បញ្ញាសតិម បរិច្ឆេទ

ទ្វិរាជកោនាម

១. តតោ រជ្ជេ បតិដ្ឋាយ, កស្សបោ ទក្ខិណំ ទិសំ;

អទា កស្សបនាមស្ស, យុវរាជស្ស ធីមតោ.

២. អគ្គាភិសេកំ ទាបេសិ, យុវរាជស្ស ធីតុយា;

រាជកញ្ញាយ តិស្សាយ, ភរិយាយេ’វ អត្តនោ.

៣. យាចកានញ្ច សិប្បីនំ, អាគតានំ តតោ តតោ;

ទានំ ទណ្ឌិស្សរំ នាម, សទា ទាបេសិ ភូបតិ.

៤. អាទិបាទោ មហិន្ទោ សោ,

វសន្តោ រោហណេ តទា;

គហេតុំ រាជិនោរដ្ឋ-

មាទាយ ពលមាគតោ.

៥. តំ សុត្វា កុបិតោ រាជា, ពលំ បេសេសិ អត្តនោ;

យុជ្ឈិត្វា តំ បរាជេសិ, មហិន្ទោ សោ មហាភដោ.

៦. តតោ រាជា និវត្តេតុំ, បិតរំ តស្ស បេសយិ;

កស្សបំ យុវរាជំ តំ, សោ គន្ត្វា បុត្តសន្តិកំ.

៧. នានាធម្មកថោបេតំ, វត្វា យុត្តិមនេកធា;

សង្ឃាមតោ និវត្តេត្វា, បុត្តំ សោ បុនរាគមិ.

៨. អាទិបាទោ តុ សោ បច្ឆា, ឃាតេត្វា មណ្ឌលាធិបេ;

កុទ្ធេជនបទេ ទិស្វា, អគមាសិ បុរន្តិកំ.

៩. ភិក្ខុសង្ឃោ តមានេត្វា, ទស្សេសិ វសុធាធិបំ;

ទត្វា សោ ធីតរំ តស្សា, បេសេសិ បុន រោហណំ.

១០. នីហរិត្វាន ទុស្សីលេ, និកាយត្តយវាសីសុ;

គាហាបេសិ នវេ ភិក្ខូ, អាវាសេ តត្ថ តត្ថ សោ.

១១. ទ្វយាភិសេកជាតេន, អាទិបាទេន សុនុនា;

មហាវិហារេ ពោធិម្ហិ, បំសុំ វឌ្ឍេសិ បូជយំ.

១២. អកាសិ ច និកាយេសុ, តីសុ ពិម្ពេ សិលាមយេ;

សោវណ្ណយេ រំសិជាលេ, ឆត្តំ ចូឡាមណិំ តថា.

១៣. អភយគិរិវិហារម្ហិ, បាសាទំ សកនាមកំ;

កត្វា តត្ថ និវាសេត្វា, ភិក្ខុ គាមមទាបយិ.

១៤. មហិយង្គណវិហារស្មិំ, គាមំ សោ ចេតិយស្ស’ទា;

សវត្ថំ បដិមាភត្តំ, សព្ពភិក្ខូន ទាបយិ.

១៥. ថលេ ជលេ ច សត្តានំ, អទាសិ អភយំ តទា;

ចារិត្តបុព្ពរាជូនំ, បរិបាលេសិ សព្ពទា.

១៦. តស្ស សេនាបតិ សេនោ, ឥលង្គោរាជវំសជោ;

ថេរិយានំ អកា’វាសំ; ថូបារាមស្ស បច្ឆតោ.

១៧. ធម្មារុចិកភិក្ខូនំ, ធម្មារាមមការយិ;

តថា សាគលិកានញ្ច, កស្សបសេននាមកំ.

១៨. ហទយុណ្ហាភិធានំ សោ, កត្វា ចេតិយបព្ពតេ;

បរិវេណំ អទាធម្ម-រុចិកានញ្ច ភិក្ខូនំ.

