បកិណ្ណកកណ្ឌ

៣១៦. កុលសីលគុណោបេតោ, សព្ពធម្មបរាយណោ;

បវីណោ បេសនាជ្ឈក្ខោ, ធម្មជ្ឈក្ខោ វិធីយតេ.

៣១៧. វេទវេទង្គតត្វញ្ញោ, ជប្បហោមបរាយណោ;

អាសីវាទវចោយុត្តោ, ឯស រាជបុរោហិតោ.

កប្បោ ព្យាករណំ ជោតិ – សត្ថំ សិក្ខា និរុត្តិ ច;

ឆន្ទោវិចិតិ ចេតានិ, វេទង្គានិ វទន្តិ ឆ.

៣១៨. សកិំ វុត្តគហិតត្តោ, លហុហត្ថោ ជិតក្ខរោ;

សព្ពសត្ថសមាលោកី, បកដ្ឋោ នាម លេខកោ.

៣១៩. សមត្តនីតិសត្ថញ្ញោ, វាហនេ បូរិតស្សមោ;

សូរវីរគុណោបេតោ, សេនាឈក្ខោ វិធីយតេ.

៣២០. សុធី វាក្យបដុ, បញ្ញោ, បរចិត្តោបលក្ខណោ;

ធីរោ យថាត្ថវាទី ច, ឯស ទូតោ វិធីយតេ.

៣២១. បុត្តនត្តគុណោបេតោ, សត្ថញ្ញោ រសបាចកោ;

សូរោ ច កថិនោ ចេវ, សូបការោ ស វុច្ចតេ.

៣២២. ឥង្គិតាការតត្តញ្ញោ, ពលវាបិយទស្សនោ;

អប្បមាទី សទា ទក្ខោ, បតីហារោ ស ឧច្ចតេ.

៣២៣. ឥត្ថិមិស្សេ កុតោ សីលំ, មំសភក្ខេ កុតោ ទយា;

សុរាបានេ កុតោ សច្ចំ, មហាលោភេ កុតោ លជ្ជា;

មហាតន្ទេ កុតោ សិប្បំ, មហាកោធេ កុតោ ធនំ.

៣២៤. សុរាយោគោ វេលាលោ ច, សមជ្ជចរណង្គតោ;

ខិឌ្ឌា ធុត្តោ បាបមិត្តោ, អលសោ ភោគនាសកា.

៣២៥. ជីវន្តាបិ មតា បញ្ច, ព្យាសេន បរិកិត្តិតា;

ទុក្ខិតោ ព្យាធិតិ មូឡ្ហោ, ឥណវា និច្ចសេវកោ.

៣២៦. និទ្ទាលុកោ បមាទោ ច, សុខិតោ រោគវាលសោ;

កាមុកោ កម្មារាមោ ច, សត្តេតេ សត្ថវជ្ជិតា.

៣២៧. គោណាហិ សព្ពគិហីនំ, បោសកា ភោគទាយកោ;

តស្មា ហិ មាតាបិតូវ, មានយេ សក្ករេយ្យ ច.

៣២៨. យថា មាតា បិតា ភាតា, អញ្ញេវាបិ ច ញាតកា;

គាវោ នោ បរមា មិត្តា, យាសុ ជាយន្តិ ឱសធា.

៣២៩. អន្នទា ពលទា ចេតា, វណ្ណទា សុខទា តថា;

ឯតមត្ថវសំ ញត្វា, នាសុ គាវោ ហនិំសុ តេ.

៣៣០. យេ ច ខាទន្តិ គោមំសំ, មាតុមំសំវ ខាទរេ;

មតេសុ តេសុ គិជ្ឈានំ, ទទេ សោតេ ច វាហយេ.

៣៣១. ទ្វិគុណោ ថីនមាហារោ, ពុទ្ធិចាបិ ចតុគ្គុណោ;

ឆគ្គុណោ ហោតិ វាយាមោ, កាមោត្វដ្ឋគុណោ ភវេ.

៣៣២. ន លោកេ សោភតេ មូឡ្ហោ, កេវលត្តបសំសកោ;

អបិ សម្បិហិតេ កូបេ, កតវិជ្ជោ បកាសតេ.

៣៣៣. កោសជ្ជំ ភយតោ ទិស្វា, វីរិយារម្ភញ្ច ខេមតោ;

អារទ្ធវីរិយា ហោថ, ឯសា ពុទ្ធានុសាសនី.

៣៣៤. វិវាទំ ភយតោ ទិស្វា, អវិវាទញ្ច ខេមតោ;

សមគ្គា សខិលា ហោថ, ឯសា ពុទ្ធានុសាសនី.

៣៣៥. បមាទំ ភយតោ ទិស្វា, អប្បមាទញ្ច ខេមតោ;

ភាវេថដ្ឋង្គិកំ មគ្គំ, ឯសា ពុទ្ធានុសាសនី.

៣៣៦. គរហា ច បសំសា ច, អនិច្ចា តាវកាលិកា;

អប្បកាចេកទេសាវ, ន តា ឥក្ខេយ្យ បណ្ឌិតោ;

ធម្មាធម្មំវ ឥក្ខេយ្យ, អត្ថានត្ថំ ហិតាហិតំ.