សោឡសម បរិច្ឆេទ

១. បុរេ ចរិត្វា បិណ្ឌាយ, ករិត្វា ជនសង្គហំ;

រាជគេហម្ហិ ភុញ្ជន្តោ, ការេន្តោ រាជសង្គហំ.

២. ឆព្ពសទិវសេ ថេរោ, មហាមេឃវនេ វសី;

អាសឡ្ហសុក្កបក្ខស្ស, តេរសេ ទិវសេ បន.

៣. រាជគេហម្ហិ ភុញ្ជិត្វា, មហារញ្ញោ មហាមតិ;

មហា’ប្បមាទសុត្តន្តំ, ទេសយិត្វា តតោ ច សោ.

៤. វិហារករណំ ឥច្ឆំ, តត្ថ ចេតិយបព្ពតេ;

និក្ខម្ម បុរិមទ្វារា, អគា ចេតិយបព្ពតំ.

៥. ថេរំ តត្ថ គតំ សុត្វា, រថំ អារុយ្ហ ភូបតិ;

ទេវិយោ ទ្វេ ច អាទាយ, ថេរស្សានុបទំ អកា.

៦. ថេរា នាគចតុក្កម្ហិ, នហាត្វា រហទេ តហិំ;

បព្ពតារោហណត្ថាយ, អដ្ឋំសុ បដិបាដិយា.

៧. រាជា រថា តទោ’រុយ្ហ, សព្ពេ ថេរេ’ភិវាទយិ;

ឧណ្ហេ កិលន្តេ កិំរាជ, អាគតោសី’តិ អហុតេ.

៨. តុម្ហាកំ គមនាសង្កី, អាគតោម្ហី’តិ ភាសិតេ;

ឥធេវ វស្សំ វសិតុំ, អាគតម្ហា’តិ ភាសិយ.

៩. តស្សូបនាយិកំ ថេរោ, ខន្ធកំ ខន្ធកោវិទោ;

កថេសិ រញ្ញោ តំ សុត្វា, ភាគិនេយ្យោ ច រាជិនោ.

១០. មហារិដ្ឋោ មហាមច្ចោ, បញ្ចបញ្ញាសភាតុហិ;

សទ្ធិំ ជេដ្ឋកនិដ្ឋេហិ, រាជានមភិតោ ឋិតោ.

១១. យាចិត្វា តទហុ ចេវ, បព្ពជុំ ថេរសន្តិកេ;

បត្តារហត្តំ សព្ពេបិ, តេ ខុរគ្គេ មហាមតី.

១២. កន្តកចេតិយឋានេ, បរិតោ តទហេវ សោ;

កម្មានិ អារភាបេត្វា, លេណានិ អដ្ឋសដ្ឋិយោ.

១៣. អគមាសិ បុរំ រាជា, ថេរា តត្ថេវ តេ វសុំ;

កាលេ បិណ្ឌាយ នគរំ, បវិសន្តា’នុកម្បកា.

១៤. និដ្ឋិតេ លេណកម្មម្ហិ, អាសឡ្ហិបុណ្ណមាសិយំ;

គន្ត្វា អទាសិ ថេរានំ, រាជា វិហារទក្ខិណំ.

១៥. ទ្វត្តិំសមាឡកានញ្ច, វិហារស្ស ច តស្ស ខោ;

សីមំ សីមាតិគោ ថេរោ, ពន្ធិត្វា តទហេវ សោ.

១៦. តេសំ បព្ពជ្ជាបេក្ខានំ, អកាសិ ឧបសម្បទំ;

សព្ពេសំ សព្ពបឋមំ, ពទ្ធេ តុម្ពរុមាឡកេ.

១៧. ឯតេ ទ្វាសដ្ឋិ អរហន្តោ, សព្ពេ ចេតិយបព្ពតេ;

តត្ថ វស្សំ ឧបគន្ត្វា, អកំសុ រាជសង្គហំ.

១៨. ទេវមនុស្សគណគណិតំ តំ,

តញ្ច គណំ គុណវិត្ថតកិត្តិំ;

យានមុបច្ច ច មានយមានា,

បុញ្ញចយំ វិបុលំ អករិំសូតិ.

សុជនបសាទសំវេគត្ថាយ កតេ មហាវំសេ

ចេតិយបព្ពតវិហារបដិគ្គហកោ នាម

សោឡសមោ បរិច្ឆេទោ.