ឯកចត្តាលីសតិម បរិច្ឆេទ

ទ្វិរាជកោ

១. មហានាគនរិន្ទស្ស, ភាគិនេយ្យោ សុភាគិយោ;

សោ អគ្គពោធិរាជាសិ, អគ្គពោធិគតាសយោ.

២. តេជេន ពាហុំ សោម្មេន, ចន្ទំ សម្បុណ្ណមណ្ឌលំ;

សុមេរុមចលន្តេន, គម្ភិរេន មហោទធិំ.

៣. វសុន្ធរា បកម្បេន, មារុតំ សម្បវុត្តិយា;

ពុទ្ធិយាមរមន្តារំ, សុទ្ធិយា សរទម្ពរំ.

៤. កាមភោគេន ទេវិន្ទ, មត្ថេន ច នរិស្សរំ;

ធម្មេន សុទ្ធវាសេដ្ឋំ, វិក្កមេន មិគាធិបំ.

៥. រាជធម្មេហិ រជ្ជេហិ, ចក្កវត្តិនរិស្សរំ;

វេស្សន្តរញ្ច ទានេន, អនុគន្ត្វា ជនេ សុតោ.

៦. មាតុលំ ឧបរាជវ្ហេ, ភាតរំ យុវរាជកេ;

ភាគិនេយ្យញ្ច មលយ-រាជឋានេ ឋបេសិ សោ.

៧. ឋានន្តរេ យថាយោគំ-សេដ្ឋាមច្ចេ ឋបេសិ ច;

ជនំ សង្គហវត្ថូហី, រាជធម្មេហិ ចគ្គហិ.

៨. ទេសំ សយោគ្គំ បាទាសិ, យុវរាជស្ស ទក្ខិណំ;

វសំ តត្ថ សិរីវឌ្ឍ-មានវាបិំ សគាហយិ.

៩. កត្វា គិរិវិហារញ្ច, សង្ឃិកំ តស្ស ទាបយិ;

ខេត្តានំ ទ្វិសតំ សង្ឃ-ភោគត្ថាយ មហាមតិ.

១០. អទា មលយរាជស្ស, ទាឋានាមំ សធីតរំ;

បរិវេណំ សីរិសង្ឃ-ពោធិនាមញ្ច ការយិ.

១១. មហាសិវស្ស ការេសិ, បរិវេណំ សនាមកំ;

បរិវារោ’បិ តស្សាសិ, ឯវំ បុញ្ញបរាយនោ.

១២. កត្វា សាធុបចារេន, បោរាណំ សង្គហំ វិធិំ;

អន្តរាយំ វិសោធេតុំ, ជិណ្ណញ្ច បដិសង្ខរិ.

១៣. កវយោ តស្ស រជ្ជម្ហិ, សីហឡាយ និរុត្តិយា;

កាវេយ្យេ ពហុកេ’កាសុំ, វិចិត្រនយាសាលិនោ.

១៤. វិហារេ ទក្ខិណេ កាសិ, បាសាទំ សុមនោហរំ;

អកា នវហិ វស្សេហិ, ទិបេ កណ្ដកសោធនំ.

១៥. កុរុន្ទនាមំ ការេត្វា, វិហារំ សព្ពសង្ឃិកំ;

វាបិំ តន្នាមកំ នាឡិ-កេរារាមំ តិយោជនំ.

១៦. មហាសិវវ្ហយេ ចេវ, សស្សំ ការយិតុំ អទា;

លាភសក្ការសម្មាន-មារាមិកសតំ តទា.

១៧. វិហារំ តំ សមីបម្ហិ, កត្វា អម្ពិលបស្សវំ;

គាមំ តន្នាមកំ ចាទា, ថេរិយានំ តបស្សីនំ.

១៨. ឧត្តរវល្លិវិហារស្ស, រតនំ ទីឃវណ្ណិតំ;

ទត្វា គាមំ បតិដ្ឋេសិ, សត្ថុពិម្ពំ សិលាមយំ.

