៥. តទ្ធិតកប្ប

អដ្ឋមកណ្ឌ

៣៤៤. , ៣៦១. វាណ’បច្ចេ.

ណបច្ចយោ ហោតិ វា ‘‘តស្សាបច្ច’’ មិច្ចេតស្មិំ អត្ថេ.

វសិដ្ឋស្ស អបច្ចំ វាសិដ្ឋោ, វសិដ្ឋស្ស អបច្ចំ វា, វសិដ្ឋស្ស អបច្ចំ វាសិដ្ឋី, វសិដ្ឋស្ស អបច្ចំ វាសិដ្ឋំ. ឯវំ ភារទ្វាជោ, ភារទ្វាជី, ភារទ្វាជំ. គោតមោ, គោតមី, គោតមំ. វាសុទេវោ, វាសុទេវី, វាសុទេវំ. ពាលទេវោ, ពាលទេវី, ពាលទេវំ. វេសាមិត្តោ, វេសាមិត្តី វេសាមិត្តំ.

៣៤៥. , ៣៦៦. ណាយន ណាន វច្ឆាទិតោ.

តស្មា វច្ឆាទិតោ គោត្តគណតោ ណាយនណានបច្ចយា ហោន្តិ វា ‘‘តស្សាបច្ច’’មិច្ចេតស្មិំ អត្ថេ.

វច្ឆស្ស អបច្ចំវច្ឆាយនោ, វច្ឆានោ, វច្ឆស្ស អបច្ចំ វា, វច្ឆស្ស អបច្ចំ វច្ឆាយនី, វច្ឆានី, វច្ឆស្ស អបច្ចំ វច្ឆាយនំ, វច្ឆានំ. សកដស្ស អបច្ចំ សាកដាយនោ, សាកដានោ, សកដស្ស អបច្ចំ វា, សាកដាយនី, សា កដានី, សាកដាយនំ, សាកដានំ. ឯវំ កណ្ហាយនោ, កណ្ហានោ, កណ្ហស្ស អបច្ចំ វា. កណ្ហាយនី, កណ្ហានី, កណ្ហាយនំ, កណ្ហានំ. អគ្គិវេស្សាយនោ, អគ្គិវេស្សានោ, អគ្គិវេស្សាយនី, អគ្គិវេស្សានី, អគ្គិវេស្សាយនំ, អគ្គិវេស្សានំ. គច្ឆាយនោ, គច្ឆានោ, គច្ឆាយនី, គច្ឆានី, គច្ឆាយនំ, គច្ឆានំ. កប្បាយនោ, កប្បានោ, កប្បាយនី, កប្បានី, កប្បាយនំ, កប្បានំ. មោគ្គល្លាយនោ, មោគ្គល្លានោ, មោគ្គល្លាយនី, មោគ្គល្លានី, មោគ្គល្លាយនំ, មោគ្គល្លានំ. មុញ្ចាយនោ, មុញ្ចានោ, មុញ្ចាយនី, មុញ្ចានី, មុញ្ចាយនំ, មុញ្ចានំ. សង្ឃាយនោ, សង្ឃានោ, សង្ឃាយនី, សង្ឃានី, សង្ឃាយនំ, សង្ឃានំ. លោមាយនោ, លោមានោ, លោមាយនី, លោមានី, លោមាយនំ, លោមានំ, សាកមាយនោ, សាកមានោ, សាកមាយនី, សាកមានី, សាកមាយនំ, សាកមានំ. នារាយនោ, នារានោ, នារាយនី, នារានី, នារាយនំ, នារានំ. ចោរាយនោចោរានោ, ចោរាយនី, ចោរានី, ចោរាយនំ, ចោរានំ, អាវសាលាយនោ, អាវសាលានោ, អាវសាលាយនី, អាវសាលានី, អាវសាលាយនំ, អាវសាលានំ. ទ្វេបាយនោ, ទ្វេបានោ, ទ្វេបាយនី, ទ្វេបានី, ទ្វេបាយនំ, ទ្វេបានំ. កុញ្ចាយនោ, កុញ្ចានោ, កុញ្ចាយនី, កុញ្ចានី, កុញ្ចាយនំ, កុញ្ចានំ. កច្ចាយនោ, កច្ចានោ, កច្ចាយនី, កច្ចានី, កច្ចាយនំ, កច្ចានំ.

