រាជកណ្ឌ

២៥១. មហាជនំ យោ រញ្ជេតិ, ចតូហិបិ វត្ថូហិ វា;

រាជាតិ វុច្ចតេ លោកេ, ឥតិ សល្លក្ខយេ វិទ្វា.

២៥២. ទានញ្ច អត្ថចរិយា, បិយវាចា អត្តសមំ;

សង្គហា ចតុរោ ឥមេ, មុនិន្ទេន បកាសិតា.

ទានម្បិ អត្ថចរិយតញ្ច, បិយវាទិតញ្ច សមានត្តតញ្ច;

ករិយចរិយសុសង្គហំ ពហូនំ, អនវមតេន គុណេន យាតិ សគ្គំ;

ទានញ្ច បេយ្យវជ្ជញ្ច, អត្ថចរិយា ច យា ឥធ;

សមានត្តតា ច ធម្មេសុ, តត្ថ តត្ថ យថារហំ;

ឯតេ ខោ សង្គហា លោកេ, រថស្សាណីវ យាយតោ.

២៥៣. ទានំ សីលំ បរិច្ចាគំ, អជ្ជវំ មទ្ទវំ តបំ;

អក្កោធំ អវិហិំសញ្ច, ខន្តី ច អវិរោធនំ;

ទសេតេ ធម្មេ រាជានោ, អប្បមត្តេន ធារយ្យុំ.

២៥៤. ឯកយាមំ សយេ រាជា, ទ្វិយា មញ្ញេវ បណ្ឌិតោ;

ឃរាវាសោ តិយាមោវ, ចតុយាមោ តុ យាចកោ.

២៥៥. អបុត្តកំ ឃរំ សុញ្ញំ, រដ្ឋំ សុញ្ញំ អរាជកំ;

អសិប្បស្ស មុខំ សុញ្ញំ, សព្ពសុញ្ញំ ទលិទ្ទត្តំ.

២៥៦. ធនមិច្ឆេ វាណិជេយ្យ, វិជ្ជមិច្ឆេ ភជេ សុតំ;

បុត្តមិច្ឆេ តរុណិត្ថិំ, រាជាមច្ចំ ឥច្ឆាគតេ.

២៥៧. បក្ខីនំ ពលមាកាសោ, មច្ឆានមុទកំ ពលំ;

ទុព្ពលស្ស ពលំ រាជា, កុមារានំ រុទំ ពលំ.

២៥៨. ខមា ជាគរិយុដ្ឋានំ, សំវិភាគោ ទយិក្ខណា;

នាយកស្ស គុណា ឯតេ, ឥច្ឆិតព្ពា សតំ សទា.

២៥៩. សកិំ វទន្តិ រាជានោ, សកិំ សមណព្រាហ្មណា;

សកិំ សប្បុរិសា លោកេ, ឯស ធម្មោ សនន្តនោ.

២៦០. អលសោ គីហិ កាមភោគី ន សាធុ,

អសញ្ញតោ បព្ពជិតោ ន សាធុ;

រាជា ន សាធុ អនិសម្មការី,

យោ បណ្ឌិតោ កោធនោ តំ ន សាធុ.

២៦១. អាយំ ខយំ សយំ ជញ្ញា, កតាកតំ សយំ ជញ្ញា;

និគ្គហេ និគ្គហារហំ, បគ្គហេ បគ្គហារហំ.

២៦២. មាតា បុត្តកតំ បាបំ, សិស្សកតំ គុរុ តថា;

រាជា រដ្ឋកតំ បាបំ, រាជកតំ បុរោហិតោ.

២៦៣. អក្កោធេន ជិនេ កោធំ, អសាធុំ សាធុនា ជិនេ;

ជិនេ កទរិយំ ទានេន, សច្ចេនាលិកវាទិនំ.

២៦៤. អទន្តទមនំ ទានំ, ទានំ សព្ពត្ថសាធកំ;

ទានេន បិយវាចាយ, ឧន្នមន្តិ នមន្តិ ច.

អទន្តទមនំ ទានំ, អទានំ ទន្តទូសកំ;

ទានេន បិយវាចាយ, ឧន្នមន្តិ នមន្តិ ច.

២៦៥. ទានំ សិនេហភេសជ្ជំ, មច្ឆេរំ ទោសនោសធំ;

ទានំ យសស្សីភេសជ្ជំ, មច្ឆេរំ កបណោសធំ.

២៦៦. ន រញ្ញា សមកំ ភុញ្ជេ, កាមភោគំ កុទាចនំ;

អាកប្បំ រសភុត្តំ វា, មាលាគន្ធវិលេបនំ;

វត្ថសព្ពមលង្ការំ, ន រញ្ញា សទិសំ ករេ.

២៦៧. ន មេ រាជា សខា ហោតិ, ន រាជា ហោតិ សមកោ;

ឯសោ សាមិកោ មយ្ហន្តិ, ចិត្តេ និដ្ឋំ សណ្ឋាបយេ.

២៦៨. នាតិទូរេ ភជេ រញ្ញោ, នច្ចាសន្នេ បវាតកេ;

ឧជុកេ នាតិនិន្នេ ច, ន ភជេ ឧច្ចមាសនេ;

ឆ ទោសេ វជ្ជេ សេវកោ, អគ្គីវ សំយតោ តិដ្ឋេ.

ន បច្ឆតោ ន បុរតោ, នាបិ អាសន្នទូរតោ;

ន កច្ឆេ នោបិ បដិវាតេ, ន ចាបិ ឱណតុណ្ណតេ;

ឥមេ ទោសេ វិវជ្ជេត្វា, ឯកមន្តំ ឋិតា អហុ –

២៦៩. ជប្បេន មន្តេន សុភាសិតេន,

អនុប្បទានេន បវេណិយា វា;

យថា យថា យត្ថ លភេថ អត្ថំ,

តថា តថា តត្ថ បរក្កមេយ្យ.

២៧០. កស្សកោ វាណិជោ មច្ចោ, សមណោ សុតសីល វា;

តេសុ វិបុលជាតេសុ, រដ្ឋម្បិ វិបុលំ សិយា.

២៧១. តេសុ ទុព្ពលជាតេសុ, រដ្ឋម្បិ ទុព្ពលំ សិយា;

តស្មា សរដ្ឋំ វិបុលំ, ធារយេ រដ្ឋភារវា.

២៧២. មហារុក្ខស្ស ផលិនោ, អាមំ ឆិន្ទតិ យោ ផលំ;

រសញ្ចស្ស ន ជានាតិ, ពីជញ្ចស្ស វិនស្សតិ.

២៧៣. មហារុក្ខូបមំ រដ្ឋំ, អធម្មេន បសាសតិ;

រសញ្ចស្ស ន ជានាតិ, រដ្ឋញ្ចស្ស វិនស្សតិ.

២៧៤. មហារុក្ខស្ស ផលិនោ, បក្កំ ឆិន្ទតិ យោ ផលំ;

រសញ្ចស្ស វិជានាតិ, ពីជញ្ជស្ស ន នស្សតិ.

២៧៥. មហារុក្ខូបមំ រដ្ឋំ, ធម្មេន យោ បសាសតិ;

រសញ្ចស្ស វិជានាតិ, រដ្ឋញ្ចស្ស ន នស្សតិ.