៨. ទេវាសុរសង្គាមសុត្តំ

៣៩. ‘‘ភូតបុព្ពំ, ភិក្ខវេ, ទេវាសុរសង្គាមោ សមុបព្យូឡ្ហោ [សមុបព្ពូឡ្ហោ (សី. បី.)] អហោសិ. តស្មិំ ខោ បន, ភិក្ខវេ, សង្គាមេ អសុរា ជិនិំសុ, ទេវា បរាជយិំសុ [បរាជិយិំសុ (សី. ស្យា. ក.)]. បរាជិតា ច, ភិក្ខវេ, ទេវា [ទេវា ភីតា (បី.)] អបយិំសុយេវ [អបយំស្វេវ (សី.)] ឧត្តរេនាភិមុខា, អភិយិំសុ [អភិយំសុ (សី.)] អសុរា. អថ ខោ, ភិក្ខវេ, ទេវានំ ឯតទហោសិ – ‘អភិយន្តេវ ខោ អសុរា. យំនូន មយំ ទុតិយម្បិ អសុរេហិ សង្គាមេយ្យាមា’តិ. ទុតិយម្បិ ខោ, ភិក្ខវេ, ទេវា អសុរេហិ សង្គាមេសុំ. ទុតិយម្បិ ខោ, ភិក្ខវេ, អសុរាវ ជិនិំសុ, ទេវា បរាជយិំសុ. បរាជិតា ច, ភិក្ខវេ, ទេវា អបយិំសុយេវ ឧត្តរេនាភិមុខា, អភិយិំសុ អសុរា’’.

អថ ខោ, ភិក្ខវេ, ទេវានំ ឯតទហោសិ – ‘អភិយន្តេវ ខោ អសុរា. យំនូន មយំ តតិយម្បិ អសុរេហិ សង្គាមេយ្យាមា’តិ. តតិយម្បិ ខោ, ភិក្ខវេ, ទេវា អសុរេហិ សង្គាមេសុំ. តតិយម្បិ ខោ, ភិក្ខវេ, អសុរាវ ជិនិំសុ, ទេវា បរាជយិំសុ. បរាជិតា ច, ភិក្ខវេ, ទេវា ភីតា ទេវបុរំយេវ បវិសិំសុ. ទេវបុរគតានញ្ច បន [បុន (ក.)], ភិក្ខវេ, ទេវានំ ឯតទហោសិ – ‘ភីរុត្តានគតេន ខោ ទានិ មយំ ឯតរហិ អត្តនា វិហរាម អករណីយា អសុរេហី’តិ. អសុរានម្បិ, ភិក្ខវេ, ឯតទហោសិ – ‘ភីរុត្តានគតេន ខោ ទានិ ទេវា ឯតរហិ អត្តនា វិហរន្តិ អករណីយា អម្ហេហី’តិ.

‘‘ភូតបុព្ពំ, ភិក្ខវេ, ទេវាសុរសង្គាមោ សមុបព្យូឡ្ហោ អហោសិ. តស្មិំ ខោ បន, ភិក្ខវេ, សង្គាមេ ទេវា ជិនិំសុ, អសុរា បរាជយិំសុ. បរាជិតា ច, ភិក្ខវេ, អសុរា អបយិំសុយេវ ទក្ខិណេនាភិមុខា, អភិយិំសុ ទេវា. អថ ខោ, ភិក្ខវេ, អសុរានំ ឯតទហោសិ – ‘អភិយន្តេវ ខោ ទេវា. យំនូន មយំ ទុតិយម្បិ ទេវេហិ សង្គាមេយ្យាមា’តិ. ទុតិយម្បិ ខោ, ភិក្ខវេ, អសុរា ទេវេហិ សង្គាមេសុំ. ទុតិយម្បិ ខោ, ភិក្ខវេ, ទេវា ជិនិំសុ, អសុរា បរាជយិំសុ. បរាជិតា ច, ភិក្ខវេ, អសុរា អបយិំសុយេវ ទក្ខិណេនាភិមុខា, អភិយិំសុ ទេវា’’.

អថ ខោ, ភិក្ខវេ, អសុរានំ ឯតទហោសិ – ‘អភិយន្តេវ ខោ ទេវា. យំនូន មយំ តតិយម្បិ ទេវេហិ សង្គាមេយ្យាមា’តិ. តតិយម្បិ ខោ, ភិក្ខវេ, អសុរា ទេវេហិ សង្គាមេសុំ. តតិយម្បិ ខោ, ភិក្ខវេ, ទេវា ជិនិំសុ, អសុរា បរាជយិំសុ. បរាជិតា ច, ភិក្ខវេ, អសុរា ភីតា អសុរបុរំយេវ បវិសិំសុ. អសុរបុរគតានញ្ច បន, ភិក្ខវេ, អសុរានំ ឯតទហោសិ – ‘ភីរុត្តានគតេន ខោ ទានិ មយំ ឯតរហិ អត្តនា វិហរាម អករណីយា ទេវេហី’តិ. ទេវានម្បិ, ភិក្ខវេ, ឯតទហោសិ – ‘ភីរុត្តានគតេន ខោ ទានិ អសុរា ឯតរហិ អត្តនា វិហរន្តិ អករណីយា អម្ហេហី’តិ.