៣៤៦. , ៣៦៧. ណេយ្យោ កត្តិកាទីហិ.

តេហិ គោត្តគណេហិ កត្តិកាទីហិ ណេយ្យបច្ចយោ ហោតិ វា ‘‘តស្សាបច្ច’’មិច្ចេតស្មិំ អត្ថេ.

កត្តិកាយ អបច្ចំ កត្តិកេយ្យោ, កត្តិកាយ អបច្ចំ វា. ឯវំ វេនតេយ្យោ, រោហិណេយ្យោ, គង្គេយ្យោ, កទ្ទមេយ្យោ, នាទេយ្យោ, អាលេយ្យោ, អាហេយោ, កាមេយ្យោ, សុចិយា អបច្ចំ សោចេយ្យោ, សាលេយ្យោ, ពាលេយ្យោ, មាលេយ្យោ, កាលេយ្យោ.

៣៤៧. , ៣៦៨. អតោ ណិ វា.

តស្មា អការតោ ណិបច្ចយោ ហោតិ វា ‘‘តស្សាបច្ច’’មិច្ចេតស្មិំ អត្ថេ.

ទក្ខស្ស អបច្ចំ ទក្ខិ, ទក្ខស្ស អបច្ចំ វា. ទុណស្ស អបច្ចំ ទោណិ, ទុណស្ស អបច្ចំ វា, ឯវំ វាសវិ, សក្យបុត្តិ, នាដបុត្តិ, ទាសបុត្តិ, ទាសវិ, វារុណិ, គណ្ឌិ, ពាលទេវិ, បាវកិ, ជេនទត្តិ, ពុទ្ធិ, ធម្មិ, សង្ឃិ, កប្បិ, អនុរុទ្ធិ.

វាតិ វិកប្បនត្ថេន ណិកបច្ចយោ ហោតិ ‘‘តស្សាបច្ច’’មិច្ចេតស្មិំ អត្ថេ. សក្យបុត្តស្ស អបច្ចំ សក្យបុត្តិកោ. ឯវំ នាដបុត្តិកោ, ជេនទត្តិកោ.

១៤៨. , ៣៧១. ណវោ’ បក្វាទីហិ.

ឧបកុឥច្ចេវមាទីហិ ណវបច្ចយោ ហោតិ វា ‘‘តស្សាបច្ច’’មិច្ចេតស្មិំ អត្ថេ.

ឧបកុស្ស អបច្ចំ ឱបកវោ, ឧបកុស្ស អបច្ចំ វា. មនុនោ អបច្ចំ មានវោ, មនុនោ អបច្ចំ វា. ភគ្គុស្ស អបច្ចំ ភគ្គវោ, ភគ្គុស្ស អបច្ចំ វា, បណ្ឌុស្ស អបច្ចំ បណ្ឌវោ, បណ្ឌុស្ស អបច្ចំ វា, ពហុស្ស អបច្ចំ ពាហវោ, ពហុស្ស អបច្ចំ វា.

៣៤៩. , ៣៧២. ណេរ វិធវាទិតោ.

តស្មា វិធវាទិតោ ណេរបច្ចយោ ហោតិ វា ‘‘តស្សាបច្ច’’មិច្ចេតស្មិំ អត្ថេ.

វិធវាយ អបច្ចំ វេធវេរោ, វិធវាយ អបច្ចំ វា. ពន្ធុកិយា អបច្ចំ ពន្ធុកេរោ, ពន្ធុកិយា អបច្ចំ វា. សមណស្ស អបច្ចំ សាមណេរោ, សមណស្ស អបច្ចំ វា. ឯវំ សាមណេរី, សាមណេរំ, នាឡិកេរោ, នាឡិកេរី, នាឡិកេរំ.

៣៥០. , ៣៧៣. យេន វា សំសដ្ឋំ តរតិ ចរតិ វហតិ ណិកោ.

យេន វា សំសដ្ឋំ, យេន វា តរតិ, យេន វា ចរតិ, យេន វា វហតិ ឥច្ចេតេស្វត្ថេសុ ណិកបច្ចយោ ហោតិ វា.

តិលេន សំសដ្ឋំ ភោជនំ តេលិកំ, តិលេន សំសដ្ឋំ វា. ឯវំ គោឡិកំ, ឃាតិកំ.

នាវាយ តរតីតិ នាវិកោ, នាវាយ តរតិ វា. ឯវំ ឱឡុម្បិកោ.

