ចត្តាលីសតិម បរិច្ឆេទ

អដ្ឋរាជកោ

១. តស្សច្ចយេ កុមារាទិ-ធាតុសេនោតិ វិស្សុតោ;

អហុ តស្ស សុតោ រាជា, ទេវរូបោ មហាពលោ.

២. ការិតេ បិតរា’កាសិ, វិហារេ នវកម្មកំ;

ការេត្វា ធម្មសង្គីតិំ បរិសោធេតិ សាសនំ.

៣. សន្តប្បេសិ មហាសង្ឃំ, បច្ចយេហិ ចតូហិបិ;

កត្វា បុញ្ញានិ’នេកានិ, នវមេ ហាយនេ’តិគា.

៤. តិត្តិសេនោ សុតោ តស្ស, រាជា ហុត្វា អនេកធា;

កត្វា បុញ្ញានិ រជ្ជំ តំ, មាសម្បិ នវមេ ជហិ.

៥. សិវោ តំ មាតុលោ ហន្ត្វា, ហុត្វា រាជា អនប្បកំ;

បុញ្ញំ កត្វោ’បតិស្សេន, បញ្ចវីស ទិនេ ហតោ.

៦. ឧបតិស្សោ តតោ អាសិ, រាជា ហន្ត្វាន សីវកំ;

មោគ្គល្លានស្ស ភគិនី, សាមិកោ ធជិនីបតិ.

៧. រាជា ឋានន្តរាទីហិ, កត្វាន ជនសង្គហំ;

សីលាកាឡស្ស បាទាសិ, សហ ភោ កនធីវរំ.

៨. ឯកោ បុត្តោ អហុ រញ្ញោ, ឧបតិស្សស្ស កស្សបោ;

សសោឡស សហាយេហិ, សូរោ សូបេហិ សញ្ញុតោ.

៩. ឯក វុត្តិសហាយេហិ, ទានមាន មហាធនោ;

ធម្មដ្ឋោ វីរិយាជីវិ, សាធុ ជេដ្ឋបចាយកោ.

១០. សិលា កាឡោតតោ រជ្ជ-លោភវញ្ចិត មានសោ;

ទក្ខិណំ មលយំ គន្ត្វា, សង្គណ្ហិត្វា មហា ពលំ.

១១. វិលុម្បមានោ បច្ចន្តិ, សម្បត្តោ នគរន្តិកំ;

តំ សុត្វា កស្សបោ ជេដ្ឋោ, វរមារុយ្ហ កុញ្ជរំ.

១២. អស្សា សេត្វាន បិតរំ, សមាទាយ សហាយកេ;

និក្ខម្ម នគរា គច្ឆិ, សិលាកាលស្ស ទស្សនំ.

១៣. ឯវំ សត្ត’ដ្ឋ វារេសុ, បលាតោ លីនវុត្តិកោ;

ហត្ថេ កត្វា ឧបាយេន, ទេសេ បាចិន បច្ឆិមេ.

១៤. យុជ្ឈិតុំ បុន បាចិន-តិស្ស បព្ពតមាគមិ;

កស្សបោបិ សហាយេហិ, សទ្ធិមារុយ្ហ ទន្តិនំ.

១៥. តត្ថ គន្ត្វា បលាបេត្វា, ចោរំ បព្ពតមត្ថកំ;

អារោបេសិ មហានាគំ, តេនា’សិ គិរិកស្សបោ.

១៦. មានត្ថទ្ធោ សិលាកាឡោ, ភិយ្យោ រដ្ឋំ បភិន្ទិយ;

សព្ពំ ហត្ថគតំ កត្វា, អជេយ្យ ពលវាហនោ.

១៧. អាគម្ម នគរំ រុន្ធិ, សត្ថាហំ រាជសេវកា;

យុជ្ឈិត្វា វិរលា អាសុំ, តតោ ចិន្តេសិ កស្សបោ.

១៨. ឯតេ នគររោធេន, សព្ពេ ភិជ្ជន្តិ បាណិនោ;

បរិហីនំ ពលំ រាជា, អន្ធកោ ច មហល្លកោ.

