ចុទ្ទសម បរិច្ឆេទ

នគរប្បវេសនោ

១. ទេវានំបិយតិស្សោ សោ, រាជា សលិលកីឡិតំ;

ទត្វា នគរវាសីនំ, មិគវំ កីឡិតុំ អគា.

២. ចត្តាលីសសហស្សេហិ, នរេហិ បរិវារិតោ;

ធាវន្តោ បទសាយេវ, អគមា មិស្សកំ នគំ.

៣. ថេរេ ទស្សេតុមិច្ឆន្តោ, ទេវោ តស្មិំ មហីធរេ;

គុម្ភំភក្ខយមានោ’វ, អដ្ឋា គោកណ្ណរូបវា.

៤. រាជា ទិស្វា ‘‘បមត្តំ តំ, ន យុត្តំ វិជ្ឈិតុំ’’ ឥតិ;

ជិយា សទ្ទមកាធាបិ, គោកណ្ណោ បព្ពតន្តរំ.

៥. រាជា’នុធាវិ សោធិំ, ថេរានំ សន្តិកំ គតោ;

ថេរេ ទិដ្ឋេ នរិន្ទេន, សយមន្តរធាយិសោ.

៦. ថេរោ ‘‘ពហូសុ ទិដ្ឋេសុ, អតិភាយិស្សតី’’ តិសោ;

អត្តានមេវ ទស្សេសិ, បស្សិត្វា តំ មហីបតិំ.

៧. ភីតោ អដ្ឋាសិ តំ ថេរោ, ‘‘ឯហិ តិស្សាតិ អព្រវិ;

តិស្សា’តិ វចនេនេវ, រាជា យក្ខោ’’តិ ចិន្តយី.

៨. សមណា មយំ មហារាជ, ធម្មរាជស្ស សាវកា;

តមេវ អនុកម្បាយ, ជម្ពុទីបា ឥធាគតា.

៩. ឥច្ចាហ ថេរោ តំ សុត្វា, រាជា វីតភយោ អហុ;

សរិត្វា សខីសន្ទេសំ, ‘‘សមាណា’’ ឥតិ និច្ឆិតោ.

១០. ធនុំ សរញ្ច និក្ខិប្ប, ឧបសង្កម្ម តំ ឥសិំ;

សម្មោទមានោ ថេរេន, សោ និសីទិ តទន្តិកេ.

១១. តទា តស្ស មនុស្សា តេ, អាគម្ម បរិវារយុំ;

តទា សេសេ ឆ ទស្សេសិ, មហាថេរោ សហាគតេ.

១២. តេ ទិស្វា អព្រវី រាជា, ‘‘កទា’’ មេ អាគតា ឥតិ;

‘‘មយា សទ្ធិំ’’តិ ថេរេន, វុត្តេ បុច្ឆិ ឥទំ បុន.

១៣. ‘‘សន្តិ ឦទិសកា អញ្ញេ, ជម្ពុទីបេ យតី’’ ឥតិ;

អាហ ‘‘កាសាវបជ្ជោ តោ, ជម្ពុទីបោ តហិំ បន.

១៤. តេវិជ្ជា ឥទ្ធិប្បត្តា ច, ចេតោបរិយកោវិទា;

‘‘ទិព្ពសោតា’រហន្តោ ច, ពហូ ពុទ្ធស្ស សាវកា’’.

១៥. បុច្ឆិ ‘‘កេនាគតត្ថា’’តិ, ន ថលេន ន វារិនា;

អាគតម្ហា’’តិ វុត្តេ សោ, វិជានិ នភសាគមំ.

១៦. វីមំសំសោ មហាបញ្ញោ, កណ្ហំ បញ្ហមបុច្ឆិតំ;

បុដ្ឋោ បុដ្ឋោ វិយាកាសិ, តំតំ បញ្ហំ មហីបតិ.

