ចតុចត្តាលីសតិម បរិច្ឆេទ

តិរាជកោ

១. អច្ចយេ ហត្ថទាឋស្ស, អគ្គពោធិកុមារកោ;

កណិដ្ឋោ រាជិនោ អាសិ, សិរិសង្ឃាទិ ពោធិកោ.

២. ធម្មរាជា អយំ អាសិ, សម្មា ទស្សនសញ្ញុតោ;

តស្មា សោ បុញ្ញកម្មានិ, អប្បមេយ្យានិ វត្តយិ.

៣. និកាយត្តយវាសីនំ, ភត្តគ្គមវលោកយិ;

មហាបាឡិញ្ច វឌ្ឍេសិ, មាឃាតញ្ចេវ ការយិ.

៤. ឋានន្តរញ្ច ទាបេសិ, យថារហ មនាលយោ;

សិបគោត្តាទិយោគ្គេហិ, សំគតេហិ ច សំគហិ.

៥. យត្ថ កត្ថចិ ទិស្វាបិ, ភិក្ខវោ សោ មហាមតិ;

សក្កត្វា សោភណាបេសិ, បរិត្តំ សាសនោគធំ.

៦. ថេរំ សោ ឧបសង្កម្ម, នាគសាលនិវាសិនំ;

ទាឋាសិវំ មហាបញ្ញំ, សីលវន្តំ ពហុស្សុតំ.

៧. សក្កច្ច នំ តតោ សុត្វា, សម្មាសម្ពុទ្ធសាសនំ;

ធម្មេ’តីវបសីទិត្វា, សព្ពសន្តិករោ ឥតិ.

៨. សុត្វា ថេរិយវាទានំ, បុព្ពញាតីនមត្តនោ;

បាបានំ ទុដ្ឋចិត្តានំ, អបការេ កតេ ពហូ.

៩. វិហារេ បរិវេណេ ច, ជិណ្ណេបាកតិកេ អកា;

ភោគគាមេ ច ទាបេសិ, តត្ថ តត្ថ ពហូទយេ.

១០. វិច្ឆិន្នបច្ចយេ ចាកា, តទាត្យំ កុរិតេ វិយ;

ទាសកេបិ ច សង្ឃស្ស, យថាឋានេ ឋបាបយិ.

១១. បធានឃរ មេតស្ស, ថេរស្ស’កាសនាមកំ;

បដិគ្គហេត្វា តំ សោ’បិ, សង្ឃស្សា’ទា មហាមតី.

១២. ភោគគាមេ ច តស្សា’ទា, ភរត្តាលំ កិហិម្ពិលំ;

កតកញ្ច តុលាធារំ, អន្ធការកមេវ ច.

១៣. អន្ធការំ អន្តុរេឡិំ, ពាលវំ ទ្វារនាយកំ;

មហានិកឌ្ឍិកញ្ចេវ, បេឡហាឡំ តថាបរំ.

១៤. ឯតេ អញ្ញេ ច សោ ទត្វា, ភោគគាមេ នរិស្សរោ;

ទាសិ អារាមិកេ ចេវ, អត្តនោ កិរ ញាតកេ.

១៥. តថា ទ្វិន្នំ និកាយានំ, វិហារេ មន្ទបច្ចយេ;

ទិស្វាបិ ច សុត្វា វា, ភោគគាមេ ពហូ អទា.

១៦. ពហុនា កិន្តុវុត្តេន, និកាយេសុ’បិ តីសុ’បិ;

អទា គាមសហស្សំ សោ, ពហុប្បាទំ និរាកុលំ.

១៧. អនុស្សរន្តោ សោ តិណ្ណំ, រតនានំ គុណេ វរេ;

ឯកាវលិំ គហេត្វាន, អក្ខមាល មកា កិរ.

១៨. ឯវំ សព្ពប្បយោគេហិ, សោ’ហុ ធម្មបរាយនោ;

សព្ពេ តមនុសិក្ខន្តា, ហេសុ ធម្មករា នរា.

១៩. ទមិឡោ បោត្ថកុដ្ឋវោ, តស្ស កម្មករោ តទា;

មាដម្ពិយវ្ហំ ការេសិ, បធានឃរមព្ភុតំ.

២០. ពូកកល្លេ អម្ពវាបិំ, តន្តវាយិកចាដិកំ;

គាមំ និដ្ឋិលវេដ្ឋិញ្ច, តស្សា’ទា សោ សទា សកំ.

២១. កប្បូរបរិវេណេ ច, កុរុន្ទបិល្លកេ តថា;

មហារាជឃរេ ចេវ, បាសាទេ សោ’វ ការយិ.

២២. អញ្ញត្ថា’ទា តយោ គាមេ, វិហារេសុ មហាធនោ;

បោត្ថសាតវ្ហយោ បញ្ញោ, វិហារេ ជេតនាមកេ.

២៣. សេនាបតិរាជនាមំ, បរិវេណំ សមាបយិ;

មហាកន្ទោ ច ទមិឡោ, បរិវេណំ សនាមកំ.

២៤. ចុល្លបន្ថំ តថា ឯកោ, សេហាលឧបរាជកំ;

ឧបរាជា សការេសិ, សង្ឃតិស្សោ’បិ រាជិនោ.

