បញ្ចទសម បរិច្ឆេទ

មហាវិហារ បដិគ្គហកោ

១. ហត្ថិសាលាបិ សម្ពាធា, ឥតិ តត្ថ សមាគតា;

តេ នន្ទនវនេ រម្មេ, ទក្ខិណទ្វារតោ ពហិ.

២. រាជុយ្យានេ ឃនច្ឆាយេ, សីតលេ នីលសទ្ទលេ;

បញ្ញាបេសុំ អាសនានិ, ថេរានំ សាទរា នរា.

៣. និក្ខម្ម ទក្ខិណទ្វារា, ថេរោ តត្ថ និសីទិ ច;

មហាកុលីនា ចា’គម្ម, ឥត្ថិយោ ពហុកា តហិំ.

៤. ថេរំ ឧបនិសីទិំសុ, ឧយ្យានំ បូរយន្តិយោ;

ពាលបណ្ឌិតសុត្តន្តំ, តាសំ ថេរោ អទេសយិ.

៥. សហស្សំ ឥត្ថិយោ តាសុ, បឋមំ ផលមជ្ឈគុំ;

ឯវំ តត្ថេវ ឧយ្យានេ, សាយណ្ហសមយោ អហុ.

៦. តតោ ថេរា និក្ខមិំសុ, ‘‘យាម តំ បព្ពតំ’’ ឥតិ;

រញ្ញោ បដិនិវេទេសុំ, សីឃំ រាជា ឧបាគមិ.

៧. ឧបាគម្មា’ព្រវី ថេរំ, ‘‘សាយំ ទូរោ ច បព្ពតោ;

ឥធេវ នន្ទនុយ្យានេ, និវាសោ ផាសុកោ ឥតិ.

៨. បុរស្ស អច្ចាសន្នត្តា, ‘‘អសារុប្ប’’ន្តិ ភាសិតេ;

‘‘មហាមេឃវនុយ្យានំ, នាតិទូរាតិ សន្តិកេ.

៩. រម្មំ ឆាយូទកូបេតំ, និវាសោ តត្ថ រោចតុ;

និវត្តិតព្ពំ ភន្តេ’’ន្តិ, ថេរោ តត្ថ និវត្តយិ.

១០. តស្មិំ និវត្តឋានម្ហិ, កទម្ពនទិយន្តិកេ;

និវត្តចេតិយំ នាម, កតំ វុច្ចតិ ចេតិយំ.

១១. តំ នន្ទនា ទក្ខិណេន, នយំ ថេរំ រថេសភោ;

មហាមេឃវនុយ្យានំ, បាចិនទ្វារកំ នយិ.

១២. តត្ថ រាជឃរេ រម្មេ, មញ្ចបីឋានិ សាធុកំ;

សាធូតិ សន្ថរាបេត្វា, ‘‘វសតេ’ត្ត សុខំ’’ ឥតិ.

១៣. រាជា ថេរេ’ភិវាទេត្វា, អមច្ចបរិវារិតោ;

បុរំ បាវិសិ ថេរា តុ, តំ រត្តិំ តត្ថ តេ វសុំ.

១៤. បភាតេយេវ បុប្ផានិ, គាហេត្វា ធរណីបតិ;

ថេរេ ឧបច្ច វន្ទិត្វា, បូជេត្វា កុសុមេហិ ច.

១៥. បុច្ឆិ កច្ចិ សុខំ វុដ្ឋំ, ឧយ្យានំ ផាសុកំ ឥតិ;

សុខំ វុត្ថំ មហារាជ, ឧយ្យានំ យតិ ផាសុកំ.

១៦. អារាមោ កប្បតេ ភន្តេ, សង្ឃស្សា’’តិ អបុច្ឆិ សោ;

‘‘កប្បតេ’’ឥតិ វត្វាន, កប្បាកប្បេសុ កោវិទោ.

១៧. ថេរោ វេឡុវនារាម, បដិគ្គហណមព្រវិ;

តំ សុត្វា អភិហដ្ឋោ សោ, តុដ្ឋហដ្ឋោ មហាជនោ.

១៨. ថេរានំ វន្ទនត្ថាយ, ទេវី តុ អនុលាគតា;

សទ្ធិំ បញ្ចសតិត្ថីហិ, ទុតិយំ ផលមជ្ឈគា.

