ទ្វាទសម បរិច្ឆេទ

នានាទេសបសាទោ

១. ថេរោ មោគ្គលិបុត្តោ សោ, ជិនសាសន ជោតកោ;

និដ្ឋាបេត្វាន សំគីតិំ, បេក្ខមានោ អនាគតំ.

២. សាសនស្ស បតិដ្ឋានំ, បច្ចន្តេសុ អវេក្ខិយ;

បេសេសិ កត្តិកេ មាសេ, តេតេ ថេរេ តហិំ តហិំ.

៣. ថេរំ កស្មីរគន្ធារំ, មជ្ឈន្តិកមបេសយិ;

អបេសយី មហាទេវ-ត្ថេរំ មហិសមណ្ឌលំ.

៤. វនវាសិំ អបេសយិ, ថេរំ រក្ខិតនាមកំ;

តថា’បរន្តកំ យោន-ធម្មរក្ខិតនាមកំ.

៥. មហារដ្ឋំ មហាធម្ម-រក្ខិតត្ថេរ នាមកំ;

មហារក្ខិត ថេរំ តំ, យោន លោកមបេសយិ.

៦. បេសេសិ មជ្ឈិមំ ថេរំ, ហិមវន្តបទេសកំ;

សុវណ្ណភូមិំ ថេរេ ទ្វេ, សោណមុត្តរ មេវ ច.

៧. មហាមហិន្ទត្ថេរំ តំ, ថេរ ឥដ្ដិយមុត្តិយំ;

សម្ពលំ ភទ្ទសាលញ្ច, សកេ សទ្ធិវិហារិកេ.

៨. លំកាទីបេ មនុញ្ញម្ហិ, មនុញ្ញំ ជិនសាសនំ;

បតិដ្ឋាបេថ តុម្ហេ’តិ, បញ្ច ថេរេ អបេសយិ.

៩. តទា កស្មីរគន្ធារេ, បក្កំ សស្សំ មហិទ្ធិកោ;

អរវាលោ នាគរាជា, វស្សំ ករកសញ្ញិតំ.

១០. វស្សា បេត្វា សមុទ្ទស្មិំ, សព្ពំ ខិបតិទារុណោ;

តត្រ មជ្ឈន្តិកត្ថេរោ, ខិប្បំ គន្ត្វា វិហាយសា.

១១. អរវាលទហេវារិ-បិដ្ឋេ ចង្កមនាទិកេ;

អកាសិ ទិស្វា តំនាគា, រុដ្ឋារញ្ញោ និវេទយុំ.

១២. នាគរាជា’ថរុដ្ឋោ សោ, វិវិធា ភិសិកា’ករិ;

វាតា មហន្តា វាយន្តិ, មេឃោ គជ្ជតិ វស្សតិ.

១៣. ផលន្ត្យ’សនិយោ វិជ្ជុ, និច្ឆរន្តិ តតោ តតោ;

មហិរុហា បព្ពតានំ, កូដានិ បបតន្តិ ច.

១៤. វិរូបរូបា នាគា ច, ភិំសាបេន្តិ សមន្តតោ;

សយំ ធុបាយតិ ជលតិ, អក្កោសន្តោ អនេកធា.

១៥. សព្ពំ តំ ឥទ្ធិយា ថេរោ, បដិពាហិយ ភិំសនំ;

អវោច នាគរាជំ តំ, ទស្សេន្តោ ពលមុត្តមំ.

១៦. សទេវ កោបិ ចេ លោកោ, អាគន្ត្វា តាសយេយ្យ មំ;

ន មេ បដិពលោ អស្ស, ជនេតុំ ភយភេរវំ.

១៧. សចេ’បិ ត្វំ មហិំ សព្ពំ, សសមុទ្ទំ សបព្ពតំ;

ឧក្ខិបិត្វា មហានាគ, ខិបេយ្យាសិ មមោ’បរិ.

១៨. នេវ មេ សក្កុណេយ្យាសិ, ជនេតុំ ភយភេរវំ;

អញ្ញទត្ថុ តវេ‘វ’ស្ស, វិឃាតោ ឧរគាធិប.

