៥. សមណសុត្តំ

៨៥. ‘‘‘សមណោ’តិ, ភិក្ខវេ, តថាគតស្សេតំ អធិវចនំ អរហតោ សម្មាសម្ពុទ្ធស្ស. ‘ព្រាហ្មណោ’តិ, ភិក្ខវេ, តថាគតស្សេតំ អធិវចនំ អរហតោ សម្មាសម្ពុទ្ធស្ស. ‘វេទគូ’តិ, ភិក្ខវេ, តថាគតស្សេតំ អធិវចនំ អរហតោ សម្មាសម្ពុទ្ធស្ស. ‘ភិសក្កោ’តិ, ភិក្ខវេ, តថាគតស្សេតំ អធិវចនំ អរហតោ សម្មាសម្ពុទ្ធស្ស. ‘និម្មលោ’តិ, ភិក្ខវេ, តថាគតស្សេតំ អធិវចនំ អរហតោ សម្មាសម្ពុទ្ធស្ស. ‘វិមលោ’តិ, ភិក្ខវេ, តថាគតស្សេតំ អធិវចនំ អរហតោ សម្មាសម្ពុទ្ធស្ស. ‘ញាណី’តិ, ភិក្ខវេ, តថាគតស្សេតំ អធិវចនំ អរហតោ សម្មាសម្ពុទ្ធស្ស. ‘វិមុត្តោ’តិ, ភិក្ខវេ, តថាគតស្សេតំ អធិវចនំ អរហតោ សម្មាសម្ពុទ្ធស្សា’’តិ.

‘‘យំ សមណេន បត្តព្ពំ, ព្រាហ្មណេន វុសីមតា;

យំ វេទគុនា បត្តព្ពំ, ភិសក្កេន អនុត្តរំ.

‘‘យំ និម្មលេន បត្តព្ពំ, វិមលេន សុចីមតា;

យំ ញាណិនា ច បត្តព្ពំ, វិមុត្តេន អនុត្តរំ.

‘‘សោហំ វិជិតសង្គាមោ, មុត្តោ មោចេមិ ពន្ធនា;

នាគោម្ហិ បរមទន្តោ, អសេខោ បរិនិព្ពុតោ’’តិ. បញ្ចមំ;