៥. ពលសុត្តំ

៥. ‘‘ចត្តារិមានិ, ភិក្ខវេ, ពលានិ. កតមានិ ចត្តារិ? បញ្ញាពលំ, វីរិយពលំ, អនវជ្ជពលំ, សង្គាហពលំ. កតមញ្ច, ភិក្ខវេ, បញ្ញាពលំ? យេ ធម្មា កុសលា កុសលសង្ខាតា យេ ធម្មា អកុសលា អកុសលសង្ខាតា យេ ធម្មា សាវជ្ជា សាវជ្ជសង្ខាតា យេ ធម្មា អនវជ្ជា អនវជ្ជសង្ខាតា យេ ធម្មា កណ្ហា កណ្ហសង្ខាតា យេ ធម្មា សុក្កា សុក្កសង្ខាតា យេ ធម្មា សេវិតព្ពា សេវិតព្ពសង្ខាតា យេ ធម្មា អសេវិតព្ពា អសេវិតព្ពសង្ខាតា យេ ធម្មា នាលមរិយា នាលមរិយសង្ខាតា យេ ធម្មា អលមរិយា អលមរិយសង្ខាតា, ត្យាស្ស ធម្មា បញ្ញាយ វោទិដ្ឋា ហោន្តិ វោចរិតា. ឥទំ វុច្ចតិ, ភិក្ខវេ, បញ្ញាពលំ.

‘‘កតមញ្ច, ភិក្ខវេ, វីរិយពលំ? យេ ធម្មា អកុសលា អកុសលសង្ខាតា យេ ធម្មា សាវជ្ជា សាវជ្ជសង្ខាតា យេ ធម្មា កណ្ហា កណ្ហសង្ខាតា យេ ធម្មា អសេវិតព្ពា អសេវិតព្ពសង្ខាតា យេ ធម្មា នាលមរិយា នាលមរិយសង្ខាតា, តេសំ ធម្មានំ បហានាយ ឆន្ទំ ជនេតិ វាយមតិ វីរិយំ អារភតិ ចិត្តំ បគ្គណ្ហាតិ បទហតិ. យេ ធម្មា កុសលា កុសលសង្ខាតា យេ ធម្មា អនវជ្ជា អនវជ្ជសង្ខាតា យេ ធម្មា សុក្កា សុក្កសង្ខាតា យេ ធម្មា សេវិតព្ពា សេវិតព្ពសង្ខាតា យេ ធម្មា អលមរិយា អលមរិយសង្ខាតា, តេសំ ធម្មានំ បដិលាភាយ ឆន្ទំ ជនេតិ វាយមតិ វីរិយំ អារភតិ ចិត្តំ បគ្គណ្ហាតិ បទហតិ. ឥទំ វុច្ចតិ, ភិក្ខវេ, វីរិយពលំ.

‘‘កតមញ្ច, ភិក្ខវេ, អនវជ្ជពលំ? ឥធ, ភិក្ខវេ, អរិយសាវកោ អនវជ្ជេន កាយកម្មេន សមន្នាគតោ ហោតិ, អនវជ្ជេន វចីកម្មេន សមន្នាគតោ ហោតិ, អនវជ្ជេន មនោកម្មេន សមន្នាគតោ ហោតិ. ឥទំ វុច្ចតិ, ភិក្ខវេ, អនវជ្ជពលំ.

‘‘កតមញ្ច, ភិក្ខវេ, សង្គាហពលំ? ចត្តារិមានិ, ភិក្ខវេ, សង្គហវត្ថូនិ – ទានំ, បេយ្យវជ្ជំ, អត្ថចរិយា, សមានត្តតា. ឯតទគ្គំ, ភិក្ខវេ, ទានានំ យទិទំ ធម្មទានំ. ឯតទគ្គំ, ភិក្ខវេ, បេយ្យវជ្ជានំ យទិទំ អត្ថិកស្ស ឱហិតសោតស្ស បុនប្បុនំ ធម្មំ ទេសេតិ. ឯតទគ្គំ, ភិក្ខវេ, អត្ថចរិយានំ យទិទំ អស្សទ្ធំ សទ្ធាសម្បទាយ សមាទបេតិ និវេសេតិ បតិដ្ឋាបេតិ, ទុស្សីលំ សីលសម្បទាយ… បេ… មច្ឆរិំ ចាគសម្បទាយ…បេ… ទុប្បញ្ញំ បញ្ញាសម្បទាយ សមាទបេតិ និវេសេតិ បតិដ្ឋាបេតិ. ឯតទគ្គំ, ភិក្ខវេ, សមានត្តតានំ យទិទំ សោតាបន្នោ សោតាបន្នស្ស សមានត្តោ, សកទាគាមី សកទាគាមិស្ស សមានត្តោ, អនាគាមី អនាគាមិស្ស សមានត្តោ, អរហា អរហតោ សមានត្តោ. ឥទំ វុច្ចតិ, ភិក្ខវេ, សង្គាហពលំ. ឥមានិ ខោ, ភិក្ខវេ, ចត្តារិ ពលានិ.

‘‘ឥមេហិ ខោ, ភិក្ខវេ, ចតូហិ ពលេហិ សមន្នាគតោ អរិយសាវកោ បញ្ច ភយានិ សមតិក្កន្តោ ហោតិ. កតមានិ បញ្ច? អាជីវិកភយំ, អសិលោកភយំ, បរិសសារជ្ជភយំ, មរណភយំ, ទុគ្គតិភយំ. ស ខោ សោ, ភិក្ខវេ, អរិយសាវកោ ឥតិ បដិសញ្ចិក្ខតិ – ‘នាហំ អាជីវិកភយស្ស ភាយាមិ. កិស្សាហំ អាជីវិកភយស្ស ភាយិស្សាមិ? អត្ថិ មេ ចត្តារិ ពលានិ – បញ្ញាពលំ, វីរិយពលំ, អនវជ្ជពលំ, សង្គាហពលំ. ទុប្បញ្ញោ ខោ អាជីវិកភយស្ស ភាយេយ្យ. កុសីតោ អាជីវិកភយស្ស ភាយេយ្យ. សាវជ្ជកាយកម្មន្តវចីកម្មន្តមនោកម្មន្តោ អាជីវិកភយស្ស ភាយេយ្យ. អសង្គាហកោ អាជីវិកភយស្ស ភាយេយ្យ. នាហំ អសិលោកភយស្ស ភាយាមិ…បេ… នាហំ បរិសសារជ្ជភយស្ស ភាយាមិ…បេ… នាហំ មរណភយស្ស ភាយាមិ…បេ… នាហំ ទុគ្គតិភយស្ស ភាយាមិ. កិស្សាហំ ទុគ្គតិភយស្ស ភាយិស្សាមិ? អត្ថិ មេ ចត្តារិ ពលានិ – បញ្ញាពលំ, វីរិយពលំ, អនវជ្ជពលំ, សង្គាហពលំ. ទុប្បញ្ញោ ខោ ទុគ្គតិភយស្ស ភាយេយ្យ. កុសីតោ ទុគ្គតិភយស្ស ភាយេយ្យ. សាវជ្ជកាយកម្មន្តវចីកម្មន្តមនោកម្មន្តោ ទុគ្គតិភយស្ស ភាយេយ្យ. អសង្គាហកោ ទុគ្គតិភយស្ស ភាយេយ្យ. ឥមេហិ ខោ, ភិក្ខវេ, ចតូហិ ពលេហិ សមន្នាគតោ អរិយសាវកោ ឥមានិ បញ្ច ភយានិ សមតិក្កន្តោ ហោតី’’តិ. បញ្ចមំ.