១៧. រុក្ខោយំ រាជកិន្នាមោ, អញ្ញោ នាម អយំ តរុ;

ឥមំ មុញ្ចិយ អត្ថ’ម្ពោ, សន្តិ អម្ពតរូ ពហុំ.

១៨. ឥមញ្ច អម្ពំ តេច’ម្ពេ, មុញ្ចិយត្ថិ មហីរុហា;

សន្តិ ភន្តេ ពហុ រុក្ខា, អនម្ពាបន តេ តរុ.

១៩. អញ្ញេ អម្ពេ អនម្ពេ ច, មុញ្ចិយ’ត្ថិ មហីរុហា;

អយំ ភន្តេ អម្ពរុក្ខោ, បណ្ឌិតោ’សិ នរិស្សរ.

២០. សន្តិ តេ ញាតកា រាជ, សន្តិ ភន្តេ ពហុជ្ជនា;

សន្តិ អញ្ញាតកា រាជ, សន្តិ តេ ញាតិតោ ពហូ.

២១. ញាតកេ តេ ច អញ្ញេ ច, មុញ្ចិយ’ញ្ញោបិ អត្ថិ នុ;

‘‘ភន្តេ’’ ហមេវ សាធុ ត្វំ, បណ្ឌិតោ’សិ នរិស្សរ.

២២. បណ្ឌិតោ’តិ វិទិត្វាន, ចូឡហត្ថិបទោបមំ;

សុត្តន្តំ ទេសយី ថេរោ, មហីបស្ស មហាមតី.

២៣. ទេសនាបរិយោសានេ, សទ្ធិំ តេហិ នរេហិ សោ;

ចត្តាលីសសហស្សេហិ, សរណេសុ បតិដ្ឋហិ.

២៤. ភត្តា’ភីហារំ សាយន្ហេ, រញ្ញោ អភិហរុំ តទា;

‘‘ន ភុញ្ជិស្ស’’ន្តិ ទានិ មេ, ឥតិ ជនម្មិ ភូបតិ.

២៥. បុច្ឆិតុំយេវ យុត្តន្តិ, ភត្តេនា’បុច្ឆិតេ ឥសិ;

ន ភុញ្ជាម ឥទានី’តិ, វុត្តេ កាលញ្ច បុច្ឆិសោ.

២៦. កាលំ វុត្តេ’ព្រវិ ឯវំ, ‘‘គច្ឆាម នគរំ’’ឥតិ;

តុវំ គច្ឆ មហារាជ, វសិស្សាម មយំ ឥធ.

២៧. ឯវំ សតិ កុមារោ’យំ, អម្ហេហិ សហ គច្ឆតុ;

អយញ្ហិ អាគតផលោ, រាជ វិញ្ញាតសាសនោ.

២៨. អបេក្ខមានោ បព្ពជ្ជំ, វសត’ម្ហាកមន្តិកេ;

ឥទានិ បព្ពជេស្សាម, ឥមំ ត្វំ គច្ឆ ភូមិប.

២៩. បាតោ រថំ បេសយិស្សំ, តុម្ហេ តត្ថ ឋិតា បុរំ;

យាថា’តិ ថេរេ វន្ទិត្វា, ភណ្ឌុំនេត្វ’ក មន្តកំ.

៣០. បុច្ឆិ ថេរាធិការំសោ, រញ្ញោ សព្ពមភាសិ សោ;

ថេរំ ញត្វា’តិ តុដ្ឋោសោ, ‘‘លាភា មេ’’ឥតិ ចិន្តយិ.

៣១. ភណ្ឌុស្ស គីហិភាវេន, គតាសង្កោ នរិស្សរោ;

អញ្ញាសិ នរភាវំ សោ, ‘‘បព្ពាជេម ឥមំ’’ ឥតិ.

៣២. ថេរោ តំ គាមសីមាយំ, តស្មិំយេវ ខណេ អកា;

ភណ្ឌុកស្ស កុមារស្ស, បព្ពជ្ជមុបសម្បទំ.

