សុជនកណ្ឌ

១៧៦. សទ្ធាសីលាទិធម្មេហិ, សប្បន្នោ សេដ្ឋមានុសោ;

វុត្តោ ពុទ្ធាទិសន្តេហិ, សាធុសប្បុរិសោ ឥតិ.

សទ្ទាធនំ សីលធនំ, ហិរីឱត្តប្បិយំ ធនំ;

សុតធនញ្ច ចាគោ ច, បញ្ញា វេ សត្តមំ ធនំ.

យស្ស ឯតេ ធនា អត្ថិ, ឥត្ថិយា បុរិសស្ស វា;

អទលិទ្ទោតិ តំ អាហុ, អមោឃំ តស្ស ជីវិតំ.

តស្មា សទ្ធញ្ច សីលញ្ច, បសាទំ ធម្មទស្សនំ;

អនុយុញ្ជេថ មេធាវី, សរំ ពុទ្ធានសាសនំ.

១៧៧. សព្ភិរេវ សមាសេថ, សព្ភិ កុព្ពេថ សន្ថវំ;

សតំ សទ្ធម្មមញ្ញាយ, សេយ្យោ ហោតិ ន បាបិយោ.

១៧៨. ចជ ទុជ្ជនសំសគ្គំ, ភជ សាធុសមាគមំ;

ករ បុញ្ញមហោរត្តំ, សរ និច្ចមនិច្ចតំ.

១៧៩. យោ វេ កតញ្ញូ កតវេទី ធីរោ,

កល្យាណមិត្តោ ទឡ្ហភត្តិ ច ហោតិ;

ទុក្ខិតស្ស សក្កច្ច ករោតិ កិច្ចំ,

តថាវិធំ សប្បុរិសំ វទន្តិ.

១៨០. មាតាបេត្តិភរំ ជន្តុំ, កុលេ ជេដ្ឋាបចាយិនំ;

សណ្ហំ សខិលសម្ភាសំ, បេសុណេយ្យប្បហាយិនំ.

១៨១. មច្ឆេរវិនយេ យុត្តំ, សច្ចំ កោធាភិភុំ នរំ;

តំ វេ ទេវា តាវតិំសា, អាហុ ‘‘សប្បុរិសោ’’ឥតិ.

១៨២. កុលជាតោ កុលបុត្តោ, កុលវំសសុរក្ខតោ;

អត្តនា ទុក្ខប្បត្តោបិ, ហីនកម្មំ ន ការយេ.

១៨៣. ឧទេយ្យ ភាណុ បច្ឆិមេ, នមេយ្យ មេរុអទ្ទិបិ;

សីតលំ យទិ នរគ្គិ, បព្ពតគ្គេ ច ឧប្បលំ;

វិកសេ ន វិបរិតា, សាធុវាចា កុទាចនំ.

១៨៤. សុខា រុក្ខស្ស ឆាយាវ, តតោ ញាតិមាតាបិតុ;

តតោ អាចេរស្ស រញ្ញោ, តតោ ពុទ្ធស្សនេកធា.

១៨៥. ភមរា បុប្ផមិច្ឆន្តិ, គុណមិច្ឆន្តិ សជ្ជនា;

មក្ខិកា បូតិមិច្ឆន្តិ, ទោសមិច្ឆន្តិ ទុជ្ជនា.

១៨៦. មាតុហីនោ ទុព្ភាសោ ហិ, បិតុហីនោ ទុក្កិរិយោ;

ឧភោ មាតុបិតុហីនា, ទុព្ភាសា ច ទុក្កិរិយា.

១៨៧. មាតុសេដ្ឋោ សុភាសោ ហិ, បិតុសេដ្ឋោ សុកិរិយោ;

ឧភោមាតុ បិតុសេដ្ឋា, សុភាសា ច សុកិរិយា.

១៨៨. សុនខោ សុនខំ ទិស្វា, ទន្តំ ទស្សេតិ ហិំសិតុំ;

ទុជ្ជនោ សុជនំ ទិស្វា, រោសយំ ហិំសមិច្ឆតិ.

