ឯកបញ្ញាសតិម បរិច្ឆេទ

បញ្ចរាជកោ នាម

១. យុវរាជា តទា ហុត្វា, រាជា ទប្បុឡនាមកោ;

ឋបេសិ ឱបរជ្ជម្ហិ, អាទិបទំ សនាមកំ.

២. មរិចវដ្ដិវិហារស្ស, គាមំ ទត្វា តតោ បុរេ;

ចារិត្តំ បុព្ពរាជូនំ, រក្ខិត្វាន មហិំ ឥមំ.

៣. អភុត្វា ទីឃកាលញ្ហិ, បុព្ពកម្មេន អត្តនោ;

រាជា សោ សត្តមេ មាសេ, បវិដ្ឋោ បច្ចុនោ មុខំ.

៤. ឧបរាជា អហុរាជា, ទប្បុឡោ តទនន្តរំ;

ឧទយស្សាទិបាទស្ស, យុវរាជបទំ អទា.

៥. តទា ចោឡភយា បណ្ឌុ-រាជំ ជនបទំ សកំ;

ចជិត្វា នាវមារុយ្ហ, មហាតិត្ថមុបាគមិ.

៦. អាណាបេត្វាន តំ រាជា, ទិស្វា សន្តុដ្ឋមានសោ;

មហាភោគំ អទា តស្ស, និវាសេសិ បុរា ពហិ.

៧. ចោឡរាជេន យុជ្ឈិត្វា, គហេត្វា បដ្ដនទ្វយំ;

បណ្ឌុរាជស្ស ទម្មីតិ, សន្នទ្ធេ លង្ករាជិនិ.

៨. កេនា’បិ ករណីយេន, ខត្តិយា ទីបវាសិនោ;

អកំសុ វិគ្គហំ ឃោរំ, បាបកម្មេន បណ្ឌុនោ.

៩. បណ្ឌុរាជេ’ត្ថ វាសេន, កម្មំ នត្ថីតិ ចិន្តិយ;

ឋបេត្វា មកុដាទីនិ, គតោ កេរឡសន្តិកំ.

១០. វិគ្គហេ និដ្ឋិតេ រាជា, មហាមេឃវនេ តទា;

មហាពោធិឃរស្សា’ទា, គាមំ នគរសន្តិកេ.

១១. អាវាសំ រក្ខកោ នាម, តស្ស សេនាបតី អកា;

ថូបារាមសមីបម្ហិ, ឥឡង្គោ រាជនាមកំ.

១២. កតំ តំ បុព្ពរាជេហិ, រាជា សោ បរិបាលិយ;

បត្តោ ទ្វាទសមំ វស្សំ, យថាកម្មមុបាគមិ.

១៣. ឧទយោ យុវរាជា’សិ, លំកាវាសីនមិស្សរោ;

សេននាមាទិបាទំ សោ, ឱបរជ្ជេ’ភិសេចយិ.

១៤. រញ្ញោ ភីតា តទាមច្ចា, បវិសិំសុ តបោវនំ;

រាជោបរាជា គន្ត្វាន, តេសំ សីសានិ ឆេទយុំ.

១៥. តេន កម្មេន និព្ពិន្នា, យតយោ តន្និវាសិនោ;

ហិត្វា ជនបទំ រញ្ញោ, តទាគច្ឆិំសុ រោហណំ.

១៦. តទា ជានបទា ចេវ, នាគរា ច ពលានិ ច;

កុបិតា ចណ្ឌុវាតេន, សាគរោ វិយ កម្បិតោ.

១៧. រតនបាសាទមារុយ្ហ, វិហារេ អភយុត្តរេ;

សន្តាសេត្វាន រាជានំ, ទស្សេត្វាន វិភីសិកំ.

១៨. ឧបត្ថម្ភកមច្ចានំ, វិគ្គហស្ស តបោវនេ;

តទា សីសានិ ឆិន្ទិត្វា, កវាតេន និបាតយុំ.