១៩. សា បញ្ចសតា ទេវី, អនុលា’ហ មហីបតិ;

‘‘បព្ពជិស្សាម ទេវា’’តិ, រាជា ថេរមវោច សោ.

២០. បព្ពាជេថ ឥមាយោ’’តិ, ថេរោ អាហ មហីបតិំ;

‘‘ន កប្បតិ មហារាជ, បព្ពាជេតុំ ថិយោ ហិនោ.

២១. អត្ថិ បាដលិបុត្តស្មិំ, ភិក្ខុនី មេ កនិដ្ឋិកា;

សង្ឃមិត្តាតិ នាមេន, វិស្សុតា សា ពហុស្សុតា.

២២. នរិន្ទសមណិន្ទស្ស, មហាពោធិទុមិន្ទតោ;

ទក្ខិណំ សាខមាទាយ, តថា ភិក្ខុនិយោ វរា.

២៣. អាគច្ឆតូ’តិ បេសេហិ, រញ្ញោ នោ បិតុ សន្តិកំ;

បព្ពាជេស្សតិ សា ថេរី, អាគតា ឥត្ថិយោ ឥមា.

២៤. ‘‘សាធុ’’តិ វត្វា គណ្ហិត្វា, រាជា ភិង្ការមុត្តមំ;

‘‘មហាមេឃវនុយ្យានំ, ទម្មិ សង្ឃស្សិ’មំ ឥតិ.

២៥. មហិន្ទថេរស្ស ករេ, ទក្ខិណោទកមា’កិរី;

មហិយា បតិតេ តោយេ, អកម្បិត្ថ មហា មហី.

២៦. ‘‘តស្មា កម្បតិ ភូមី’’តិ, ភូមិបាលោ អបុច្ឆិ តំ;

បតិដ្ឋិតត្តា ទីបម្ហិ, សាសនស្សា’តិ សោ ព្រវិ.

២៧. ថេរស្ស ឧបនាមេសិ, ជាតិបុប្ផានិ ជាតិមា;

ថេរោ រាជឃរំ គន្ត្វា, តស្ស ទក្ខិណតោ ឋិតោ.

២៨. រុក្ខម្ហិ បិចុលេ អដ្ឋ, បុប្ផមុដ្ឋី សមោកិរី;

តត្ថាបិ បុថវី កម្បិ, បុដ្ឋោ តស្សា’ហ ការណំ.

២៩. អហោសិ តិណ្ណំ ពុទ្ធានំ, កាលេ’បិ ឥធ មាលកោ;

នរិន្ទសង្ឃកម្មត្ថំ, ភវិស្សតិ ឥទានិបិ.

៣០. រាជគេហា ឧត្តរតោ, ចារុបោក្ខរណិំ អគា;

តត្តកា នេវ បុប្ផានិ, ថេរោ តត្ថាបិ ឱកិរិ.

៣១. តត្ថា’បិ បុថុវី កម្បិ, បុដ្ឋោ តស្សា’ហ ការណំ;

‘‘ជន្តឃរ បោក្ខរណី, អយំ ហេស្សតិ ភូមិប’’.

៣២. តស្សេវ រាជគេហស្ស, គន្ត្វាន ទ្វារកោដ្ឋកំ;

តត្តកេហេ’វ បុប្ផេហិ, តំ ឋានំ បូជយី ឥសិ.

៣៣. តត្ថាបិ បុថុវីកម្បិ, ហដ្ឋលោមោ អតីវសោ;

រាជា តំ ការណំ បុច្ឆិ, ថេរោ តស្សា’ហ ការណំ.

៣៤. ឥមម្ហិ កប្បេ ពុទ្ធានំ, តិណ្ណន្នំ ពោធិរុក្ខតោ;

អានេត្វា ទក្ខិណាសាខា, រោបិតា ឥធ ភូមិប.

៣៥. តថាគតស្ស អម្ហាកំ, ពោធិសាខាបិ ទក្ខិណា;

ឥមស្មិំយេវ ឋានម្ហិ, បតិដ្ឋិស្សតិ ភូមិប.

៣៦. តតោ’គមា មហាថេរោ, មហាមុចលមាលកំ;

តត្តកានេវ បុប្ផានិ, តស្មិំ ឋានេ សមោកិរិ.

