បញ្ចចត្តាលីសតិម បរិច្ឆេទ

១. រញ្ញោ តស្សច្ចយេ រាជា, មាណវម្មោ អហោសិ សោ;

កិំ គោត្តោ កស្ស បុត្តោ ច, កថំ រជ្ជមបាបុណិ.

២. មហាសម្មតវំសម្ហិ, ជាតោ ជាតិគុណាវហោ;

បុត្តោ កស្សបនាមស្ស, ថូបារាមស្ស ភេទិនោ.

៣. ធីតា មលយរាជស្ស, សង្ឃនាមស្ស រាជិនោ;

តំ លភិត្វា វសំ ទេសេ, ឧត្តរេ លីនវុត្តិកោ.

៤. ហត្ថទាឋនរិន្ទេន, តស្មិំ អត្ថេវ ធារិតេ;

ជម្ពុទីបមុបាគម្ម, នរសីហំ មហីបតិ.

៥. គន្ត្វា វត្វា សកំ នាមំ, សេវិតុំ តមុបក្កមិ;

អារាធេសិ ច សព្ពេហិ, បយោគេហិ នរាធីបំ.

៦. វិទិត្វា តស្ស សោហជ្ជំ, នេត្វា ភរិយមត្តនោ;

វាសំ តត្ថេវ កប្បេសិ, សេវមានោ ទិវានិសំ.

៧. សោបិ អារាធិតោ តេន, កណ្ឌុវេដ្ឋិ នរុត្តមោ;

សព្ពំ នេន្តោវ តំ រជ្ជំ, មហាភោគមទាបយិ.

៨. តេន សំវាសមន្វាយ, ភរិយា សង្ឃនាមិកា;

ចតស្សោ ធីតរោ បុត្តេ, ចត្តារោបិ វិជាយថ.

៩. អថេកទិវសំ រាជា, ហត្ថិក្ខន្ធវរំ គតោ;

សញ្ចរន្តោ យថាកាមំ, មាណវម្មេន ឯកតោ.

១០. នាឡិកេរំ បិវិត្វាន, តត្រដ្ឋោវ បិបាសិតោ;

មាណវម្មស្ស បាទាសិ, មញ្ញន្តោ អញ្ញមេវ តំ.

១១. សោ តំ គហេត្វា ចិន្តេសិ, សខំ បេស នរាធិបោ;

ឧច្ឆិដ្ឋំ នាម កិំ ហោតិ, សត្តានំ បរមត្ថតោ.

១២. តស្មា យុត្តំ មយាបាតុ-មីតិ ចិន្តិយ តំ បិវិ;

ឯវំ ហោន្តិ មហុស្សាហា, ទេតុកាមាហិ ពុទ្ធិនោ.

១៣. រាជាបិ ទិស្វា តំ ភីតោ, តស្សបី តាវ សេសកំ;

សយំ បិវិ តថាហោតិ, កម្មំ បុញ្ញវតំ សទា.

១៤. ឋបេសិ សកវេសេវ, តតោ បដ្ឋាយ អត្តនោ;

ភោជនេ សយនេ ចេវ, បរិហារេ ច វាហនេ.

១៥. ឯវំ តេសុ វសន្តេសុ, យុទ្ធត្ថាយមុបក្កមិ;

វល្លភោ នរសីហេន, នរសីហោ វិចិន្តយិ.

១៦. អយំ ខោ មម សេវាយ, រជ្ជំ វំស គតំ សកំ;

លភិស្សាមីតិ សេវេតិ, រត្តិំ ទិវ មតន្ទិតោ.

១៧. សចេ សោបិ មយា គន្ត្វា, យុជ្ឈន្តោ មរណំ គតោ;

តក្កិតំ តស្ស មយ្ហញ្ច, សព្ពំ តមផលំ ភវេ.

១៨. ឯវំ ចិន្តិយតំ រាជា, និវត្តេត្វា សកេ បុរេ;

សយំ វល្លភរាជេន, កាតុំ សង្គាមមារសិ.

១៩. មាណវម្មោបិ ចិន្តេសិ, សចេ’យំ មយិ ជីវិតិ;

រាជា មីយតិ យុទ្ធម្ហិ, កិំ ផលំ មម ជីវិតេ.

២០. វិស្សាសោ ទុក្កតោ តេន, ភវិស្សតិ តថាសតិ;

សង្គហេសិ កិមត្ថំ មំ, សមានត្តេន អត្តនោ.

២១. តស្មា យុត្តំ មយា គន្តុំ, សហសង្គាម មណ្ឌលំ;

សុខញ្ហិ សទ្ធិំ តេនេត្ថ, ជីវិតំ មរណំបិ វា.

២២. ឯវំ ចិន្តិយ សន្នទ្ធ-ពលោ ហត្ថិវរំ គតោ;

គន្ត្វា ទស្សេសិ អត្តានំ, សោ តំ សង្គាម មណ្ឌលេ.