១៩. តំសុត្វា និម្មទស្ស’ស្ស, ថេរោ ធម្មមទេសយិ;

តតោ សរណសីលេសុ, នាគរាជា បតិដ្ឋហិ.

២០. តថេវ ចតុរាសីតិ-សហស្សានិ ភុជង្គមា;

ហិមវន្តេវ គន្ធព្ពា, យក្ខា កុម្ភណ្ឌកា ពហូ.

២១. បណ្ឌកោ នាម យក្ខោ តុ, សទ្ធិំហារិត យក្ខិយា;

បញ្ចសតេហិ បុត្តេហិ, ផលំ បាបុណិ អាទិកំ.

២២. ‘‘មា’’ទានិ កោធំ ជនិយិត្ថ, ឥតោ ឧទ្ធំ យថាបុរេ;

សសឃាតញ្ច មា’កត្ថ, សុខកាមាហិ បាណិនោ.

២៣. ករោថ មេត្តំ សត្តេសុ, វសន្តុ មនុជា សុខំ;

ឥតិ តេនា’នុសិដ្ឋា តេ, តថេវ បដិបជ្ជិសុំ.

២៤. តតោ រតនបល្លង្កេ, ថេរំ សោ ឧរគាធិបោ;

និសីទាបិយ អដ្ឋាសិ, ពីជមានោ តទន្តិកេ.

២៥. តទា កស្មីរគន្ធារ-វាសិនោ មនុជា’គតា;

នាគរាជស្ស បូជត្ថំ, មន្ត្វា ថេរំ មហិទ្ធិកំ.

២៦. ថេរមេវា’ភិ វាទេត្វា, ឯកមន្តំ និសីទិសុំ;

តេសំ ធម្មមទេសេសិ, ថេរោ អាសិវិសោបមំ.

២៧. អសីតិយា សហស្សានំ, ធម្មាភិសមយោ អហុ;

សតសហស្ស បុរិសា, បព្ពជុំ ថេរសន្តិកេ.

២៨. តតោប្បភុបតិ កស្មិរ-គន្ធារំ តេ ឥទានិបិ;

អាសុំ កាសាវ បជ្ជោតា, វត្ថុត្តយបរាយនា.

២៩. គន្ត្វា មហាទេវត្ថេរោ, ទេសំ មហិសមណ្ឌលំ;

សុត្តន្តំ ទេវទូតំ សោ, កថេសិ ជនមជ្ឈគោ.

៣០. ចត្តាលីស សហស្សានិ, ធម្មចក្ខុំ វិសោធយុំ;

ចត្តាលីស សហស្សានិ, បព្ពជិំសុ តទន្តិកេ.

៣១. គន្ត្វា’ថ រក្ខិតត្ថេរោ, វនវាសិំ នភេ ឋិតោ;

សំយុត្តមនមតគ្គំ, កថេសិ ជនមជ្ឈគោ.

៣២. សដ្ឋិ នរសហស្សានំ, ធម្មាភិសមយោ អហុ;

សត្តតិំស សហស្សានិ, បព្ពជិំសុ តទន្តិកេ.

៣៣. វិហារានំ បញ្ចសតំ, តស្មិំទេសេ បតិដ្ឋហិ;

បតិដ្ឋាបេសិ តត្ថេវំ, ថេរោ សោ ជិនសាសនំ.

៣៤. គន្ត្វា’បរន្តកំ ថេរោ, យោនកោ ធម្មរក្ខិតោ;

អគ្គិក្ខន្ធោបមំ សុត្តំ, កថេត្វា ជនមជ្ឈគោ.

៣៥. សត្តតិំស សហស្សានិ, បាណេ តត្ថ សមាគតេ;

ធម្មាមតមបាយេសិ, ធម្មា ធម្មេសុ កោវិទោ.

៣៦. បុរិសានញ្ច សហស្សញ្ច, ឥត្ថិយោ ច តតោ’ធិកា;

ខត្តិយានំ កុលាយេវ, និក្ខមិត្វាន បព្ពជុំ.

៣៧. មហារដ្ឋមិសី គន្ត្វា, សោ មហាធម្មរក្ខិតោ;

មហានារទកស្សបវ្ហំ, ជាតកំ កថយី តហិំ.

