សត្តរសម បរិច្ឆេទ

ធាតុអាគមនោ

១. វុត្ថវស្សោ បវារេត្វា, កត្តិកបុណ្ណមាសិយំ;

អវោចេ’ទំ មហារាជំ, មហាថេរោ មហាមតិ.

២. ចិរទិដ្ឋោ ហិ សម្ពុទ្ធោ, សត្ថា នោ មនុជាធិប;

អនាថវាសំ អវសិម្ហ, នត្ថិ នោ បូជិយំ ឥធ.

៣. ‘‘ភាសិត្ថ ននុ ភន្តេមេ, សម្ពុទ្ធោ និព្ពុតោ’’ ឥតិ;

អាហ ធាតូសុ ទិដ្ឋេសុ, ទិដ្ឋោ ហោតិ ជិនោ’’ ឥតិ.

៤. វិទិតោ វោ អធិប្បាយោ, ថូបស្ស ការណេ មយា;

ការេស្សាមិ អហំ ថូបំ, តុម្ហេ ជានាថ ធាតុយោ.

៥. មន្តេហិ សុមនេនាតិ, ថេរោ រាជានមព្រវិ;

រាជា’ហ សាមណេរំ តំ, កុតោ លច្ឆាម ធាតុយោ.

៦. វិភូសយិត្វា នគរំ, មគ្គញ្ច មនុជាធិប;

ឧបោសថី សបរិសោ, ហត្ថិំ អារុយ្ហ មង្គលំ.

៧. សេតច្ឆត្តំ ធារយន្តោ, តាលាវចរសំហិតោ;

មហានាគវនុយ្យានំ, សាយន្ហសមយេ វជ.

៨. ធាតុភេទញ្ញុនោ រាជ, ធាតុយោ តត្ថ លច្ឆសិ;

ឥច្ឆាហ សាមណេរោ សោ, សុមនោ តំ សុមានសំ.

៩. ថេរោ’ថ រាជកុលតោ, គន្ត្វា ចេតិយបព្ពតំ;

អាមន្តិយ សាមណេរំ, សុមនំ សុមនោ គតិំ.

១០. ឯហិ ត្វំ ភទ្រ សុមន, គន្ត្វា បុប្ផបុរំ វរំ;

អយ្យកំ តេ មហារាជំ, ឯវំ នោ វចនំ វទ.

១១. សហាយោ តេ មហារាជ, មហារាជា មរុប្បិយោ;

បសន្នោ ពុទ្ធសមយេ, ថូបំ ការេតុមិច្ឆតិ.

១២. មុនិនោ ធាតុយោ ទេហិ, បត្តំ ភុត្តញ្ច សត្ថុនា;

សរីរធាតុយោ សន្តិ, ពហវោ ហិ តវន្តិកេ.

១៣. បត្តបូរា គហេត្វា តា, គន្ត្វា ទេវបុរំ វរំ;

សក្កំ ទេវានមិន្ទំ តំ, ឯវំ នោ វចនំ វទ.

១៤. តិលោកទក្ខិណេយ្យស្ស, ទាឋាធាតុ ច ទក្ខិណា;

តវន្តិកម្ហិ ទេវិន្ទ, ទក្ខិណក្ខកធាតុ ច.

១៥. ទាឋំ ត្វមេវ បូជេហិ, អក្ខកំ ទេហិ សត្ថុនោ;

លំកាទីបស្ស កិច្ចេសុ, មាបមជ្ជ សុរាធិប.

១៦. ‘‘ឯវំ ភន្តេ’’តិ វត្វា សោ, សាមណេរោ មហិទ្ធិកោ;

តង្ខណំយេវ អគមា, ធម្មាសោកស្ស សន្តិកំ.

១៧. សាលមូលម្ហិ ឋបិតំ, មហាពោធិំ តហិំ សុតំ;

កត្តិកច្ឆណបូជាហិ, បូជិយំ តញ្ច អទ្ទស.

១៨. ថេរស្ស វចនំ វត្វា, រាជតោ លទ្ធធាតុយោ;

បត្តបូរំ គហេត្វាន, ហិមវន្តមុបាគមិ.

១៩. ហិមវន្តេ ឋបេត្វាន, សធាតុំ បត្តមុត្តមំ;

ទេវិន្ទសន្តិកំ គន្ត្វា, ថេរស្ស វចនំ ភណិ.

២០. ចូឡាមណិ ចេតិយម្ហា, គហេត្វា ទក្ខិណក្ខកំ;

សាមណេរស្ស បាទាសិ, សក្កោ ទេវានមិស្សរោ.

២១. តំ ធាតុំ ធាតុបត្តញ្ច, អាទាយ សុមនោ តតោ;

អាគម្ម ចេតិយគិរិំ, ថេរស្ស’ទាសិ តំ យតិ.

២២. មហានាគវនុយ្យានំ, វុត្តេនា វិធិនា’គមា;

សាយន្ហាសមយេ រាជា, រាជសេនា បុរក្ខតោ.