១៩. អារាមិកានំ ភិក្ខូនំ, អារាមេសុ តហិំ តហិំ;

ឯកមេកំ កុដិំ កត្វា, ទាបេសិ ច ចមូបតិ.

២០. រត្តមាលគិរិស្មិំ សោ, កត្វា រម្មំ តរំ សុភំ;

កុចិំ អទា សាសនស្ស, សាមិកានំ តបស្សិនំ.

២១. មហាវិហារេ ការេត្វា, បវិវេណំ វរំ អទា;

បំសុកូលិកភិក្ខូនំ, សមុទ្ទគិរិនាមកំ.

២២. វាសំ អរញ្ញេ ការេត្វា, អត្តនោ វំសនាមកំ;

មហាវិហារេ ភិក្ខូនំ, វនេ និវាសតំ អទា.

២៣. វិហារេសូ ច ជិណ្ណេសុ, នវកម្មមការយិ;

ទាបេសិ អគ្គលំ សព្ព-ភិក្ខូនំ ជិណ្ណចីវរេ.

២៤. តិស្សារាមំ ករិត្វាន, ភិក្ខូនីនមុបស្សយំ;

មរិចវដ្ដិមហាពោធិ, បរិហារេ និវេសយិ.

២៥. អនុរាធបុរេ ចេវ, បុលត្ថិនគរេបិ ច;

ឧបសគ្គរោគនាសាយ, វេជ្ជសាលាបិ ការយិ.

២៦. អត្តនា កតវាសនំ, ភោគគាមេ ច ទាបយិ;

តថារាមិកគាមេ ច, បដិមាភរណញ្ច សោ.

២៧. ភេសជ្ជគេហំ ការេសិ, នគរេ តត្ថ តត្ថ សោ;

បំសុកូលិកភិក្ខូនំ, ភត្តំ វត្ថញ្ច ទាបយិ.

២៨. ខន្ធីកតេ អមោចេសិ, តិរច្ឆានគតេ ពហូ;

កបណានញ្ច ទាបេសិ, មហាទានំ ចមូបតិ.

២៩. វិចិត្តំ ព្យញ្ជនំ ភត្តំ, យាគុំ វិវិធខជ្ជកំ;

កត្វា សូកររូបញ្ច, គុឡំ ភិក្ខូនំ ទាបយិ.

៣០. ឯវាមាទីនិ បុញ្ញានិ, កត្វា សេនាយ នាយកោ;

សេនោ កិត្តិន្ទុបាទេហិ, សព្ពា ឱភាសយី ទិសា.

៣១. តស្សេវ ញាតកោ កត្វា, នាយកោ រក្ខសវ្ហយោ;

សវារកម្ហិ គាមម្ហិ, វិហារំ សុមនោហរំ.

៣២. មហាវិហារវាសីនំ, សារានំ បដិបត្តិយា;

ភិក្ខូនំ សោ អទា សាធុ, ឋបេត្វា វត្តមុត្តមំ.

៣៣. សេនោ នាម មហាលេខោ, មហាលេខកបព្ពតំ;

មហាវិហារេ ការេសិ, ភិក្ខូនំ វាសមុត្តមំ.

៣៤. ចោឡរាជាភិធានោ, ច, អមច្ចោ តស្ស រាជិនោ;

បរិវេណំ អការម្មំ, នដ្ឋំ តំ សុប្បតិដ្ឋិតំ.

៣៥. រាជា តីសុ និកាយេសុ, រូបកម្មមនោរមំ;

មណ្ឌបានិ វិចិត្តានិ, វេជយន្តោ បមានិ ច.

៣៦. ការេត្វា ធាតុបូជាយោ, កត្វា ជនមនោហរា;

យថា កម្មំ គតោ ឋត្វា, វស្សានិ ទសសត្ត ច.