‘‘ឯវមេវំ ខោ, ភិក្ខវេ, យស្មិំ សមយេ ភិក្ខុ វិវិច្ចេវ កាមេហិ វិវិច្ច អកុសលេហិ ធម្មេហិ សវិតក្កំ សវិចារំ វិវេកជំ បីតិសុខំ បឋមំ ឈានំ ឧបសម្បជ្ជ វិហរតិ, តស្មិំ, ភិក្ខវេ, សមយេ ភិក្ខុស្ស ឯវំ ហោតិ – ‘ភីរុត្តានគតេន ខោ ទានាហំ ឯតរហិ អត្តនា វិហរាមិ អករណីយោ មារស្សា’តិ. មារស្សាបិ, ភិក្ខវេ, បាបិមតោ ឯវំ ហោតិ – ‘ភីរុត្តានគតេន ខោ ទានិ ភិក្ខុ ឯតរហិ អត្តនា វិហរតិ អករណីយោ មយ្ហ’’’ន្តិ.

‘‘យស្មិំ, ភិក្ខវេ, សមយេ ភិក្ខុ វិតក្កវិចារានំ វូបសមា…បេ… ទុតិយំ ឈានំ… តតិយំ ឈានំ… ចតុត្ថំ ឈានំ ឧបសម្បជ្ជ វិហរតិ, តស្មិំ, ភិក្ខវេ, សមយេ ភិក្ខុស្ស ឯវំ ហោតិ – ‘ភីរុត្តានគតេន ខោ ទានាហំ ឯតរហិ អត្តនា វិហរាមិ អករណីយោ មារស្សា’តិ. មារស្សាបិ, ភិក្ខវេ, បាបិមតោ ឯវំ ហោតិ – ‘ភីរុត្តានគតេន ខោ ទានិ ភិក្ខុ ឯតរហិ អត្តនា វិហរតិ, អករណីយោ មយ្ហ’’’ន្តិ.

‘‘យស្មិំ, ភិក្ខវេ, សមយេ ភិក្ខុ សព្ពសោ រូបសញ្ញានំ សមតិក្កមា បដិឃសញ្ញានំ អត្ថង្គមា នានត្តសញ្ញានំ អមនសិការា ‘អនន្តោ អាកាសោ’តិ អាកាសានញ្ចាយតនំ ឧបសម្បជ្ជ វិហរតិ. អយំ វុច្ចតិ, ភិក្ខវេ, ‘ភិក្ខុ អន្តមកាសិ មារំ, អបទំ វធិត្វា មារចក្ខុំ អទស្សនំ គតោ បាបិមតោ តិណ្ណោ លោកេ វិសត្តិក’’’ន្តិ.

‘‘យស្មិំ, ភិក្ខវេ, សមយេ ភិក្ខុ សព្ពសោ អាកាសានញ្ចាយតនំ សមតិក្កម្ម ‘អនន្តំ វិញ្ញាណ’ន្តិ វិញ្ញាណញ្ចាយតនំ ឧបសម្បជ្ជ វិហរតិ… សព្ពសោ វិញ្ញាណញ្ចាយតនំ សមតិក្កម្ម ‘នត្ថិ កិញ្ចី’តិ អាកិញ្ចញ្ញាយតនំ ឧបសម្បជ្ជ វិហរតិ… សព្ពសោ អាកិញ្ចញ្ញាយតនំ សមតិក្កម្ម នេវសញ្ញានាសញ្ញាយតនំ ឧបសម្បជ្ជ វិហរតិ… សព្ពសោ នេវសញ្ញានាសញ្ញាយតនំ សមតិក្កម្ម សញ្ញាវេទយិតនិរោធំ ឧបសម្បជ្ជ វិហរតិ, បញ្ញាយ ចស្ស ទិស្វា អាសវា បរិក្ខីណា ហោន្តិ. អយំ វុច្ចតិ, ភិក្ខវេ, ‘ភិក្ខុ អន្តមកាសិ មារំ, អបទំ វធិត្វា មារចក្ខុំ អទស្សនំ គតោ បាបិមតោ តិណ្ណោ លោកេ វិសត្តិក’’’ន្តិ. អដ្ឋមំ.