៧. សប្បុរិសទានសុត្តំ

៣៧. ‘‘អដ្ឋិមានិ, ភិក្ខវេ, សប្បុរិសទានានិ. កតមានិ អដ្ឋ? សុចិំ ទេតិ, បណីតំ ទេតិ, កាលេន ទេតិ, កប្បិយំ ទេតិ, វិចេយ្យ ទេតិ, អភិណ្ហំ ទេតិ, ទទំ ចិត្តំ បសាទេតិ, ទត្វា អត្តមនោ ហោតិ. ឥមានិ ខោ, ភិក្ខវេ, អដ្ឋ សប្បុរិសទានានី’’តិ.

‘‘សុចិំ បណីតំ កាលេន, កប្បិយំ បានភោជនំ;

អភិណ្ហំ ទទាតិ ទានំ, សុខេត្តេសុ [សុខេត្តេ (សី. បី.)] ព្រហ្មចារិសុ.

‘‘នេវ [ន ច (សី. បី.)] វិប្បដិសារិស្ស, ចជិត្វា អាមិសំ ពហុំ;

ឯវំ ទិន្នានិ ទានានិ, វណ្ណយន្តិ វិបស្សិនោ.

‘‘ឯវំ យជិត្វា មេធាវី, សទ្ធោ មុត្តេន ចេតសា;

អព្យាពជ្ឈំ [អព្យាបជ្ឈំ (ក.) អ. និ. ៤.៤០; ៦.៣៧] សុខំ លោកំ, បណ្ឌិតោ ឧបបជ្ជតី’’តិ. សត្តមំ;