សកដេន ចរតីតិ សាកដិកោ, សកដេន ចរតិ វា. ឯវំ បត្តិកោ, ទណ្ឌិកោ, ធម្មិកោ, បាទិកោ.

សីសេន វហតីតិ សីសិកោ, សីសេន វហតិ វា. អំសេន វហតីតិ អំសិកោ, អំសេន វហតិ វា. ឯវំ ខន្ធិកោ, អង្គុលិកោ.

វាតិ វិកប្បនត្ថេន អញ្ញេសុបិ ណិកបច្ចយោ ហោតិ. រាជគហេ វសតីតិ រាជគហិកោ, រាជគហេ វសតិ វា. រាជគហេ ជាតោ រាជគហិកោ, រាជគហេ ជាតោ វា. ឯវំ មាគធិកោ, សាវត្ថិកោ, កាបិល វត្ថិកោ, បាដលិបុត្តិកោ, វេសាលិកោ.

៣៥១. , ៣៧៤. តមធីតេ តេនកតាទិ សន្និធាន និយោគ សិប្ប ភណ្ឌ ជីវិកត្ថេសុ ច.

តមធីតេ, តេនកតាទិអត្ថេ, តម្ហិ សន្និធានា, តត្ថ និយុត្តោ, តមស្ស សិប្បំ, តមស្ស ភណ្ឌំ, តមស្ស ជីវិកំ ឥច្ចេតេស្វត្ថេសុ ច ណិកបច្ចយោ ហោតិ វា.

វិនយមធីតេ វេនយិកោ, វិនយមធីតេ វា. ឯវំ សុត្តន្តិកោ, អាភិធម្មិកោ, វេយ្យាករណិកោ.

កាយេន កតំ កម្មំ កាយិកំ, កាយេន កតំ កម្មំ វា. ឯវំ វាចសិកំ, មានសិកំ.

សរីរេ សន្និធានា វេទនា សារីរិកា, សរីរេ សន្និធានា វា, ឯវំ មានសិកា.

ទ្វារេ និយុត្តោ ទោវារិកោ, ទ្វារេ និយុត្តោ វា. ឯវំ ភណ្ឌាគារិកោ, នាគរិកោ, នាវកម្មិកោ.

វីណា អស្ស សិប្បំ វេណិកោ, វីណា អស្ស សិប្បំ វា. ឯវំ បាណវិកោ, មោទិង្គិកោ, វំសិកោ.

គន្ធោ អស្ស ភណ្ឌំ គន្ធិកោ, គន្ធោ អស្ស ភណ្ឌំ វា. ឯវំ តេលិកោ, គោឡិកោ.

ឧរព្ភំ ហន្ត្វា ជីវតីតិ ឱរព្ភិកោ, ឧរព្ភំ ហន្ត្វា ជីវតិ វា. មគំ ហន្ត្វា ជីវតីតិ មាគវិកោ, មគំ ហន្ត្វា ជីវតិ វា. ឯវំ សោករិកោ, សាកុណិកោ.

អាទិគ្គហណេន អញ្ញត្ថាបិ ណិក បច្ចយោ យោជេតព្ពោ. ជាលេន ហតោ ជាលិកោ, ជាលេន ហតោ វា.

សុត្តេន ពន្ធោ សុត្តិកោ, សុត្តេន ពន្ធោ វា.

ចាបោ អស្ស អាវុធោ ចាបិកោ, ចាបោ អស្ស អាវុធោ វា. ឯវំ តោមរិកោ, មុគ្គរិកោ, មោសលិកោ.

វាតោ អស្ស អាពាធោ វាតិកោ, វាតោ អស្ស អាពាធោ វា. ឯវំ សេម្ហិកោ, បិត្តិកោ.

ពុទ្ធេ បសន្នោ ពុទ្ធិកោ, ពុទ្ធេ បសន្នោ វា. ឯវំ ធម្មិកោ, សង្ឃិកោ.

ពុទ្ធស្ស សន្តកំ ពុទ្ធិកំ, ពុទ្ធស្ស សន្តកំ វា. ឯវំ ធម្មិកំ, សង្ឃិកំ.

វត្ថេន កីតំ ភណ្ឌំ វត្ថិកំ, វត្ថេន កីតំ ភណ្ឌំ វា. ឯវំ កុម្ភិកំ, ផាលិកំ, កិំ កណិកំ, សោវណ្ណិកំ.