៣៨. មគ្គផលំ បាបុណិំសុ, ចតុរាសីតិ សហស្សកា;

តេរសន្តុ សហស្សានិ, បព្ពជិំសុ តទន្តិកេ.

៣៩. គន្ត្វាន យោនវិសយំ, សោ មហាធម្មរក្ខិតោ ឥសិ;

កាឡការាម សុត្តន្តំ, កថេសិ ជនមជ្ឈគោ.

៤០. បាណសត សហស្សានិ, សហស្សានិ ច សត្តតិ;

មគ្គផលំ បាបុណិំសុ, ទស សហស្សានិ បព្ពជុំ.

៤១. គន្ត្វា ចតូហិ ថេរេហិ, ទេសេសិ មជ្ឈិមោ ឥសិ;

ហិមវន្តបទេសស្មិំ, ធម្មចក្កបវត្តនំ.

៤២. មគ្គផលបាបុណិំសុ, អសីតិបាណ កោដិយោ;

វិសុំ តេ បញ្ចរដ្ឋានិ, បញ្ចថេរា បសាទយុំ.

៤៣. បុរិសសតសហស្សានិ, ឯកេកស្សេវ សន្តិកេ;

បព្ពជិំសុ បសាទេន, សម្មាសម្ពុទ្ធ សាសនេ.

៤៤. សទ្ធិំ ឧត្តរថេរេន, សោណត្ថេរោ មហិទ្ធិកោ;

សុវណ្ណភូមិំ អគមា, តស្មិំ តុ សមយេ បន.

៤៥. ជាតេ ជាតេ រាជគេហេ, ទារកេ រុទ្ទរក្ខសី;

សមុទ្ទតោ និក្ខមិត្វា, ភក្ខិត្វា បន គច្ឆតិ.

៤៦. តស្មិំ ខណេ រាជគេហេ,

ជាតោ ហោតិ កុមារកោ;

ថេរេ មនុស្សា បស្សិត្វា,

រក្ខសានំ សហាយកា.

៤៧. ឥតិ ចិន្តិយ មារេតុំ, សា យុវា ឧបសង្កមុំ;

‘‘កិមេតន្តិ’’ច បុច្ឆិត្វា, ថេរំ តេ ឯវ មាហុតេ.

៤៨. សមណា មយំ ហិមវន្តា, ន រក្ខសិ សហាយកា;

រក្ខសី សា សបរិសា, និក្ខន្តា ហោតិ សាគរា.

៤៩. តំ ទិស្វាន មហារាវំ, វិរវិំសុ មហាជនា;

ទិគុណេ រក្ខសេ ថេរោ, មាបយិត្វា ភយានកេ.

៥០. តំ រក្ខសិំ សបរិសំ, បរិក្ខិបិ សមន្តតោ;

ឥទំ ឥមេហិ ឧទ្ធន្តិ, មន្ត្វា ភីតា បលាយិសា.

៥១. តស្ស ទេសស្ស អារក្ខំ, ឋបេត្វាន សមន្តតោ;

តស្មិំ សមាគមេ ថេរោ, ព្រហ្មជាលមទេសយិ.

៥២. សរណេសុ ច សីលេសុ, អដ្ឋំសុ ពហវោ ជនា;

សដ្ឋិយា តុ សហស្សានំ, ធម្មាភិសមយោ អហុ.

៥៣. អឌ្ឍុឌ្ឍានិ សហស្សានិ, បព្ពជុំ កុលទារកា;

បព្ពជិំសុ ទិយឌ្ឍន្តុ, សហស្សំ កុលធីតរោ.

៥៤. តតោប្បភុតិ សញ្ជាតេ, រាជគេហេ កុមារកេ;

នាមំ ករិំសុ រាជានោ, សោណុត្តរ សនាមកេ.

៥៥. មហាជនស្សាបិ ជិនស្ស កឌ្ឍនំ;

វិហាយ បត្តំ អមតំ សុខម្បិតេ;

ករិំសុ លោកស្ស ហិតំ តហិំ តហិំ;

ភវេយ្យ យោ លោកហិតេ បមាទវាតិ.

សុជនប្បសាទ សំវេគត្ថាយ កតេ មហាវំសេ

នានាទេសបសាទោ នាម ទ្វាទសមោ បរិច្ឆេទោ.