៣៧. តថាបិ បុថវី កម្បិ, បុដ្ឋោ តស្សា’ហ ការណំ;

សង្ឃស្សុ បោសថា គារំ, ឥធ ហេស្សតិ ភូមិប.

៣៨. បញ្ហម្ពមាលកដ្ឋានំ, តតោ’គមា មហីបតិ;

សុបក្កំ អម្ពបក្កញ្ច, វណ្ណគន្ធរសុត្តមំ.

៣៩. មហន្តំ ឧបនាមេសិ, រញ្ញោ ឧយ្យានបាលកោ;

តំ ថេរស្សុបនាមេសិ, រាជា អតិមនោរមំ.

៤០. ថេរោ និសីទនាការំ, ទស្សេសិ ជនតា ហិតោ;

អត្ថរាបេសិ តត្ថេវ, រាជា អត្ថរណំ វរំ.

៤១. អទា តត្ថ និសិន្នស្ស, ថេរស្សម្ពំ មហីបតិ;

ថេរោ តំ បរិភុញ្ជិត្វា, រោបនត្ថាយ រាជិនោ.

៤២. អម្ពដ្ឋិកំ អទា រាជា, តំ សយំ តត្ថ រោបយិ;

ហត្ថេ តស្សោបរិថេរោ, ធោវិ តស្ស វិរុឡ្ហិយា.

៤៣. តំ ខណំយេវ ពីជម្ហា, តម្ហា និក្ខម្ម អង្កុរោ;

កមេនា’តិ មហារុក្ខោ, បត្តបក្កធរោ អហុ.

៤៤. តំ បាដិហារិយំ ទិស្វា, បរិសា សា សរាជិកា;

នមស្សមានា អដ្ឋាសិ, ថេរេ ហត្ថតនុរុហា.

៤៥. ថេរោ តទា បុប្ផមុដ្ឋិ, អដ្ឋ តត្ថ សមោកិរិ;

តថាបិ បុថវីកម្បិ, បុដ្ឋោ តស្សា’ហ ការណំ.

៤៦. សង្ឃស្សប្បន្នលាភានំ, អនេកេសំ នរាធិប;

សង្គម្មភាជនឋានំ, ឥទំ ឋានំ ភវិស្សតិ.

៤៧. តតោ គន្ត្វា ចតុស្សាល-ឋានំ តត្ថ សមោកិរិ;

តត្តកានេវ បុប្ផានិ, កម្បិ តត្ថាបិ មេទិនី.

៤៨. តំ កម្បការណំ បុច្ឆិ, រាជា ថេរោ វិយាករិ;

តិណ្ណន្នំ បុព្ពពុទ្ធានំ, រាជុយ្យាន បដិគ្គហេ.

៤៩. ទាន វត្ថុនា’ហដានិ, ទីបវាសីហិ សព្ពតោ;

ឥធ ឋបេត្វា ភោជេសុំ, សសង្ឃេ សុគតេ តយោ.

៥០. ឥទានិ បន ឯត្ថេវ, ចតុស្សាលា ភវិស្សតិ;

សង្ឃស្ស ឥធ ភត្តគ្គំ, ភវិស្សតិ នរាធិប.

៥១. មហថូបឋិតឋានំ, ឋានាឋានវិទូតតោ;

អគមាសិ មហាថេរោ, មហិន្ទោ ទីបទីបនោ.

៥២. តទា អន្តោបរិក្ខេបេ, រាជុយ្យានស្ស ខុទ្ទិកា;

កកុធវ្ហា អហុ វាបី, តស្សោ’បរិ ជលន្តិកេ.

៥៣. ថូបារហំ ថលឋានំ, អហុ ថេរេ តហិំ គតេ;

រញ្ញោ ចម្បកបុប្ផានំ, បុដកាន’ដ្ឋ អាហរុំ.

៥៤. តានិ ចម្បកបុប្ផានិ, រាជា ថេរស្សុ’បានយិ;

ថេរោ ចម្បកបុប្ផេហិ, តេហិ បូជេសិ តំ ផលំ.

៥៥. តត្ថាបិ បុថវី កម្បិ, រាជា តំ កម្បការណំ;

បុច្ឆិ ថេរោ’នុ បុព្ពេន, អាហតំ កម្បការណំ.

