៦. អរញ្ញាទិវគ្គ

៦០៥. បព្ពតោ គិរិ សេលោ’ទ្ទិ, នគា’ចល, សិលុច្ចយា;

សិខរី ភូធរោថ ព្ភ, បាសាណា’ស្មោ’បលោ សិលា.

៦០៦. គិជ្ឈកូដោ ច វេភារោ, វេបុល្លោ’សិគិលី នគា;

វិញ្ឈោ បណ្ឌវ វង្កាទី, បុព្ពសេលោ តុ ចោ’ទយោ;

មន្ទរោ បរសេលោ’ត្ថោ, ហិមវា តុ ហិមាចលោ.

៦០៧. គន្ធមាទន កេលាស, ចិត្តកូដ សុទស្សនា;

កាលកូដោ តិកូដា’ស្ស, បត្ថោ តុ សានុ និត្ថិយំ.

៦០៨. កូដោ វា សិខរំ សិង្គំ, បបាតោ តុ តដោ ភវេ;

និតម្ពោ កដកោ និត្ថី, និជ្ឈរោ បសវោ’ម្ពុនោ.

៦០៩. ទរី’ត្ថី កន្ទរោ ទ្វីសុ, លេណំ តុ គព្ភរំ គុហា;

សិលាបោក្ខរណី សោណ្ឌី, កុញ្ជំ និកុញ្ជ មិត្ថិ ន.

៦១០. ឧទ្ធ មធិច្ចកា សេល, ស្សាសន្នា ភូម្យុ បច្ចកា;

បាទោ តុ’បន្តសេលោ ថ,

ធាតុ’ត្តោ គេរិកាទិកោ.

ឥតិ សេលវគ្គោ.

៦១១. មិគិន្ទោ កេសរី សីហោ, តរច្ឆោ តុ មិគាទនោ;

ព្យគ្ឃោ តុ បុណ្ឌរីកោ ថ, សទ្ទូលោ ទីបិនី’រិតោ.

៦១២. អច្ឆោ ឥក្កោ ច ឥស្សោ តុ,

កាឡសីហោ ឥសោ ប្យថ;

រោហិសោ រោហិតោ ចាថ,

គោកណ្ណោ គណិ កណ្ដកា.

៦១៣. ខគ្គ ខគ្គវិសាណា តុ, បលាសាទោ ច គណ្ឌកោ;

ព្យគ្ឃាទិកេ វាឡមិគោ, សាបទោ ថ ប្លវង្គមោ.

៦១៤. មក្កដោ វានរោ សាខា, មិគោ កបិ វលីមុខោ;

បលវង្គោ, កណ្ហតុណ្ឌោ,

គោនង្គុលោ [គោនង្គលោ (ដី.)] តិ សោ មតោ.

៦១៥. សិង្គាលោ [សិគាលោ (សី.)] ជម្ពុកោ កោត្ថុ, ភេរវោ ច សិវា ប្យថ;

ពិឡារោ ពព្ពុ មញ្ជារោ, កោកោ តុ ច វកោ ភវេ.

៦១៦. មហិំសោ [មហិសោ (សី.)] ច លុលាយោ ថ,

គវជោ គវយោ សមា;

សល្លោ តុ សល្លកោ ថា’ស្ស,

លោមម្ហិ សលលំ សលំ.

៦១៧. ហរិណោ មិគ សារង្គា, មគោ អជិនយោនិ ច;

សូករោ តុ វរោហោ ថ,

បេលកោ ច សសោ ភវេ.

៦១៨. ឯណេយ្យោ ឯណីមិគោ ច, បម្បដកោ តុ បម្បកោ;

វាតមិគោ តុ ចលនី, មូសិកោ ត្វា’ខុ ឧន្ទុរោ.

៦១៩. ចមរោ បសទោ ចេវ, កុរុង្គោ មិគមាតុកា;

រុរុ រង្កុ ច នីកោ ច, សរភាទី មិគន្តរា.

៦២០. បិយកោ ចមូរុ កទលី, មិគាទី ចម្មយោនយោ;

មិគា តុ បសវោ សីហា, ទយោ សព្ពចតុប្បទា.

៦២១. លូតា តុ លូតិកា ឧណ្ណ, នាភិ មក្កដកោ សិយា;

វិច្ឆិកោ ត្វា’ឡិ កថិតោ, សរពូ ឃរគោឡិកា.

៦២២. គោធា កុណ្ឌោ ប្យថោ កណ្ណ, ជលូកា សតបទ្យថ;

កលន្ទកោ កាឡកា ថ, នកុលោ មង្គុសោ ភវេ.

៦២៣. កកណ្ដកោ ច សរដោ, កីដោ តុ បុឡវោ កិមិ;

បាណកោ ចាប្យថោ ឧច្ចា,

លិង្គោ លោមសបាណកោ.

៦២៤. វិហង្គោ វិហគោ បក្ខី, វិហង្គម ខគ’ណ្ឌជា;

សកុណោ ច សកុន្តោ វិ, បតង្គោ សកុណី ទ្វិជោ.

៦២៥. វក្កង្គោ បត្តយានោ ច, បតន្តោ នីឡជោ ភវេ;

តព្ភេទា វដ្ដកា ជីវ, ញ្ជីវោ ចកោរ តិត្តិរា.