២៣. ឋបេសិ ធាតុយោ សព្ពា, ថេរោ តត្ថេវ បព្ពតេ;

មិស្សកំ បព្ពតំ តស្មា, អាហុ ចេតិយ បព្ពតំ.

២៤. ឋបេត្វា ធាតុបត្តំ តំ, ថេរោ ចេតិយបព្ពតេ;

គហេត្វា អក្ខកំ ធាតុំ, សង្កេតំ សគណោ’គមា.

២៥. សចាយំ មុនិនោ ធាតុ, ឆត្តំ នមតុ មេ សយំ;

ជណ្ណុកេហិ ករីធាតុ, ធាតុចង្កោដកោ អយំ.

២៦. សិរស្មិំ មេ បតិដ្ឋាតុ, អាគម្ម សហ ធាតុកោ;

ឥតិ រាជា វិចិន្តេសិ, ចិន្តិតំ តំ តថា អហុ.

២៧. អមតេនា’ភិសិត្តោវ, អហុ ហដ្ឋោ’តិ ភូបតិ;

សីសតោ តំ គហេត្វាន, ហត្ថិក្ខន្ធេ ឋបេសិតំ.

២៨. ហដ្ឋោ ហត្តី កុញ្ចនាទំ, អកា កម្បិត្ថ មេទិនី;

តតោ នាគោ និវត្តិត្វា, សថេរ ពលវាហនោ.

២៩. បុរត្ថិមេន ទ្វារេន, បវិសិត្វា បុរំ សុភំ;

ទក្ខិណេន ច ទ្វារេន, និក្ខមិត្វា តតោ បុន.

៣០. ថូបារាមេ ចេតិយស្ស, ឋានតោ បច្ឆតោ កតំ;

បមោជវត្ថុំ គន្ត្វាន, ពោធិឋានេ និវត្តិយ.

៣១. បុរត្ថាវទនោ អឋា, ថូបឋានំ តទា ហិតំ;

កទម្ពបុប្ផអាទារិ-វល្លីហិ ចិតកំ អហុ.

៣២. មនុស្សទេវោ ទេវេហិ, តំ ឋានំ រក្ខិតំ សុចិំ;

សោធាបេត្វា ភូសយិត្វា, តង្ខណំយេវ សាធុកំ.

៣៣. ធាតុំ ឱរោបនត្ថាយ, អារភី ហត្ថិក្ខន្ធតោ;

នាគោ ន ឥច្ឆិតំ រាជា, ថេរំ បុច្ឆិត្ថ តំ មនំ.

៣៤. អត្តនោ ខន្ធសមកេ, ឋានេ ឋបនមិច្ឆតិ;

ធាតុឱរោបនំ តេន, ន ឥដ្ឋមី’តិ សោ ព្រវិ.

៣៥. អាណាបេត្វា ខណំយេវ,

សុក្ខាតោ’ភយវាបិតោ;

សុក្ខកទ្ទម ខណ្ឌេហិ,

ចិតា បេត្វាន តំ សមំ.

៣៦. អលង្ករិត្វាន ពហុធា, រាជា តំ ឋានមុត្តមំ;

ឱរោបេត្វា ហត្ថិក្ខន្ធា, ធាតុំ តត្ថ ឋបេសិតំ.

៣៧. ធាតារក្ខំ សំវិធាយ, ឋបេត្វា តត្ថ ហត្ថិនំ;

ធាតុថូបស្ស ករណេ, រាជា តុរិតមានសោ.

៣៨. ពហូ មនុស្សេ យោជេត្វា, ឥត្ថិកាករណេ លហុំ;

ធាតុកិច្ចំ វិចិន្តេន្តោ, សាមច្ចោ បាវិសី បុរំ.

៣៩. មហាមហិន្ទត្ថេរោ តុ, មហា មេឃវនំ សុភំ;

សគណោ អភិគន្ត្វាន, តត្ថ វាសមកប្បយិ.

៤០. រត្តិំ នាគោ’នុបរិយាតិ, តំ ឋានំ សោ សធាតុ កំ;

ពោធិឋានម្ហិ សាលាយ, ទិវាឋាតិ សធាតុកោ.

៤១. វត្ថុស្ស តស្សោ’បរិតោ, ថូបំ ថេរមតានុ គោ;

ជង្ឃាមត្តំ ចិតាបេត្វា, កតិបាហេន ភូបតិ.

៤២. តត្ថ ធាតុបតិដ្ឋានំ, ឃោសាបេត្វា ឧបាគមិ;

តតោ តតោ សមន្តោ ច, សមាគមិ មហាជនោ.

៤៣. តស្មិំ សមាគមេ ធាតុ, ហត្ថិក្ខន្ធា នគាគ្គតា;

សត្តតាលប្បមាណម្ហិ, ទិស្សន្តិ នភសិដ្ឋិតា.

៤៤. វិម្ហាបយន្តិ ជនតំ, យមកំ បាដិហារិយំ;

កណ្ណម្ពមូលេ ពុទ្ធោ’វ, អករិ លោមហំសនំ.