៣៣. តស្មិំយេវ ខណេ សោ ច, អរហត្តមបាបុណិ;

សុមនំ សាមណេរំ តំ, ថេរោ អាមន្តយី តតោ.

៣៤. ធម្មសវនកាលំ ត្វំ, ឃោសេហី’’តិ អបុច្ឆិសោ;

សាវេន្តោ កិត្តកំ ឋានំ, ភន្តេ ឃោសេម’ហំ ឥតិ.

៣៥. ‘‘សកលំ តម្ពបណ្ណី’’តិ, វុត្តេ ថេរេន ឥទ្ធិយា;

សាវេន្តោ សកលំ លំកំ, ធម្មកាលមឃោសយី.

៣៦. រាជា នាគចតុត្តេសោ, សោណ្ណិបស្សេ និសីទិយ;

ភុញ្ជន្តោ តំ រវំ សុត្វា, ថេរន្តិក មបេសយិ.

៣៧. ‘‘ឧបទ្ទវោ នុ អត្ថី’’តិ, អាហ នត្ថិ ឧទ្ទវោ;

សោតុំ សម្ពុទ្ធវចនំ, កាលោ ឃោសាបិតោ ឥតិ.

៣៨. សាមណេរ រវំ សុត្វា, ភុម្មាទេវា អឃោសយុំ;

អនុក្កមេន សោ សទ្ទោ, ព្រហ្មលោកំ សមារុហិ.

៣៩. តេន ឃោសេន ទេវានំ, សន្និបាតោ មហា អហុ;

សមចិត្តសុត្តំ ទេសេសិ, ថេរោ តស្មិំ សមាគមេ.

៤០. អសំខិយានំ ទេវានំ, ធម្មាភិសមយោ អហុ;

ពហូ នាគា សុបណ្ណា ច, សរណេសុ បតិដ្ឋយុំ.

៤១. យថេទំ សារិបុត្តស្ស, សុត្តំ ថេរស្ស ភាសតោ;

តថា មហិន្ទត្ថេរស្ស, អហុ ទេវសមាគមោ.

៤២. រាជា បភា តេ បាហេសិ, រថំ សារថិ សោ គតោ;

‘‘អារោហថ រថំ យាម, នគរំ’’ ឥតិ តេ’ព្រវិ.

៤៣. នា’រោហាម រថំ គច្ឆ, គច្ឆាម តវ បច្ឆតោ;

ឥតិ វត្វាន បេសេត្វា, សារថិំ សុមនោរថំ.

៤៤. វេហាសមព្ភុគន្ត្វា, តេ នគរស្ស បុរត្ថតោ;

បឋមត្ថូបដ្ឋានម្ហិ, ឱតរិំសុ មហិទ្ធិកា.

៤៥. ថេរេហិ បឋមោតិណ្ណ-ឋានម្ហិ កតចេតិយំ;

អជ្ជាបិ វុច្ចតេ តេន, ឯវំ បឋមចេតិយំ.

៤៦. រញ្ញា ថេរគុណំ សុត្វា, សព្ពា អន្តេបុរិត្ថិយោ;

ថេរទស្សនមិច្ឆិំសុ, យស្មា តស្មាមហីបតិ.

៤៧. អន្តោ’វ រាជវត្ថុស្ស, រម្មំ ការេសិ មណ្ឌបំ;

សេតេហិ វត្ថបុប្ផេហិ, ឆាទិតំ សមលង្កតំ.

៤៨. ឧច្ចសេយ្យាវិរមណំ, សុតត្តា ថេរសន្តិកេ;

កង្ខី ‘‘ឧច្ចាសនេ ថេរោ, និសីទិទេយ្យនុនោតិ ច.

៤៩. តទន្តរេ សារថិ សោ, ថេរេ ទិស្វា តហិំ ឋិតេ;

ចីវរំ បារុបន្តេ តេ, អតិវិម្ហិត មានសោ.