កុម្ភោ អស្ស បរិមាណំ កុម្ភិកំ, កុម្ភោ អស្ស បរិមាណំ វា.

កុម្ភស្ស រាសិ កុម្ភិកំ, កុម្ភស្ស រាសិ វា.

កុម្ភំ អរហតីតិ កុម្ភិកោ, កុម្ភំ អរហតិ វា.

អក្ខេន ទិព្ពតីតិ អក្ខិកោ, អក្ខេន ទិព្ពតិ វា. ឯវំ សាលាកិកោ, តិន្ទុកិកោ, អម្ពផលិកោ. កបិដ្ឋផលិកោ, នាឡិកេរិកោ ឥច្ចេវមាទិ.

៣៥២. , ៣៧៦. ណ រាគា តស្សេ ទមញ្ញត្ថេសុ ច.

ណបច្ចយោ ហោតិ វា រាគម្ហា ‘‘តេន រត្តំ’’ ឥច្ចេតស្មិំ អត្ថេ, ‘‘តស្សេទំ’’ អញ្ញត្ថេសុ ច.

កសាវេន រត្តំ វត្ថំ កាសាវំ, កសាវេន រត្តំ វត្ថំ វា. ឯវំ កោសុម្ភំ, ហាលិទ្ទំ, បាដង្គំ, រត្តង្គ, មញ្ជិដ្ឋំ, កុង្កុមំ.

សូករស្ស ឥទំ មំសំ សោករំ, សូករស្ស ឥទំ មំសំ វា. ឯវំ មាហិសំ.

ឧទុម្ពរស្ស អវិទូរេ បវត្តំ វិមានំ ឱទុម្ពរំ, ឧទុម្ពរស្ស អវិទូរេ បវត្តំ វិមានំ វា.

វិទិសាយ អវិទូរេ និវាសោ វេទិសោ, វិទិសាយ អវិទូរេ និវាសោ វា.

មថុរាយ ជាតោ មាថុរោ, មថុរាយ ជាតោ វា.

មថុរាយ អាគតោ មាថុរោ, មថុរាយ អាគតោ វា.

កត្តិកាយ និយុត្តោ មាសោ កត្តិកោ, កត្តិកាយ និយុត្តោ មាសោ វា. ឯវំ មាគសិរោ, ផុស្សោ, មាឃោ, ផគ្គុនោ, ចិត្តោ, វេសាខោ, ជេដ្ឋោ, អាសឡ្ហោ, សាវណោ, ភទ្ទោ, អស្សយុជោ.

ន វុទ្ធិ នីលបីតាទោ, បច្ចយេ សណការកេ.

ផការោ ផុស្សសទ្ទស្ស, ‘‘សិរោ’’តិ សិរសំ វទេ.

សិក្ខានំ សមូហោ សិក្ខោ, ភិក្ខានំ សមូហោ ភិក្ខោ. ឯវំ កាបោតោ, មាយូរោ, កោកិលោ.

ពុទ្ធេ, អស្ស ទេវតា ពុទ្ធោ. ឯវំ ភទ្ទោ, មារោ, មាហិន្ទោ, វេស្សវណោ, យាមោ, សោមោ, នារាយណោ.

សំវច្ឆរមធីតេ សំវច្ឆរោ. ឯវំ មោហុត្តោ, នេមិត្តោ, អង្គវិជ្ជោ, វេយ្យាករណោ, ឆន្ទោ, ភាស្សោ, ចន្ទោ.

វសាទានំ វិសយោ ទេសោ វាសាទោ. ឯវំ កុម្ភោ, សាកុន្តោ, អាតិសារោ.

ឧទុម្ពរា អស្មិំ បទេសេ សន្តីតិ ឱទុម្ពរោ. សាគរេហិ និព្ពត្តោ សាគរោ. សាគលមស្ស និវាសោ សាគលោ. មថុរា អស្ស និវាសោ មាថុរោ. មថុរាយ ឥស្សរោ មាថុរោ. ឥច្ចេវមាទយោ យោជេតព្ពា.

៣៥៣. , ៣៧៨. ជាតាទីនមិមិយា ច.

ជាតឥច្ចេវមាទីនមត្ថេ ឥមឥយបច្ចយា ហោន្តិ.

