៥. បញ្ញាសុត្តំ

២៥. ‘‘យតោ ខោ, ភិក្ខវេ, ភិក្ខុនោ បញ្ញាយ ចិត្តំ សុបរិចិតំ ហោតិ, តស្សេតំ, ភិក្ខវេ, ភិក្ខុនោ កល្លំ វចនាយ – ‘ខីណា ជាតិ, វុសិតំ ព្រហ្មចរិយំ, កតំ ករណីយំ, នាបរំ ឥត្ថត្តាយាតិ បជានាមី’’’តិ.

‘‘កថញ្ច, ភិក្ខវេ, ភិក្ខុនោ បញ្ញាយ ចិត្តំ សុបរិចិតំ ហោតិ? ‘វីតរាគំ មេ ចិត្ត’ន្តិ បញ្ញាយ ចិត្តំ សុបរិចិតំ ហោតិ; ‘វីតទោសំ មេ ចិត្ត’ន្តិ បញ្ញាយ ចិត្តំ សុបរិចិតំ ហោតិ; ‘វីតមោហំ មេ ចិត្ត’ន្តិ បញ្ញាយ ចិត្តំ សុបរិចិតំ ហោតិ; ‘អសរាគធម្មំ មេ ចិត្ត’ន្តិ បញ្ញាយ ចិត្តំ សុបរិចិតំ ហោតិ; ‘អសទោសធម្មំ មេ ចិត្ត’ន្តិ បញ្ញាយ ចិត្តំ សុបរិចិតំ ហោតិ; ‘អសមោហធម្មំ មេ ចិត្ត’ន្តិ បញ្ញាយ ចិត្តំ សុបរិចិតំ ហោតិ; ‘អនាវត្តិធម្មំ មេ ចិត្តំ កាមភវាយា’តិ បញ្ញាយ ចិត្តំ សុបរិចិតំ ហោតិ; ‘អនាវត្តិធម្មំ មេ ចិត្តំ រូបភវាយា’តិ បញ្ញាយ ចិត្តំ សុបរិចិតំ ហោតិ; ‘អនាវត្តិធម្មំ មេ ចិត្តំ អរូបភវាយា’តិ បញ្ញាយ ចិត្តំ សុបរិចិតំ ហោតិ. យតោ ខោ, ភិក្ខវេ, ភិក្ខុនោ បញ្ញាយ ចិត្តំ សុបរិចិតំ ហោតិ, តស្សេតំ, ភិក្ខវេ, ភិក្ខុនោ កល្លំ វចនាយ – ‘ខីណា ជាតិ, វុសិតំ ព្រហ្មចរិយំ, កតំ ករណីយំ, នាបរំ ឥត្ថត្តាយាតិ បជានាមី’’’តិ. បញ្ចមំ.