១៨៩. ន ច វេគេន កិច្ចានិ, កត្តព្ពានិ កុទាចនំ;

សហសា ការិតំ កម្មំ, ពាលោ បច្ឆានុតប្បតិ.

១៩០. កោធំ វធិត្វា ន កទាចិ សោចតិ,

មក្ខប្បហានំ ឥសយោ វណ្ណយន្តិ;

សព្ពេសំ វុត្តំ ផរុសំ ខមេថ,

ឯតំ ខន្តិំ ឧត្តមមាហុ សន្តោ.

១៩១. ទុក្ខោ និវាសោ សម្ពាធេ, ឋានេ អសុចីសង្កតេ;

តតោ អរិម្ហិ អប្បិយេ, តតោបិ អកតញ្ញុនា.

១៩២. ឱវទេយ្យា’នុសាសេយ្យ, អសព្ភា ច និវារយេ;

សតញ្ហិ សោ បិយោ ហោតិ, អសតំ ហោតិអប្បិយោ.

១៩៣. ឧត្តមត្តនិវាតេន, កក្ខឡំ មុទុនា ជយេ;

នីចំ អប្បកទានេន, វាយាមេន សមំ ជយេ.

១៩៤. ន វិសំ វិសមិច្ចាហ, ធនំ សង្ឃស្ស ឧច្ចតេ;

វិសំ ឯកំវ ហនតិ, ហនតិ សង្ឃស្ស សព្ពំ.

១៩៥. ធនមប្បម្បិ សាធូនំ, កូបេ វារិវ និស្សយោ;

ពហុំអបិ អសាធូនំ, ន ច វារិវ អណ្ណវេ.

១៩៦. អបត្ថេយ្យំ ន បត្ថេយ្យ, អចិន្តេយ្យំ ន ចិន្តយេ;

ធម្មមេវ សុចិន្តេយ្យ, កាលំ មោឃំ ន ឥច្ឆយេ.

១៩៧. អចិន្តិតម្បិ ភវតិ, ចិន្តិតម្បិ វិនស្សតិ;

ន ហិ ចិន្តាមយា ភោគា, ឥត្ថិយា បុរិសស្ស វា.

១៩៨. អសន្តស្ស បិយោ ហោតិ, សន្តេ ន កុរុតេ បិយំ;

អសតំ ធម្មំ រោចេតិ, តំ បរាភវតោ មុខំ.

១៩៩. គុណា កុព្ពន្តិ ទូតត្តំ, ទូរេបិ វសតំ សតំ;

កេតកេ គន្ធំ ឃាយិត្វា, គច្ឆន្តិ ភមរា សយំ.

២០០. បុព្ពជាតិកតំ កម្មំ, តំ កម្មមីតិ កថ្យតេ;

តស្មា បុរិសាការេនំ, យតំ ករេ អតន្ទិតោ.

២០១. មត្តិកបិណ្ឌតោ កត្តា, កុរុតេ យំ យទិច្ឆតិ;

ឯវមត្តកតំ កម្មំ, មាណវោ បដិបជ្ជតេ.

២០២. ឧដ្ឋាយោដ្ឋាយ ពោធេយ្យំ, មហព្ភយ មុបដ្ឋិតំ;

មរណព្យាធិសោកានំ, កិមជ្ជ និបតិស្សតិ.

២០៣. បាណា យថាត្តនោភិដ្ឋា, ភូតានមបិ តេ តថា;

អត្តោបមេន ភូតេសុ, ទយំ កុព្ពន្តិ សាធវោ.

សព្ពេ តសន្តិ ទណ្ឌស្ស, សព្ពេ ភាយន្តិ មច្ចុនោ;

អត្តានំ ឧបមំ កត្វា, ន ហនេយ្យ ន ឃាតយេ.

២០៤. ពាលោ វា យទិ វា វុទ្ធោ, យុវា វា គេហមាគតោ;

តស្ស បូជា វិធាតព្ពា, សព្ពស្សាភ្យាគតោ គរុ.

២០៥. អាកិណ្ណោបិ អសន្តេហិ, អសំសដ្ឋោវ ភទ្ទកោ;

ពហុនា សន្នជាតេន, គច្ឆេន ឧព្ពត្តេនិធ.