បច្ឆា ជាតោ បច្ឆិមោ. ឯវំ អន្តិមោ, មជ្ឈិមោ, បុរិមោ, ឧបរិមោ, ហេដ្ឋិមោ, គោប្ផិមោ. ពោធិសត្តជាតិយា ជាតោ ពោធិសត្តជាតិយោ, ឯវំ អស្សជាតិយោ, ហត្ថិជាតិយោ, មនុស្សជាតិយោ.

អាទិគ្គហណេន និយុត្តត្ថាទិតោបិ តទស្សត្ថាទិតោបិ ឥម ឥយ ឥក ឥច្ចេតេ បច្ចយា ហោន្តិ. អន្តោ និយុត្តោ អន្តិមោ. ឯវំ អន្តិយោ, អន្តិកោ.

បុត្តោ អស្ស អត្ថិ, តស្មិំ វា វិជ្ជតីតិ បុត្តិមោ. ឯវំ បុត្តិយេវ, បុត្តិកោ, កប្បិមោ, កប្បិយោ, កប្បិកោ.

ចគ្គហណេន កិយបច្ចយោ ហោតិ និយុត្តត្ថេ. ជាតិយំ និយុត្តោ ជាតិកិយោ, អន្ធេ និយុត្តោ អន្ធកិយោ, ជាតិយា អន្ធោ ជច្ចន្ធោ, ជច្ចន្ធេ និយុត្តោ ជច្ចន្ធកិយោ.

៣៥៤. , ៣៧៩. សមូហត្ថេ កណ ណា.

សមូហត្ថេ កណ ណឥច្ចេតេ បច្ចយា ហោន្តិ.

រាជបុត្តានំ សមូហោ រាជបុត្តកោ. ឯវំ រាជបុត្តោ, មានុស្សកោ, មានុស្សោ, មាយូរកោ, មាយូរោ, មាហិំសកោ, មាហិំសោ.

៣៥៥. , ៣៨០. គាម ជន ពន្ធុ សហាយាទីហិតា.

គាម ជន ពន្ធុ សហាយឥច្ចេវមាទីហិ តាបច្ចយោ ហោតិ សមូហត្ថេ.

គាមានំ សមូហោ គាមតា. ឯវំ ជនតា, ពន្ធុតា, សហាយតា, នគរតា.

៣៥៦. , ៣៨១. តទស្ស ឋានមិយោ ច.

‘‘តទស្ស ឋាន’’ មិច្ចេតស្មិំ អត្ថេ ឥយបច្ចយោ ហោតិ.

មទនស្ស ឋានំ មទនិយំ, ពន្ធនស្ស ឋានំ ពន្ធនិយំ, មុច្ឆនស្ស ឋានំ មុច្ឆនិយំ, ឯវំ រជនិយំ, កមនិយំ, គមនិយំ, ទុស្សនិយំ, ទស្សនិយំ.

៣៥៧. , ៣៨២. ឧបមត្ថាយិតត្តំ.

ឧបមត្ថេ អាយិតត្តបច្ចយោ ហោតិ.

ធូមោ វិយ ទិស្សតិ អទុំ វនំ តទិទំ ធូមាយិតត្តំ, តិមិរំ វិយ ទិស្សតិ អទុំ វនំ តទិទំ តិមិរាយិតត្តំ.

៣៥៨. , ៣៨៣. តន្និស្សិតត្ថេ លោ.

‘‘តន្និស្សិតត្ថេ, តទស្ស ឋាន’’មិច្ចេតស្មិំ អត្ថេ ច លបច្ចយោ ហោតិ.

ទុដ្ឋុ និស្សិតំ ទុដ្ឋុល្លំ, វេទំ និស្សិតំ វេទល្លំ, ទុដ្ឋុ ឋានំ ទុដ្ឋុល្លំ, វេទស្ស ឋានំ វេទល្លំ.

៣៥៩. , ៣៨៤. អាលុ តព្ពហុលេ.

អាលុបច្ចយោ ហោតិ តព្ពហុលត្ថេ.

អភិជ្ឈា អស្ស បកតិ អភិជ្ឈាលុ, អភិជ្ឈា អស្ស ពហុលា វា អភិជ្ឈាលុ. ឯវំ សីតាលុ, ធជាលុ, ទយាលុ.

៣៦០. , ៣៨៧. ណ្យ ត្ត តា ភាវេ តុ.

