ពលោ ទេវ-មល្លោតិ វិទិតោ តទា.

៦០. សហិតោ ពន្ធុមិត្តេហិ, ពហូ រោហណវាសិនោ;

សមាទាយា’ភិគន្ត្វាន, កុមារំ បស្សិ សាទរោ.

៦១. ពន្ធិយ ឆុរិកំ ឆេកោ, សោ បន្នរសវស្សិកោ;

អាទិបាទបទំ តត្ថ, សម្បាបុណិ មហាយសោ.

៦២. តតោ ហិរញ្ញមលយ, មុបាគម្ម មហព្ពលោ;

តហិំ រេមុណសេលម្ហិ, ខន្ធាវារំ និពន្ធយិ.

៦៣. តត្ថាបិ សេនំ បេសេត្វា, សង្គាមេន្តោ ចមូបតិ;

អលទ្ធវិជយោ ឆន្ទំ, បុនយុទ្ធេ ជហិតតោ.

៦៤. លោកនាមោ ចមូនាថោ, លោកំ ហិត្វា សកំ តទា;

អហុ វស្សម្ហិ ឆដ្ឋេសោ, បរលោកបរាយនោ.

៦៥. តទា កស្សបនាមេកោ, កេសធាតុកនាយកោ;

ជនេ’ភិភូយវត្តេសិ, នីជាណំ រោហណេ តទា.

៦៦. សុត្វា តំ ចោឡសាមន្តោ, បុឡត្ថិនគរា តទា;

និក្ខម្ម យុទ្ធសនទ្ធោ, គន្ត្វា កាជរគាមកំ.

៦៧. កេសាធាតុ តតោ យុទ្ធេ, ភិន្ទិត្វា ទមិឡំ ពលំ;

រក្ខបាសាណសីមាយំ, ឋបេត្វា រក្ខិយេ ជនេ.

៦៨. បដិលទ្ធជយុទ្ទាមោ, មហាសេនា បុរក្ខតោ;

បុនរាគម្ម បាវេក្ខិ, វីរោ កាជរគាមកំ.

៦៩. តទាទិបាទោ សុត្វាន, សព្ពំ សុត្ថីរធាតុកោ;

កេសធាតុំ និឃាតេតុំ, ពលំ សន្នយ្ហិ វេគសា.

៧០. បវត្តិំ តំ សុណិត្វា សោ, សាភិមានោ ភុសំតតោ;

សមត្តំ ពលមាទាយ, សិប្បត្ថលកមាគមា.

៧១. បញ្ចយោជនរដ្ឋាទិ-វាសិកេសុ ពហូជនេ;

សមាទាយ សមាសន្នេ, រាជបុត្តេ សុទុជ្ជយេ.

៧២. វិរត្តតញ្ច សោ ញត្វា, ពហុន្នំ រដ្ឋវាសិនំ;

ទុក្ករំ ឯត្ថ យុទ្ធន្តិ, គតោ សោ ខទិរង្គណិំ.

៧៣. មហាសេនាយ ភូបាល សុតោ សោឡសវស្សីកោ;

ខិប្បំ វាបេក្ខិ សោ វីត-ទរោ កាជរគាមកំ.

៧៤. ឆម្មាសមនុភោត្វាន, រោហណំ រុដ្ឋមានសោ;

កេសធាតុកនាថោបិ, សង្គាមត្ថាយ តត្ថគា.