១៩. មេរុកន្ទរកេ កត្វា, មាតរំ បិតរញ្ច មេ;

អង្គហេត្វា ពលំ បច្ឆា, ចោរោ និគ្គណ្ហិ យោ ឥតិ.

២០. រត្តិយំ សោ សហាយេ ច, រាជសាធនមេវច;

អាទាយ បិតរោ ចេវ, មលយំ គន្តុមារភិ.

២១. តទា មគ្គមជានន្តា, សម្មូឡា មគ្គទេសកា;

នគរស្ស សមីបេវ, សម្ភមិំសុ ឥតោ តតោ.

២២. សិលាកាឡោ បវត្តិំ តំ, សុត្វា សង្គម្ម វេគសា;

បរិវារេសិ សង្គាមោ, តត្ថ ភិំសនកោ អហុ.

២៣. ទេវាសុររណាការេ, វត្តមានេ មហាហវេ;

បតិតេសុ សហាយេសុ, សីទមានេ មហាគជេ.

២៤. ហត្ថារោហស្ស ទត្វា, ឆិន្ទិត្វា សីសមត្តនោ;

បុញ្ឆិត្វា លោហិតំ កត្វា, កោសិយំ អសិ បុត្តិកំ.

២៥. ហត្ថិកុម្ភេ ឧភោ ហត្ថេ, ឋបេត្វាន អវត្ថរិ;

ឧបតិស្សោបិ តំ សុត្វា, សោកសល្លាហតោ មរិ.

២៦. ឯវំ ទិយឌ្ឍវស្សេន, ឧបតិស្សេ ទិវំគតេ;

រាជា’ហោសិ សិលាកាឡោ, បុព្ពនាមេន ឯកតោ.

២៧. តំ អម្ពសាមណេរាទិ-សិលាកាឡោតិ វោហរុំ;

តិត្ថំ តេរសវស្សានិ, ទិបំ ធម្មេន បាលយិ.

២៨. មហាបាឡិម្ហិ ទាបេសិ, បច្ចគ្ឃំ រាជភោជនំ;

វេជ្ជសាលាសុ ភោគេ ច, វឌ្ឍេសិ ជនតាហិតោ.

២៩. អន្វហំ បូជយិ ពោធិំ, បដិមាយោ ច ការយិ;

សព្ពេសំ ទីបវាសីនំ, ភិក្ខូនំ’ទា តិចីវរំ.

៣០. មាឃាតំ ការយិទីបេ, សព្ពេសំយេវ បាណិនំ;

អានិតំ អត្តនា កេស-ធាតុំ សម្មា អបូជយិ.

៣១. រហេរទកវារញ្ច, អទាសិ អភយុត្តរេ;

បុរត្ថិមា ថេរីយានំ, វិហារកុន្ថនាម សោ.

៣២. អានេត្វា អាសនំ តត្ថ, ឋបេសិ ទុមរាជកេ;

យាវជីវំ បវត្តេសិ, បុញ្ញកម្មមសង្ខិយំ.

៣៣. មោគ្គល្លានោ តថា ទាឋា, បភុតិ ចោ’បតិស្សកោ;

បុត្តោ តស្សា’សុមគ្គស្ស, ទេសំ ទត្វា បុរត្ថិមំ.

៣៤. ទត្វា ឋានន្តរញ្ចាទិ-បាទសញ្ញំ វិសជ្ជយិ;

គន្ត្វា តត្ថ វសាហីតិ, សោបិ គន្ត្វា តហិំ វសិ.

៣៥. ឋានំ មលយរាជគ្គំ, ទេសំ ទត្វាន ទក្ខិណំ;

រក្ខណត្ថំ សមុទ្ទស្ស, មជ្ឈិមំ តុ និយោជយិ.

៣៦. ឧបតិស្សំ តុ វាសេសិ, សន្តិកេយេវ អត្តនោ;

វិសេសេន មមាយន្តោ, យូនំ កល្យានទស្សនំ.

៣៧. តស្ស ទ្វាទសមេ វស្សេ, ឥតោ កាសិ បុរំ គតោ;

ធម្មាតុ មិធា’នេសិ, តតោ វាណិជ មាណវោ.