ណ្យត្តតាឥច្ចេតេ បច្ចយា ហោន្តិ ភាវត្ថេ.

អលសស្ស ភាវោ អាលស្យំ, អរោគស្ស ភាវោ អារោគ្យំ. បំសុកូលិកស្ស ភាវោ បំសុកូលិកត្តំ, អនោទរិកស្ស ភាវោ អនោទរិកត្តំ. សង្គណិការាមស្ស ភាវោ សង្គណិការាមតា, និទ្ទារាមស្ស ភាវោ និទ្ទារាមតា.

តុគ្គហណេន ត្តនបច្ចយោ ហោតិ. បុថុជ្ជនត្តនំ, វេទនត្តនំ.

៣៦១. , ៣៨៨. ណ វិសមាទីហិ.

ណបច្ចយោ ហោតិ វិសមាទីហិ ‘‘តស្ស ភាវោ’’ឥច្ចេតស្មិំ អត្ថេ.

វិសមស្ស ភាវោ វេសមំ, សុចិស្ស ភាវោ សោចំ.

៣៦២. , ៣៨៩. រមណីយាទិតោ កណ.

រមណីយឥច្ចេវមាទិតោ កណ បច្ចយោ ហោតិ ‘‘តស្ស ភាវោ’’ឥច្ចេតស្មិំ អត្ថេ.

រមណីយស្ស ភាវោ រាមណីយកំ, មនុញ្ញស្ស ភាវោ មានុញ្ញកំ.

៣៦៣. , ៣៩០. វិសេសេ តរតមិសិកិយិដ្ឋា.

វិសេសត្ថេ តរ តម ឥសិក ឥយ ឥដ្ឋឥច្ចេតេ បច្ចយា ហោន្តិ.

សព្ពេ ឥមេ បាបា, អយមិមេសំ វិសេសេន បាបោតិ បាបតរោ. ឯវំ បាបតមោ, បាបិសិកោ, បាបិយោ, បាបិដ្ឋោ.

៣៦៤. , ៣៩៨. តទស្សត្ថីតិ វី ច.

‘‘តទស្សត្ថិ’’ឥច្ចេតស្មិំ អត្ថេ វីបច្ចយោ ហោតិ.

មេធា យស្ស អត្ថិ, តស្មិំ វា វិជ្ជតីតិមេធាវី. ឯវំ មាយាវី.

ចគ្គហណេន សោបច្ចយោ ហោតិ. សុមេធា យស្ស អត្ថិ, តស្មិំ វា វិជ្ជតីតិ សុមេធសោ.

៣៦៥. , ៣៩៩. តបាទិតោ សី.

តបាទិតោ សីបច្ចយោ ហោតិ ‘‘តទស្សត្ថិ’’ឥច្ចេតស្មិំ អត្ថេ.

តបោ យស្ស អត្ថិ តស្មិំ វា វិជ្ជតីតិ តបស្សី. ឯវំ យសស្សី, តេជស្សី.

២៦៦. , ៤០០. ទណ្ឌាទិតោ ឥកឦ.

ទណ្ឌាទិតោ ឥក ឦឥច្ចេតេ បច្ចយា ហោន្តិ ‘‘តទស្សត្ថិ’’ឥច្ចេតស្មិំ អត្ថេ.

ទណ្ឌោ យស្ស អត្ថិ, តស្មិំ វា វិជ្ជតីតិ ទណ្ឌិកោ, ទណ្ឌី. ឯវំ មាលិកោ, មាលី.

៣៦៧. , ៤០១. មធ្វាទិតោ រោ.

មធុឥច្ចេវមាទិតោ របច្ចយោ ហោតិ ‘‘តទស្សត្ថិ’’ឥច្ចេតស្មិំ អត្ថេ.

មធុ យស្ស អត្ថិ, តស្មិំ វា វិជ្ជតីតិ មធុរោ. ឯវំ កុញ្ជរោ, មុគ្គរោ, មុខរោ, សុសិរោ, (សីសរោ, សុករោ, សុង្ករោ), សុភរោ, សុចិរោ, រុចិរោ.

៣៦៨. , ៤០២. គុណាទិតោ វន្តុ.

គុណឥច្ចេវមាទិតោ វន្តុបច្ចយោ ហោតិ ‘‘តទស្សត្ថិ’’ឥច្ចេតស្មិំ អត្ថេ.