៥៦. ឥទំ ឋានំ មហារាជ, ចតុពុទ្ធ និសេវិតំ;

ថូបារហំ ហិតត្ថាយ, សុខត្ថាយ ច បាណិនំ.

៥៧. ឥមម្ហិ កប្បេ បឋមំ, កកុសន្ធោ ជិនោ អហុ;

សព្ព ធម្មវិទូ សត្ថា, សព្ពលោកានុកម្បកោ.

៥៨. មហាតិត្ថវ្ហយំ អាសិ, មហាមេឃវនំ ឥទំ;

នគរំ អភយំ នាម, បុរត្ថិមទិសាយ’ហុ.

៥៩. កទម្ព នទិយា បារេ, តត្ថ រាជា’ភយោ អហុ;

ឱជទីបោតិ នាមេន, អយំ ទីបោ តទាអហុ.

៦០. រក្ខសេហិ ជនស្សេ’ត្ថ, រោគោ បជ្ជរកោ អហុ;

កកុសន្ធោ ទសពលោ, ទិស្វាន តទុបទ្ទវំ.

៦១. តំ គន្ត្វា សត្តវិនយំ, បវត្តិំ សាសនស្ស ច;

កាតុំ ឥមស្មិំ ទីបស្មិំ, ករុណា ពលចោទិតោ.

៦២. ចត្តាលីសសហស្សេហិ, តាទីហិ បរិវារិតោ;

នភសា’គម្ម អដ្ឋាសិ, ទេវកូដម្ហិ បព្ពតេ.

៦៣. សម្ពុទ្ធស្សា’នុភាវេន, រោគោ បជ្ជរកោ ឥធ;

ឧបសន្តោ មហារាជ, ទីបម្ហិ សកលេ តទា.

៦៤. កត្ថ ឋិតោ អធិដ្ឋាសិ, នរិស្សរ មុនិស្សរោ;

សព្ពេ មំ អជ្ជ បស្សន្តុ, ឱជទីបម្ហិ មានុសា.

៦៥. អាគន្តុកាមា សព្ពេវ, មនុស្សា មម សន្តិកំ;

អាគច្ឆន្តុ អកិច្ឆេន, ខិប្បញ្ចាបិ មហាមុនិ.

៦៦. ឱភាសយន្តំ មុនិន្ទំ តំ, ឱភាសន្តញ្ច បព្ពតំ;

រាជា ច នាគរា ចេវ, ទិស្វា ខិប្បំ ឧបាគមុំ.

៦៧. ទេវតា ពលិទានត្ថំ, មនុស្សា ច តហិំ គតា;

ទេវតា ឥតិ មញ្ញិំសុ, សសង្ឃំ លោកនាយកំ.

៦៨. រាជា សោ មុនិរាជំ តំ, អតិហដ្ឋោ’ភិ វាទិយ;

និមន្តយិត្វា ភត្តេន, អានេត្វា បុរសន្តិ កំ.

៦៩. សសង្ឃស្ស មុនិន្ទស្ស, និសជ្ជារហមុត្តមំ;

រមណីយមិទំ ឋាន-មសម្ពាធន្តិ ចិន្តិយ.

៧០. ការិតេ មណ្ឌបេ រម្មេ, បល្លង្កេសុ វរេ សុតំ;

និសីទាបេសិ សម្ពុទ្ធំ, សសង្ឃំ ឥធ ភូបតិ.

៧១. និសិន្នម្បិ ច បស្សន្តា, សសង្ឃំ លោកនាយកំ;

ទីបេ មនុស្សា អានេសុំ, បណ្ណាការេ សមន្តតោ.

៧២. អត្តនោ ខជ្ជភោជ្ជេហិ, តេហិ តេហា’ភតេហិ ច;

សន្តប្បេសិ សសង្ឃំ តំ, រាជា សោ លោកនាយកំ.

៧៣. ឥធេវ បច្ឆាភត្តំ តំ, និសិន្នស្ស ជិនស្ស សោ;

មហា តិត្ថកមុយ្យានំ, រាជា’ទា ទក្ខិណំ វរំ.

៧៤. អកាលបុប្ផា លង្ការេ, មហាតិត្ថវនេ តទា;

បដិគ្គហិតេ ពុទ្ធេន, អកម្បិត្ថ មហាមហី.