៣៧. ទ្វយាភិសេកសញ្ជាតោ, យុវរាជាថ កស្សបោ;

អាសិ លទ្ធាភិសេកោ សោ, លំការជ្ជេកមាគតេ.

៣៨. សទ្ធោ អាគតមគ្គោវ, សាភិញ្ញោ វិយ បញ្ញវា;

វត្តា សោ មរមន្តិវ, ចាគវា ធនទោ វិយ.

៣៩. ពហុស្សុតោ ធម្មកថី, សព្ពសិប្បវិសារទោ;

យុត្តាយុត្តវិចារាយ, និបុណោ នយកោវិទោ.

៤០. អចលោ ឥន្ទលីលោ’វ, ឋិតោ សុគតសាសនេ;

បរប្បវាទិវាតេហិ, សព្ពេហិ’បិ អកម្បិយោ.

៤១. មាយាសាឋេយ្យមានាទិ, បាបានញ្ច អគោចរោ;

គុណានំ អាករោ សព្ព-រតនានំ វសាគរោ.

៤២. ភូមិចន្ទោ នរិន្ទោ សោ, វំសេ ជាតស្ស អត្តនោ;

ទប្បុឡស្សាទីបាទស្ស, យុវរាជបទំ អទា.

៤៣. រជ្ជំ ទសហិ ធម្មេហិ, ចតុសង្គហវត្ថូហិ;

ករោន្តោ បរិបាលេសិ, លោកំ នេត្តំវ អត្តនោ.

៤៤. សោ ធេត្វា សាសនំ សព្ពំ, ធម្មកម្មេន សត្ថុនោ;

គហេត្វា នវកេ ភិក្ខូ, អកាសា’វាសបូរណំ.

៤៥. ទុដ្ឋគាមណិរាជេន, កតំ មរិចវដ្ដិកំ;

នដ្ឋំ វិហារំ ការេត្វា, នានាអាវាស ភូសិតំ.

៤៦. ថេរវំសជភិក្ខូនំ, អទា កត្វា មហាមហំ;

តេសំ បញ្ចសតានញ្ច, ភោគគាមេ ច ទាបយិ.

៤៧. តត្ថ សោ តុសិតេ រម្មេ, ទេវសង្ឃបុរក្ខតំ;

មេត្តេយ្យំ លោកនាថំ តំ, ទេសេន្តំ ធម្មមុត្តមំ.

៤៨. ទស្សេន្តោ វិយ លោកស្ស, វិហារេ សព្ពសជ្ជិតេ;

និសិន្នោ មណ្ឌបេ រម្មេ, នានារតនភូសិតេ.

៤៩. នគរេហិ ច សព្ពេហិ, ភិក្ខូហិ បរិវារិតោ;

ពុទ្ធលិលាយ លំកិន្ទោ, អភិធម្ម មភាសយិ.

៥០. សោណ្ណបដ្ដេ លិខាបេត្វា-ភិធម្មបិដកំ តទា;

ធម្មសង្គណិកំ បោត្ថំ, នានារតន ភូសិតំ.

៥១. កត្វា នគរមជ្ឈម្ហិ, ការេត្វា ហេមមុត្តមំ;

តំ តត្ថ ឋបយិត្វាន, បរិហារមទាបយិ.

៥២. សក្កសេនាបតិដ្ឋានំ, ទត្វា បុត្តស្ស អត្តនោ;

បរិហារេ និយោជេសិ, តត្ថ តំ ធម្មបោត្ថកេ.

៥៣. អនុសំវច្ឆរំ រាជា, បុរំ ទេវបុរី វិយ;

វិភូសិតាយ សេនាយ, សជ្ជេត្វា បរិវារិតោ.

៥៤. ទេវរាជាវ សោភន្តោ, សព្ពាភរណភូសិតោ;

ហត្ថិខណ្ឌេ និសីទិត្វា, ចរន្តោ បុរវីថិយំ.

៥៥. មហតា បរិហារេន, នេត្វា តំ ធម្មសង្គហំ;

អត្តនា ការិតំ រម្មំ, វិហារំ សព្ពសជ្ជិតំ.