១៩. តំ សុត្វា យុវរាជា ច, អាទិបាទោ ច តំ សខា;

ឧល្លង្ឃិត្វាន បាការំ, សីឃំ គច្ឆិំសុ រោហណំ.

២០. ពលកាយោនុពន្ធិត្វា, យាវ កណ្ហនទីតដា;

អលាភេន ច នាវានំ, តិណ្ណត្តា តេសមាគមិ.

២១. រាជបុត្តាគតា តត្ថ, វនេ អភយភេទិនោ;

យតីនំ បុរតោ តេសំ, និបជ្ជិត្វា ឧរេន តេ.

២២. អល្លវត្ថា’ល្លកេសា ច, បរិទេវិត្ថ’នេកធា;

កន្ទីត្វា រោទនំ កត្វា, ខមាបេសុំ តបស្សិនោ.

២៣. ខន្តិមេត្តានុភាវេន, តេសំ សាសនសាមិនំ;

បុញ្ញោទយោ អហុ តេសំ, ឧភិន្នំ ទីបសាមិនំ.

២៤. យុវរាជពលញ្ចេវ, និកាយត្តយវាសិនោ;

គមិំសុ តេសមានេតុំ, សន្តិភូតេ មហាពលេ.

២៥. រាជបុត្តា ឧភោ ព្យត្តា, បណ្ឌិតា បំសុកូលិនោ;

យាចិត្វា តេសមាទាយ, អគមំសុ សកំ បុរំ.

២៦. ភិក្ខូនំ បុរតោ មគ្គំ, រាជាគន្តា ខមាបយិ;

អាទាយ តេ វនំ តេសំ, នេត្វា រាជឃរំ គតោ.

២៧. តតោ បដ្ឋាយ ចារិត្ថំ, បាលេត្វា បុព្ពរាជុនំ;

រាជា សោ តតិយេ វស្សេ, យថាកម្មមុបាគមិ.

២៨. លំកាភិសេកំ បត្វាន, សេនោ សោ មតិមា តតោ;

ឧទយំ អាទិបាទំ តំ, យុវរាជំ អកា សខំ.

២៩. កហាបណសហស្សំ សោ, ទុគ្គតានំ ឧបោសថេ;

ហោតុ’បោសថិកោ ទត្វា, យាវជីវំ នរាធិបោ.

៣០. បដិមា ភត្តវត្ថានិ, ភិក្ខូនំ ធរណី បតិ;

អទា ទណ្ឌិស្សរំ ទានំ, យាចកានញ្ច សិប្បីនំ.

៣១. ឋានេ កត្ថចិ សិប្បីនំ, បាសាទេសុ មនោហរេ;

ការេត្វា ភោគគាមេ ច, អទាបេសិ មហាមតិ.

៣២. កហាបណសហស្សំ វា, ទត្វា បញ្ចសតានិ វា;

លង្កាយំ ជិណ្ណកាវាសេ, នវកម្មមការយី.

៣៣. ចត្តាលីសសហស្សានិ, អភយុត្តរចេតិយេ;

សិលាបត្ថរណត្ថាយ, ទាបេសិ ច មហីបតិ.

៣៤. មហាវាបីសុ លំកាយំ, ជិណ្ណនិទ្ធមនេ អកា;

នវកម្មញ្ច មរិយាទំ, ថិយំ បាសាណបំសុនា.

៣៥. អកា រាជឃរេ រម្មំ, មាលាគេហំ មហារហំ;

ឋបិតំ បុនរាជូហិ, ទានំ សម្មាបវត្តយិ.

៣៦. កតំ មលយរាជេន, អមច្ចេន’គ្គ ពោធិនា;

បរិវេណំ នាគសាលំ, ទិស្វា គាម មទា តទា.