៥០. គន្ត្វា រញ្ញោ និវេទេសិ, សុត្វា សព្ពំ មហីមតិ;

‘‘និសជ្ជំ ន ករិស្សន្តិ, បីឋកេសូ’’តិ និច្ឆិតោ.

៥១. ‘‘សុសាធុ ភុម្មត្ថរណំ, បញ្ញាបេថា’’តិ ភាសិយ;

គន្ត្វា បដិបថំ ថេរេ, សក្កច្ចំ អភិវាទិយ.

៥២. មហាមហិន្ទត្ថេរស្ស, ហត្ថតោ បត្តមាទិយ;

សក្ការបូជាវិធិនា, បុរំ ថេរំ បវេសយិ.

៥៣. ទិស្វា អាសនបញ្ញត្តិំ, នេមិត្តា ព្យាករុំ ឥតិ;

‘‘គហិតា បថវី’មេហិ, ទីបេ ហេស្សន្តិ ឥស្សរា.

៥៤. នរិន្ទោ បូជយន្តោ តេ, ថេរេ អន្តេបុរំ នយិ;

តត្ថ តេ ទុស្សបីឋេសុំ, និសីទិំសុ យថារហំ.

៥៥. តេ យាគុខជ្ជភោជ្ជេហិ, សយំ រាជា អតប្បយិ;

និដ្ឋិតេ ភត្តកិច្ចម្ហិ, សយំ ឧបនិសីទិយ.

៥៦. កនិដ្ឋស្សោបរាជស្ស, មហានាគស្ស ជាយិកំ;

វសន្តិំ រាជគេហេ’វ, បក្កោសា បេសិចា’នុលំ.

៥៧. អាគម្ម អនុលាទេវី, បញ្ច ឥត្ថិសតេហិ សា;

ថេរេវន្ទិយ បូជេត្វា, ឯកមន្តមុបាវិសិ.

៥៨. បេតវត្ថុំ វិមានញ្ច, សច្ចសំយុត្តមេវ ច;

ទេសេសិ ថេរោ តា ឥត្ថី, បឋមំ ផលមជ្ឈគុំ.

៥៩. ហិយ្យោ ទិដ្ឋមនុស្សេហិ, សុត្វា ថេរគុណេ ពហូ;

ថេរទស្សនមិច្ឆន្តា, សមាគន្ត្វាន នាគរា.

៦០. រាជទ្វារេ មហាសទ្ទំ, អករុំ តំ មហីបតិ;

សុត្វា បុច្ឆិយ ជានិត្វា, អាហ តេសំ ហិតត្ថិកោ.

៦១. សព្ពេសំ ឥធ សម្ពាធោ, សាលាមង្គលហត្ថិនោ;

សោធេថ តត្ថ ទក្ខន្តិ, ថេរេ’មេ នាគរា’ឥតិ.

៦២. សោធេត្វា ហត្ថិសាលំ តំ, វិតានាទីហិ សជ្ជុកំ;

អលង្ករិត្វា សយនេ, បញ្ញបេសុំ យថារហំ.

៦៣. សថេរោ តត្ថ គន្ត្វាន, មហាថេរោ និសីទិយ;

សោ ទេវទូតសុត្តន្តំ, កថេសី កថិកោ មហា.

៦៤. តំ សុត្វាន បសីទិំសុ, នគរា តេ សមាគតា;

តេសុ បាណសហស្សំតុ, បឋមំ ផលមជ្ឈគា.

៦៥. លំកាទីបេ សោ សត្ថុកប្បោ អកប្បោ;

លំកាធិដ្ឋានេ ទ្វីសុ ឋានេសុ ថេរោ;

ធម្មំ ភាសិត្វា ទីបភាសាយ ឯវំ;

សទ្ធម្មោ តារំ ការយី ទីបទីបោតិ.

សុជនប្បសាទសំវេគត្ថាយ កតេ មហាវំសេ

នគរប្បវេសនោ នាម

ចុទ្ទសមោ បរិច្ឆេទោ.