១៩. កេឡិវាតេ ច ការេសិ, សុមនំ នាម បព្ពតំ;

មហាតេលវដំពោធិ-ឃរេ បាសាណវេទិកំ.

២០. ការេត្វា លោហបាសាទំ, បាសាទមហនេ អទា;

ឆត្តិំសានំ សហស្សានំ, ភិក្ខូនំ សោ តិចីវរំ.

២១. គាមំ ទត្វា និយោជេសិ, អារក្ខំ ធីតុ នាមកំ;

ហត្ថិកុច្ឆិវិហារេបិ, បាសាទំ កាសិ ពុទ្ធិមា.

២២. ទាឋា សិវស្ស ឋត្វាន, ឱវាទេ សាធុ ភិក្ខុនោ;

សមាចរន្តោ ធម្មេន, សក្កច្ចំ តមុបដ្ឋហិ.

២៣. មូគសេនាបតិំ ចាកា, វិហារំ សោ វិសាលកំ;

គាមំ លជ្ជិកមេតស្ស, ទាស ភោគាយ’ទាសិ ច.

២៤. មហានាគស្ស បុញ្ញត្ថំ, រញ្ញោ តំនាមកំ អកា;

មហាថេរស្ស តញ្ចា’ទា, រាជា តេបិដកស្ស សោ.

២៥. អត្តនោ សទិសានញ្ច, យោគីនំ វិគតាលយោ;

ភិក្ខូនំ ចតុសដ្ឋីនំ, វិហារំ តំ តទា អទា.

២៦. កត្វា តស្សេវ មហា-បរិវេណនិវាសិនោ;

ភិន្នោរុទីបំ ទត្វាន, វដ្ដកាការបិដ្ឋិតោ.

២៧. ទក្ខិណគីរិទឡ្ហវ្ហេ, មហានាគេ ច បព្ពតេ;

កាឡវាបាទិកេ ចា’កា, វិហារេ បោសថាលយេ.

២៨. វិហារេ អភយេ’កាសិ, មហាបោក្ខរណិំ តថា;

ចេតិយបព្ពតេ ចាកា, នាគសោណ្ឌិំ ថិរោទិកំ.

២៩. មហិន្ទតដវាវិញ្ច, ការាបេត្វាន សាធុកំ;

ឯតិស្សា មរិយាទាយ, ថេរំ នេតុំ និយោជយិ.

៣០. មហាមហិន្ទ ថេរម្ហិ, តំឋានសមុបាគតោ;

តរច្ឆា ឯវ នេតុន្តិ, កតិកញ្ចេវ ការយិ.

៣១. ឆត្តំ សោណ្ណញ្ច ការេសិ, និកាយេសុបិ តីសុ សោ;

សត្តាដ្ឋនវ វារេសុ, មហគ្ឃរតនេហិ ច.

៣២. មហាតូបេ ចតុព្ពីស-ភារំ ឆត្តំ សុវណ្ណយំ;

តត្ថ តត្ថ ច បូជេសិ, មហគ្ឃំ រតនុត្តមំ.

៣៣. ទាឋាធាតុឃរំ កត្វា, វិចិត្ររតនុជ្ជលំ;

កាសិ ហេមករណ្ឌញ្ច, លោហនាវញ្ច បាឡិយំ.

៣៤. មណិមេខលនាមញ្ច, ពន្ធាបេសិ សពន្ធនំ;

មហាមាតិញ្ច គណ្ហេសិ, មណិហីរកវាបិយំ.

៣៥. តទា ឯកោ មហាថេរោ, ជោតិបាលកនាមកោ;

បរាជេសិ វិវាទេន, ទីបេ វេតុល្លវាទិនោ.

៣៦. ទាឋាបភុតិនាមោ’ថ, អាទិបាទោ’តិលជ្ជិតោ;

ហត្ថមុក្ខិប្បិ តំ ហន្តុំ, គណ្ឌោ សញ្ជាយិ តំខណេ.