២៣. នរសីហោវ តំ ទិស្វា, ហដ្ឋតុដ្ឋោ សមុគ្គិរិ;

សហោ សន្ថវមេតស្មិំ, កត្តព្ពំ មេ កតំ ឥតិ.

២៤. តតោ មានស្ស សេនា ច, សេនា ចេវស្សរាជិនោ;

សេនំ វល្លភរាជស្ស, វិទ្ធំសេសិ សមាគតា.

២៥. មាណវម្មោបិ ទស្សេសិ, តហិំ សុរត្តមត្តនោ;

បរក្កមន្តោ ទេវានំ, រណេ នារាយណោ វិយ.

២៦. នរសីតោបិ សន្តុដ្ឋោ, មាណវម្មស្ស វិក្កមេ;

អាលិង្គត្វា សិនេហេន, ត្វំ ខោ មេ ជយទោ ឥតិ.

២៧. អត្តនោ បុរមាគម្ម, កត្វា វិជយមង្គលំ;

មាណវម្មស្ស សេនាយ, កត្តព្ពំ សព្ពមាចរិ.

២៨. អថេវំ ចិន្តយិ រាជា, កត្តព្ពំ មេ សហាយកោ;

អត្តនា’កាសិ សព្ពញ្ច, អនណោ សោ មមជ្ជតោ.

២៩. ឥណំ មមាបិ សោធេមិ, កត្វា កត្តព្ពមត្តនា;

កត្តញ្ញូ កតវេទីហិ, បុរិសា’តីវទុល្លភា.

៣០. អមច្ចេ សន្និបាតេត្វា, ឥទំ វចនមព្រវិ;

សហាយស្ស មមេតស្ស, កម្មេ តុម្ហេបិ សក្ខិនោ.

៣១. មយាបិ តស្ស កត្តព្ពំ, កម្មំ សាធុ សុខាវហំ;

ឧបការោ ហិ សាធូនំ, ធម្មោ បុព្ពោបការិនោ.

៣២. ឯវំ វុត្តេ អមច្ចា តេ, បច្ចាហំសុ មហីបតិ;

យំ យមិច្ឆតិ ទេវោហិ, តំ តំ រុច្ចតិ នោ ឥតិ.

៣៣. អថ សោ មាណវម្មស្ស, សេនំ ទត្វា សវាហនំ;

សព្ពោបករណញ្ចេវ, សព្ពកម្មករេបិ ច.

៣៤. គច្ឆាតិ វត្វា តំ យន្តំ, សហសេនាយបេក្ខិយ;

បរិទេវិត្ថ ភូមិន្ទោ, វិប្បវុត្ថំ’វ បុត្តកំ.

៣៥. មាណវម្មោបិ អារុយ្ហ, នាវាយោ ជលធីតដេ;

ន ចិរេនេវ អាគម្ម, សមត្តិក្កម្ម វេគសា.

៣៦. សហ សេនាយ មទ្ទន្ថោ, លង្កាទីបមុបវិសី;

តំ សុត្វាន បលាយិត្ថ, រាជា ទាឋោបតិស្សកោ.

៣៧. មាណវម្មោ បុរំ គន្ត្វា, អហុត្វាវ នរាធិបោ;

បលាតមនុពន្ធិត្ថ, បទានុបទមុគតោ.

៣៨. តទា សា ទមិឡិ សេនា, អស្សោសិ កិរ សាមិកោ;

មហារោគា’ភិភូតោតិ, សុត្វា តំ សា អបក្កមិ.

៣៩. សុត្វា ទាឋោបតិស្សោ តំ, សមាទាយ មហាពលំ;

មាណវម្មំ ឧបាគម្ម, កាតុមារភិ សំយុធំ.

៤០. មាណវម្មោ ច ចិន្តេសិ, សព្ពា សេនា គតា មម;

មតេ មយិ សមិជ្ឈេយ្យ, វេរិនោ មេ មនោរថំ.

៤១. ជម្ពុទីបំវ តស្មា’ហំ, គន្ត្វា’ទាស ពលំ តតោ;

បុន រជ្ជំ គហេស្សំតិ, តស្មា ឯវមកាសិ សោ.

៤២. គន្ត្វា បុន’បិ ទិស្វាន, សហាយំ នរសីហកំ;

អារាធហន្តោ និបុណំ, សក្កច្ចំ តមុបដ្ឋហិ.

៤៣. យាវ រាជចតុក្កំសោ, មាណាម្មោ តហិំ វសិ;

នរសីហោ’ថ ចិន្តេសិ, មានត្ថទ្ធោ យសោធនោ.

៤៤. រជ្ជត្ថំ មេ សហា យោ មំ, សេវន្តោយេវ អទ្ធគោ;

វុទ្ធោ ហេស្សតិ តំ បស្សំ, កថំ រជ្ជំ ករោមហំ.

៤៥. ឥមស្មិំ បន វារស្មិំ, បេសយិត្វា ពលំ មម;

រជ្ជំ តំ ន គហេស្សាមិ, កោ អត្ថោ ជីវិតេន មេ.