៣៨. រាជា ទិស្វា’សមត្ថោ សោ, ធម្មាធម្មវិចារណេ;

ហេមសញ្ញាយ ទីបម្ហិ, បតន្តោ សលភោ វិយ.

៣៩. ពុទ្ធធម្មោតិ សញ្ញាយ, តំ គហេត្វាន សាធុកំ;

កត្វា សក្ការសម្មានំ, គេហេ រាជឃរន្តិកេ.

៤០. ឋបេត្វា អនុវស្សំ តុ, នេត្វា ជេតវនំ មហំ;

កាតុំ ការេសិ ចារិត្តំ, ហិតំ មន្ត្វាន បាណិនំ.

៤១. ឯវំ កត្វា សិលាកាឡោ, បុញ្ញកម្មមនប្បកំ;

បត្តេ តេរសមេ វស្សេ, យថាកម្មមុបាគមិ.

៤២. ទាឋប្បភុតិកោ រជ្ជំ, គហេត្វា ភាតរំសកំ;

អក្កមោតិ និវារេន្តំ, មារាបេសិ វិពុទ្ធិកោ.

៤៣. មោគ្គល្លានោ’ថ តំ សុត្វា, អប្បត្តំ រជ្ជមគ្គហិ;

អការណេ មេ មារេសិ, កណិដ្ឋំ ធម្មវាទីនំ.

៤៤. ការាបេស្សាមហម្បជ្ជ, រជ្ជន្តិ បរិកុប្បិយ;

សមាទាយ មហាសេនំ, អគារាហេរ បព្ពតំ.

៤៥. រាជាបិ សុត្វា សន្នទ្ធ-ពលកាយោ ករិន្ទកេ;

បព្ពតេ សិវិរំ ពន្ធិ, មោគ្គល្លានោ និសម្មតំ.

៤៦. សាបរាធាន តេ មេ វា, មនុស្សា ទីបវាសិនោ;

ឯកស្មិញ្ច មតេ រជ្ជ-មុភិន្នំយេវ នោសិយា.

៤៧. តស្មា អញ្ញេន យុជ្ឈន្តុ, ឧភោយេវ មយំ ឥធ;

ហត្ថិយុទ្ធំ ករោមាតិ, រញ្ញោ បេសេសិ សាសនំ.

៤៨. សោបិ សាធូតិ វត្វាន, ពទ្ធបញ្ចាយុធោ គជំ;

អារុយ្ហ មុនិនោ មារោ វិយ ឱត្ថរិ តាវទេ.

៤៩. មោគ្គល្លានោបិ សន្នទ្ធោ, អារុយ្ហ ករីនំ វរំ;

តត្ថា’គោ អញ្ញមញ្ញំ តេ, បាបុណិំសុ មហាគជា.

៥០. សទ្ទោ សូយិត្ថ សង្ឃដ្ដេ, អសនិរាវ សន្និភោ;

ទន្តឃាតេន ឧដ្ឋាសិ, ជាលា វិជ្ជុល្លតា វិយ.

៥១. សញ្ឈាឃនសភាគា’សុំ, គជា លោហិតមក្ខិតា;

មោគ្គល្លានគជាវិទ្ធោ, រញ្ញោឱសក្កិ កុញ្ជរោ.

៥២. រាជា អារភិ តំ ទិស្វា, ឆិន្ទិតុំ សីសមត្តនោ;

មោគ្គល្លានោ’ថ វន្ទន្តោ, យាចិ’មេ’វំ កិរីឥតិ.

៥៣. យាចមានេបិ សោមានំ, មានេន្តោ ឆិន្ទិកន្ធរំ;

ឆឌ្ឌេសិ ឆហិ សោ រជ្ជំ, មាសេហិ ទិវសេហិ ច.

៥៤. មោគ្គល្លានោ តតោ រាជា, អាសិ ទីបេ មហាពលោ;

មាតុលញ្ច បដិច្ចេមំ, ចូលនាមេន វោហរុំ.

៥៥. អាសាធារណកាវេយ្យោ, វត្ថុត្តយ បរាយណោ;

ទានសំយម សោចេយ្យោ, សោរច្ចាទិគុណាលយោ.