៣៧. រាជា តស្មិំ បសីទិត្វា, វិហារេយេវ វាសយិ;

មានេន តំ អនាគម្ម, ទាឋាបភូមតោ កិរ.

៣៨. ទត្វា មហាទិបាទត្តំ, ភាគិនេយ្យគ្គពោធិនោ;

រក្ខិតុំ តំ និយោជេសិ, ថេរំ សោបិ តមាចរិ.

៣៩. នីលគេហបរិច្ឆេទំ, កត្វា តស្សេវ សោ អទា;

កត្វេវំ ពហុធា បុញ្ញំ, ចតុត្តិំសេ សមេ មតោ.

៤០. អគ្គពោធិ តតោ អាសិ, រាជា បុព្ពស្ស រាជិនោ;

មហល្លកត្តានំ ខុទ្ទ-នាមេន បរិទីបយុំ.

៤១. សោ ទីបំ បរិបាលេសិ, បុព្ពចារិត្តកោវិទោ;

អកាសិ ច មហេសិំ សោ, មាតុលធីតុមត្តនោ.

៤២. សង្ឃភទ្ទំ អសិគ្គាហំ, កាសិ ពន្ធុំ មហេសិយា;

យថារហមទា ចេវ, ឋានន្តរមនាលយោ.

៤៣. កត្វា វេឡុវនំ រាជា, សាគលីនំ និយោជយី;

ជម្ពុរន្តរគល្លញ្ច, កាសិ មាតិកបិដ្ឋិកំ.

៤៤. រញ្ញោ តស្សេ’វ រជ្ជម្ហិ, កាលិង្គេសុ មហីបតិ;

សត្តានំ មរណំ យុទ្ធេ, ទិស្វា សំវិគ្គមានសោ.

៤៥. ឥមំ ទីបមុបាគម្ម, បព្ពជ្ជា កតនិច្ឆយោ;

ជោតិបាលម្ហិ បព្ពជិ, រាជា សក្កាសិ តំ ចិរំ.

៤៦. បធានឋានំ តស្ស’កា, វិហារេ មត្តបព្ពតេ;

តស្សាមច្ចោ មហេសី ច, តថេវា’គម្ម បព្ពជុំ.

៤៧. រញ្ញោ មហេសី សុត្វាន, តស្ស បព្ពជ្ជមុត្តមំ;

សក្កច្ចំ តមុបដ្ឋាសិ, រតនវ្ហញ្ច ការយិ.

៤៨. អទា រាជា អមច្ចស្ស, បាចីនកណ្ឌរាជិយំ;

វេត្តវាសវិហារញ្ច, សោ’ទា សង្ឃស្ស តំ យតិ.

៤៩. រាជត្ថេរេមតេ រាជា, សោចិត្វា បរិទេវិយ;

បធានឋានំ ការេសិ, ចូឡគល្លវិហារកេ.

៥០. បលំនគរគញ្ចេវ, តស្ស ឋានញ្ហិ ការយិ;

ឯវំ តទត្ថំ បុញ្ញានិ, ពហូនិ’បិ មហីបតិ.

៥១. ជោតិបាលិត ថេរម្ហិ, តូបារាមម្ហិ ចេតិយំ;

វន្ទមានេ បភិជ្ជិត្វា, ភាគោ តំ បុរតោ បតិ.

៥២. បក្កោសិត្វាន រាជានំ, ថេរោ ទស្សេសិ ទុក្ខិតោ;

រាជា ទិស្វាវ សំវិគ្គោ, កម្មំ បដ្ឋបិ តំខណេ.

៥៣. ទក្ខិណក្ខកធាតុំ សោ, លោហបាសាទកុច្ឆិយំ;

សារក្ខំ ឋបយិត្វាន, រត្តិន្ទិវមបូជយិ.