៦២៦. សាឡិកា ករវីកោ ច, រវិហំសោ កុកុត្ថកោ;

ការណ្ឌវោ ច បិលវោ [ពិលវោ (ដី.)], បោក្ខរសាតកា’ទយោ.

៦២៧. បតត្តំ បេខុណំ បត្តំ, បក្ខោ បិញ្ឆំ ឆទោ គរុ;

អណ្ឌំ តុ បក្ខិពីជេ ថ, នីឡោ និត្ថី កុលាវកំ.

៦២៨. សុបណ្ណមាតា វិនតា, មិថុនំ ថីបុមទ្វយំ;

យុគំ តុ យុគលំ ទ្វន្ទំ, យមកំ យមលំ យមំ.

៦២៩. សមូហោ គណ សង្ឃាតា, សមុទាយោ ច សញ្ចយោ;

សន្ទោហោ និវហោ ឱឃោ, វិសរោ និករោ ចយោ.

៦៣០. កាយោ ខន្ធោ សមុទយោ, ឃដា សមិតិ សំហតិ;

រាសិ បុញ្ជោ សមវាយោ, បូគោ ជាតំ កទម្ពកំ.

៦៣១. ព្យូហោ វិតាន គុម្ពា ច, កលាបោ ជាល មណ្ឌលំ;

សមានានំ គណោ វគ្គោ,

សង្ឃោ សត្ថោ តុ ជន្តុនំ.

៦៣២. សជាតិកានំ តុ កុលំ, និកាយោ តុ សធម្មិនំ;

យូថោ និត្ថី សជាតិយ, តិរច្ឆានានមុច្ចតេ.

៦៣៣. សុបណ្ណោ វេនតេយ្យោ ច, គរុឡោ វិហគាធិបោ;

បរបុដ្ឋោ បរភតោ, កុណាលោ កោកិលោ បិកោ.

៦៣៤. មោរោ មយូរោ វរហី, នីលគីវ សិខណ្ឌិនោ;

កលាបី ច សិខី កេកី, ចូឡា តុ ច សិខា ភវេ.

៦៣៥. សិខណ្ឌោ វរហញ្ចេវ, កលាបោ បិញ្ឆ មប្យថ;

ចន្ទកោ មេចកោ ចាថ, ឆប្បទោ ច មធុព្ពតោ.

៦៣៦. មធុលីហោ មធុករោ, មធុបោ ភមរោ អលិ;

បារាវតោ កបោតោ ច, កកុដោ ច បារេវតោ.

៦៣៧. គិជ្ឈោ គទ្ធោថ កុលលោ, សេនោ ព្យគ្ឃីនសោ ប្យថ;

តព្ភេទា សកុណគ្ឃិ’ត្ថី, អាដោ ទព្ពិមុខទ្វិជោ.

៦៣៨. ឧហុង្ការោ ឧលូកោ ច, កោសិយោ វាយសារិ ច;

កាកោ ត្វ’រិដ្ឋោ ធង្កោ ច, ពលិបុដ្ឋោ ច វាយសោ.

៦៣៩. កាកោលោ វនកាកោ ថ,

លាបោ លដុកិកា ប្យថ;

វារណោ ហត្ថិលិង្គោ ច, ហត្ថិសោណ្ឌវិហង្គមោ.

៦៤០. ឧក្កុសោ កុររោ កោល,ដ្ឋិបក្ខិម្ហិ ច កុក្កុហោ;

សុវោ តុ កីរោ ច សុកោ, តម្ពចូឡោ តុ កុក្កុដោ.

៦៤១. វនកុក្កុដោ ច និជ្ជិវ្ហោ, អថ កោញ្ចា ច កុន្តនី;

ចក្កវាកោ តុ ចក្កវ្ហោ, សារង្គោតុ ច ចាតកោ.

៦៤២. តុលិយោ បក្ខិពិឡាលោ,

សតបត្តោ តុ សារសោ;

ពកោ តុ សុក្កកាកោថ,

ពលាកា វិសកណ្ឋិកា.

៦៤៣. លោហបិដ្ឋោ តថា កង្កោ, ខញ្ជរីដោ តុ ខញ្ជនោ;

កលវិង្កោ តុ ចាដកោ, ទិន្ទិភោ តុ កិកី ភវេ.

៦៤៤. កាទម្ពោ កាឡហំសោថ, សកុន្តោ ភាសបក្ខិនិ;

ធូម្យាដោ តុ កលិង្គោថ,

ទាត្យូហោ កាឡកណ្ឋកោ.

៦៤៥. ខុទ្ទាទី មក្ខិកាភេទា, ឌំសោ បិង្គលមក្ខិកា;

អាសាដិកា មក្ខិកាណ្ឌំ, បតង្គោ សលភោ ភវេ.

៦៤៦. សូចិមុខោ ច មកសោ, ចីរី តុ ឈល្លិកា [ឈិល្លិកា (ក.)] ថ ច;

ជតុកា ជិនបត្តា ថ, ហំសោ សេតច្ឆទោ ភវេ.

៦៤៧. តេ រាជហំសា រត្តេហិ, បាទតុណ្ឌេហិ ភាសិតា;

មល្លិកា’ខ្យា ធតរដ្ឋា, មលីនេហ្យ’សិតេហិ ច.

៦៤៨. តិរច្ឆោ តុ តិរច្ឆានោ, តិរច្ឆានគតោ សិយាតិ.

ឥតិ អរញ្ញាទិវគ្គោ.