តេរសម បរិច្ឆេទ

មហិន្ទាគមនោ

១. មហាមហិន្ទត្ថេរោ សោ, តទា ទ្វាទសវស្សិកោ;

ឧបជ្ឈាយេន អាណត្តោ, សង្ឃេន ច មហាមតី.

២. លំកាទីបំ បសាទេតុំ,

កាលំ បេក្ខំ វិចិន្តយី;

‘‘វុឌ្ឍោ មុដសិវោ រាជា,

រាជា ហោតុ សុតោ’’ ឥតិ.

៣. តទន្តរេ ញាតិគណំ, ទដ្ឋុំ កត្វាន មានសំ;

ឧបជ្ឈាយញ្ច សង្ឃញ្ច, វន្ទិត្វា បុច្ឆ ភូបតិំ.

៤. អាទាយ ចតុរោ ថេរេ, សង្ឃមិត្តាយ អត្រជំ;

សុមនំ សាមណេរញ្ច, ឆឡាភិញ្ញំ មហិទ្ធិកំ.

៥. ញាតីនំ សង្គហំ កាតុំ, អគមា ទក្ខិណាគិរិំ;

តតោ តត្ថ ចរន្តស្ស, ឆម្មាសា សមតិក្កមុំ.

៦. កមេន វេទិសគិរិំ, នគរំ មាតុទេវិយា;

សម្បត្វា មតរំ បស្សិ, ទេវី ទិស្វា បិយំ សុតំ.

៧. ភោជយិត្វា សបរិសំ, អត្តនាយេវ ការិតំ;

វិហារំ ចេតិយគិរិំ, ថេរំ អារោបយី សុភំ.

៨. អវន្តិរដ្ឋំ ភុញ្ជន្តោ, បិតរា ទិន្នមត្តនោ;

សោ អសោក កុមារោ ហិ, ឧជ្ជេនីគមនា បុរា.

៩. វេទិសេ នគរេ វាសំ, ឧបគន្ត្វា តហិំ សុភំ;

ទេវិន្នាម លភិត្វាន, កុមារិំ សេដ្ឋិធីតរំ.

១០. សំវាសំ តាយ កប្បេសិ, គព្ភំ គណ្ហិយ តេន សា;

ឧជ្ជេនិយំ កុមារំ តំ, មហិន្ទំ ជនយី សុភំ.

១១. វស្សទ្វយមតិក្កម្ម, សង្ឃមិត្តញ្ច ធីតរំ;

តស្មិំ កាលេ វសតិ សា, វេទិសេ នគរេ តហិំ.

១២. ថេរោ តត្ថ និសីទិត្វា, កាលញ្ញូ ឥតិ ចិន្តយិ;

បិតរា មេ សមាណត្តំ, អភិសេក មហុស្សវំ.

១៣. ទេវានំបិយតិស្សោ សោ, មហារាជា’នុភោតុ ច;

វត្ថុត្តយគុណេ ចាបិ, សុត្វា ជានាតុ ទូហតោ.

១៤. អារោហតុ មិស្សនគំ, ជេដ្ឋមាសស្សុ’បោសថេ;

តទហេវ គមិស្សាម, លំកាទីបវរំ មយំ.

១៥. មហិន្ទោ ឧបសង្កម្ម, មហិន្ទត្ថេរ មុត្តមំ;

យាហិ លំកំ បសាទេតុំ, សម្ពុទ្ធេនា’សិ ព្យាកតោ.

១៦. មយម្បិ តត្ថុបត្ថម្ភា, ភវិស្សាមា’តិ អព្រវិ;

ទេវិយា ភគិនី ធីតុ-បុត្តោ ភណ្ឌុក នាមកោ.

១៧. ថេរេន ទេវិយា ធម្មំ, សុត្វា ទេសិតមេវ តុ;

អនាគាមិផលំ បត្វា, វសិ ថេរស្ស សន្តិកេ.

១៨. តត្ថ មាសំ វសិត្វាន, ជេដ្ឋមាសស្សុ’ បោសថេ;

ថេរោ ចតូហិ ថេរេហិ, សុមនេនា’ថ ភណ្ឌុនា.

១៩. សទ្ធិំ តេន គហដ្ឋេន, ន រតោ ញាតិហេតុនា;

តស្មា វិហារា អាកាសំ, ឧគ្គន្ត្វា សោ មហិទ្ធិកោ.

២០. ខណេនេវ ឥធាគម្ម, រម្មេ មិស្សក បព្ពតេ;

អដ្ឋាសិ វិលុកូដម្ហិ, រុចិរម្ពត្ថលេ វរេ.

២១. លំកាបសាទ គុណេន វិយាកតោ សោ;

លំកាហិតាយ មុនិនា សយិតេន អន្តេ;

លំកាយ សត្ថុសទិសោ ហិតហេតុ តស្សា;

លំកាមរូហិ មហិតោ’ភិនិសីទិ តត្តាតិ.

សុជនប្បសាទសំវេគត្ថាយ កតេ មហាវំសេ

មហិន្ទាគមនោ នាម

តេរសមោ បរិច្ឆេទោ.