៥៦. ទានេន បិយវាចាយ, អត្ថស្ស ចរិយាយ ច;

សមានត្តស្សភាវេន, សង្គហេសិ មហាជនំ.

៥៧. បិណ្ឌបាតវិហារេហិ, ភេសជ្ជច្ឆាទនេហិ ច;

ភិក្ខុសង្ឃញ្ហិ សង្គណ្ហិ, ធម្មិកាយ ច គុត្តិយា.

៥៨. អតិរេកាយ បូជាយ, បូជេត្វា ធម្មភាណកេ;

បិដកេ តីណិ វាចេសិ, សទ្ធិមដ្ឋកថាយ សោ.

៥៩. កុមារេ ឧបលាលេត្វា, និវាបេន យថារុចិំ;

សជ្ឈាបេសិ សទា ធម្មំ, ធម្មទីបោ មហាមតិ.

៦០. ធម្មទីបញ្ច សោ កត្វា, កុញ្ជរសេខរេនិ សា;

ធម្មាវាសានេ វាចេសិ, បុរម្ហិ បុរិសុត្តមោ.

៦១. ពន្ធាបេសិ កទម្ពញ្ច, នទិំបព្ពតមជ្ឈតោ;

បត្តបសាណវាបិញ្ច, ធនវាបិំ គរិតរំ.

៦២. គណ្ហាបេសិ សទីឃាយុ-ហេតុ កម្មន្តិ សាទរោ;

លិខាបេសិ ច សទ្ធម្មំ, វត្ថុបូជញ្ច ការយិ.

៦៣. លោកំ សោ អនុកម្បិត្វា, មាតាបុត្តំវ ឱរសំ;

ទត្វា ភុត្វា យថាកាមំ, វស្សេ វីសតិមេ មរិ.

៦៤. មហេសី តស្ស ឃាតេត្វា, វិសយោគេន ញាតកេ;

បុត្តំ រជ្ជេ’ភិសិញ្ចិត្វា, សយំ រជ្ជំ វិចារយិ.

៦៥. តថាភិសិត្តោ សោ កិត្តិ-សិរិមេឃោ នរាធិបោ;

តិបុបត្តេហិ ឆាទេសិ, ទុមិន្ទធរមាទិតោ.

៦៦. កបណទ្ធិវណិព្ពានំ, មហាទានំ បវត្តយិ;

មគ្គបាលោ តថាការោ, អហុ សព្ពោបភោគិយោ.

៦៧. មហេសី សា សទា អាសិ, បធានា សព្ពកម្មសុ;

រជ្ជំ តស្សា’សិ តេនេវ, ហេដ្ឋុបរិយវត្តិកំ.

៦៨. រាជាបាទា មហាមច្ចា’-ហេសុំ លញ្ចបរាយនា;

ទុព្ពលេ ច វិហេឋេសុំ, ពលី ជានបទា នរា.

៦៩. សិលាកាឡស្ស កាលម្ហិ, គាមេ សង្គិល្លនាមកេ;

ភយវសីវ្ហយោ បោសោ, អហុ មោរិយវំសជោ.

៧០. អហោសិ បុត្តោ សីវស្ស, អគ្គពោធិ សនាមកោ;

ភាគិនេយ្យោបិ តស្សាសិ, មហានាគោតិ វិស្សុតោ.

៧១. ភាគិនេយោ មហានាគោ, អគ្គពោធិ ច សុន្ទរោ;

ឧឡារជ្ឈាសយត្តា សោ, មហានាគោ មហព្ពលោ.

៧២. ហិត្វា កស្សកកម្មានិ, ចោរកម្មមកា វនេ;

គោធំ លទ្ធាន បេសេសិ, មាតុលានិយ សន្តិកំ.

៧៣. គោធំ ទិស្វា’វសា ញត្វា, ធញ្ញបច្ឆិមបេសយិ;

កម្មារស្សា’បិ បេសេសិ, សសំ សោបិ តថេវកា.

៧៤. ពីជំ ភគិនី មាយាចិ, ពីជគាហញ្ច តស្ស សា;

ទាសញ្ច ញត្វា បេសេសិ, អន្នបានាទិនា រហោ.