៤៦. ឯវំ ចិន្តិយ សោ សេនំ, សន្និបាតិយ អត្តនោ;

សន្នាហេត្វា យថា យោគំ, ទាបេត្វាន យថារុចិំ.

៤៧. សយមេវ តមាទាយ, សមុទ្ទតដមាគតោ;

នាវាយោ ចិត្តរូបាយោ, ការយិត្វា ថិរា ពហូ.

៤៨. អមច្ចេ អាហ ‘‘ឯតេន, សទ្ធិំ គច្ឆថ ភោ’’ឥតិ;

នាវំ អារោហិតុំ សព្ពេ, ន ឥច្ឆិំសុ តទា ជនា.

៤៩. តទា សីហោ វិចិន្តេត្វា, សយំ ហុត្វា តិរោហិតោ;

អត្តនោ បរិហារំ សោ, រាជលក្ខណសម្មតំ.

៥០. សព្ពំ តស្សេវ ទត្វាន, អលង្ការម្បិ អត្តនោ;

អារោបេត្វាន តំ នាវំ, គច្ឆ ឋត្វាន សាគរេ.

៥១. ឥមំ ភេរិំច វាទេហិ, កោដ្ឋនាមន្តិ យោជយី;

សោ’បិ សព្ពំ តថាកាសិ, រាជានោ អគមា ឥតិ.

៥២. អារុហិំសុ ជនា នាវំ, ឯកំ កត្វា នរាធិបំ;

សោ តំ សេនង្គមាទាយ, មាណោ គន្តុំ សមារភិ.

៥៣. កេវលោ’បិ សមុទ្ទោ សោ, អហោភិ នគរូបមោ;

អថ សោ បដ្ដនំ បត្វា, ឱតរិត្វា សវាហនោ.

៥៤. វិស្សាមេត្វា ពលំ តត្ថ, វសំ កតិបយេ ទិនេ;

ឧត្តរំ ទេសមាទាយ, កត្វា ហត្ថគតំ ជនំ.

៥៥. អក្ខោព្ភិយ មហាសេនោ, នគរំ គន្តុមារភិ;

បោត្ថកុដ្ឋោបិ តំ សុត្វា, បច្ចុគ្គញ្ឆិ មហាពលោ.

៥៦. សំគច្ឆិំសុ ឧភោ សេនា, ភិន្នវេលា’វ សាគរា;

មាណវម្មោ តតោ ហត្ថិ-មារុយ្ហ គហិតាយុធោ.

៥៧. បោត្ថកុដ្ឋញ្ច រាជានំ, ទ្វេធា កត្វា បលាបយិ;

ហត្ថទាឋំ បលាយន្តំ, ទិស្វា ជនបទា នរា.

៥៨. សីសមស្ស គហេត្វាន, មាណវម្មស្ស ទស្សយុំ;

បោត្ថកុដ្ឋោបលាយិត្វា, មេរុកន្ទរមាគមិ.

៥៩. តតោ តំ សាមិកោ ទិស្វា, សហាយោ មេ អយំចិរំ;

តស្មា ន សក្កា ចឌ្ឌេតុំ, អាបទេ សរណាគតំ.

៦០. សាមិនោ ច សហាយស្ស, និទ្ទោសោហំ កថំ ភវេ;

ឥតិ ចិន្តិយ បូវំ សោ, សវិសំ ខាទិយា’មរិ.

៦១. កុដ្ឋកោបិ ច តេនេវ, ខាទិត្វា បូវកំ មតោ;

មាណវម្មស្ស តស្សេវំ, ទីបោ អាសិ អកណ្ដកោ.

៦២. មាណវម្មោ តតោ ទីបេ, ឆត្តំ ឧស្សាបយិ តទា;

វារេន្តោ វិយ តេនេវ, ទុក្ខំ ទីបេ ជនស្ស សោ.

៦៣. បុញ្ញកម្មានិ សោ’កាសិ, អនគ្ឃានិ ពហូនិ ច;

សមត្ថោ កោហិ តំ សព្ពំ, វត្តុំ បដិបទំ នរោ.

៦៤. កប្បគាមវ្ហយញ្ចេវ, តថា សេបណ្ណិនាមកំ;

បធានរក្ខេ ច សិរិំ, សិរីសង្ឃាទិ ពោធិកេ.

៦៥. បាសាទំ សោវ ការេសិ, បសាទាវហមុត្តមោ;

ឆាទេសិ លោហបាសាទំ, ថូបារាមឃរំ តថា.

៦៦. ថូបារាមេ ច បាសាទំ កត្វា’ទា បំសុកូលិនំ;

ជិណ្ណកំ បដិសង្ខាសិ ឆត្តំ ចេតិយមុទ្ធនិ;

ពហវោ ជិណ្ណកាវាសេ តត្ថេវ បដិសង្ខរិ.

[ឯត្ថ មាណវម្មស្ស រជ្ជកថាយ ឩនតា ទិស្សតិ. ឥតោ បដ្ឋាយ អគ្គពោធិស្ស រជ្ជបដិពទ្ធា កថា វិរ ខាយតិ.]