៥៤. នវកម្មេ ចិរាយន្តេ, ថូបារាមម្ហិ ទេវតា;

សុបិនំ តស្ស ទស្សេសុំ, រត្តិមារាមិកា វិយ.

៥៥. សចេ រាជា បបញ្ចេតិ, កាតុំ ធាតុឃរំ មយំ;

ធាតុំ គហេត្វា គច្ឆាម, យត្ថតត្ថា’តិ តំខណេ.

៥៦. រាជា បពុទ្ធោ សំវិគ្គោ, ន ចិរេនេវ ការយិ;

កម្មំ ធាតុឃរេសព្ពំ, ចិត្តកម្មាទិសញ្ញុត្តំ.

៥៧. ចតស្សោ បដិមាយោ ច, បល្លង្កេ ច សិលាមយេ;

ហេមច្ឆត្តំ សិលាទន្ត-កម្មំ គេហម្ហិ សព្ពសោ.

៥៨. មហាមច្ចាទយោ’កំសុ, ករណ្ឌានំ សតំ នវ;

ទេវានំបិយតិស្សស្ស, កម្មញ្ច និខិលំ នវំ.

៥៩. សព្ពុស្សាហេន ការេត្វា, មហាបូជំ យថារហំ;

អានេត្វា លោហបាសាទា, ធាតុំ សព្ពាទរេន សោ.

៦០. ជោតិបាលំ មហាថេរំ, សសង្ឃំ បរិវារិយ;

បរិហារេន វឌ្ឍេសិ, ធាតុំ ធាតុករណ្ឌកេ.

៦១. ធាតុគេហស្ស បាទាសិ, លង្កាទីបំ សហត្តនា;

លាភគ្គាម-មទា តស្សា, រក្ខកានំ មហេសិយា.

៦២. នាគទីបម្ហិ គេហញ្ច, រាជាយតនធាតុយា;

ឧណ្ណលោមឃរញ្ចេវ, ឆត្តមាមលចេតិយេ.

៦៣. តត្ថ គាមំ វិហារស្ស, យាគុទានាយ’ទាសិ ច;

វិហារស្ស’ភយស្សា’ទា, គាមមង្គណសាលកំ.

៦៤. នាមំ កត្វាន សោ’កាសិ, អត្តនោ ច មហេសិយា;

ទាឋគ្គពោធិមាវាសំ, វិហារេ អតយុត្តរេ.

៦៥. ទេវី កបាលនាគំ សា, វិហារំ សាធុការិយ;

តស្សេ’វាទា វិហារស្ស, សម្បន្នចតុបច្ចយំ.

៦៦. គេហំ ជេតវនេ កាសិ, រាជា រាជតចុម្ពដំ;

ឧទបានំ មណាបេសិ, សោវ ពោធិឃរន្តិកេ.

៦៧. គង្គាតដំ វលាហស្សំ, វាបិំ គិរិតដញ្ចកា;

មហាបាឡិំបិ វឌ្ឍេសិ, ភតនាវញ្ច ការយិ.

៦៨. ភិក្ខូនីនំ មហេសី ច, ភត្តវំសំ សមាទិសិ;

ឯវំ បុញ្ញានិ កត្វា សោ, ទិវំ’គា ទសមេ សមេ.

៦៩. ឯវំ បុញ្ញរតា នរាធិបតយោ សម្បន្នភោគា គមុំ;

មច្ចុស្សេវ វសំ តតោហិ មតិមា សម្មា ភវស្សីទិសំ;

បស្សន្តោ និយមំ វិហាយ វិធិនា សព្ពំ ភវេ សង្គតិំ;

និព្ពានាភិមុខោ ចរេយ្យ ធិតិមា បព្ពជ្ជមជ្ឈូបគោ.

សុជនប្បសាទសំវេគត្ថាយ កតេ មហាវំសេ

ទ្វិរាជកោ នាម

ឯកចត្តាលីសតិមោ បរិច្ឆេទោ.