គុណោ យស្ស អត្ថិ, តស្មិំ វា វិជ្ជតីតិ គុណវា. ឯវំ យសវា, ធនវា, បញ្ញវា, ពលវា, ភគវា.

៣៦៩. , ៤០៣. សត្យាទីហិ មន្តុ.

សតិឥច្ចេវមាទីហិ មន្តុបច្ចយោហោតិ ‘‘តទស្សត្ថិ’’ ឥច្ចេតស្មិំ អត្ថេ.

សតិ យស្ស អត្ថិ, តស្មិំ វា វិជ្ជតីតិ សតិមា, ឯវំ ជុតិមា, រុចិមា, ថុតិមា, ធិតិមា, មតិមា, ភាណុមា.

៣៧០. , ៤០៥. សទ្ធាទិតោណ.

សទ្ធាឥច្ចេវមាទិតោ ណ បច្ចយោ ហោតិ ‘‘តទស្សត្ថិ’’ឥច្ចេតស្មិំ អត្ថេ.

សទ្ធា យស្ស អត្ថិ, តស្មិំ វា វិជ្ជតីភិ សទ្ធោ, ឯវំ បញ្ញោ, អមច្ឆរោ.

៣៧១. , ៤០៤. អាយុស្សុការាស មន្តុម្ហិ.

អាយុស្ស អន្តោ ឧការោ អសាទេសោ ហោតិមន្តុម្ហិ បច្ចយេ បរេ.

អាយុ អស្ស អត្ថិ, តស្មិំ វា វិជ្ជតីតិ អាយស្មា.

៣៧២. , ៣៨៥. តប្បកតិវចនេ មយោ.

តប្បកតិវចនត្ថេ មយបច្ចយោ ហោតិ.

សុវណ្ណេន បកតំ កម្មំ សោវណ្ណមយំ. ឯវំ រូបិយមយំ ជតុមយំ, រជតមយំ, ឥដ្ឋកមយំ, អយោមយំ, មត្តិកា មយំ, ទារុមយំ, គោមយំ.

៣៧៣. , ៤០៦. សង្ខ្យាបូរណេ មោ.

សង្ខ្យាបូរណត្ថេ មបច្ចយោ ហោតិ.

បញ្ចន្នំ បូរណោ បញ្ចមោ, ឯវំ សត្តមោ, អដ្ឋមោ, នវមោ, ទសមោ.

៣៧៤. , ៤០៨. ស ឆស្សវា.

ឆស្ស សការាទេសោ ហោតិ វា សង្ខ្យាបូរណត្ថេ.

ឆន្នំ បូរណោ សដ្ឋោ, ឆដ្ឋោ វា.

៣៧៥. , ៤១២. ឯកាទិតោ ទសស្សី.

ឯកាទិតោ ទសស្ស អន្តេ ឦបច្ចយោ ហោតិ វា សង្ខ្យាបូរណត្ថេ.

ឯកោ ច ទស ច ឯកាទស, ឯកាទសន្នំ បូរណី ឯកាទសី. បញ្ចច ទស ច បញ្ចទស, បញ្ចទសន្នំ បូរណី បញ្ចទសី. ចត្តារោ ច ទស ច ចតុទ្ទស, ចតុទ្ទសន្នំ បូរណី ចាតុទ្ទសី.

បូរណេតិ កិមត្ថំ? ឯកាទស, បញ្ចទស.

៣៧៦. , ២៥៧. ទសេ សោ និច្ចញ្ច.

ទសសទ្ទេ បរេ និច្ចំ ឆស្ស សោ ហោតិ.

សោឡស.

៣៧៧. , ០. អន្តេ និគ្គហិតញ្ច.

តាសំ សង្ខ្យានំ អន្តេ និគ្គហិតាគមោ ហោតិ.

បញ្ចទសិ, ចាតុទ្ទសិ.

៣៧៨. , ៤១៤. តិ ច.

តាសំ សង្ខ្យានំ អន្តេ តិការាគមោ ហោតិ. វីសតិ, តិំសតិ.

៣៧៩. , ២៥៨. ល ទរានំ.

ទការ រការានំ សង្ខ្យានំ លការាទេសោ ហោតិ. សោឡស, ចត្តាលីសំ.

៣៨០. , ២៥៥. វីសតិ ទសេសុ ពា ទ្វិស្ស តុ.