២. បុរវគ្គ

១៩៨. បុរំ នគរ មិត្ថី វា, ឋានីយំ បុដភេទនំ;

ថិយំ តុ រាជធានី [រាជឋានី (ដី.)] ច, ខន្ធាវារោ ភវេ ថ ច.

១៩៩. សាខានគរ មញ្ញត្រ, យំ តំ មូលបុរា បុរំ;

ពារាណសី ច សាវត្ថិ, វេសាលី មិថិលា, ឡវី.

២០០. កោសម្ពុ, ជ្ជេនិយោ តក្ក, សិលា ចម្បា ច សាគលំ;

សុសុមារគិរំ [សំសុមារ (ដីកា)] រាជ, គហំ កបិលវត្ថុ ច.

២០១. សាកេត, មិន្ទបត្ថញ្ចោ, ក្កដ្ឋា បាដលិបុត្តកំ;

ជេតុត្តរញ្ច សង្កស្សំ, កុសិនារាទយោ បុរី.

២០២. រច្ឆា ច វិសិខា វុត្តា, រថិកា វីថិ ចាប្យថ;

ព្យូហោ រច្ឆា អនិព្ពិទ្ធា, និព្ពិទ្ធា តុ បថទ្ធិ ច.

២០៣. ចតុក្កំ ចច្ចរេ មគ្គ, សន្ធិ សិង្ឃាដកំ ភវេ;

បាការោ វរណោ ចាថ, ឧទាបោ [ឧទ្ទាប, ឧទ្ទាប] ឧបការិកា.

២០៤. កុដ្ដំ តុ ភិត្តិ នារី ថ, គោបុរំ ទ្វារកោដ្ឋកោ;

ឯសិកា ឥន្ទខីលោ ច, អដ្ដោ ត្វដ្ដាលកោ ភវេ.

២០៥. តោរណំ តុ ពហិទ្វារំ, បរិខាតុ ច ទីឃិកា;

មន្ទិរំ សទនា, គារំ, និកាយោ និលយា, លយោ.

២០៦. អាវាសោ ភវនំ វេស្មំ, និកេតនំ និវេសនំ;

ឃរំ គហញ្ចា, វសថោ, សរណញ្ច បតិស្សយោ.

២០៧. ឱកំ សាលា ខយោ វាសោ, ថិយំ កុដិ វសត្យ’បិ;

គេហញ្ចា, និត្ថិ សទុមំ, ចេតិយា, យតនានិ តុ.

២០៨. បាសាទោ ចេវ យូបោ ថ, មុណ្ឌច្ឆទោ ច ហម្មិយំ;

យូបោតុ គជកុម្ភម្ហិ, ហត្ថិនខោ បតិដ្ឋិតោ.

២០៩. សុបណ្ណវង្កច្ឆទន, មឌ្ឍយោគោ សិយា ថ ច;

ឯកកូដយុតោ មាឡោ,

បាសាទោ ចតុរស្សកោ.

២១០. សភាយញ្ច សភា ចាថ, មណ្ឌបំ វា ជនាលយោ;

អថោ អាសនសាលាយំ, បដិក្កមន មីរិតំ.

២១១. ជិនស្ស វាសភវន, មិត្ថី គន្ធកុដិ ប្យថ;

ថិយំ រសវតី បាក, ដ្ឋានញ្ចេវ មហានសំ.

២១២. អាវេសនំ សិប្បសាលា, សោណ្ឌា តុ បានមន្ទិរំ;

វច្ចដ្ឋានំ វច្ចកុដិ, មុនីនំ ឋាន មស្សមោ.

២១៣. បណ្យវិក្កយសាលា កុ, អាបណោ បណ្យវីថិកា;

ឧទោសិតោ ភណ្ឌសាលា, ចង្កមនំ តុ ចង្កមោ.

២១៤. ជន្តាឃរំ ត្វគ្គិសាលា, បបា បានីយសាលិកា;

គព្ភោ ឱវរកោ វាសា, គារំ តុ សយនិគ្គហំ.

២១៥. ឥត្ថាគារំ តុ ឱរោធោ, សុទ្ធន្តោ’ ន្តេបុរម្បិ ច;

អសព្ពវិសយដ្ឋានំ, រញ្ញំ កច្ឆន្តរំ មតំ.

២១៦. សោបានោ វា’រោហណញ្ច,

និស្សេណី សា, ធិរោហិណី;

វាតបានំ គវក្ខោ ច, ជាលញ្ច សីហបញ្ជរំ.

២១៧. អាលោកសន្ធិ វុត្តោ ថ, លង្គី’ត្ថី បលិឃោ ភវេ;

កបិសីសោ, គ្គលត្ថម្ភោ, និព្ពំ តុ ឆទ្ទកោដិយំ.

២១៨. ឆទនំ បដលំ ឆទ្ទ, មជិរំ ចច្ចរោ, ង្គណំ;

បឃានោ បឃនា, លិន្ទោ, បមុខំ ទ្វារពន្ធនំ.

២១៩. បិដ្ឋសង្ឃាដកំ ទ្វារ, ពាហា កូដំ តុ កណ្ណិកា;

ទ្វារញ្ច បដិហារោ ថ, ឧម្មារោ ទេហនី, ត្ថិយំ.

២២០. ឯឡកោ ឥន្ទខីលោ ថ, ថម្ភោ ថូណោ បុមិត្ថិយំ;

បាដិកា, ឌ្ឍេន្ទុបាសាណេ, គិញ្ជកា តុ ច ឥដ្ឋកា.

២២១. វលភិច្ឆាទិទារុម្ហិ, វង្កេ គោបានសី, ត្ថិយំ;

កបោតបាលិកាយំ តុ, វិដង្កោ និត្ថិយំ ភវេ.

២២២. កុញ្ចិកាវិវរំ តាឡ, ច្ឆិគ្គលោ ប្យថ កុញ្ចិកា;

តាឡោ’វាបុរណំ ចាថ, វេទិកា វេទិ កថ្យតេ.

២២៣. សង្ឃាតោ បក្ខបាសោ ច, មន្ទិរង្គា តុលា អបិ;

ថិយំ សម្មុជ្ជនី ចេវ, សម្មជ្ជនី ច សោធនី.

២២៤. សង្កដីរំ តុ សង្ការ, ដ្ឋានំ សង្ការកូដកំ;

អថោ កចវរោ, ក្លាបោ, សង្ការោ ច កសម្ពុបិ.

២២៥. ឃរាទិភូមិ តំ វត្ថុ, គាមោ សំវសថោ ថ សោ;

បាកដោ និគមោ ភោគ, មច្ចាទិភ្យោ ធិ តូទិតោ [‘អធិភូ’តិ ឦរិតោ កថិតោ (ដី.)].

២២៦. សីមា ច មរិយាទា ថ,

ឃោសោ គោបាលគាមកោតិ.

បុរវគ្គោ និដ្ឋិតោ.