២៥. អញ្ញេសុ ពហវោ អាសុំ, វិហារេ ឯវមាទិកេ;

ភស្ស រញ្ញោ’ នុវត្តន្តា, ឯវំ ធម្មីហិ បាណិនោ.

២៦. បាបំ វាបិ ហិ បុញ្ញំ វា,

បធានោយំ ករោតិ យោ;

លោ កោ តំ តំ ករោតេវ,

តំ វិជនេយ្យ បណ្ឌិតោ.

២៧. ជេដ្ឋនាមា មហាបុញ្ញា, មហេសី តស្ស រាជិនោ;

ជេដ្ឋារាមញ្ច ការេសិ, ភិក្ខូនីនមុបស្សយំ.

២៨. តស្សា’ទាសិ ច ទ្វេ គាមេ, បក្កបាសាណភូមិយំ;

តម្ពុទ្ធំ ភេលគាមញ្ច, អារាមិកសតំ តថា.

២៩. អកា មលយរាជាបិ, ធាតុគេហំ មហារហំ;

មណ្ឌលគិរិវិហារម្ហិ, ចេតិយស្ស មហាធនោ.

៣០. លោហបាសាទកេ សោ’វ, ឆាទេសិ មជ្ឈកូដកំ;

ពោធិតិស្សវិហារញ្ច, ពោធិតស្សោ មហាយសោ.

៣១. ទីបេ មណ្ឌលិកា សព្ពេ, តត្ថ តត្ថ យថាពលំ;

វិហារេ បរិវេណេ ច, ការយិំសុ អនប្បកេ.

៣២. តស្ស កាលោ នរិន្ទស្ស, បុញ្ញកម្មមយោ ឥធ;

អតិវិត្ថារភីតេន, សព្ពសោ ន វិចារិតំ.

៣៣. បុព្ពកោបិ កថាមគ្គោ, អាកុលោ វិយ ភាតិមេ;

យថាបធានំ កថិតំ, ហេតូនំ ឧបលក្ខណំ.

៣៤. អថាបរេន កាលេន, បុលត្ថិនគរំ គតោ;

វាសំ តត្ថេវ កប្បេសិ, ករោន្តោ បុញ្ញសញ្ចយំ.

៣៥. អតេកិច្ឆិយរោគេន, សម្ផុដ្ឋោ កាលមត្តនោ;

មរណស្ស វិទិត្វាន, តមាហុយមហាជនំ.

៣៦. ឱវទិត្វាន ធម្មេន, មរណំ សោ ឧបាគមិ;

មហាជនោ មតេ តស្មិំ, ពាឡ្ហសោកោ បរោទិយ.

៣៧. កត្វា អាឡហណេ តស្ស, កិច្ចំ សព្ពមសេសតោ;

តស្សាឡាហណភស្មម្បិ, កត្វា ភេសជ្ជមត្តនោ.

៣៨. រាជា ភណ្ឌញ្ច តំ សព្ពំ, សព្ពញ្ច ពលវាហនំ;

សម្មា អាទាយ គោបេត្វា, នគរំ សមុបាគមិ.

៣៩. ឯវំ សោឡសមេ វស្សេ, រាជា អាសិ ទិវង្គតោ;

បោត្ថកុដ្ឋោបិ ទមិឡោ, រជ្ជំ តស្ស វិចារយិ.

៤០. ឧបរាជំ គហេត្វាន, ទាឋាសិវំ ខិបាបយិ;

ចារកោ វិហិតុំ សម្មា, រក្ខាវរណ មាទិសិ.

៤១. វិនា រញ្ញា ន សក្កាតិ, មេទិនិំ បរិភុញ្ជិតុំ;

អានេត្វា ទត្តនាមកំ, ធនបិដ្ឋប្បធានកំ.

៤២. ឧប្បន្នំ រាជវំសម្ហិ, រជ្ជេ តំ អភិសិញ្ចិយ;

តស្ស នាមំ ឋបេត្វាន, សយំ សព្ពំ វិចារយិ.

៤៣. ទន្តោ សោ ធនបិដ្ឋិម្ហិ, វិហារំ សកនាមកំ;

ការយិត្វាន បុញ្ញានិ, អញ្ញានិបិ សមាចិនិ.

៤៤. សមកន្តុ សោ ឋត្វា’វ, វស្សទ្វយ មហុមតោ;

បោត្ថកុដ្ឋោ មតេតស្មិំ, បុន អញ្ញម្បិ មាណវំ.

៤៥. ហត្ថទាឋំ សមាហូយ, ឧណ្ហា នគរសម្ភវំ;

តម្បិ រជ្ជេ ភិសិញ្ចិត្វា, យថា បុព្ពំ សយំវសី.

៤៦. កាឡទីឃាវិកំ កត្វា, បធានឃរកំ តថា;

បុញ្ញមញ្ញំ ឆមាសេហិ, សោ’បិ មច្ចុវសំ គតោ.

៤៧. ឯវំ វិទិត្វា ពហុបទ្ទវានិ;

ធនានិ ធញ្ញានិ ច វាហនានិ;

វិហាយ រជ្ជេសុ រតិំសប្បញ្ញា;

មនុញ្ញបុញ្ញាភិរតា ភវេយ្យុំ.

សុជនប្បសាទសំវេគត្ថាយ កតេ មហាវំសេ

តិរាជកោ នាម

ចតុចត្តាលីសតិមោ បរិច្ឆេទោ.