៤៥. តតោ និក្ខន្តជាលាហិ, ជលធារាហិ ចា’សកិំ;

អយំ ឱភាសិតា’សិត្តា, សព្ពាលំកាមហី មហុ.

៤៦. បរិនិព្ពានមញ្ចម្ហិ, និបន្នេន ជិនេន ហិ;

កតំ មហាអធិដ្ឋាន-បញ្ចកំ បញ្ចចក្ខុនា.

៤៧. គយ្ហមានា មហាពោធិ សាខាសោកេន ទក្ខិណា;

ឆិជ្ជិត្វាន សយំយេវ, បតិដ្ឋាតុ កដាហកេ.

៤៨. បតិដ្ឋហិត្វា សា សាខា, ឆព្ពណ្ណរស្មិយោ សុភា;

រញ្ជយន្តី ទិសា សព្ពា, ផលបត្តេហិ មុច្ចតុ.

៤៩. សសុវណ្ណកដាហា សា, ឧគ្គន្ត្វាន មនោរមា;

អទិស្សមានា សត្តាហំ, ហិមគព្ភម្ហិ តិដ្ឋតុ.

៥០. ថូបារាមេ បតិដ្ឋន្តំ, មម ទក្ខិណអក្ខកំ;

ករោតុ នភមុគ្គន្ត្វា, យមយំ បាដិហារិយំ.

៥១. លង្កា លង្ការភូតម្ហិ, ហេមមាលិកចេតិយេ;

បតិដ្ឋហន្តិយោ ធាតុ, ទោណមត្តា បមាណតោ.

៥២. ពុទ្ធវេសធរា ហុត្វា, ឧគ្គន្ត្វា នភសិដ្ឋិតា;

បតិដ្ឋំ តុ ករិត្វាន, យមកំ បាដិហារិយំ.

៥៣. អធិដ្ឋានានិ បញ្ចេ’វ, អធិដ្ឋាសិ តថាគតោ;

អកាសិ តស្មា សា ធាតុ, តទា តំ បាដិហារិយំ.

៥៤. អាកាសា ឱតរិត្វា សា, អដ្ឋាភូបស្ស មុទ្ធនិ;

អតីវហដ្ឋោ តំ រាជា, បតិដ្ឋាបេសិ ចេតិយេ.

៥៥. បតិដ្ឋិតាយ តស្សា ច, ធាតុយា ចេតិយេ តទា;

អហុ មហាភូមិចាលោ, អព្ភុតោ លោមហំសនោ.

៥៦. ឯវំ អចិន្តិយា ពុទ្ធា, ពុទ្ធធម្មា អចិន្តិយា;

អចិន្តិយេ បសន្នានំ, វិបាកោ ហោតិ អចិន្តិយោ.

៥៧. តំ បាដិហារិយំ ទិស្វា, បសីទិំសុ ជនេ ជនា;

មត្តាភយោ រាជបុត្តោ, កនិដ្ឋោ រាជិនោ បន.

៥៨. មុនិស្សរេ បសីទិត្វា, យាចិត្វាន នរិស្សរំ;

បុរិសានំ សហស្សេន, សហ បព្ពជិសាសនេ.

៥៩. ចេតារិគាមតោ ចាបិ, ទ្វារមណ្ឌលតោបិ ច;

វិហីរពីជតោ ចាបិ, តថា គល្លកបិដ្ឋិតោ.

៦០. តថោ’បតិស្សគាមា ច, បញ្ច បញ្ច សតានិ ច;

បព្ពជុំ ទារកា ហដ្ឋា, ជាតសទ្ធា តថាគតេ.

៦១. ឯវំ បុរា ពាហិរា ច, សព្ពេ បព្ពជិតា តទា;

តិំស ភិក្ខុសហស្សានិ, អហេសុំ ជិនសាសនេ.

៦២. ថូបារាមេ ថូបវរំ, និដ្ឋាបេត្វា មហីបតិ;

រតនាទីហិ’នេកេហិ, សទា បូជមការយិ.

៦៣. រាជោរោធា ខត្តិយា ច, អមច្ចា នាគរា តថា;

សព្ពេ ជនបទា ចេវ, បុជា’កំសុ វិសុំ វិសុំ.

៦៤. ថូបបុព្ពង្គមំ រាជា, វិហារំ តត្ថ ការយិ;

ថូបារាមោតិ តេនេ’ស, វិហារោ វិស្សុតោ អហុ.

៦៥. សកធាតុសរីរកេន ចេ’វំ,

បរិនិព្ពានគតោបិ លោកនាថោ;

ជនកាយហិតំ សុខញ្ច សម្មា,

ពហុធា’កាសិ ឋិតេ ជិនេ កថាវកាតិ.

សុជនប្បសាទសំវេគត្ថាយ កតេ មហាវំសេ

ធាតុអគមនោ នាម

សត្តរសមោ បរិច្ឆេទោ.