៥៦. តត្ថ ធាតុគតេ រម្មេ, នានារតនភូសិតេ;

មណ្ឌបេ ធាតុបិឋស្មិំ, បតិដ្ឋាបិយ បូជយិ.

៥៧. គន្ថាករបរិវេណំ, មហាមេឃវនេ អកា;

នគរេ វជ្ជសាលា ច, តេសំ គាមេ ច ទាបយិ.

៥៨. ភណ្ឌិកបរិវេណញ្ច, សិលាមេឃញ្ច បព្ពតំ;

កត្វា’ភយគិរិស្មិំ សោ, តេសំ គាមមទាបយិ.

៥៩. ជោតិវនវិហារស្មិំ, រាជា លង្កាយ នាយកោ;

ភត្តគ្គស្ស អទា គាមំ, តថា’ភយគិរិម្ហិ ច.

៦០. ទក្ខិណគិរិនាមស្ស, វិហារស្ស ច ទាបយិ;

គាមំ កតញ្ញុភាវេន, រាជា បរមធម្មិកោ.

៦១. សក្កសេនាបតិ រម្មំ, បរិវេណំ សុមាបិយ;

អទាសិ សហគាមេហិ, ថេរិយានំ សនាមិកំ.

៦២. ភរិយា វជិរា តស្ស, តេសំយេវ អទាបយិ;

បរិវេណំ ករិត្វាន, សគាមំ សកនាមកំ.

៦៣. ឧបស្សយំ ករិត្វាន, សា ឯវ បទលញ្ឆនេ;

ភិក្ខូនីនំ អទា ថេរ-វំសេ សព្ពត្ថ បូជិតេ.

៦៤. សក្កសេនាបតិ មាតា, ទេវា’រញ្ញក ភិក្ខូនំ;

ថេរវំសប្បទីបានំ, អកា’វាសំ សនាមកំ.

៦៥. សា ឯវ បដិពិម្ពស្ស, សត្ថុ មរិចវដ្ដិយំ;

ចូឡាមណិំ បាទជលំ, អកា ឆត្តញ្ច ចីវរំ.

៦៦. រាជា រាជាលយេយេវ, រាជវំសំ សនាមកំ;

អកាសិ បាឡិកំ នាម, បាសាទំ សុមនោ ហរំ.

៦៧. បូជេសិ រាជិនី នាម, រាជិនោ ភរិយា’បរា;

បដ្ដកញ្ចុកបូជាយ, ហេមមាលិក ចេតិយំ.

៦៨. តស្សា បុត្តោសិ សិទ្ធត្ថោ, នាម ឥស្សរិយេ ឋិតោ;

សុតោ មលយរាជាតិ, រូបេន មករទ្ធជោ.

៦៩. រាជា តស្មិំ មតេ កត្វា, សាលំ ភិក្ខុនមុត្តមំ;

ទានវដ្ដំ បដ្ឋបេត្វា, តស្ស បត្តិមទា តទា.

៧០. ឯវំ ធម្មេន ការេន្តេ, រជ្ជំ លង្កាទីបេ តទា;

ចោឡរាជេន យុជ្ឈិត្វា, បណ្ឌុរាជា បរាជិតោ.

៧១. បណ្ណាការានិ នេកានិ, ពលំ សន្ធាយ បេសយិ;

រាជាលំកិស្សរោ សទ្ធិំ, មន្តេត្វា សចិវេហិ សោ.

៧២. សន្នយ្ហ ពលកាយំ សោ, សក្កសេនាបតិំ សកំ;

ពលស្ស នាយកំ កត្វា, មហាយិត្ថមុបាគមិ.

៧៣. វិជយំ បុព្ពរាជូនំ, វត្វា វេលាតដេ ឋិតោ;

ឧស្សាហំ ជនយិត្វាន, នាវំ អារោបយី ពលំ.