៣៧. កត្វា ចតុវិហារេសុ, រូបកម្មានិ សាធុកំ;

មណ្ឌបានិ ច រម្មានិ, ធាតុបូជំ អកា សទា.

៣៨. ឯវមាទីនិ បុញ្ញានិ, អនេកានិ អនេកធា;

កត្វា សោ នវមេ វស្សេ, យថាកម្មមុបាគមិ.

៣៩. លំកាភិសេកំ បត្វាន, យុវរាជោទយោ តតោ;

សេននាមាទិបាទំ សោ, ឱបរជ្ជេ’ភិ សេចយិ.

៤០. និទ្ទាលុ មជ្ជបោ អាសិ, រាជា បាបេន ជន្តុនំ;

ចោឡោ បមត្តតំ តស្ស, សុត្វា សន្តុដ្ឋមានសោ.

៤១. បណ្ឌុទេសាតិសេកំ សោ, បត្តុកា មេត្ថ បេសយិ;

មកុដាទីនមត្ថាយ, ឋបិតានំវ បណ្ឌុនា.

៤២. តានិ នាទាសិ សោ រាជា, តេន ចោឡោ មហព្ពលោ;

ពលំ សន្នយ្ហ បេសេសិ, ពលក្ការេន គណ្ហិតុំ.

៤៣. តទា សេនាបតិ ឯត្ថ, បច្ចន្តេ កុបិតេ គតោ;

អាណាបេត្វាន តំ រាជា, យុជ្ឈនត្ថាយ បេសយិ.

៤៤. ហតោ សេនាបតិ តត្ថ, យុជ្ឈិ ន រណេ មតោ;

កកូដាទីនិ អាទាយ, រាជា សោ រោហណំ អគា.

៤៥. គន្ត្វា ចោឡពលំ តត្ថ, អលភិត្វា បវេសនំ;

និវត្តិត្វា សកំ រដ្ឋំ, អគមាសិ ឥធតា ភយា.

៤៦. តតោ សេនាបតិដ្ឋានេ, វិទុរគ្គំ តុ នាយកំ;

ឋបេសិ រាជា លំកិន្ទោ, តេជវន្តំ មហាមតិំ.

៤៧. បច្ចន្តំ ចោឡរាជស្ស, ឃាតេត្វា សោ ចមូបតិ;

អាណាបេសិ ឥតោ នីតំ, ទស្សេត្វាន វិភីសិតំ.

៤៨. តតោ ទាបេសិ សោ សព្ព-បរិក្ខារំ មហារហំ;

បំសុកូលិកភិក្ខូនំ, សព្ពេសំ ទីបវាសិនំ.

៤៩. មហាវិហារេ លំកិន្ទោ, បដិពិម្ពស្ស សត្ថុនោ;

ជលន្តំ មណិរំសីហិ, អកា ចូឡាមណិំ តទា.

៥០. ឱរោធា វិទុរា តស្ស, បាទជាលេន បូជយិ;

មណីហិ បជ្ជលន្តេហិ, បដិមំ តំ សិលាមយំ.

៥១. ឈាបិតំ ចោឡរាជស្ស, ពលេន មណិនាមកំ;

បាសាទំ កាតុមារទ្ធោ, ចុតោ វស្សម្ហិ អដ្ឋមេ.

៥២. បញ្ចេតេ វសុធាធិបា វសុមហិំ ឯកាតបត្តង្កិតំ;

ភុត្វា និគ្គហសង្គហេហិ សកលំ លោកំ វសេ វត្តិយ;

យា តា មច្ចុវសំ សបុត្តវណិតា សាមច្ចមិត្តានុគា;

ឥច្ចេវំ សតតំ សរន្តុ សុជនា ហាតុំ បមាទំ មទំ.

សុជនប្បសាទសំវេគត្ថាយ កតេ មហាវំសេ

បញ្ចរាជកោ នាម

ឯកបញ្ញាសតិមោ បរិច្ឆេទោ.