៣. សំខិត្តសុត្តំ

៥៣. [ចូឡវ. ៤០៦] ឯកំ សមយំ ភគវា វេសាលិយំ វិហរតិ មហាវនេ កូដាគារសាលាយំ. អថ ខោ មហាបជាបតី គោតមី យេន ភគវា តេនុបសង្កមិ; ឧបសង្កមិត្វា ភគវន្តំ អភិវាទេត្វា ឯកមន្តំ អដ្ឋាសិ. ឯកមន្តំ ឋិតា ខោ សា មហាបជាបតី គោតមី ភគវន្តំ ឯតទវោច –

‘‘សាធុ មេ, ភន្តេ, ភគវា សំខិត្តេន ធម្មំ ទេសេតុ, យមហំ ភគវតោ ធម្មំ សុត្វា ឯកា វូបកដ្ឋា អប្បមត្តា អាតាបិនី បហិតត្តា វិហរេយ្យ’’ន្តិ. ‘‘យេ ខោ ត្វំ, គោតមិ, ធម្មេ ជានេយ្យាសិ – ‘ឥមេ ធម្មា សរាគាយ សំវត្តន្តិ, នោ វិរាគាយ; សំយោគាយ សំវត្តន្តិ, នោ វិសំយោគាយ; អាចយាយ សំវត្តន្តិ, នោ អបចយាយ; មហិច្ឆតាយ សំវត្តន្តិ, នោ អប្បិច្ឆតាយ; អសន្តុដ្ឋិយា សំវត្តន្តិ, នោ សន្តុដ្ឋិយា; សង្គណិកាយ សំវត្តន្តិ, នោ បវិវេកាយ; កោសជ្ជាយ សំវត្តន្តិ, នោ វីរិយារម្ភាយ; ទុព្ភរតាយ សំវត្តន្តិ, នោ សុភរតាយា’តិ, ឯកំសេន, គោតមិ, ធារេយ្យាសិ – ‘នេសោ ធម្មោ, នេសោ វិនយោ, នេតំ សត្ថុសាសន’’’ន្តិ.

‘‘យេ ច ខោ ត្វំ, គោតមិ, ធម្មេ ជានេយ្យាសិ – ‘ឥមេ ធម្មា វិរាគាយ សំវត្តន្តិ, នោ សរាគាយ; វិសំយោគាយ សំវត្តន្តិ, នោ សំយោគាយ; អបចយាយ សំវត្តន្តិ, នោ អាចយាយ; អប្បិច្ឆតាយ សំវត្តន្តិ, នោ មហិច្ឆតាយ; សន្តុដ្ឋិយា សំវត្តន្តិ, នោ អសន្តុដ្ឋិយា; បវិវេកាយ សំវត្តន្តិ, នោ សង្គណិកាយ; វីរិយារម្ភាយ សំវត្តន្តិ, នោ កោសជ្ជាយ; សុភរតាយ សំវត្តន្តិ, នោ ទុព្ភរតាយា’តិ, ឯកំសេន, គោតមិ, ធារេយ្យាសិ – ‘ឯសោ ធម្មោ, ឯសោ វិនយោ, ឯតំ សត្ថុសាសន’’’ន្តិ. តតិយំ.